Johani 4
4
Jeso Wabandika u Mukaintu mu Samaliya
1Inzho ba Falisi bakateelela ati Jeso ulasandula ukupapatiza ba shiciiya banji banji kubaala Johani. 2Nikuba ati Jeso lwakwe mwini katapapatizi, cita bulyo ba shiciiya mbubakaakupapatiza. 3Inzho Jeso naakazhiba aza, wakakuhwa ku Judiya, wakabweela ku Galilaya. 4Mulweendo lwakwe lolu kali shikwiita mu Samaliya.
5 #
Mata 33:19; Jos 24:32 Mucishi ca Samaliya, wakashika ku munzhi umwi uutewa ati Sika, uuli afwaafwi umuunda wezo Jakobo ngwaakapa mwanakwe Jozefu. 6Koko kubusena kakuli mukalo waka Jakobo. Jeso mbwaakaakukatele wakakala kumbali ku mukalo wezo. Kacili ciindi ceshikati.
7Ngoonaawo wakashika mukaintu umwi Musamaliya kwiza kuteka meenzhi, amane Jeso wakamwaambila ati, “Mpa meenzhi nwe.” 8Ceco ciindi ba shiciiya kabaile mu munzhi kuula shakulya.
9 #
Ezi 4:1-5; Neh 4:1, 2 Mukaintu wakaamba ati, “Anu uwe umu Juda wankanka buti kunomba meenzhi ndi Musamaliya?” Nkaambo ba Juda u Basamaliya tabalyatana.
10Jeso wakaingula ati, “Kuti niwaakucizhi cipo ncazanda u kupa Leza, u wezo ukukumbila meenzhi aakunwa, aze niwamukumbila naakupa meenzhi a bumi butamana.”
11Mukaintu wakaamba ati, “Mwami, inta wiina ucakutesha, ulimwi wezu mukalo mulamfwu, inzho azo meenzhi a bumi butamana ulaateka buti? 12Sa uwe uli mukando kubaala taata Jakobo wakatupa mukalo ngwaakaakunwa mwini ubanakwe iiŋombe shakwe?”
13Jeso wakaingula ati, “Boonse baanwa meenzhi aza balafwa inyota ulimwi. 14Pele muntu unwa meenzhi ngumupa ume, takafwi linji inyota pe. Azo meenzhi alakaba katinti kameenzhi a bumi muli nguwe, katutuntumuka bumi butamana.”
15Mukaintu wakaamba ati, “Mwami mpa azo meenzhi kwaamba intakafwi linji inyota, ulimwi intakezhiza linji kono kuteka meenzhi.” 16Jeso wakaamba ati, “Koya ukamwite mulumyaako muzhize aze.”
17Mukaintu wakaingula ati, “Nshitwelwe.” Ngoonaawo Jeso wakaingula ati, “Uli kabotu niwaamba ati tutwelwe, 18nkaambo wakaakutwelwe kubalombwana bosanwe, u wezo uukutwele ninzho tali mulumyaako, ubobo waamba meni meni.” 19Mukaintu wakaamba ati, “Mwami inzho ndazhiba ati uli mushinshimi. 20Bamatata bakaakukombela mulupili lolu, pele nuba Juda mulaamba ati bantu balyeelele kukombela Muŋanda ya Leza ku Jelusalemu.”
21Jeso wakaamba ati, “Mukaintu nshoma, ciindi cilakashika nimutakaamukombi Taata mulupili lolu nikuba ku Jelusalemu.” 22Mulakomba ncimutezhi, pele uswe tulakomba ncitwizhi nkaambo lufwutuko lulahwa kuba Juda. 23Pele ciindi cilakashika, ulimwi cashika kale, lelyo babo bamukomba calushinizho nibakaamukomba Taata mu moza u mu lushinizho. Babo imbabo mbaazanda Taata ati baakumukomba. 24Leza ngu Moza, ubobo bamukomba balyeelele kumukomba mu moza u mu lushinizho. 25Mukaintu wakaamba ati, “Ndizhi ati Mesiya ulakeza, uli ngu mufwutuli, akashika ulakatutondezha shintu shoonse.” 26Jeso wakamwaambila ati, “Ume intwaamba aze ndime wezo nguuamba.”
27Ngoonaawo ba shiciiya bakwe bakashika. Bakazhingwa nibakayana ati Jeso ulabandika u mukaintu. Nikuba bobo kwiina naaba womwi wakoombuzha mukaintu wezo ati, “No ulazandaanzhi?” Na kumubuzha Jeso ati, “Mwaambaanzhi uwezu?”
