ROMA 16
16
ROMA 16
1Mi gisin yaak siŋg wɛ Febe yɔ gi Bɛt woosɗaakya a Yeesu fɔkya wɔ hi tees du a Kɛŋkeriya, ha̧a̧mi 2an nɛ zeg a Waar Yeesu nuŋg du anyɔ bɛrɔ a Bɛt doodɔ gbaŋgi, an nɛ wɛɛ nɛ ɗaasige a hinyɔ ha̧a̧g gedu sɛw. Ya̧a̧nɛ da ɗaas dood kittɔnɔ, ɗaas mii hi zul mi hɛw. 3Boon nis bɔ Piriskila hi waltɔ Akilas, dood wɔ hi woo Bɛt woosɔ hi mii lɛlgbunu a Kristu nuŋg du, 4hi gaa zulya̧ wɔrko an hi za̧a̧s kol mi, mi taahi baanik mi gbunu, dood wɔ hi taa Yahuduya gɛ Yeesu fɔkya ɔksilya̧ wɔ sɛw hi baanihi.
5Boon Yeesu fɔkya wɔ hi mɔksig hi raa du. Boon saam mi rɔb bɔ Hepanɛtus yɔ wɛɛ Yeesu Kristu ɗɔbsigya doosi a Aaziya hɛbtdu. 6Boon Mariyama yɔ woosin woos gbɔɔltɔnɔ. 7Boon Adronikus hi Zuniyas, nɛsɛ mi wɔ, hi da hi ginɛ a luknɔ du hi mii lɛlgbunu, wɔ hi gi dood gbɔlɛ a tɔmsyaadɛ teesdu, hii dosum Kristu ɗɔbsugɔ.
8Boon saam mi rɔb Ampilas yɔ wi ɔks hi gii a Waar Yeesu nuŋg du. 9Boon Urbɛn yɔ gɔ gi wootingo woos hi wɛɛ a Kristu nuŋg du, hi saam mi rɔb Itaskis. 10Boon Apeelɛs yɔ mɔm ya̧a̧rhant gi zuun ɗɔbsugɔ woosɛ a Kristu nuŋg du. Boon dood wɔ hi gi a Aritobulus raa du. 11Boon nɛs mi Hirodiyɔn. Boon dood wɔ hi gi a Narkis raa du hi ɗɔbsig Waar Yeesu.
12Boon Terefena hi Tirifosa, nɛɛd wɔ hi gi wook Waar Yeesu woosɛ. Boon nis bɔ Pɛris, saam wɛ rɔb yɔ woos Waar Yeesu woos gbɔɔltɔnɔ. 13Boon Rufus yɔ Waar Yeesu sɛ̧ɛ̧ge, hi nɔɔtɔ yɔ gi an nààmi hɛw. 14Boon Asiŋgirid, hi Filigɔn, Hɛrmɛs, Patorobas, Hɛrmas hi yɛ̧ɛ̧dɛ wɔ hi gi hi hii sɛw. 15Boon Filoga hi Zuuliya hi Nɛɛrus hi siŋtɔ, hi Olimpus, hi Bɛt doodɔ zaadɛ wɔ hi gi hi hiya.
16Bootinnɛ bɛttɔnɔ hi yɛ̧ɛ̧dums hat gaattɔnɔ. Kristu fɔk-yaadɛ ɔ̧ɔ̧ a lɛl wɔ hi mɔksig ge sɔmsɔm sɛw hi boon du. 17Mi gin zɔ̧ko, yɛ̧ɛ̧dɛ mi wɛ, oon zul nɛ hi dood wɔ hi taa ɛmbik an hingok rɔb bɔ hi da hi goksinɛ, hi gɔk gɛ̧ksil a nɛ teesdu hi wɛɛ hi matig dood hinha̧a̧l du. Hɛmlinɛ hi! 18Dood wɔrɔ lab hi taas Waar wɛ Kristu wooko, hi mɔkig buu ya̧a̧n kpɔd, hi maatig dood ɗaktil wɔ hi ya̧a̧hɛmnti, hi gihi sɔɔtugo an kpoosya̧ gi zɛmrɔ.
19Nɛnɛ be, dood sɛw hi mɛɛ tɔnnɛlaki, ya̧a̧nɛ mi dag hat nɛ zulha. Yɛrɛ ha̧a̧m an nɛ wɛɛ hinmɛɛkyaadɛ dubtɛ a rɔbgɔk du, wɛɛ ha̧a̧m an nɛ kɔm an dood wɔ hi mɛɛ hin gɛ a hinha̧a̧l gbaŋgi. 20Kuudu kaasi Bɛt yɔ gi gaak boolumi gi namr Saydanu a nɛ dɔɔ du. An Waar wɛ Yeesu Kristu gɛmsilɔ gi gi hi nɛya.
21Timɔte yɔ wi wootingo woos elo, hi nɛsɛ mi Lukeyus hi Yasɔn, hi Sosipatɛr hi boon du.
22Mii Teritiyus mi boon a Waar Yeesu nuŋg du, mii bi̧i̧ hinyɔ Pol ha̧a̧g raak a ɗɛɛrwol yɛrɛ gedu.
23Gayus, rɔbɛzekya mi yɔ Yeesu fɔkya hi mɔksig gi lɛl du boonɛ. Erastus, tusgbaakya bɔ a waal gbɔɔl du hi yɛ̧ɛ̧ wɛ Kawartus hi boonɛ. [ 24An Waar wɛ Yeesu Kristu gɛmsilɔ gigi hi nɛɛ sɛw. Aanbɔ! ]
25Yɛwɛ baan Bɛto, gii ɗɛɛ an gi gaan tɛŋk gi ɗaasin a gbɔnɔ du, anyɔ nɛ lag Dɔgl Rɔb yɔ mi dɔk a Yeesu Kristu zulɛ. Dɔgl Rɔb bɔ da yaat nɛ amntɔnɔ. 26Yɛrɛ dɔgl yaatilya bɔ miid ma. Bɛtya̧a̧kɛŋkya wɔ hi tuus dɔglɔ a ɗɛɛrwol wɔ hi bi̧i̧ gedu anyɔ Waar Bɛt yɔ gi waak faa da raahi hi dɔks dood dɔ̧ɔ̧t sɛw dɔglɔ an hi fɔbɔ hi ɗɔbsige. 27Gbɔlums gi a Bɛt yɔ gi hinmɛɛkya dubt gi gbunu a Yeesu Kristu nuŋg du faa! Àanbɔ!
Currently Selected:
ROMA 16: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.