Gaˍlaˍtiˆ li‸ 2
2
1Oˇ ve awˬ hkʼaw‸ nawˉ, teˇ chi awˇ hkʼaw‸ gaˬ htaˇ, ngaˬ Tiˇtuˆ hta‸ shiˍ veu leh, Baˍnaˍbaˆ geh Yeˍruˆsaˍlehnˍ venˇ lo teˇ pawˆ kʼaw‸ kʼai ve yoˬ. 2Gʼuiˬsha hpeu‸ maˍ laˇ ve hta‸ pa taw ngaˬ kʼai ve yoˬ. Ngaˬ te peuˬ ve kanˉ leh chi beu‸ te chehˇ ve kanˉ teˇ hpaˍ hkʼe leˇ maˇ gʼa hpeh‸ tuˬ, buiˇshaˆaˉnaˆ chaw hui hta‸ ngaˬ maˍ piˇ ve ha lehˬ ve bon hkawˇ yawˇ hui mehˆ gʼuˇ suhˍ ngaˬ kʼaoˍ maˍ piˇ ve yoˬ. (Ya‸ hkʼaˇ, awˉ lawˉ htaˇ awˬ hoˉ teˇ hpaˍ hta‸ ceh tiˉ ngaˬ kʼaoˍ maˍ piˇ ve yoˬ.) 3Ngaˬ geh teˇ geh kʼai ve Tiˇtuˆ lehˬ, Heˍlaˍsaˆ chaw hpeh‸ ve htawˇ, shu yawˇ hta‸ awˬ guiˬ meuˇ maˇ shoˍ tcuh. 4Yeˍsuˆ Hkri‸ awˬ hkʼaw lo ngaˬ hui gʼa taˍ ve ponˬ ve teˇ ceuˬ hta‸ jaˆ nyi leh ngaˬ hui hta‸ awˬ ceˬ te tcuh laˇ tuˬ, awˬ viˉ awˬ nyi teh‸ kʼoˆ ve ka‸, awˬ viˉ awˬ nyi maˇ heˆ ve chaw teˇ hpaˍ ngaˬ hui geh lo hkʼawˇ lo‸ la ve yoˬ. 5Ya‸ hkʼaˇ, ha lehˬ ve bon hkawˇ ve hteˇ ve cawˇ ve teˇ ceuˬ nawˬ hui awˬ hkʼaw lo yeˬ chehˇ tuˬ, ngaˬ yawˇ hui ve hkawˇ hta‸ a ciˉ ka‸ maˇ na.
6Awˬ hoˉ teˇ hpaˍ lehˬ, ngaˬ maˍ piˇ ve ha lehˬ ve bon hkawˇ hta‸ te‸ chiˉ maˇ htehˍ laˇ. (Yawˇ hui awˬ hoˉ hpeh‸ ve teh‸ kʼoˆ ve lehˬ, yawˇ hui hkʼaˬ hkʼe ve chaw hpeh‸ ve hta‸ ngaˬ te‸ chiˉ maˇ dawˇ. Gʼuiˬsha lehˬ chaw yaˇ ve mehˆ hpfuhˇ hta‸ maˇ nyi.) 7Yawˇ hui te‸ chiˉ maˇ htehˍ laˇ ve awˬ hkʼoˆ ka‸, awˬ guiˬ meuˇ shoˍ ve chaw hui hta‸ ha lehˬ ve bon hkawˇ maˍ piˇ tuˬ Gʼuiˬsha Peˍtruˆ hta‸ chiˇ a‸ piˇ taˍ ve hkʼe, awˬ guiˬ meuˇ maˇ shoˍ ve chaw hui hta‸ ha lehˬ ve bon hkawˇ maˍ piˇ tuˬ Gʼuiˬsha ngaˬ hta‸ chiˇ a‸ laˇ taˍ ve yoˬ teh‸, yawˇ hui gʼa shiˍ gʼa mawˬ ve yoˬ. 8(Awˬ lawn kʼo, awˬ guiˬ meuˇ shoˍ ve chaw hui awˬ pon kanˉ te tuˬ Peˍtruˆ hta‸ aˉ yaˇ piˇ shehˍ hpaˇ teˇ gʼaˇ lehˬ, buiˇshaˆaˉnaˆ chaw hui awˬ pon kanˉ te tuˬ ngaˬ hta‸ htawˇ aˉ yaˇ pe‸ laˇ ve yoˬ.) 9Ngaˬ hta‸ pe‸ laˇ ve awˬ bon hta‸ yawˇ hui gʼa shiˍ gʼa mawˬ ve teˇ yanˇ, nyi ma yeˬ jaˇ ve awˬ hoˉ teˇ hpaˍ, Yaˍkoˆ, Keˍhpaˆ leh Yoˇhanˬ hui lehˬ, Baˍnaˍbaˆ ngaˬ huiˉ maˬ hta‸ la‸ sha paˉ la‸ sheh caˉ laˇ ve yoˬ. Oˇ hkʼe te ve lehˬ, awˬ chawˇ te da‸ ve awˬ heˆ hpeh‸ ve yoˬ. Ngaˬ huiˉ maˬ lehˬ, buiˇ shaˆ aˉ naˆ chaw hui geh kʼai leh, yawˇ hui lehˬ, awˬ guiˬ meuˇ shoˍ ve chaw hui geh kʼai tuˬ yoˬ teh‸ kʼoˆ da‸ taˍ ve yoˬ. 10Haˍ ve gʼawˇ ve chaw hui hta‸ ngaˬ hui dawˇ nawˇ tuˬ, chi teˇ ceuˬ ngaˬ hui hta‸ yawˇ hui lawˬ hkawˉ laˇ ve yoˬ. Oˇ hkʼe te tuˬ ngaˬ htawˇ te gaˇ jaˇ ve yoˬ.
Anˍtiˆawˍ venˇ hkʼaw Pawˇlu‸ Peˍtruˆ hta‸ deˇ piˇ ve
11Oˇ ve awˬ hkʼaw‸ nawˉ Keˍhpaˆ lehˬ, Anˍtiˆawˍ venˇ lo gaˬ la ve teˇ yanˇ, yawˇ te maˇ cawˇ ve teˇ ceuˬ hkʼa tawˍ lehˆ tawˆ la ve pa taw, ngaˬ yawˇ hta‸ mehˆ hpfuhˇ tawˍ da‸ taˍ leh deˇ piˇ ve yoˬ. 12Awˬ lawn kʼo, Yaˍkoˆ ve chaw teˇ hpaˍ maˇ gaˬ la sheˍ htaˇ, Keˍhpaˆ lehˬ, buiˇ shaˆ aˉ naˆ chaw teˇ hpaˍ geh awˍ caˇ chehˇ ve yoˬ. Ya‸ hkʼaˇ, yawˇ hui gaˬ la ve teˇ yanˇ, awˬ guiˬ meuˇ shoˍ ve chaw teˇ moˍ hta‸ yawˇ kawˆ ve pa taw, buiˇshaˆaˉnaˆ chaw teˇ hpaˍ hta‸ hpaˆ da‸ leh, awˬ chawˇ maˇ kʼaw‸ te ve yoˬ. 13Awˬ kaˍ awˬ nu Yuˇda‸ chaw teˇ hpaˍ htawˇ, yawˇ geh teˇ geh maˇ heˆ ve hta‸ kʼaw‸ te ve pa taw, Baˍnaˍbaˆ ka‸ yawˇ hui awˬ hkʼaˇ suh kʼai ve yoˬ. 14Yawˇ hui lehˬ, ha lehˬ ve bon hkawˇ ve hteˇ ve cawˇ ve teˇ ceuˬ awˬ hkʼaˇ suh hteˇ lehˍ maˇ kʼai ve hta‸ ngaˬ gʼa mawˬ ve teˇ yanˇ, yawˇ hui hkʼa peu-eˬ mehˆ gʼuˇ suhˍ Keˍhpaˆ hta‸ ngaˬ chi hkʼe kʼoˆ piˇ ve, Nawˬ lehˬ Yuˇda‸ chaw hpeh‸ ve ka‸, Yuˇda‸ ve awˬ liˇ hta‸ nawˬ maˇ te leh buiˇshaˆaˉnaˆ ve awˬ liˇ hta‸ te ve kʼo, buiˇshaˆaˉnaˆ chaw teˇ hpaˍ lehˬ, Yuˇda‸ ve awˬ liˇ hta‸ te tuˬ, aˬ hto‸ ma pa taw nawˬ yawˇ hui hta‸ nyiˉ te ve le teh‸ kʼoˆ piˇ ve yoˬ.
