Johani 3
3
Jeso u Nikodimasi
1Inzho kakuli muntu wankamu yaba Falisi izhina lyakwe kali Nikodimasi, mweendelezhi waba Juda. 2Wakeza kwa Jeso mashiku u kumwaambila ati, “Mwiiyi mukando, tulizhi ati uwe uli mwiiyi uuhwa kwa Leza, nkaambo kwiina muntu ukonzha kucita shitondezho shizoosha nshuucita kuti katali u Leza.”
3Jeso wakamwiingula ati, “Cini cini ndakwaambila meni meni ati, muntu atazhalwa bupiya takonzha kunjila umbwami bwa Leza.”
4Nikodimasi wakaamba ati, “No muntu mukando ulakonzha buti kuzhalwa lwabili? Sa ulakonzha kunjila mwifwu lyakabaina kwaamba azhalwe?”
5Jeso wakaingula ati, “Cini cini kuti muntu tazhalwa ku meenzhi, ulimwi uku Moza Usalala takonzha kunjila umbwami bwa Leza. 6Cizhalwa ku mubili, mubili, pele Moza Usalala ulazhala moza. 7Utazhingwa bobo mbundaamba ati, Ulyeele kuzhalwa bupiya. 8Muuwo ulaunga kufwumbwa mbuuzanda. Ulooteelela bulyo, pele tukonzha kuzhiba nkuuhwa naa nkuuya. Ubobo tukonzha kuzhiba mbwaabele wezo uzhalwa ku Moza Usalala.”
9Nikodimasi wakabuzha ati, “No ceco cintu cilaba buti?”
10Jeso wakaingula ati, “Inta uwe uli mwiiyi waba Izilaili, no tweezhi buti aza makani? 11Ndakwaambila meni meni, uswe tulapa bumboni bwa shintu nshitwizhi ukumushimwina nshitwakabona, pele tamulibambile kubutambula bumboni bwesu. 12Na mwiina nimwakashoma indakamushimwina shintu shaanshi ano, no mulakozha buti kushoma kuti ndamwaambila shintu sha kwizeulu? 13Nkaambo kwiina muntu wakaya kale kwizeulu cita bulyo Mwanaa Muntu wezo wakahwa kwizeulu.”
14 #
Mye 21:9
“Umbona Mozesi mbwaakaanjika muzoka mupange wa mukuba mulukula, aze Mwanaa Muntu ulyeelele kusumpulwa, 15kwaamba uukaamushoma, akayane bumi butamana. 16Nkaambo mbubolya Leza mbwaakeefwunisha inshi, wakapa mwanakwe shimuzhalwa ice kwaamba kufwumbwa ukaamushoma atakafwililili, pele akayane bumi butamana. 17Nkaambo Leza wiina kutuma Mwanakwe ano anshi kwaamba abeteke bantu, pele kwaamba bantu bafwutulwe kwiita mwakwe.
18“Wezo umushoma tabetekwa, pele wezo utamushomi wabetekwa kale, nkaambo wiina kushoma mwizhina lya Mwanaa Leza shimuzhalwa ice. 19Inzho lubeta ndulolu, mumuni wakashika anshi, pele bantu bakoozandisha mushinze nkaambo milimo yabo mibiyabi. 20Kufwumbwa ucita cibi ulyuuswile mumuni ulimwi tashika kumumuni nkaambo ulatiya ati shibi shakwe shilabonwa. 21Pele muntu ucita shiluleme uleza kumumuni kwaamba milimo yakwe ibonwe ati yacitwa kwiita mu kuteelela Leza.”
Johani Wapa Bumboni bwa Bili
22Kuhwaawo, Jeso u ba shiciiya bakwe bakaya ku cishi ca Judiya. Wakakala koko kwa mazuba mashoonto ukupapatiza. 23Johani aze wakaakupapatiza umulonga wa Enoni kumbali uku Salimu nkaambo nkukwakaakuli meenzhi manji manji. Bantu kabeza kupapatizwa. 24#Mat 14:3; Mk 6:17; Lk 3:19, 20Ceci ciindi Johani katana kubikwa muntolongo pe.
25Inzho bamwi ba shiciiya baka Johani bakakanka kukazhanya umu Juda umwi ku makani akusalazha kwakanshiya nshiya kabo. 26Ubobo bakaya kwa Johani baamba ati, “Mwiiyi, welya muntu ngumwakaakuli aze umutala kwiwe ku lweenje lwa Joodani, welya nguwakaakwaamba, ubwasunu nguwelya ulapapatiza, ubobo bantu banji banji balaya kwakwe.”
27Johani wakaingula ati, “Kwiina muntu uukonzha kuyana cintu niciba comwi na kuti wiina kucitambula kuhwa kwa Leza uli kwizeulu. 28#Joh 1:20Umwe muli bakamboni bangu, mulizhi mbundakaamba ati, ‘Indime Kilisito ndakatumwa bulyo kusololela Kilisito.’ 29Ciindi ca bwinga, nabwinga, uushibwinga balaakuli antoomwi. Pele mulongwaakwe shibwinga ulazhima ambali u kumuteelela. Inzho ulabotelwa cini cini ku mazwi aka shibwinga. Ubobo ame ndiinininwe cini cini. 30Walo ulyeelele kubaala kulemekwa, ume ndemekwe ashoonto.”
Wezo Uhwa Kwizeulu
31Wezo uhwa kwizeulu uli ezeulu a bantu boonse, pele uhwa anshi ngwaanshi ulimwi ulaamba bulyo shaanshi. Wezo uhwa kwizeulu uli ezeulu abantu boonse. 32Ngu kamboni wa shintu nshaakabona u kuteelela, pele kwiina ubutambula bumboni bobu. 33Pele kufwumba ushoma mazwi aakwe ulazhibisha ati Leza ngwa lushinizho ku mazwi akwe. 34Wezo wakatumwa kwa Leza ulaamba mazwi aka Leza, nkaambo Leza wakamupa Moza Usalala cakulitakata. 35#Mat 11:27; Lk 10:22Leza Taata ulimufwinishi Mwanakwe cakuti wabika shintu shoonse munsana shakwe. 36Wezo uushoma Mwana ulikwete bumi butamana, pele wezo uutashomi takayani bumi, pele ulaakuli mubukali bwa Leza.
Currently Selected:
Johani 3: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.