Suzan 1
1
O gbɛrɛ yiitoo dee wɔ tɛ Suzan
1Ŋma wiwii duka so sɛn Babilɔŋ, nin-a nɛ Joakim.
2A̧ baa nɛ́ Suzan, bokobem ko Hɛlkias, nɛ koo. Suzan'i duka nɛ de zɔŋa
nɛ yu kií Gasa Wan nyɛmna.
3O dáà kɔ̧-a̧ yaa so nɛ́ o widemɔ nɛ yuwar-a, ɓɛɛ wa daia a̧ ɗɔɔ heembea ko Mɔise.
4Joakim duka so nɛ zɔm mbɔi nyɛmna, ɓɛɛ a̧ a̧-a̧ so nɛ ŋma de kpɛɛfɔ, fara
ɔmtɛ, mgbak ka̧ tua kɔ̧-a̧; o Juif duka so mɛ nɛ tɛ a̧ zɔtɛɛ, wen a̧ nɛ tu̧u̧-tɛ bíí poo wa lɛŋ
5Ti pɛ‘i, wa hoka so o kutiwi yiitoo poo dukbii wen gɔna kita. Mɛ nɛ o wan nɛ
Gasa Wan baa tɔ̧ so zu wa nde:” Gɔɔmɔ tɛ̀ɛ́ nɛ Babilɔŋ, nɛ ɗoŋ o kutiwi,
o wigɔnkita, nɛ tɛ̀ɛ́ ya so zu dukbii” wo’ɛ.
6Wa mbɛt, wa yaa so nɛ́ nɛnɛ tɛ kɔ Joakim dɔ̧ɔ̧dɔ̧ɔ̧, ɓɛɛ o wi nɛ a̧-a̧ so nɛ
ŋma wen zu lɛŋ, nɛɛ́ kpa so wa sɛn hi̧i̧.
7Ɓɛɛ Suzan duka so mɛ nɛ kpɛɛfɔ ko wíi kɔ‘i yar nɛnɛ, ŋgimbi nɛ bíí
pɛsi lɛŋ, nyɛm nɛ wesé-seé-zu.
8Wese lɛŋ, o kutiwi nɔ‘i yiitoo'i zɔk so nɛ a̧ fara yee mɔ in fara yara,
ɓɛɛ wa ye tɛ dea wɔ tɛ-a.
9Taamɔ kɔ-wa kpaia lɛŋ, ɓɛ wa zɔk mɔ sitɛ Sɔ̧, kà bó nɛ taa mɔ wen gɔna
kita kɔ̧-A̧ nɛ yuwar-a, ɓɔ na.
10See-wa yiitoo lɛŋ gbɛŋ so zɛk-zɛk wen koo'i, ɓɛɛ wa kɔ̧ɔ̧ so mɛ tɔ̧ mɔ
nɛ ba tɛ-wa ha̧ ŋmaa na.
11Wen foe de nɛ wa tɛ tɔ̧̧‘e wi kɔ̧ɔ̧ mɛ ɔ in a.
12Hegɔ, wese lɛŋ, wa pɛm nɛ mɔ wen zɔka a̧, yéŋ nɛ a̧.
13Ŋma wese, wa tɔ̧̧ ha̧ ŋmaa: “Ɛɛ si tɛ k’ɛ́ɛ́, wen ŋgimbi nyɔŋa mɔ hɔa kaɗi”,
ɓɛɛ wa kɛ̧ tɛ nɛ ŋmaa ɗoŋ gboaa.
14Nɛ mɔ nɛ wa zika tɛ piinɛ ɗoŋ, ɓɛɛ kpa ŋmaa kpɔk fara'i woyo;
wa aka ŋmaa zu mɔ nɛ ba o nde lɛŋ piinɛ ɗoŋ‘i, ɓɛɛ wa gbár wómɔ
kɔ see-wa'i ha̧ ŋmaa. Hegɔ, wa ee zu-a mɛ kpa Suzan'i ɛnɛ.
