Roˉma‸ li‸ 2
2
Gʼuiˬsha hteˇ lehˍ suhˉ jehˬ ve
1Hkʼe te leh, shu hta‸ venˇbaˆ taˍ ve chaw-oˬ, nawˬ awˬ to ka‸ ca kʼoˆ kuiˬ maˇ cawˬ. Awˬ lawn kʼo, shu hta‸ nawˬ venˇbaˆ taˍ ve hkʼe, nawˬ awˬ to ka‸ te chehˇ ve yoˬ. Hkʼe te leh shu hta‸ venˇbaˆ taˍ ve teˇ yanˇ, nawˬ awˬ to hta‸ ka‸ venˇbaˆ kʼaw‸ taˍ chehˇ ve yoˬ. 2Oˇ hkʼe te ve chaw teˇ hpaˍ hta‸ Gʼuiˬsha ciˍ yanˍ ve lehˬ, hteˇ jaˇ cawˇ jaˇ ve teh‸ ngaˬ hui shiˍ ve yoˬ. 3Shu awˬ hkʼoˆ nawˬ venˇbaˆ taˍ ve hkʼe nawˬ awˬ to ka‸ te chehˇ ve kʼo, Gʼuiˬsha ciˍ yanˍ ve hta‸ nawˬ gʼa ponˬ tuˬ teh‸ dawˇ ve laˇ. 4Gʼuiˬsha yawˇ ve paw sha jaˇ ve awˬ bon te laˇ ve, yeunˇ hkanˍ ve leh, nyi ma dawˇ zuhˬ gaˇ zuhˬ ve teˇ hpaˍ hta‸ nawˬ maˇ shawˍ maˇ caˆ te ve laˇ. Gʼuiˬsha ve awˬ bon lehˬ, nawˬ venˇbaˆ hta‸ dawˇ hpfuhˆ tuˬ sheh kʼai laˇ ve hta‸ nawˬ maˇ shiˍ laˇ. 5Nawˬ nyi ma heh leh venˇbaˆ hta‸ maˇ dawˇ hpfuhˆ ve hta‸ pa taw, Gʼuiˬsha nyi ma zuhˆ ve awˬ nyi teˇ nyi awˬ pon, yawˇ nyi ma zuhˆ ve teˇ ceuˬ hta‸ nawˬ shaw hpoˆ chehˇ taˍ ve yoˬ. Oˇ ve teˇ nyi gaˬ kʼo, Gʼuiˬsha hteˇ lehˍ cawˇ lehˍ tawˇ jehˬ ve hta‸ hkʼa tawˍ lehˆ gʼa mawˬ tuˬ yoˬ. 6Gʼuiˬsha lehˬ, chaw teˇ gʼaˇ le le a shu yawˇ te ve kanˉ hta‸ keunˍ da‸ ve hkʼe yawˇ hui hta‸ piˇ tuˬ yoˬ.#Chi 62:12 7Yeunˇ hkanˍ leh da‸ ve kanˉ te ve awˬ hkʼaw lo, awˬ me‸ awˬ hponˇ, da‸ ve awˬ meh leh, maˇ luˬ maˇ sheˆ puiˉ ve teˇ ceuˬ, chi teˇ hpaˍ hta‸ ca ve chaw hui hta‸ yawˇ co ti‸ ha ti‸ piˇ tuˬ yoˬ. 8Ya‸ hkʼaˇ, tawˇ gʼawˬ da‸ ve, hteˇ ve cawˇ ve tawˇ hkawˇ hta‸ maˇ na yuˬ leh, maˇ hteˇ maˇ cawˇ ve hta‸ na yuˬ ve chaw hui awˬ hkʼoˆ, hehnˇ jaˇ ve nyi ma zuhˆ ve teˇ ceuˬ gaˬ la tuˬ yoˬ. 9Haiˬ ve hta‸ hkʼa te ve chaw hui hkʼa peu-eˬ awˬ hkʼoˆ, tu‸ ve hkanˍ ve leh dawˇ tui‸ gaˇ tui‸ ve gaˬ la tuˬ yoˬ. Awˉ lawˉ Yuˇda‸ chaw hui, hkʼaw‸ nawˉ Heˍlaˍsaˆ chaw hui awˬ hkʼoˆ gaˬ la tuˬ yoˬ. 10Ya‸ hkʼaˇ, da‸ ve hta‸ hkʼa te ve chaw hui hkʼa peu-eˬ lehˬ, awˬ me‸ awˬ hponˇ hta‸ maˇ kʼoˆ, da‸ ve awˬ meh hta‸ maˇ kʼoˆ, dawˇ sha gaˇ sha ve teˇ ceuˬ hta‸ maˇ kʼoˆ, chi teˇ hpaˍ hta‸ gʼa tuˬ yoˬ. Awˉ lawˉ Yuˇda‸ chaw hui, hkʼaw‸ nawˉ Heˍlaˍsaˆ chaw hui gʼa tuˬ yoˬ. 11Awˬ lawn kʼo, Gʼuiˬsha lehˬ chaw mehˆ hpfuhˇ hta‸ maˇ nyi.
