Haˆgehˇ li‸ 2
2
Bon yehˬ awˬ suhˉ ve awˬ me‸ awˬ hponˇ
1Oˇ ve teˇ hkʼaw‸ ha pa suhˍ maˬ teˇ maˬ nyiˇ chi teˇ nyi gaˬ ve teˇ yanˇ, Gʼuiˬsha lehˬ tcuh kaˍ paˍ Haˆgehˇ hta‸ tawˇ teˇ pawˆ kʼaw‸ yaw piˇ ve yoˬ. 2Yawˇ lehˬ Haˆgehˇ hta‸ jawˇmawˇ Zeˍruˆbaˍbeˍlaˆ, paw hkuˇ lonˉ Yawˇsuˆ leh Iˉsaˍreˍlaˆ chaw hui hta‸ chi hkʼe kʼoˆ piˇ tcuh ve yoˬ. 3Ponˬ laˬ htaˇ ve bon yehˬ hkʼaˬ ma da‸ jaˇ nyi sha jaˇ ve hta‸ nawˬ hui awˬ hkʼaw lo a shu teˇ gʼaˇ dawˇ nawˇ chehˇ sheˍ le. Chi beu‸ bon yehˬ oˇ ve hkʼaˬ hkʼe hpeh‸ kʼai peuˬ le. Chi beu‸ bon yehˬ oˇ ve luˬ kʼai sheˆ kʼai peuˬ. 4Ya‸ hkʼaˇ, nawˬ hui teˇ gʼaˇ ka‸ nyi ma taˇ luˬ. Bon yehˬ hta‸ kʼaw‸ tanˬ gu-o. Awˬ lawn kʼo, ngaˬ nawˬ hui geh chehˇ taˍ ve yoˬ. 5Nawˬ hui Eˇjiˇtu‸ mvuhˇmiˬ hkʼaw tawˆ la chehˇ ve teˇ yanˇ, ngaˬ nawˬ hui geh hkʼaˬ htaˆ ka‸ chehˇ tuˬ ka ti‸ te taˍ peuˬ ve yoˬ. Chi beu‸ ka‸ ngaˬ nawˬ hui geh chehˇ taˍ ve yoˬ. Chi hta‸ pa taw taˇ kawˆ.
6Maˇ maw maw ngaˬ lehˬ miˬguiˬ, mvuhˇ naw leh laˇ tsuhˇ gʼuiˬ hta‸ hiˆ piˇ tuˬ yoˬ. 7Awˬ nu ve chaw ceuˬ hkʼa peu-eˬ hta‸ htawˇ, ngaˬ hiˆ hiˆ naˇ naˇ hpeh‸ la piˇ leh, yawˇ hui ve hpu shi teˇ hpaˍ choˬ kaˬ lo yuˬ laˬ leh, bon yehˬ hkʼaw biˇ sheˆ chehˇ tuˬ yoˬ. 8Miˬguiˬ hkʼoˆ lo cawˬ ve hpu shi hkʼa peu-eˬ ngaˬ ve deˇ deˇ hpeh‸ ve yoˬ. 9Chi beu‸ tanˬ gu chehˇ ve bon yehˬ chi lehˬ, ponˬ laˬ htaˇ ve bon yehˬ awˬ piˍ teˇ maˬ a‸ kehˉ da‸ jaˇ nyi sha jaˇ tuˬ yoˬ. Oˇ kaˬ lo ngaˬ leh, ngaˬ ve chaw teˇ hpaˍ hta‸ uiˍ la da‸ la piˇ leh, Yawˇ hui hta‸ gawˬ lehˍ chehˇ tcuh piˇ tuˬ yoˬ, teh‸ Gʼuiˬsha kʼoˆ ve yoˬ.
