1 KƆRƐŊGTU 3
3
1 KƆRƐŊGTU 3
1Yɛ̧ɛ̧dɛ mi wɛ mii hɛw mí ɗɛ̄ɛ̄ nɛ an mi boonya̧a̧ anyɔ gɔ hi boonik dood wɔ hi dag Bɛt Mɔkilɔ gɛ, mi gin book an nɛ gi dood waal du, an ya̧a̧mwaat wɔ hi yɛɛl Kristu ɗɔbsugo.
2Mi gaan naawa̧a̧lɛ an nɛ yɔ̧, mí gāan lees ɓaatil an nɛ le gɛ, yɔ nɛ ɗɛɛ lek gɛ. Yɛrɛ ɓɔryɔ yɔ nɛ ɗɛɛ gɛ hɛw, 3anyɔ nɛ waak an dood waal du te. Mi lag a ka̧a̧s gi nɛ teesdu hi gabsɛ. Nɛ́ mɛ̄ɛ̄ a hin anbɔ gi talik a nɛ teesdu, nɛ ɛmbik an dood tɔs a waal du gɛ ya?
4Anyɔ zaadɛ hi raako: a be gi Pol doo ɔ̧ɔ̧nɛ! Zaabe a be gi Apolos doo ɔ̧ɔ̧nɛ! Nɛ taa wook an doo waal du gɔ hi wook ya? 5Bɔ gi Apolos? Bɔ gi Pol? Hi gi woosyaadɛ wɔ nɛ ɗɔbs Yeesu hi dɔŋg giya anyɔ Waar Yeesu gɛ̧ɛ̧siw woosɔ.
6Wi gi an bakwoosyaadɛ, mii mi lugɔ, Apolos gubt mɛmɛ, Bɛt wɛɛ pis lɛŋks wɔ, tɔɔsihi. 7Za̧a̧nyɔ lugɔ hi za̧a̧nyɔ gubt mɛmɛ hí rı̄ı̄ hinza gɛ hi eer sɛw. Bɛt yɔ tɔɔsɔ gii tuur hinza. 8Za̧a̧nyɔ lug dɔ̧ɔ̧to hi za̧a̧nyɔ gubt mɛmɛ hi riitinu. Bɔ be gi dag dɔɔrɔɔsɔ an woosɔ yɔ woo.
9Wii be wi woosyaadɛyɔ hi Bɛto, nɛɛ be nɛ gi Bɛt bak ɔ̧ɔ̧nɛ. Zaabe nɛ gi Bɛtlukɔ yɔ wɔmɔ. 10An Bɛt gɛmsilɔ yɔ da gaami, gaami an mi mɛɛ lukwɔŋk dɔglɔ bɛttɔnɔ, mi yɛ̀ɛ̀l mi gbàà sɛŋkɔ bɔ, wɛɛ doo za zaa gi wɔŋk hage. Doo yɔ gi wɔŋk hage sɛw seeg wɔŋkyɔ gi wɔŋk bɛttɔnɔ. 11Ya̧a̧nɛ doo za ɗɛ̄ɛ̄ an gi wɛɛ gi gɔ sɛŋk za a zaabɔ hage gɛ, gɛ biitir bɔ hi gbaa, yɔ gi Yeesu Kristu.
12Yɔ anbɔ doo za gi wɔm luk bɔ hi hɛɛlmɔto, zaabe hi tusɛ, zaabe hi bet rɔbo; zaabe hi tɛ̧ɛ̧, zaabe hi hɛto, zaabe hi kokkaalɛ a sɛŋk bɔ geha, 13ɔ̧tza za̧a̧nyɔ woosɔ giro gi midɔ. Gɔ gi anbɔ za̧a̧nyɔ woosɔ giro gi mid a dɔgl-gbaak bɔ ɔ̧tɔ gedu; ya̧a̧nɛ Bɛt gi gbaa laa a dood sɛw woosya̧ muulɛ an laa bɔ gi zuun woosya̧ bɔ, kinsa bɛr ya, kinsa bɛr gɛ ya.
14Gid laa lē za̧a̧n bɔ woosɔ bɔ woo a sɛŋk bɔ hage gɛ, gi dag dɔɔrɔɔsɔ. 15Gid laa le doo za woosɔ, gi lɔɔ dɔɔrɔɔsɔ lɔɔ, gii ɔnɛ gi za̧a̧; yɔ anbɔ ɔnɛ gi gba̧a̧r lɛlsa̧a̧tigi a laadu ro ɓɔr gi ɔɔ tuuko. 16Nɛ mɛɛ a nɛ gi an Bɛtluko, wɛɛ Bɛt Mɔkilɔ gi waak a nɛ muul du!
17Za̧a̧nyɔ ha̧tir Bɛtluk bɔ, Bɛt gi ha̧tirge be! Ya̧a̧nɛ, Bɛtlukɔ bɔ gi hingaatyɔ, wɛɛ Bɛt bɔ lukɔ gɛ nɛya! 18Bɔ doo gi maat zulɔ. Gid doo za a nɛ teesdu gi mɔkig a gi hinmɛɛkya dubtyɔ a waabil yɛrɛ gedu, wɛɛg yooyɔ an kuudu gi wɛɛ hinmɛɛkya dubti. 19Ya̧a̧nɛ hinmɛɛk dubtyɔ a waal du dihɛ gi yooya̧a̧ a Bɛt muutdu. Anyɔ Bɛt ɗɛɛrwolɔ raa
a Bɛt gi hinmɛɛkya dubtɛ wa̧a̧kya a hi kɛ̧ɛ̧tig du.
20A lɛlza hi bi̧i̧ ɓɛ:
a Waar Bɛt mɛɛ hinmɛɛkya dubtɛ wɔ mɔkilya̧, mɛɛ a hi gi hintɔsyɔ.
21Ya̧a̧nɛ mi raasinɛ: bɔ muul nɛ gi ɓaa a dood muulɛ. Bɔnɛ mɔk a nɛ gi doo za ɔ̧ɔ̧nɛ. Mɛɛn a hin sɛw gi nɛɛnɛ, 22an nɔ hinɔ, an Pol giya, an Apolos giya, an Piyɛr giya, hi gi nɛnɛ, hi gi woosya nɛnɛ, an waalɛ, an waabilɛ, an wɔrko, an hinwɔ hi gi ɓɔri giya, an hinwɔ gɔ hi zaa kuudu giya, 23hin sɛw gi nɛ naan du. Nɛɛ be nɛ gi Kristu naan du. Kristu be gi Bɛt naan du.
Currently Selected:
1 KƆRƐŊGTU 3: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.