Zeˍhpaˍniˆ li‸ 3
3
Yeˍruˆsaˍlehnˍ ve venˇbaˆ
1A shu yawˇ ve chaw ceuˬ hta‸ fawˉ mehˍ leh, cha‸ chiˆ jaˇ ve Yeˍruˆsaˍlehnˍ venˇ lehˬ gʼa luˬ gʼa sheˆ tuˬ yoˬ. 2Yawˇ lehˬ Gʼuiˬsha ve tawˇ hkawˇ hta‸ maˇ na yuˬ leh Gʼuiˬsha hta‸ gʼaˇ maˇ va. 3Venˇ hta‸ uˉ peunˍ chehˇ ve awˬ hoˉ awˬ naˬ teˇ hpaˍ lehˬ, kuˬ toˇ chehˇ ve laˇ caˬ shiˉ hkʼa shuˍ hpeh‸ ve yoˬ. Suhˉ jehˬ shehˍ hpaˇ teˇ hpaˍ htawˇ, meu‸ jehˇ chehˇ ve heh hpuiˇ hkʼa shuˍ hpeh‸ leh awˬ mu‸ ku teˇ maˬ hta‸ ka‸ mvuhˇ htiˇ la htaˇ hkʼa gaˬ teh taˍ maˇ gʼa. 4Tcuh kaˍ paˍ teˇ hpaˍ lehˬ, a shu yawˇ ve kanˉ hta‸ hkʼa deh‸ maˇ te leh, ka ti‸ maˇ yeˬ ve chaw teˇ hpaˍ hpeh‸ ve yoˬ. Paw hkuˇ teˇ hpaˍ htawˇ, da‸ kehˬ ve awˬ ceuˬ hta‸ cha‸ chiˆ tuˬ te leh, Gʼuiˬsha ve awˬliˇtawˇhkawˇ hta‸ yuˬ hpfuhˆ chehˇ ve yoˬ. 5Ya‸ hkʼaˇ, Gʼuiˬsha lehˬ venˇ hkʼaw chehˇ taˍ leh da‸ ve hteˇ ve kanˉ hta‸ ceh tiˉ te chehˇ ve yoˬ. Teˇ shawˉ le le yawˇ lehˬ chaw yaˇ teˇ hpaˍ hta‸ hteˇ ve cawˇ ve hkʼaw suhˉ jehˬ piˇ chehˇ ve yoˬ. Ya‸ hkʼaˇ, maˇ hteˇ maˇ cawˇ ve chaw teˇ hpaˍ lehˬ, cha‸ chiˆ ve kanˉ hta‸ ceh tiˉ te tcuhˉ taˍ leh ya‸ taw hkawˇ maˇ nawˇ ve yoˬ.
6Gʼuiˬsha kʼoˆ ve, Ngaˬ lehˬ chaw yaˇ teˇ hpaˍ leh yawˇ hui ve venˇ yaˇ teˇ hpaˍ hta‸ te luˬ te sheˆ piˇ ve yoˬ. Chaw teˇ gʼaˇ ka‸ venˇ oˇ ve teˇ hpaˍ hkʼaw maˇ kʼaw‸ chehˇ leh, ya‸ kʼaw hkʼoˆ lo gawˬ cu gawˬ pehˆ hpeh‸ la ve yoˬ. 7Ngaˬ oˇ hkʼe te piˇ ve pa taw, ngaˬ ve chaw teˇ hpaˍ ngaˬ hta‸ kawˆ leh, ngaˬ ve tawˇ hta‸ na yuˬ tuˬ yoˬ. Ngaˬ yawˇ hui hta‸ maˍ piˇ taˍ ve tawˇ hta‸ yawˇ hui maˇ leunˇ taˬ, teh‸ ngaˬ dawˇ taˍ ve yoˬ. Ya‸ hkʼaˇ, yawˇ hui lehˬ ponˬ laˬ htaˇ hkʼe kʼaw‸ haiˬ chehˇ sheˍ ve yoˬ.
