1 Kawˇrenˍhtuˆ li‸ 16
16
Hkri‸ yaˇ hui awˬ pon hpu tanˇ shaw ve awˬ lawn
1Hkri‸ yaˇ hui awˬ pon hpu tanˇ shaw ve awˬ lawn lehˬ, Gaˍlaˍtiˆ mvuhˇmiˬ hkʼaw chehˇ ve Hkri‸ yaˇ awˬ moˍ teˇ hpaˍ hta‸ ngaˬ hto piˇ taˍ ve hkʼe, nawˬ hui htawˇ oˇ hkʼe te-o. 2Ngaˬ gaˬ la htaˇ hpu tanˇ maˇ gʼa shaw tuˬ, teˇ shinˉ le le awˬ hkʼaw lo awˉ lawˉ teˇ nyi htaˇ, nawˬ hui teˇ gʼaˇ le le a shu yawˇ awˬ bon gʼa taˍ ve hkʼe, hpu tanˇ piˇ tuˬ awˬ pon yuˬ tawˆ leh ha‸ shaˉ taˍ-o‸. 3Ngaˬ gaˬ la ve teˇ yanˇ, nawˬ hui ve hpu tanˇ hta‸ Yeˍruˆsaˍlehnˍ venˇ lo yuˬ kʼoˬ piˇ tuˬ, nawˬ hui nyi ma cawˇ ve chaw hui hta‸ leuˆ yuˬ leh, yawˇ hui awˬ pon shaˉ hkiˆ hkanˍ ve li‸ bvuh‸ piˇ peuˬ hkʼaw‸ nawˉ, ngaˬ yawˇ hui hta‸ peu kʼai tuˬ yoˬ. 4Ngaˬ htawˇ kʼai cawˇ ve kʼo, yawˇ hui ngaˬ geh teˇ geh kʼai hpeh‸ ve yoˬ.
Pawˇlu‸ kʼai tuˬ ve ya‸ kʼaw
5Maˍkeˍdawˇniˆ mvuhˇmiˬ hta‸ ngaˬ hpanˍ kʼai peuˬ hkʼaw‸ nawˉ, ngaˬ nawˬ hui geh gaˬ la tuˬ yoˬ. Awˬ lawn kʼo, ngaˬ Maˍkeˍdawˇniˆ mvuhˇ miˬ hta‸ gʼa hpanˍ kʼai tuˬ yoˬ. 6Ngaˬ hkʼaˬ ve teˇ hpawˇ lo kʼaw‸ kʼai tuˬ ve maˇ kʼoˆ, nawˬ hui ngaˬ hta‸ awˬ gʼuˇ suhˍ peu kʼai laˇ tuˬ, ngaˬ nawˬ hui geh a ciˉ maw chaweh chehˇ tuˬ teh‸ dawˇ taˍ ve yoˬ. Mvuhˇkaˆ yanˇ peuˬ htaˇ hkʼa gaˬ nawˬ hui geh chehˇ tuˬ yoˬ hehˉ. 7Awˬ lawn kʼo, chi beu‸ hpanˍ kʼai chehˇ ve awˬ hkʼaw lo ceh nawˬ hui hta‸ gʼa mawˬ da‸ tuˬ ngaˬ maˇ te gaˇ. Ya‸ hkʼaˇ, Jawˇmawˇ Yeˍsuˆ nyi ma cawˇ ve kʼo, ngaˬ nawˬ hui geh a ciˉ maw chaweh chehˇ tuˬ dawˇ law taˍ ve yoˬ.
8Peˍteˍkoˆteˍ pawehˇ awˬ nyi hkʼa gaˬ, ngaˬ Eˇfeˇsu‸ venˇ hkʼaw chehˇ tuˬ yoˬ. 9Awˬ lawn kʼo, kanˉ hkʼa deh‸ te hpeh‸ tuˬ ngaˬ awˬ pon kʼehˬ jaˇ ve yehˬ miˉ teˇ maˬ hpaw taˍ ve yoˬ. Tawˍ taˍ shehˍ hpaˇ htawˇ maˇ maˇ cawˬ ve yoˬ.
10Tiˆmoˉseˍ nawˬ hui geh gaˬ la kʼo, nawˬ hui geh chehˇ htaˇ yawˇ maˇ gʼa kawˆ tuˬ nawˬ hui shaˍ ti‸ taˍ-o‸. Awˬ lawn kʼo, yawˇ lehˬ ngaˬ hkʼa shuˍ shuˍ Jawˇmawˇ Yeˍsuˆ ve kanˉ te shehˍ hpaˇ hpeh‸ ve yoˬ. 11Hkʼe te leh, a shu ka‸ yawˇ hta‸ maˇ shawˍ maˇ caˆ taˇ te. Yawˇ ngaˬ geh kʼaw‸ la hpeh‸ tuˬ, dawˇ sha ve awˬ hkʼaw lo yawˇ hta‸ kʼaw‸ peu laˇ-oˆ. Awˬ viˉ awˬ nyi teˇ hpaˍ geh teˇ geh yawˇ kʼaw‸ la tuˬ ve hta‸ ngaˬ dawˇ law chehˇ ve yoˬ.