12Awˬliˇtawˇhkawˇ maˇ cawˬ leh venˇbaˆ hkʼa te ve chaw hui lehˬ, awˬ liˇ tawˇ hkawˇ hta‸ maˇ caˉ da‸ ve awˬ hkʼaw lo gʼa luˬ gʼa sheˆ tuˬ yoˬ. Awˬliˇtawˇhkawˇ cawˬ taˍ leh venˇbaˆ hkʼa te ve chaw hui lehˬ, awˬ liˇ tawˇ hkawˇ awˬ hawˉ lo tawˇ jehˬ ve hta‸ gʼa hkanˍ tuˬ yoˬ. 13Awˬ lawn kʼo, awˬliˇtawˇhkawˇ hta‸ kaˇ ve chaw hui lehˬ, Gʼuiˬsha mehˆ gʼuˇ suhˍ hteˇ ve cawˇ ve chaw hpeh‸ ve maˇ heˆ. Awˬ liˇ tawˇ hkawˇ hta‸ na yuˬ ve chaw hui ceh, hteˇ ve cawˇ ve chaw hpeh‸ ve yoˬ. 14Awˬliˇtawˇhkawˇ maˇ cawˬ ve buiˇ shaˆ aˉ naˆ chaw hui lehˬ, awˬliˇtawˇhkawˇ maˇ cawˬ ve ka‸ yawˇ hui hkʼaˇ yawˇ hui dawˇ shiˍ leh awˬliˇtawˇhkawˇ kʼoˆ taˍ ve hkʼe te ve kʼo, yawˇ hui ve nyi ma awˬ hkʼaw lo awˬ liˇ tawˇ hkawˇ cawˬ taˍ ve hkʼe yoˬ. 15Yawˇ hui ve nyi ma awˬ hkʼaw lo awˬ liˇ tawˇ hkawˇ kʼoˆ taˍ ve hkʼe bvuh‸ taˍ ve hta‸ ngaˬ hui gʼa mawˬ gʼa shiˍ ve yoˬ. Yawˇ hui ve shiˍ puiˉ ve nyi ma htawˇ shaˉ hkiˆ hkanˍ leh, yawˇ hui ve nyi ma hkʼaw dawˇ hkʼaˇ teˇ hpaˍ lehˬ, venˇbaˆ cawˬ ve teh‸ kʼoˆ ve, maˇ heˆ kʼo venˇbaˆ maˇ cawˬ teh‸ kʼoˆ ve yoˬ. 16Ngaˬ ha lehˬ ve bon hkawˇ maˍ piˇ ve hkʼa shuˍ shuˍ, Gʼuiˬsha lehˬ Yeˍsuˆ Hkri‸ hta‸ cuˇ leh, chaw yaˇ hui nyi ma hkʼaw faˉ taˍ ve teˇ hpaˍ hta‸ tawˇ jehˬ ve awˬ nyi awˬ hkʼaw lo, awˬ ceuˬ chi teˇ hpaˍ hpeh‸ la tuˬ yoˬ.
Yuˇda‸ chaw hui leh awˬ liˇ tawˇ hkawˇ awˬ lawn
17Nawˬ Yuˇda‸ chaw teh‸ kʼoˆ leh, awˬ liˇ tawˇ hkawˇ hta‸ gʼaˇ va leh, Gʼuiˬsha ve awˬ lawn hta‸ nawˬ nyi ma uiˍ chaweh te ve yoˬ. 18Nawˬ awˬliˇtawˇhkawˇ hta‸ gʼa henˇ ve pa taw, Gʼuiˬsha ve a loˍ hta‸ shiˍ ve chaw leh, da‸ jaˇ ve teˇ hpaˍ hta‸ fuiˍ puiˉ pehˬ puiˉ ve chaw hpeh‸ ve teh‸ kʼoˆ ve yoˬ. 19Nawˬ lehˬ mehˆ cuˉ ve chaw hui hta‸ sheh kʼai shehˍ hpaˇ hpeh‸ leh, naˆ ho‸ ve awˬ hkʼaw lo chehˇ ve chaw hui hta‸ awˬ gʼeuˆ ba piˇ shehˍ hpaˇ hpeh‸ ve teh‸ nawˬ yonˍ ve yoˬ. 20Nawˬ lehˬ, maˇ dawˇ nyi puiˉ ve chaw teˇ hpaˍ hta‸ sheh kʼai shehˍ hpaˇ te leh, yaˇ ehˉ teˇ hpaˍ hta‸ maˍ piˇ shehˍ hpaˇ te ve teh‸ nawˬ dawˇ taˍ ve yoˬ. Awˬliˇtawˇhkawˇ awˬ hkʼaw lo cuˇ yiˍ hta‸ maˇ kʼoˆ, hteˇ ve cawˇ ve hta‸ maˇ kʼoˆ, nawˬ cawˬ ve teh‸ dawˇ taˍ ve yoˬ. 21Hkʼe