8Chi hta‸ pa taw, ngaˬ hta‸ law taˍ-o‸. Ngaˬ tu leh awˬ nu ve mvuhˇmiˬ teˇ hpaˍ hta‸ ciˍ yanˍ piˇ tuˬ ve awˬ nyi gaˬ la htaˇ hkʼa gaˬ law taˍ-o‸. Ngaˬ nyi ma zuhˆ ve teˇ ceuˬ hkʼaˬ ma kawˆ tuˬ cawˬ ve, mvuhˇmiˬ oˇ ve teˇ hpaˍ hta‸ leh‸ nyi tcuh tuˬ ngaˬ dawˇ cheˆ taˍ peuˬ. Nyi ma zuhˆ jaˇ ve hkʼaw ngaˬ lehˬ miˬguiˬ chi hkʼa peu-eˬ hta‸ aˬ miˍ to‸ baˬ piˇ lawˬ tuˬ yoˬ.
9Oˇ ve hkʼaw‸ nawˉ, chaw yaˇ teˇ hpaˍ lehˬ awˬ nu ve gʼuiˬsha teˇ hpaˍ hta‸ oˉ kʼoˍ maˇ pui leh, ngaˬ hta‸ ceh tiˉ oˉ kʼoˍ kʼaw‸ pui la tuˬ ngaˬ te piˇ tuˬ yoˬ. Yawˇ hui hkʼa peu-eˬ ngaˬ ve tawˇ hta‸ na yuˬ tuˬ yoˬ. 10Oˇ htaˇ vuiˇ jaˇ ve Ehˇtaˍyawˇpiˆ mvuhˇmiˬ lo hkʼa gaˬ hpaˆ da‸ guiˇ da‸ kʼai taˍ ve ngaˬ ve chaw teˇ hpaˍ lehˬ, ngaˬ geh lo tuˉ tanˇ tuˬ yuˬ veu laˇ tuˬ yoˬ. 11Oˇ htaˇ gaˬ kʼo, ngaˬve chaw teˇ hpaˍ-oˬ, nawˬ hui ngaˬ hta‸ baˬ taˉ peuˬ ve htawˇ gʼa ya‸ taw tuˬ ve maˇ heˆ. Awˬ lawn kʼo, caˆ muiˬ leh nyi ma uiˍ ve chaw hui hta‸ ngaˬ yuˬ baˬ tuˬ yoˬ. Nawˬ hui lehˬ ngaˬ ve da‸ kehˬ ve hkʼaw hkʼoˆ lo, ngaˬ hta‸ teˇ pawˆ ka‸ kʼaw‸ hpfuhˆ tuˬ ve maˇ heˆ. 12Ngaˬ hta‸ gʼaˇ va leh nyi ma nuˇnuˇ nehˬ nehˬ cawˬ ve chaw teˇ hpaˍ hta‸ ngaˬ oˇ kaˬ lo chehˇ tcuh piˇ tuˬ yoˬ. 13Cawˬ taˉ sheˍ ve Iˉsaˍreˍlaˆ chaw teˇ hpaˍ lehˬ, shu hta‸ maˇ ya‸ puiˉ leh shu hta‸ heˍ caˇ puiˉ tuˬ ve maˇ heˆ. Yawˇ hui kʼaw‸ uiˍ la da‸ la leh, gawˬ lehˍ gʼa chehˇ tuˬ yoˬ. Yawˇ hui lehˬ, chaw teˇ gʼaˇ hta‸ ka‸ kawˆ tuˬ ve maˇ heˆ, teh‸ Gʼuiˬsha kʼoˆ ve yoˬ.
Ha lehˬ ve kʼa muiˬ hkawˇ
14Iˉsaˍreˍlaˆ chaw teˇ hpaˍ-oˬ, ha lehˬ ve awˬ hkʼaw lo kʼa muiˬ hkawˇ kʼa leh kuˬ chehˇ-oˆ.
Yeˍruˆsaˍlehnˍ venˇ-oˬ, nawˬ ve nyi ma awˬ tawˬ hkʼa gaˬ ha lehˬ chehˇ-oˆ.