Tcuh kaˍ paˍ paw hkuˇ hui geh jehˬ da‸ ve
10Daˍriˆ jawˇmawˇ te ve nyiˇ hkʼaw‸ teˇ hkʼaw‸, ha pa kʼawˇ maˬ teˇ maˬ, nyiˇ chi awˇ nyi htaˇ, Gʼuiˬsha lehˬ Haˆgehˇ hta‸ tawˇ teˇ pawˆ kʼaw‸ yaw piˇ ve yoˬ. 11Yawˇ kʼoˆ ve, Paw hkuˇ teˇ hpaˍ hta‸ chi hkʼe kʼoˆ na nyi-o. 12Chaw teˇ gʼaˇ lehˬ, Gʼuiˬsha hta‸ tanˇ tuˬ ve shaˍ hta‸ yawˇ ve veu‸ kʼaˇ hkʼaw hawˆ htiˆ leh kʼo‸-e ve yoˬ. Yawˇ ve veu‸ kʼaˇ oˇ ve lehˬ hkaoˍmonˇ, te meh taˍ ve caˇ tuˬ, a pehˉ meuˇ gʼuiˬ, shaˍ lonˍ chu, maˇ heˆ kʼo, caˇ tuˬ teˇ ceuˬ ceuˬ hta‸ daw‸ ve kʼo, caˇ tuˬ oˇ ve teˇ hpaˍ htawˇ da‸ kehˬ la tuˬ ve laˇ teh‸ ca na nyi-o, teh‸ yawˇ hta‸ kʼoˆ piˇ ve yoˬ.
Yawˇ ca na nyi ve teˇ yanˇ, Te maˇ gʼa taˬ, teh‸ paw hkuˇ teˇ hpaˍ yawˇ hta‸ kʼaw‸ yaw hkʼaw‸ piˇ ve yoˬ.
13Oˇ htaˇ Haˆgehˇ lehˬ, Hkʼe kʼo, chaw teˇ gʼaˇ lehˬ suh taˍ ve awˬ to hta‸ ca htawˇ heuˆ ve pa taw yawˇ awˬ to cha‸ chiˆ kʼai peuˬ teh‸ kʼoˆ loˬ. Yawˇ lehˬ caˇ tuˬ oˇ ve teˇ hpaˍ hta‸ htawˇ ve kʼo, caˇ tuˬ oˇ ve teˇ hpaˍ cha‸ chiˆ kʼai ve laˇ, teh‸ paw hkuˇ teˇ hpaˍ hta‸ kʼaw‸ na nyi ve yoˬ.
Cha‸ chiˆ kʼai tehˬ ve yoˬ, teh‸ paw hkuˇ teˇ hpaˍ yawˇ hta‸ kʼaw‸ yaw hkʼaw‸ piˇ ve yoˬ.
14Oˇ htaˇ Haˆgehˇ lehˬ, Chaw chi teˇ hpaˍ hkʼa te ve kanˉ teˇ ceuˬ le le, leh yaw hui Gʼuiˬsha hta‸ tanˇ piˇ ve awˬ ceuˬ hkʼa peu-eˬ oˇ ve hkʼa shuˍ cha‸ chiˆ kʼai peuˬ, teh‸ Gʼuiˬsha kʼoˆ ve yoˬ teh‸ yawˇ hui hta‸ kʼoˆ piˇ ve yoˬ.