te leh, nawˬ shu hta‸ maˍ piˇ chehˇ ve ka‸, nawˬ awˬ to hta‸ maˇ maˍ leh laˇ. Shu ve mawˇ hta‸ taˇ hkʼawˇ teh‸ nawˬ maˍ piˇ chehˇ ve ka‸, nawˬ awˬ to shu ve mawˇ hta‸ hkʼawˇ ve laˇ. 22Haˉ chawˇ haˉ paˆ taˇ te teh‸ nawˬ maˍ piˇ chehˇ ve ka‸, nawˬ awˬ to haˉ chawˇ haˉ paˆ te ve laˇ. Shaˉ ho‸ hta‸ nawˬ cha‸ naˬ chehˇ ve ka‸, shaˉ ho‸ yehˬ hkʼaw cawˬ ve mawˇ hta‸ nawˬ hkʼawˇ yuˬ ve laˇ. 23Awˬliˇtawˇhkawˇ hta‸ nawˬ gʼaˇ va leh nyi ma uiˍ ve ka‸, awˬliˇtawˇhkawˇ hta‸ nawˬ kʼaw‸ te ya‸ leh Gʼuiˬsha ve awˬ me‸ awˬ hponˇ hta‸ te luˬ ve laˇ. 24Awˬ lawn kʼo, Li‸ hpu hkʼaw bvuh‸ taˍ ve hkʼe, buiˇshaˆaˉnaˆ chaw hui lehˬ, nawˬ hui hta‸ pa taw Gʼuiˬsha ve awˬ meh hta‸ maˇ shawˍ maˇ caˆ kʼoˆ chehˇ ve yoˬ.#Isy 52:5
25Nawˬ awˬliˇtawˇhkawˇ hta‸ na yuˬ ve kʼo, awˬ guiˬ meuˇ shoˍ ve teˇ ceuˬ lehˬ awˬ bon cawˬ ve yoˬ. Ya‸ hkʼaˇ, nawˬ awˬliˇtawˇhkawˇ hta‸ ya‸ ve kʼo, nawˬ awˬ guiˬ meuˇ shoˍ ve lehˬ, awˬ guiˬ meuˇ maˇ shoˍ ve hkʼe kʼaw‸ hpeh‸ la ve yoˬ. 26Hkʼe te leh, awˬ guiˬ meuˇ maˇ shoˍ ve chaw lehˬ, awˬliˇtawˇhkawˇ hta‸ na yuˬ ve kʼo, yawˇ awˬ guiˬ meuˇ maˇ shoˍ ve ka‸, awˬ guiˬ meuˇ shoˍ ve chaw hkʼe hpeh‸ ve maˇ heˆ laˇ. 27Bvuh‸ taˍ ve awˬliˇtawˇhkawˇ leh awˬ guiˬ meuˇ shoˍ ve awˬ liˇ nawˬ cawˬ ve ka‸, nawˬ awˬliˇtawˇhkawˇ hta‸ te ya‸ ve yoˬ. Hkʼe te leh, awˬ suhˍ awˬ shaˍ hpawˇ awˬ guiˬ meuˇ maˇ shoˍ ve ka‸, awˬliˇtawˇhkawˇ hta‸ na yuˬ ve chaw teˇ hpaˍ lehˬ, nawˬ hta‸ venˇ baˆ taˍ laˇ tuˬ maˇ heˆ laˇ. 28Awˬ lawn kʼo, awˬ hta‸ hpawˇ ceh Yuˇda‸ chaw hpeh‸ ve teˇ gʼaˇ lehˬ, awˬ tehˬ awˬ na Yuˇda‸ chaw maˇ heˆ. Awˬ hta‸ hpawˇ ceh awˬ guiˬ meuˇ shoˍ ve teˇ ceuˬ lehˬ, awˬ tehˬ awˬ na awˬ guiˬ meuˇ shoˍ ve teˇ ceuˬ maˇ heˆ. 29Awˬ hkʼaw hpawˇ Yuˇda‸ chaw hpeh‸ ve teˇ gʼaˇ lehˬ, awˬ tehˬ awˬ na Yuˇda‸ chaw hpeh‸ ve yoˬ. Awˬ tehˬ awˬ na awˬ guiˬ meuˇ shoˍ ve teˇ ceuˬ lehˬ, awˬliˇtawˇhkawˇ ve li‸ mehˆ biˇ la tuˬ ceh shoˍ ve maˇ heˆ. Co ha leh nyi ma awˬ hkʼaw shoˍ ve teˇ ceuˬ hpeh‸ ve yoˬ. Oˇ hkʼe ve chaw hta‸ chaw yaˇ maˇ chiˇ mvuh htawˇ Gʼuiˬsha chiˇ mvuh ve yoˬ.
Currently Selected:
Roˉma‸ li‸ 2: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.