28Inzho mukaintu wezo wakeeshiya intesho yakwe waya ku munzhi u kwaambila bantu ati, 29“Amweende mukamubone muntu wanshimwina shintu shoonse nshindakacita. Sa ingwe Kilisito?” 30Bantu bakooshiya munzhi baya kwa Jeso.
31Ku ciindi ceco ba shiciiya bakamweenzelezha Jeso ati, “Mwiiyi lya.”
32Walo wakaamba ati, “Ume ndikwete cakulya ncimutezhi.”
33Ubobo ba shiciiya bakakanka kulyaambauzha mulwabo beni ati, “Sa kuli wamuletela cakulya?”
34Pele Jeso wakabaambila ati, “Cakulya cangu nkucita luzando lwa Leza wakantuma, u kumaninzha mulimo wakwe.” 35Inta mulaamba ati, “Kucisheele myezhi yone kwaamba tutebule.” Ndamushimwina ati amwiibone myuunda, maila abizwa kale, alalindila bulyo kutebulwa. 36Mutebuzhi wahola kale kumulimo wakwe, ulabunjika micelo iitola ku bumi butamana. Kwaamba wezo wakashanga u wezo utebula batangalile antoomwi. 37Kaka kashimpi kaamba ati, “Umwi mushanji, umwi mutebuzhi nkeni keni. 38Amwe ndamutuma kwaamba mutebule nshimwatakalima. Ubakalima mbanji, umwe mweelya coolwe milimo yabo.”
39Basamaliya banji banji mu munzhi bakamushoma Jeso nkaambo kamazwi ngakaamba mukaintu aakuti, wanshimwina shoonse nshindakacita. 40Basamaliya bakamukumbila Jeso kwaamba akale abo mu munzhi, ubobo wakakala abo kwa mazuba obile.
41Inzho bantu banji banji bakashoma ukaambo kamazwi ngaakabayiisha Jeso. 42Bakamwaambila mukaintu ati, “Twashoma kutali ku mazwi nguwatushimwina pele ukaambo kakuti twaliteelelela tubeni, ubobo twazhiba ati wezu cini cini ngu mufwutuli waluundu.”
Jeso Wamuponya Mwana wa Mweendelezhi
43Naakamana mazuba obile, Jeso wakakuhwa wakaya ku Galilaya. 44#Mat 13:57; Mk 6:4; Lk 4:24Jeso mwini wakapa bumboni bwakuti, kwiina mushinshimi uulemekwa mucishi ca kwabo. 45#Joh 2:23Naakashika, bantu bamu Galilaya, bakamutambula kabotu, nkaambo kabaliko kwipobwe lya kwiitilila u kubona shintu shoonse nshaakacita mu Jelusalemu ciindi ce pobwe nkaambo abo kabaliko.
46 #
Joh 2:1-11
Inzho Jeso wakabweela ku munzhi wa Kana. Koko nkwaakasandula meenzhi kuba waini. Kakuli muntu umwi mweendelezhi wakaakukwete mwana wakaakuli mulwazhi ku Kapenaumi. 47Naakateelela ati Jeso wakuhwa ku cishi ca Judiya weza ku Galilaya, wakeza kumukumbila ati akaponye mwanakwe ku Kapenaumi, nkaambo kazanda kufwa. 48Jeso wakamwita ati, “Kwiina akati kenu uushoma cita mwabona citondezho cizhinga u maleele.”
49Wezo mweendelezhi wakamwaambila Jeso ati, “Mwami kweza naatana kufwa mwanangu.”
50Ngoonaawo Jeso wakamwaambila ati, “Koya bulyo mwanako wapona.” Wezo muntu wakaashoma mazwi akaamba Jeso wakabweela kwakwe. 51Kacili munzhila, basebezhi bakwe bakamucinga bamwaambila ati, “Mwanako wapona.” 52Wakababuzha ciindi ncaakaliteelela kabotu. Bakaamba ati, “Uzona ishikati niyakamuleka impeyo.” 53Ngoonaawo ushi wakazhiba ati, nciciindi Jeso naakamwaambila ati mwanako wapona. Inzho lwakwe mwini wakashoma kubikilizha umbucihwa abo boonse. 54Aza ngu maleele abili ngaakacita Jeso ku Kana. Wakaacitila mu Galilaya ciindi naakahwa ku Judiya.
Currently Selected:
Johani 4: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.