Gʼuiˬsha bon na‸ piˇ tuˬ ka ti‸ te ve
15Gʼuiˬsha kʼoˆ ve, Nawˬ hui hkʼaˬ hkʼe hpeh‸ la chehˇ ve hta‸ maˇ mawˬ laˇ. Nawˬ hui bon yehˬ hta‸ maˇ tanˬ gu sheˍ htaˇ, 16nawˬ hui ve ti mi lo kʼai leh, caˬ shiˍ nyiˇ chi taˆ gʼa tuˬ yoˬ teh‸ dawˇ taˍ ve yoˬ. Ya‸ hkʼaˇ, nawˬ hui caˬ shiˍ teˇ chi taˆ ceh tiˉ gʼa ve yoˬ. Nawˬ hui ve a pehˉ meuˇ gʼuiˬ nyiˉ kuiˬ lo, a peuˉ meuˇ gʼuiˬ ngaˇ chi punˇ gʼa tuˬ yoˬ teh‸ dawˇ taˍ ve yoˬ. Ya‸ hkʼaˇ, nawˬ hui a pehˉ meuˇ gʼuiˬ nyiˇ chi punˇ tiˉ gʼa ve yoˬ. 17Nawˬ hui ti taˍ ve awˬ ceuˬ teˇ hpaˍ hta‸ te luˬ te sheˆ piˇ tuˬ ngaˬ lehˬ nawˬ hui ti taˍ ve awˬ cehˬ teˇ hpaˍ hta‸ yawˇ taˆ piˇ lawˬ leh vaˇ shiˍ ce la piˇ lawˬ ve yoˬ. Ya‸ hkʼaˇ, nawˬ hui venˇbaˆ maˇ dawˇ hpfuhˆ. 18Chi beu‸ ha pa kʼawˇ maˬ teˇ maˬ, nyiˇ chi awˇ nyi htaˇ nawˬ hui bon yehˬ awˬ hkuiˉ puiˍ hta‸ hkʼa deh‸ tanˬ kawˍ gʼa taˍ peuˬ. Awˬ gʼuˇ suhˍ hpawˇ hkʼaˬ hkʼe hpeh‸ la tuˬ ve hta‸ hkʼa deh‸ law nyi taˍ-o‸. 19Nawˬ hui geh caˇ tuˬ maˇ cawˬ leh, a pehˉ meuˇ te, maˉ nawˆ cehˬ, aˉ ci ku cehˬ, leh shaˍ lonˍ cehˬ teˇ hpaˍ awˬ shiˍ maˇ naw‸ la sheˍ ve htawˇ, chi beu hta‸ tanˬ leh ngaˬ nawˬ hui hta‸ bon na‸ laˇ tuˬ yoˬ, teh‸ Gʼuiˬsha kʼoˆ ve yoˬ.
Zeˍruˆbaˍbeˍlaˆ hta‸ Gʼuiˬsha ka ti‸ te ve
20Ha pa 24 nyi oˇ ve teˇ nyi tiˉ awˬ hkʼaw lo, Gʼuiˬsha Haˆgehˇ hta‸ tawˇ nyiˇ pawˆ teˇ pawˆ kʼaw‸ yaw piˇ leh kʼoˆ ve, 21Yuˇda‸ jawˇmawˇ Zeˍruˆbaˍbeˍlaˆ hta‸ chi hkʼe ca kʼoˆ piˇ-oˆ. Ngaˬ lehˬ miˬguiˬ leh mvuhˇ naw ma hta‸ chi beu‸ hiˆ piˇ leh, 22mvuhˇmiˬ teˇ hpaˍ hta‸ te luˬ te sheˆ piˇ tuˬ yoˬ. Iˉ mvuhˇ lawˬ leh iˉ mvuhˇ lawˬ gʼa‸ paˍ hui hta‸ ngaˬ hpfuhˆ baˬ piˇ leh, iˉ mvuhˇ teˇ hpaˍ suh-e tuˬ yoˬ. Iˉ mvuhˇ ciˇ shehˍ hpaˇ teˇ hpaˍ teˇ gʼaˇ hta‸ teˇ gʼaˇ tiˇ pehˍ da‸ tuˬ yoˬ. 23Oˇ ve teˇ nyi gaˬ kʼo, ngaˬ ve awˬ ceˬ Zeˍruˇbaˍbeˍlaˆ nawˬ hta‸ ngaˬ ve awˬ meh awˬ hkʼaw lo uˉ peunˍ tcuh laˇ tuˬ yoˬ. Nawˬ hta‸ ngaˬ leuˆ yuˬ taˍ peuˬ, teh‸ Gʼuiˬsha kʼoˆ ve yoˬ.
Currently Selected:
Haˆgehˇ li‸ 2: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.