O kutiwi ɓira wen-ndela e nú Suzan
15Hee mɔ'ɔ nɛ wa zɛm so nɛ de ŋgimbi ga, ŋma wese Suzan yee mɔ,
hee mɔ n'aa de ɓɔnsɛnɛ ga in o bokobe-tua yiitoo ɓɛɛ;
a̧ kɔ̧ɔ̧ so mɛ zui yi sɛn kpɛɛfɔ, wen gbɛŋmɔ nyɛmna.
16Ŋma bíí bo so kpɛɛfɔ‘i na, kana nɛ́ o kutiwi nɔ‘i yiitoo nɛ hu̧si so
pɛm nɛ mɔ‘i ɓɛɛ.
17Suzan tɔ̧a̧ ha̧ o be-zɔŋa nɔ‘i: “Ɛnɛ nɛɛ ba nɔ̧-sɔ̧-tɛ in o nɔ̧-nyama tɛnɛ
ha̧‘m, ɓɛɛ ɛnɛ kpe o nú-mɔ e zu'm, ha̧‘m zui yí.”
18Wa dea hee mɔ'ɔ nɛ Suzan tɔ̧a̧ ga: wa kpee o nú ɓoramɔ, ɓɛɛ wa gbo
nɛ ŋma nu-a, mɛ ka̧-a̧, mɛ́ nɛ̀ɛ́ ba mɔ n'a̧-a̧ aka'i tɛnɛ. Wa kɔɓi'e o kutiwi nɔ‘i
hu̧sa hi̧i̧ na.
19Yakaa ko o be-zɔŋa nɔ‘i hega, ɓɛɛ o kutiwi nɔ‘i yiitoo'i gɔm buŋdaŋ
site Suzan.
20Ɓɛɛ wa tɔ̧ ha̧ a̧: “Mɛ zɔ́k! o nú-mɔ kpeé kpeé, ŋma wi nɛ zɔk yɛ bó na!
See-yɛ gbɛŋ zɛk-zɛk wen zu mɛ geé. Mɛ kɔ̧ ɗɔa h’ɛ́ɛ́ ɔ in mɛ́ɛ́!
21“Kà bo hegɔ na, ɛ́ɛ́ tɛ ɓir wen e nú-mɛ‘e: ŋma be-ŋgaiwi duka in mɛ̀ɛ́,
nɛ́ wen zu a'i a mɛ foo nɛ o bokobe-tua kɔ-mɛ sinɛ ɗoŋ.
22Suzan pɛɛ see, ɓɛɛ tɔ̧: “Kinii, mɔ kɛra'm dam fara.
“Wen kà‘m demɔ‘i, kɔ‘m nɛ́ fio! Kà‘m de na máá, mi beka gbo
kɔ er-‘nɛ́ na mbɛt!
23Ɓɛɛ gana so a'm tik kɔ er-‘nɛ́ zu geemɔ, ba nɛ dea ɗaŋmɔ ti Gasa Wan.”
24Suzan ŋmaa nú tɛ hiɗi mɔ kɔ̧i̧-kɔ̧i̧, ɓɛɛ o sɔkawi nɔ‘i yiitoo'i
gai mɔ a zu-a mbɛt.
25Kpɔk mgbara wa maa-yì nɛ̀ɛ́ hui nú-ɓoramɔ.
26Ŋgimbi nɛ o widetom-kɔ̧-tua zia o hiɗimɔ sɛn kpɛɛfɔ‘i, wa maa yì
ye mɔ nɛ nú-ɓoramɔ mɛ ka̧-a̧ mɛ zɔk mɔ nɛ yak.
27Ɓɛɛ, tɛ o wen ko o sɔkawi nɔ‘i, foe baa o widetom, wen wi tɛ zii so
pɛrti mɔ‘i zu Suzan nɛti na.
28Mɔ sa̧-a̧, ɓɛɛ ŋgimbi nɛ o bii mɔi̧a̧ tɛ ko Joakim, wíì ko Suzan kaɗi,
o kutiwi nɔ‘i yiitoo'i hɔa, nɛ taamɔ gbe-fio kɔ-wa zu Suzan;
wa kɔ̧ɔ̧ so ha̧‘i mɛ gbɛ a̧, ɓɛɛ wa tɔ̧ ti bii lɛŋ:
29“Ɛnɛ tom sa Suzan, bokobem ko Hɛlkias, koo ko Joakim, tɛnɛ!”
wa toma sa a̧.
