Luka 24
24
Jeso Wabuka ku Bafwu
(Matayo 28:1-10; Maako 16:1-8; Johani 20:1-10)
1Mu buzuba butaanzhi bwa nsunda cifwumo fwumo, bakaintu bakaya ku cuumbwe, bakabweza umafwuta aanunka kalonze ngubakaakubambile. 2Bakayana ati ibwe lyakakushincilwe acuumbwe ndikunkulushe. 3Ubobo bakanjila mu cuumbwe, pele bakayana ati mutunta wa Jeso kootemo. 4Bacizhinjilwe ku makani aza, balombwana bobile basamine shikobelo shibeka beka bakeza kuzhima afwaafwi. 5Bakaintu bakatiya cini cini, bakafwulama balanga anshi, balombwana babo bakababuzha ati, “No kaamboonzhi mulakapula mumi akati kabafwu?” 6#Mat 16:21; 17:22, 23; 20:18, 19; Mk 8:31; 9:31; 10:33, 34; Lk 9:22; 18:31-33Temo mono wabuka! Amuzhibaluke mbwaakamushimwina naakucili mu Galilaya ati, 7“Mwanaa Muntu ulyeelele kwaabwa mu matashi a bantu ba shishibi, ukuyayiwa aciciinkano, ulimwi mu buzuba bwatatu ulakabuka ku bafwu.”
8Ngoonaawo bakaintu bakaazhibaluka mazwi akwe. 9Inzho bakakuhwa ku cuumbwe kuya kushimwina ba shiciiya bakwe bali ikumi uutwesha womwi aza makani, u babo bamwi bakaakumucilila Jeso. 10Bakaintu baba kabali ba Maliya Magadalena, u Joana u Maliya baina Jemusi. Inzho baba, u bakaintu bamwi mbucaakuli abo bakaya kukananina batumwa aza makani. 11Batumwa bayina nibakaashoma makani aza, bakatelaika ati ntwaambo twa musalo wabakaintu. 12Pele Pita wakazhimuka waalukancila ku cuumbwe. Naakashika wakasondela, wakabona bulyo shisani shakaakuputilwe mufwu. Wakabweela ku munzhi ulizhinjile kaambo ka ceco cakacitika.
Cakacitika Munzhila yaku Emausi
(Maako 16:12-13)
13Inzho mu buzuba bobo mbubona, balombwana bobile bakaakucilila Jeso, kabaya ku munzhi wa Emausi kuhwa ku Jelusalemu. Mushinzo wezu koolampa bamaile bali baliciloba uutwesha womwi. 14Nibakaakuya bweenda munzhila kabaya bubandika makani akacitika mu Jelusalemu. 15Nibakaakuya bweenda ukulya musalo, Jeso wakaposhoka, wabeenzha wakanka kuya bweenda abo. 16Bakamubona pele bayina kumwizhiba. 17Ngoonaawo Jeso wakababuzha ati, “Anu makaninzhi aza ngumuya bwaamba?”
Inzho bakazhima bamulanjilila balyeetezha. 18Umwi wabo uutewa ati Kiliyopasi wakamubuzha ati, “Sa uwe ndiwe mweenzu ice nana mu Jelusalemu, utashizhi shintu shakacitika ano ngoona mazuba?”
19Walo wakabuzha ati, “Anu nshintuunzhi?”
Bakamwiingula ati, “Shintu shakacitika kwa Jeso waku Nanzaleta. Wezu muntu kali mushinshimi mukando, ulimwi kayiisha u kucita milimo izoosha ku bushu bwa Leza uku bantu boonse. 20Pele bapaizhi bakando u beendelezhi ba cishi, bakamwaaba kwaamba apewe mulandu wa lufwu, inzho wakakankaminwa aciciinkano. 21Pele uswe twakaakushoma ati nguukaanununa ba Izilaili. Inzho bwasunu mbuzuba bwatatu kuhwa nicaacitika ceci. 22Bamwi bakaintu ba munkamu yesu batunzhinga. Bafwuma kuya ku cuumbwe kaacishiyashiya anshi, 23pele mutunta wakwe bayina kuuyana mu cuumbwe, nibapiluka baamba ati babona bulyo baanjelo babashimwina ati mumi. 24Ulimwi bamwi bamunkamu yesu, kabayile ku cuumbwe bayana mbubona mbubaamba bakaintu, pele walo bayina kumubona.”
