1 Pita 4
4
Makani a Bumi Bupiya
1Inzho ukoya Kilisito mbwaakapenga ku mubili, amwe muli elele kulibambila kupenga, nkaambo mulizhi ati kufwumbwa upenga tanjili linji mu shibi. 2Ubobo ciindi nimucipona anshi ano, mutacilila shisushi shaku mubili, mucilile bulyo nshaazanda Leza. 3Nkaambo kale kale mwakaakucita shesho bakunze nshibazanda. Mwakaakweenda mu busofwaazhi, buhuule, bucakolwa, bulyato, kusenga cibaala u kukomba mizhimu u shibumbwa shitonda. 4Inzho ceno ciindi bakunze balazhingwa babona ati mwaleka kucitaabo shisofweele, nciceco ncibamusampaulila. 5Pele balakalyaambilila milandu yabo beni kwa Leza wezo ukaabeteka bapona u bafwu. 6Nkukaambo kako Makani Mabotu ncaakakambaucilwa ukubafwu, kwaamba nikukaba ati bakabetekwa ku mubili mbuli bantu boonse, bamana bakapone mu moza umbona mbuli mbwaapona Leza.
Kubanza Shipo sha Leza
7Inzho mamanino a shintu shoonse alyaafwaafwi. Ubobo amusungwaale cakupakamana kwaamba muzume mutakatali kukukomba. 8#Tush 10:12Cintu cikando ncakuti muzandane cakutalengaana. Nkaambo lufwuno nduluhumba shibi shinji shinji. 9Umwe amutambulane cakutatongauka. 10Uumwi cipo ceco ncaakatambula kwa Leza acisebezhe mukuyohwa beenzhiina. Mube mbuli babanzhi basebezha kabotu shipo sha luse shandeene andeene. 11Wezo ukambauka akambauke ukoya ulaamba mazwi ahwa kwa Leza. Wezo usebeza naasebeze munsana shihwa kwa Leza, kwaamba ati mu shintu shoonse Leza apewe bulemu kwiita mwa Jeso Kilisito. Ukwakwe kube bulemu u bulelo shikwense u shikwense. Ameni.
Kupenga Ukaambo ka Bukilisito
12Nubafwunwa ku Mwami, citamubeli cintu ceenzu, ulimwi mutazhingwa kumapenzhi ezhiza kwenu kumusunka ali ukoya mulilo uhwilima. 13Pele amutangale nkaambo mulapengela mwa Kilisito kwaamba akapiluka mu bulemu bwakwe, amwe mukatangale cini cini. 14Kuti naa mwasampaulwa ukaambo kezhina lya Kilisito, muli balonjezhe, nkaambo kakuti Moza wa bulemu wa Leza, muli awo. 15Kutabi u penga ukaambo kabuyazhi u butewu u bufwumpi u kunjila mu twaambo twabeni. 16Pele kuti kamupenzhewa ukaambo kakuti muli bana Kilisito mutausa insoni pe, pele mulemeke Leza ukaambo kezhina lya Kilisito. 17Inzho ciindi cashika uca kwaamba Leza akanke kubeteka bantu ba ŋanda yakwe. Naa lubeta lolu lwakancila kwesu, no cilakaba buti kuli babo batacilila Makani Mabotu ahwa kwa Leza? 18#Tush 11:31Mazwi a Leza alaamba ati,
“Kuti kacili cizumu ku mululami kwaamba akafwutulwe,
No ku mubiyabi utacilila sha Leza cilakaba buti?”
19Ubobo, babo bapenga mu luzando lwa Leza, abalipe mu matashi a Shikabumba wabo ushomeka ukutolelela kucita milimo mibotu.
Currently Selected:
1 Pita 4: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.