12Awˬ viˉ awˬ nyi Aˍpawˇlu‸ awˬ lawn lehˬ, awˬ viˉ awˬ nyi teˇ hpaˍ geh teˇ geh nawˬ hui ve chehˇ kuiˬ lo laˬ tuˬ, ngaˬ yawˇ hta‸ gʼaˇ hte‸ awˬ gʼaˇ piˇ ve htawˇ, chi beu‸ nawˬ hui ve chehˇ kuiˬ lo laˬ tuˬ yawˇ nyi ma a ciˉ ka‸ maˇ cawˬ ve yoˬ. Ya‸ hkʼaˇ, awˬ yanˇ cawˇ ve teˇ yanˇ, yawˇ nawˬ hui geh laˬ tuˬ yoˬ.
Awˬ leh meuˇ ve tawˇ hkawˇ
13Nawˬ hui hkʼa deh‸ shaw taˍ-o‸. Yonˍ ve awˬ hkʼaw lo yeˬ lehˍ chehˇ-oˆ. Awˬ gʼaˇ yuˬ tawˆ leh, nyi ma ha‸ hanˉ te chehˇ-oˆ. 14Nawˬ hui hkʼa te ve hkʼa peu-eˬ lehˬ, ha‸ pehnˇ ve awˬ hkʼaw lo te-o.
15Awˬ viˉ awˬ nyi teˇ hpaˍ-oˬ, Saˍteˍhpanˍ ve yehˬ yaˇ kʼa yaˇ hui lehˬ, Aˍhkaˍyaˆ mvuhˇmiˬ awˬ hkʼaw lo Hkri‸ yaˇ awˉ lawˉ hpeh‸ la leh, Hkri‸ yaˇ hui awˬ pon kanˉ te tuˬ, yawˇ hui lehˬ a shu yawˇ ve awˬ to chiˇ a‸ piˇ taˍ ve hta‸ nawˬ hui shiˍ ve yoˬ. 16Nawˬ hui lehˬ, chi hkʼe ve chaw hui awˬ hawˉ lo maˇ kʼoˆ, nawˬ hui awˬ hkʼaw lo ga piˇ leh kanˉ gʼaˇ hte‸ te chehˇ ve chaw teˇ gʼaˇ le le awˬ hawˉ lo maˇ kʼoˆ, hkʼa deh‸ chehˇ tuˬ ngaˬ nawˬ hui hta‸ lawˬ hkawˉ ve yoˬ.
17Saˍteˍhpanˍ, Hpawˍtuˇnaˆ leh Aˍhkaˍyaˍkuˆ hui gaˬ la ve pa taw, ngaˬ ha lehˬ jaˇ ve yoˬ. Awˬ lawn kʼo, ngaˬ nawˬ hui hta‸ maˇ gʼa mawˬ htawˇ, yawˇ hui hta‸ gʼa mawˬ ve pa taw ngaˬ nyi ma sha la ve yoˬ. 18Yawˇ hui lehˬ, ngaˬ ve nyi ma leh nawˬ hui ve nyi ma hta‸ dawˇ sha la piˇ ve yoˬ. Chi hkʼe ve chaw teˇ hpaˍ hta‸ hkʼa deh‸ yawˆ yan-o.
19Aˍsiˆ mvuhˇmiˬ awˬ hkʼaw lo Hkri‸ yaˇ awˬ moˍ teˇ hpaˍ lehˬ, nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. Aˍkuˉlaˆ leh Piˇkiˇlaˆ ka‸, yawˇ hui ve yehˬ hkʼaw hpawnˬ da‸ ve Hkri‸ yaˇ awˬ moˍ ka‸, Jawˇmawˇ Yeˍsuˆ awˬ hkʼaw lo nawˬ hui hta‸ dawˇ nawˇ jaˇ ve yoˬ teh‸, teˇ geh tawˇ shanˍ feu laˇ ve yoˬ. 20Awˬ viˉ awˬ nyi hkʼa peu-eˬ nawˬ hui hta‸ dawˇ nawˇ ve yoˬ teh‸ tawˇ shanˍ feu laˇ ve yoˬ.
Nawˬ hui teˇ gʼaˇ leh teˇ gʼaˇ da‸ ve kehˬ ve awˬ hkʼaw lo boˆ nu da‸ leh la‸ sheh caˉ da‸-o‸.
21Ngaˬ Pawˇlu‸ lehˬ, nawˬ hui hta‸ dawˇ nawˇ ve awˬ hkʼaw lo tawˇ chi teˇ hkawˇ ngaˬ awˬ to nawˬ hui hta‸ bvuh‸ laˇ ve yoˬ.
22Chaw teˇ gʼaˇ gʼaˇ Jawˇmawˇ Yeˍsuˆ hta‸ maˇ ha‸ ve kʼo, hkeu ve hta‸ hkanˍ piˇ lawˬ-o‸.
Ngaˬ hui ve Jawˇmawˇ laˬ chehˇ ve yoˬ.
23Jawˇmawˇ Yeˍsuˆ ve awˬ bon awˬ shinˉ nawˬ hui geh cawˬ piˇ-oˆ.
24Ngaˬ ve ha‸ pehnˇ ve teˇ ceuˬ lehˬ, Yeˍsuˆ Hkri‸ awˬ hkʼaw lo nawˬ hui hkʼa peu-eˬ geh cawˬ piˇ-oˆ.
Currently Selected:
1 Kawˇrenˍhtuˆ li‸ 16: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.