25Ngoonaawo Jeso wakabaambila ati, “Umwe nubalimbushi! Umutafwambaani kuhumina shintu shoonse nshibakaamba bashinshimi. 26Sa sheshi shintu kashiteelele kucitika ku Munanike wa Leza, kwaamba anjile mu bulemu bwakwe?” 27Kuhwaawo Jeso wakabapandulwila shoonse shilembelwe mu maŋwalu shizeeme kwakwe. Kutalicila kumabuka ngaakalemba Mozesi kuya kushika kuli shesho nshibakalemba bashinshimi.
28Nibakashika afwaafwi amunzhi ngubakaakuya, Jeso wakacita ukoya shikwiitilila, 29pele balo bakamukasha baamba ati, “Utayi, bona kwashiya kale izuba lyebila katuya aŋanda.” Ngoonaawo wakayaabo amunzhi. 30Nibakasengela cakulya, wakabweza cinkwa walumba kwa Leza amane wacikomona wabapa. 31Inzho menso abo akayaluka, bakamuzhiba. Ngoonaawo wakazeluka bulyo waya cakutabonwa linji. 32Inzho bakaamba beni ubeni ati, “Bwe! Sa mazwi akwe kaatatuyasi naakukanana munzhila, ciindi naakupandulula Malembe?”
33Ngoonaawo bakazhimuka babweela ku Jelusalemu, nkubakaya kuyana batumwa bali ikumi uutwesha womwi balibungene antoomwi u bantu bamwi mbucaakuliaabo, 34balabandika ati, “Cini cini Mwami wabuka! Saimoni Pita wamubona.”
35Inzho u babo ba shiciiya bobile bakakanka kubapandulwila cakacitika munzhila, umbubakamuzhiba Jeso nakabakomwena cinkwa.
Jeso Walibonya ku Bashiciiya Bakwe
(Matayo 28:16-20; Maako 16:14-18; Johani 20:19-23; Incito 1:6-8)
36Nibakaakucipandulula aza makani, mwini Jeso wakazhima akati kabo ca shibulicila, wabaambila ati, “Luumuno alube amwe.”
37Pele bakazoowa ukutiya cini cini, kaambo bakatelaika ati babona moza mubiyabi. 38Inzho wakabaambila ati, “No mwapengaanzhi? Nkaamboonzhi ncimuzuluzha? 39Amwaabone matashi umatende angu, ndime cacini cini. Amuŋampaampe muteelele ati ndime, kaambo moza mubiyabi wiina mubili ushifwuwa ukoya mbwiinkwete ume.” 40Naakaakwaamba bobo wakabatondezha matashi umatende akwe. 41Nikuba bobo bayina nibakahumina kaambo kalutangalo ukuzoowa, inzho wakababuzha ati, “Sa kwiina cakulya ano?” 42Bakamupa citinka canswi inzoce. 43Wakacibweza walya boonse balimulanjilile.
44Ngoonaawo wakabaambila ati, “Sheshi inshisho shintu nshindakaakumwaambila lelya nindakakuli amwe, nkaambo shoonse shilembelwe mu Mulawo wa Mozesi, umalembe a bashinshimi, umu Ntembauzho, ushaamba ume shilyeelele kuzuzucizhiwa.”
45Naakaamba bobo wakeeyalula mizeezo yabo kwaamba bateeleleshe Malembe ncaamba. 46Wakabaambila ati, “Ceci ncicilembelwe ati, Munanike wa Leza ulyeelele kupenga u kubuka ku bafwu mu buzuba bwatatu, 47ulimwi ati mwizhina lyakwe makani akusanduka u kulecelelwa kwa shibi akambaukwe ku bantu bamishobo yoonse kukancila mu Jelusalemu. 48Umwe muli bakamboni ba shintu sheshi. 49#Inc 1:4Ulimwi ume ndakamutumina ceco Taata ncakashomezha, pele mulyeelele kulindila mu munzhi mono mpaka insana shihwa kwizeulu shikashice ali umwe.”
Jeso Watolwa Kwizeulu
(Maako 16:19-20; Incito 1:9-11)
50 #
Inc 1:9-11
Inzho wakabasololela kuya ku munzhi wa Betani, nibakashika koko, Jeso wakatambika matashi akwe wabalonjezha. 51Naakaakucibalonjezha wakaandaana abo, wakatolwa mwizeulu. 52Inzho bakamukomba, bamane babweela ku Jelusalemu balibotelelwe cini cini mu myonzo. 53Ciindi coonse kabanjila muŋanda ya Leza balatembaula Leza.
Currently Selected:
Luka 24: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.