15Awˬ lawn kʼo, Gʼuiˬsha lehˬ nawˬ ve canˇ paˍ teˇ hpaˍ hta‸ yuˬ baˬ peuˬ.
Nawˬ hta‸ tawˍ taˍ chehˇ ve chaw teˇ hpaˍ hta‸ htawˇ,
yawˇ gʼa‸ kʼoˬ peuˬ. Iˉsaˍreˍlaˆ ve Jawˇmawˇ Gʼuiˬsha nawˬ geh chehˇ taˍ ve yoˬ.
Chi beu‸ nawˬ kawˆ tuˬ te‸ chiˉ maˇ cawˬ.
16Ziˉonˍ venˇ-oˬ, taˇ kawˆ.
Nawˬ ve la‸ sheh hta‸ deu lehˍ taˇ hpehˇ ce taˍ, teh‸
shu Yeˍruˆsaˍlehnˍ venˇ hta‸ kʼoˆ piˇ tuˬ ve awˬ yanˇ gaˬ la chehˇ ve yoˬ.
17Nawˬ ve Jawˇmawˇ Gʼuiˬsha nawˬ geh chehˇ taˍ leh,
nawˬ hta‸ gʼaˇ shehˍ hpaˇ hpeh‸ la piˇ taˍ ve yoˬ.
Gʼuiˬsha nawˬ hta‸ nyi ma cawˇ leh,
Yawˇ ve ha‸ pehnˇ ve lehˬ
nawˬ hta‸ a sha‸ te‸ ve awˬ suhˉ teˇ ceuˬ kʼaw‸ piˇ laˇ tuˬ yoˬ.
18Pawehˇ te kuiˬ lo chaw yaˇ teˇ hpaˍ ha lehˬ chehˇ ve hkʼe, nawˬ hta‸ pa taw Yawˇ ha lehˬ leh kʼa muiˬ tuˬ yoˬ.
Luˬ ve sheˆ ve awˬ ceuˬ hta‸ ngaˬ te mehˉ peuˬ leh,
nawˬ geh cawˬ ve maˇ nyi sha ve awˬ ceuˬ hkʼa peu-eˬ hta‸ ngaˬ yuˬ baˬ peuˬ.
19Nawˬ hta‸ fawˉ mehˍ laˇ chehˇ ve chaw teˇ hpaˍ hta‸ ciˍ yanˍ piˇ tuˬ maˇ kʼoˆ,
hkui kʼaw‸ paˍ teˇ hpaˍ hta‸ htaiˍ hkʼaw‸ piˇ leh,
shu mvuhˇmiˬ hkʼaw chehˇ taˍ ve chaw hui hta‸ kʼaw‸ shiˍ hkʼaw‸ veu laˇ piˇ tuˬ maˇ kʼoˆ,
yawˇ hui hta‸ awˬ me‸ awˬ hponˇ cawˬ la piˇ leh,
chaw yaˇ hkʼa peu-eˬ yawˇ hui hta‸ chiˇ mvuh piˇ tuˬ maˇ kʼoˆ,
ngaˬ te piˇ tuˬ ve awˬ yanˇ gaˬ la chehˇ ve yoˬ.
20Chi hkʼoˆ ka‸, hpaˆ da‸ guiˇ da‸ chehˇ taˍ ve nawˬ ve chaw teˇ hpaˍ hta‸ aˉ hkʼaw lo kʼaw‸ shiˍ hkʼaw‸ veu laˇ piˇ leh,
miˬguiˬ chaw yaˇ hkʼa peu-eˬ nawˬ hta‸ chiˇ uiˍ chiˇ mvuh tuˬ,
ngaˬ te laˇ tuˬ ve awˬ yanˇ htawˇ gaˬ la chehˇ ve yoˬ.
Oˇ htaˇ, nawˬ kʼaw‸ uiˍ la da‸ la tuˬ yoˬ, teh‸
Gʼuiˬsha kʼoˆ ve yoˬ.
Currently Selected:
Zeˍhpaˍniˆ li‸ 3: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.