Haˍbaˍkuˆ li‸ 3
3
Haˍbaˍkuˆ bon lawˬ hkawˇ
1Chi ve lehˬ tcuh kaˍ paˍ Haˍbaˍkuˆ ve bon lawˬ hkawˇ hpeh‸ ve yoˬ.
2Gʼuiˬsha-oˬ, nawˬ te taˍ peuˬ ve kanˉ teˇ hpaˍ awˬ lawn ngaˬ gʼa kaˇ leh anˇ jaˇ tehˬ ve yoˬ.
Nawˬ te jaw ve kanˉ oˇ ve teˇ hpaˍ,
ya‸ nyi ngaˬ hta‸ htawˇ kʼaw‸ te maˍ laˇ-oˆ.
Nawˬ nyi ma zuhˆ jaˇ chehˇ ve htawˇ,
ngaˬ hui hta‸ a ciˉ ha kʼaˉ laˇ-oˆ.
3Gʼuiˬsha lehˬ Eˇdonˍ mvuhˇmiˬ hkʼaw kʼaw‸ tawˆ la chehˇ ve yoˬ.
Da‸ kehˬ jaˇ ve Gʼuiˬsha lehˬ
Paˍranˍ mvuhˇmiˬ hkʼaw cawˬ ve hkʼaw hkʼoˆ lo biˇ sheˆ chehˇ leh,
miˬguiˬ hkʼoˆ lo yawˇ hta‸ chiˇ mvuh ve awˬ hkawˇ biˇ sheˆ chehˇ ve yoˬ.
4Yawˇ lehˬ mvuhˇ tiˉ po-e‸ awˬ gʼeuˆ ba jaˇ ve hkʼa shuˍ tawˆ la chehˇ leh,
yawˇ ve awˬ me‸ awˬ hponˇ hta‸ faˉ taˍ kuiˬ
yawˇ ve la‸ sheh hkʼaw lo awˬ gʼeuˆ ba tawˆ la chehˇ ve yoˬ.
5Yawˇ gʼuˇ suhˍ lo naˬ beuˬ hta‸ peu laˇ leh,
yawˇ hkʼaw‸ nawˉ hpawˇ lo suh ve teˇ ceuˬ hta‸ gʼa‸ laˬ tcuh taˍ ve yoˬ.
6Yawˇ jehˇ taˍ ve teˇ yanˇ miˬ hiˆ jaˇ ve yoˬ.
Yawˇ chiˇ nyi ve teˇ yanˇ chaw yaˇ teˇ hpaˍ haw chiˆ jaˇ ve yoˬ.
Co co taiˍ taiˍ yeˬ chehˇ ve hkʼaw lonˉ teˇ hpaˍ hkoˇ kʼai leh,
ponˬ laˬ htaˇ yawˇ juˇ kʼai jaw ve hkʼaw ehˉ teˇ hpaˍ,
miˬguiˬ hkʼaw tuˍ lo‸-e ve yoˬ.
7Kuˇshaˆ chaw hui kawˆ jehˇ chehˇ leh,
Meˇdiˍanˍ chaw hui kawˆ cheˇ chehˇ ve hta‸ ngaˬ gʼa mawˬ ve yoˬ.
8Gʼuiˬsha-oˬ, nawˬ hta‸ nyi ma zuhˆ tuˬ te laˇ ve lehˬ,
iˉ kaˆ lawˬ teˇ hpaˍ leh laˇ tsuhˇ gʼuiˬ hpeh‸ ve laˇ.
Nawˬ ve chaw teˇ hpaˍ hta‸ gʼaˇ shehˍ hpaˇ hpeh‸ la piˇ chehˇ ve teˇ yanˇ,
nawˬ lehˬ moˬ hta‸ ciˇ toˇ chehˇ leh,
mvuhˇ haw mvuhˇ yeˬ lonˉ lehˬ nawˬ ve iˉ mvuhˇ lawˬ hpeh‸ ve yoˬ.
9Nawˬ lehˬ hkaˆ leh hkaˆ ce hta‸ hkʼa deh‸ gu taˍ ve yoˬ.
Nawˬ mvuhˇ htehˆ piˇ lawˬ leh,
miˬguiˬ pe‸ hkoˇ kʼai ve yoˬ.
10Hkʼaw pui teˇ hpaˍ nawˬ hta‸ mawˬ ve teˇ yanˇ kawˆ cheˇ chehˇ ve yoˬ.
Mvuhˇ naw ma hkʼoˆ lo mvuhˇ yeˬ maˇ maˇ ya‸ la ve yoˬ.
