1 Kawˇrenˍhtuˆ li‸ 2
2
Hkri‸ la‸ ka hkʼoˆ lo hkanˍ suh ve awˬ lawn ca maˍ la ve
1Awˬ viˉ awˬ nyi teˇ hpaˍ-oˬ, ponˬ laˬ htaˇ ngaˬ nawˬ hui geh laˬ leh, Gʼuiˬsha kʼoˆ taˍ ve tawˇ hkawˇ nawˬ hui hta‸ ca maˍ la ve teˇ yanˇ, na sha jaˇ ve tawˇ hkawˇ yaw leh cuˇ yiˍ maˍ yiˍ hta‸ yehˇ leh ngaˬ ca maˍ la ve maˇ heˆ. 2Awˬ lawn kʼo, nawˬ hui geh ngaˬ chehˇ htaˇ, Yeˍsuˆ Hkri‸ leh, yawˇ la‸ ka hkʼoˆ lo hkanˍ suh ve awˬ lawn hta‸ ceh tiˉ ngaˬ shiˍ tuˬ yoˬ teh‸, ngaˬ dawˇ cheˆ taˍ ve yoˬ. 3Nawˬ hui geh ngaˬ chehˇ htaˇ, awˬ gʼaˇ nuˇ leh kawˆ jaˇ cheˇ jaˇ ve awˬ hkʼaw lo chehˇ ve yoˬ. 4Nawˬ hui yonˍ ve teˇ ceuˬ lehˬ, chaw yaˇ ve cuˇ yiˍ awˬ hkʼaw lo maˇ gʼa yeˬ tuˬ leh Gʼuiˬsha ve kanˇ paˆ awˬ hkʼaw lo yeˬ tuˬ, 5ngaˬ tawˇ yaw ve maˇ kʼoˆ, bon maˍ laˇ ve maˇ kʼoˆ, cuˇ yiˍ tawˇ hkawˇ hta‸ yehˇ leh beˬ yuˬ ve maˇ heˆ. Ya‸ hkʼaˇ, ngaˬ awˬ hkʼaw lo Awˬ ha hpu chehˇ ve hta‸ hpeu‸ maˍ laˇ leh, yawˇ ve kanˇ paˆ awˬ hkʼaw lo maˍ laˇ ve yoˬ.
Gʼuiˬsha pe‸ laˇ ve awˬ ceuˬ teˇ hpaˍ hta‸ Awˬ ha hpu hpeu‸ maˍ laˇ ve
6Biˇ la peuˬ ve chaw teˇ hpaˍ hta‸ ngaˬ hui cuˇ yiˍ tawˇ hkawˇ maˍ piˇ ve yoˬ. Chi miˬguiˬ ve cuˇ yiˍ hta‸ kʼoˆ ve maˇ heˆ. Luˬ kʼai mehˉ kʼai tuˬ ve miˬguiˬ jawˇmawˇ teˇ hpaˍ ve cuˇ yiˍ hta‸ ka‸ kʼoˆ ve maˇ heˆ. 7Ya‸ hkʼaˇ faˉ taˍ ve leh naˉ jaˇ ve Gʼuiˬsha ve cuˇ yiˍ hta‸ ngaˬ hui maˍ ve yoˬ. Cuˇ yiˍ oˇ ve lehˬ, ngaˬ hui awˬ me‸ awˬ hponˇ gʼa tuˬ awˬ pon, miˬguiˬ maˇ te hpanˍ sheˍ htaˇ ka‸, Gʼuiˬsha dawˇ cheˆ taˍ ve cuˇ yiˍ hpeh‸ ve yoˬ. 8Cuˇ yiˍ chi hta‸ chi miˬguiˬ jawˇmawˇ teˇ hpaˍ htawˇ, teˇ gʼaˇ ka‸ maˇ shiˍ. Yawˇ hui shiˍ ve hkʼe kʼo, awˬ me‸ awˬ hponˇ ve Awˬ jawˇmawˇ teˇ gʼaˇ hta‸ la‸ ka hkʼoˆ lo hta‸ pehˍ tuˬ ve maˇ heˆ. 9Li‸ hpu hkʼaw bvuh‸ taˍ ve hkʼe,
Gʼuiˬsha hta‸ ha‸ ve chaw hui awˬ pon yawˇ gu taˍ ve awˬ ceuˬ teˇ hpaˍ hta‸
mehˆ shiˍ maˇ mawˬ jaw, naˍ paw