15Ngaˬ hui lehˬ, paw la htaˇ ka‸ Yuˇda‸ chaw hpeh‸ ve yoˬ. Venˇbaˆ yaˇ teh‸ kʼoˆ ve buiˇ shaˆ aˉ naˆ chaw hpeh‸ ve maˇ heˆ. 16Ngaˬ hui Yuˇda‸ chaw hpeh‸ ve ka‸, chaw teˇ gʼaˇ hteˇ ve cawˇ ve chaw hpeh‸ la ve lehˬ, awˬliˇtawˇhkawˇ hta‸ caˉ da‸ ve kanˉ teˇ hpaˍ hta‸ te ve pa taw maˇ heˆ. Yeˍsuˆ Hkri‸ hta‸ yonˍ ve pa taw hteˇ ve cawˇ ve chaw hpeh‸ la ve hta‸ ngaˬ hui shiˍ ve yoˬ. Ngaˬ hui htawˇ, Hkri‸ hta‸ yonˍ ve awˬ hkʼaw lo hteˇ ve cawˇ ve chaw hpeh‸ la tuˬ, Yeˍsuˆ Hkri‸ hta‸ ngaˬ hui yonˍ taˍ peuˬ. Awˬliˇtawˇhkawˇ hta‸ caˉ da‸ ve kanˉ teˇ hpaˍ hta‸ cuˇ ve awˬ hkʼaw lo hteˇ ve cawˇ ve chaw hpeh‸ la ve maˇ heˆ. Awˬ lawn kʼo, awˬliˇtawˇhkawˇ hta‸ caˉ da‸ ve kanˉ teˇ hpaˍ hta‸ cuˇ ve awˬ hkʼaw lo chaw teˇ gʼaˇ ka‸ hteˇ ve cawˇ ve chaw hpeh‸ la tuˬ maˇ heˆ.#Chi 143:2 17Hkri‸ hta‸ pa taw hteˇ ve cawˇ ve chaw hpeh‸ la tuˬ ngaˬ hui ca chehˇ ve teˇ yanˇ, ngaˬ hui venˇbaˆ yaˇ hpeh‸ ve yoˬ teh‸ tawˆ la ve kʼo, Hkri‸ lehˬ venˇbaˆ awˬ pon kanˉ te shehˍ hpaˇ hpeh‸ ve leh laˇ. Chi hkʼe maˇ heˆ taˬ. 18Awˬ lawn kʼo, ngaˬ hpaˆ baˬ peuˬ ve awˬ ceuˬ hta‸ ngaˬ kʼaw‸ gu te ve kʼo, ngaˬ te ya‸ shehˍ hpaˇ hpeh‸ ve hta‸ hkʼa tawˍ lehˆ tawˆ la piˇ lawˬ ve yoˬ. 19Awˬ lawn kʼo, ngaˬ lehˬ Gʼuiˬsha hta‸ caˉ da‸ ve teˇ hpawˇ lo gʼa te‸ tuˬ, awˬliˇtawˇhkawˇ hta‸ caˉ da‸ ve teˇ hpawˇ lo, awˬliˇtawˇhkawˇ awˬ hawˉ lo ngaˬ suh ve yoˬ. 20Ngaˬ Hkri‸ geh teˇ geh la‸ ka hkʼoˆ lo hkanˍ suh peuˬ. Hkʼe te leh, chi beu‸ te‸ chehˇ ve lehˬ ngaˬ awˬ to maˇ heˆ, Hkri‸ ngaˬ awˬ hkʼaw lo te‸ chehˇ ve yoˬ. Chi beu‸ awˬ suhˍ awˬ shaˍ hpawˇ ngaˬ a sha‸ te‸ ve teˇ ceuˬ lehˬ, ngaˬ hta‸ ha‸ leh ngaˬ awˬ pon yawˇ awˬ to tanˇ peuˬ ve, Gʼuiˬsha ve Yaˇ hpu hta‸ ngaˬ yonˍ ve pa taw te‸ chehˇ ve teˇ ceuˬ yoˬ. 21Gʼuiˬsha ve awˬ bon hta‸ ngaˬ baˬ taˉ ve maˇ heˆ. Awˬ lawn kʼo, awˬliˇtawˇhkawˇ hta‸ pa taw hteˇ ve cawˇ ve chaw hpeh‸ la gʼa ve hkʼe kʼo, Hkri‸ suh ve lehˬ hkʼe leˇ hpeh‸ ve yoˬ.
Currently Selected:
Gaˍlaˍtiˆ li‸ 2: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.