Miˬguiˬ hawˉ lo cawˬ ve iˉ kaˆ teˇ hpaˍ awˬ hkawˇ bvuhˬ la leh,
gʼuiˬ baˇ uiˍ taˆ la ve yoˬ.
11Nawˬ bawˆ peu ve hkaˆ ce teˇ hpaˍ leh,
nawˬ ve gehˇ awˬ gʼeuˆ ba chehˇ ve hta‸ gʼa mawˬ ve teˇ yanˇ,
mvuhˇ nyi ha pa htawˇ jehˇ sheˬ ve yoˬ.
12Nyi ma zuhˆ jaˇ ve hkʼaw nawˬ miˬguiˬ hkʼoˆ juˇ kʼai leh,
chaw yaˇ teˇ hpaˍ hta‸ naˆ nehˆ piˇ ve yoˬ.
13Nawˬ lehˬ, nawˬ ve chaw teˇ hpaˍ leh
nawˬ leuˆ yuˬ taˍ ve jawˇmawˇ hta‸ ponˬ piˇ tuˬ tawˆ kʼai chehˇ ve yoˬ.
Haiˬ ve chaw hui ve awˬ hoˉ hta‸ nawˬ dawˆ paiˍ piˇ leh,
yawˇ hkʼaˇ suh gʼa‸ toˇ ve chaw hui hta‸ te luˬ te sheˆ piˇ ve yoˬ.
14Yawˇ hui lehˬ ngaˬ hui hta‸ te luˬ te sheˆ tuˬ, mvuhˇ haw mvuhˇ yeˬ lonˉ hta‸ hkaˆ ce bawˆ tcuhˉ piˇ ve yoˬ.
Yawˇ hui lehˬ baˬ kuiˬ lo haˍ ve gʼawˇ ve chaw hui hta‸ fawˉ mehˍ piˇ chehˇ ve chaw hkʼa shuˍ,
ha lehˬ ha kʼa te chehˇ ve yoˬ.
15Nawˬ lehˬ, nawˬ ve iˉ mvuhˇ teˇ hpaˍ hta‸ yehˇ leh laˇ tsuhˇ gʼuiˬ hta‸ naˆ nehˆ piˇ ve yoˬ.
Oˇ htaˇ, iˉ kaˆ teˇ hpaˍ awˬ fuˇ tawˆ la ve yoˬ.
16Awˬ ceuˬ chi teˇ hpaˍ hta‸ ngaˬ gʼa kaˇ leh kawˆ cheˇ jaˇ ve yoˬ.
Kawˆ jaˇ ve pa taw, ngaˬ ve meuˇ guiˬ naˇ naˇ hpeh‸ leh,
ngaˬ ve awˬ to nuˇ lehˍ hpeh‸ sheˬ ve yoˬ.
Ngaˬ ve hkui sheh htawˇ hkui htiˇ poˬ toˇ chehˇ ve yoˬ.
Ngaˬ hui hta‸ ca bawˆ la ve chaw teˇ hpaˍ hta‸ Gʼuiˬsha ciˍ yanˍ piˇ tuˬ ve awˬ nyi gaˬ htaˇ hkʼa gaˬ,
ngaˬ ta‸ iˉ gawˬ lehˍ chehˇ leh law taˍ tuˬ yoˬ.
17Maˉ nawˆ shiˍ, a pehˉ meuˇ shiˍ, shaˍ lonˍ shiˍ teˇ hpaˍ maˇ naw‸ leh
caˬ teˇ hpaˍ luˬ kʼai ve awˬ hkʼoˆ,
yawˬ ehˉ hkʼa peu-eˬ suh kʼai leh,
nuˇ hkawˆ hkʼaw lo nuˇ teˇ hkeh ka‸ maˇ cawˬ-o ve htawˇ,
18ngaˬ ha lehˬ chehˇ tuˬ sheˍ ve yoˬ.
Awˬ lawn kʼo, Gʼuiˬsha lehˬ ngaˬ ve htaiˍ hkʼaw‸ paˍ hpeh‸ ve yoˬ.
19Gʼuiˬsha ngaˬ hta‸ awˬ gʼaˇ awˬ shaˉ pe‸ laˇ ve yoˬ.
Yawˇ ngaˬ hta‸ hkuiˉ zuhˬ hkʼa shuˍ naˆ yeˬ tuˬ te laˇ leh,
hkʼaw hkʼoˆ lo ngaˬ hta‸ gawˬ lehˍ chehˇ tcuh laˇ ve yoˬ.
Currently Selected:
Haˍbaˍkuˆ li‸ 3: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.