30A̧ tɛa in o dáà kɔ̧-a̧, o bem kɔ̧-a̧ in o nàm kɔ̧-a̧ lɛŋ.
31Suzan yora so zɔŋa nyɛmna, saŋayí-a̧ ɔ so dée nyɛmna mbɛt.
32O ɗaŋwi nɔ‘i ha̧so nú mɛ fo goi zu-a yinɛ, ha̧ wa mɛ yɛŋgi
dée kɔ̧-a̧ woyo, wen a̧ kpee so zu-a kpee.
33O nàm kɔ̧-a̧ in o wi nɛ zɔka so a̧ lɛŋ zu̧u̧ nú tɛ kɔ̧a̧.
34O sɔkawi nɔ‘i yiitoo'i kura ŋgɔn mgbara o bíí, ɓɛɛ wa a er zu Suzan.
35Suzan hi̧a̧ kɔ̧a̧ ɓér nɛ yí si yiwese, wen see-aa lɛŋ a̧-a̧ so tɛ ee ta
nɛ Gasa Wan.
36O kutiwi tɔ̧̧: “Ɛ́ɛ́ yár so yar ɛnɛ-yɛ nɛ kpɛɛfɔ, ɓɛɛ ɛ́ɛ́ zɔk koo’ɛ
fara yee mɔ in o bokobe-tua yiitoo; a̧ kpee nú mɔ, ɓɛɛ a̧ fo o bokobe-tua nɔ‘i sinɛ ɗoŋ.
37Nɛ́ mɔ nɛ ŋma be-ŋgaiwi, nɛ hu̧sa so tɛ nɛ ti, nɛa sitɛ a̧, ɓɛɛ ɔ in a̧.
38Ɛ́ɛ́ yá so k’ɛ́ɛ́ sɛn ŋma mgbíí-fɔ, ŋgimbi n’ɛɛ́ zɔka nɛ ndiŋmɔ‘i, ɛ́ɛ́ maa
nɛnɛ sitɛ wa,
39ɓɛɛ ɛ́ɛ́ kpa wa fara ɔaa in ŋmaa. Ɛ́ɛ́ ba be-ŋgaiwi'i na, wen a̧ gana yɛ nɛ
ŋgai, a̧ hu̧i̧a̧ nú-mɔ, ɓɛɛ a̧ gɔm yak;
40Nɛ ko Suzan, ɛ́ɛ́ baa a̧, ɓɛɛ ɛ́ɛ́ ak a nde be-ŋgaiwi'i nɛ o nde?
41ɓɛɛ a̧ bɛ̧ tɔ̧̧a h’ɛ́ɛ́: ɛ́ɛ́ nɛ o wi-sedaako mɔ‘i! “Giiwi kpɛka wen'i,
wen nɛ wa so nɛ o kutiwi in o wigɔnkita. Ɓɛɛ wa gɔn kita-fio zu Suzan.
42Suzan hiɗa mɔ nɛ ŋgayaa, ɓɛɛ tɔ̧: “Ho! Sɔ̧ nɛ duk ɓɔnsɛnɛ, Ɛnɛ iŋa
o mɔ nɛ ɔ hu̧sa, Ɛnɛ iŋa gun mɔ lɛŋ nɛti ha̧ mɛ hɔ;
43Ɛnɛ iŋa nɛ dea ndé wa ɓira nɛ wen-ndela e nu'm. Ɓɛɛ Ɛnɛ zɔk n'am tɛ fe
kana sɔɔgee’ɛ. Mi demɔ nɛ ɗaŋ kɔ-wa baa wa tɔ̧ nɛnɛ zu'm'i na.
Daniɛl foo wen yinɛ zu Suzan
44Gasa Wan zia tigɛr-Suzan.