maˇ kaˇ jaw leh, chaw yaˇ ve nyi ma hkʼaw lo maˇ dawˇ shiˍ jaw ve yoˬ, teh‸ bvuh‸ taˍ ve yoˬ.#Isy 64:4
10Ya‸ hkʼaˇ Gʼuiˬsha lehˬ, Awˬ ha hpu hta‸ cuˇ leh awˬ ceuˬ chi teˇ hpaˍ ngaˬ hui hta‸ hpeu‸ maˍ laˇ peuˬ. Awˬ lawn kʼo, Awˬ ha hpu lehˬ hkʼa peu-eˬ hta‸ ca nyi leh, Gʼuiˬsha ve naˉ jaˇ ve awˬ ceuˬ teˇ hpaˍ hta‸ htawˇ yawˇ ca nyi ve yoˬ. 11Chaw yaˇ awˬ hkʼaw lo cawˬ taˍ ve nyi ma maˇ heˆ kʼo, chaw yaˇ hta‸ caˉ da‸ ve awˬ ceuˬ teˇ hpaˍ hta‸ a shu shiˍ hpeh‸ tuˬ le. Oˇ ve hkʼa shuˍ shuˍ, Gʼuiˬsha ve Awˬ ha hpu maˇ heˆ kʼo, Gʼuiˬsha hta‸ caˉ da‸ ve awˬ ceuˬ teˇ hpaˍ hta‸ htawˇ a shu ka‸ shiˍ maˇ hpeh‸. 12Ngaˬ hui lehˬ, miˬguiˬ yaˇ hui ve nyi ma hta‸ gʼa taˍ ve maˇ heˆ. Ya‸ hkʼaˇ, Gʼuiˬ sha ngaˬ hui hta‸ piˇ taˍ ve awˬ bon teˇ hpaˍ hta‸ shiˍ hpeh‸ tuˬ, Gʼuiˬsha lo laˬ ve Awˬ ha hpu hta‸ ngaˬ hui gʼa taˍ ve yoˬ.
13Awˬ bon oˇ ve teˇ hpaˍ awˬ lawn maˍ piˇ htaˇ, ngaˬ hui lehˬ chaw yaˇ maˍ laˇ ve cuˇ yiˍ hta‸ cuˇ leh kʼaw‸ maˍ piˇ ve maˇ heˆ. Awˬ ha hpu maˍ laˇ ve hkʼa shuˍ shuˍ ngaˬ hui kʼaw‸ maˍ piˇ ve yoˬ. Co ha hpawˇ awˬ lawn maˍ piˇ htaˇ, co ha hpawˇ hta‸ caˉ da‸ ve awˬ ceuˬ hta‸ cuˇ leh maˍ piˇ ve yoˬ. 14Co ha hpawˇ maˇ dawˇ pawnˍ ve chaw lehˬ, Gʼuiˬsha ve Awˬ ha hpu hta‸ caˉ da‸ ve teˇ hpaˍ hta‸ maˇ ha‸ yuˬ. Awˬ ceuˬ oˇ ve teˇ hpaˍ lehˬ, yawˇ awˬ pon cuˇ yiˍ maˇ cawˬ ve awˬ ceuˬ hpeh‸ ve yoˬ. Co ha hpawˇ ceh tiˉ oˇ ve teˇ hpaˍ hta‸ fuiˍ da‸ pehˬ da‸ gʼa ve pa taw, yawˇ lehˬ oˇ ve teˇ hpaˍ hta‸ maˇ shiˍ puiˉ. 15Co ha hpawˇ dawˇ pawnˍ ve chaw lehˬ, hkʼa peu-eˬ hta‸ fuiˍ da‸ pehˬ da‸ gʼa ve yoˬ. Ya‸ hkʼaˇ, chaw oˇ ve awˬ lawn hta‸ teˇ gʼaˇ ka‸ fuiˍ da‸ pehˬ da‸ maˇ gʼa. 16Awˬ lawn kʼo,
Jawˇmawˇ Gʼuiˬsha hta‸ maˍ piˇ tuˬ,
yawˇ ve nyi ma hta‸ a shu shiˍ ve le.#Isy 40:13
Ya‸ hkʼaˇ, ngaˬ hui lehˬ Hkri‸ ve nyi ma cawˬ taˍ ve yoˬ.
Currently Selected:
1 Kawˇrenˍhtuˆ li‸ 2: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.