45Ɓɛɛ, ŋgimbi nɛ wa tɛ̀ɛ́ baa a̧ yaknɛ mɛ gbɛ‘i, Sɔ̧ ee ŋma de sa̧-a̧ taamɔ
tɛ ŋma be-ŋgaiwi nɛ‘i sa'e Daniɛl.
46Ɓɛɛ Daniɛl hiɗi mɔ nɛ hee-gɛr'e: “Simbo tɔktɛ-koo’ɛ bo zu'm na!”
47Bíí lɛŋ aa yí nyɛm sitɛ a, ɓɛɛ wa ak a̧: “Mɛ tɔ̧ héé géé?”
48A̧ yora mgbara wa, ɓɛɛ a̧ tɔ̧: “O be-Israɛl, nɛ́ bɔkɔ a de ‘nɛ́ gɔn nɛ pɛrti
kita-fio’ɛ zu bokobe-Israɛl nde? Ɛnɛ kií mgbara-a na, ɛnɛ iŋ mgbak mɔ
nɛ yaka na mbɛt.
49“Ɛnɛ si ɗoŋ fara-kita woyo, wen o wi nɔ'ɔ ɓira nɛ wen-ndela e nú koo’ɛ.”
50Bíí lɛŋ zika tɛ sinɛ ɗoŋ fara-kita, nɛ hayaa, ɓɛɛ o oi kutiwi tɔ̧ ha̧ Daniɛl:
“Mɛ tɛ̀ɛ̀ ye mgbara yɛ, a mɛ tɔ̧ taamɔ kɔ-mɛ h’ɛ́ɛ́, wen Sɔ̧ ha̧ɗuka-taamɔ
ko mgbita bíí ha̧ mɛ.”
51Daniɛl tɔ̧̧ ha̧ wa: “Ɛnɛ kɛ̧ tɛ o wi nɔ'ɔ nyɛi nɛ ŋmaa, ɓɛɛ mi tɛ ak wa
kpɔk kpɔk.”
52Ɗoŋ nɛ‘i kɛ̧a tɛ-wa nɛ ŋmaa kaɗi, Daniɛl saa kpɔk tɛnɛ, ɓɛɛ tɔ̧ ha̧ a:
“Mɛ nɛ mɛ sɔka zu ɗaŋmɔ'ɛ, kinii o ɗaŋmɔ nɛ mɛ dea so nɛti lɛŋ tika zu-mɛ.
53“Mɛ gɔn so o kita nyɛm sɛnɛ na. Mɛ dee so ha̧ kita mɛ tik o wi nɛ wen bó
zu-wa na, gbo nɛ o wi nɛ wen a̧a̧ zu a nù sɔɔgee. Zua'i, Gasa Wan tɔ̧ɔ̧ so'e:
ká mɛ́ gbɛ wi nɛ duk zóóŋ gee na, in widemɔ nɛ yuwar-a na.
54Ɓɛɛ kinii, kà mɛ nɛ zɔka koo’ɛ nɛ mbetɛ, mɛ sa nin te nɛ mɛ zɔka wa
fara ɔaa in ŋmaa ɗɔɔ a'i h’ɛ́ɛ́!”. A̧ kifa: “Nɛ́ ɗɔɔ ndɛndɛ.”
55Daniɛl tɔ̧a̧ ha̧ a̧: “Nɛ mbetɛ, ndela kɔ-mɛ pia ɗoŋ zu mɛ!
Sɔ̧ ha̧nú kaɗi wen ha̧ betom kɔ‘i mɛ ɓir mɛ tán ka̧ see-a.”
56A̧ foo a̧ sinɛ ɗoŋ, a̧ tɔ̧ wa'a fo ɓii bíí tɛnɛ, ɓɛɛ a̧ tɔ̧ ha̧ a̧: “Mɛ, kpár be-Kanaan
nɛ mɛ bo nɛ be-Juda na’ɛ! Déè ko koo’ɛ zika zu-mɛ, ɓɛɛ wɔ tɛ-a ɔr mɛ.
57Nɛ hegɔ ɛnɛ dee so in o bokobe-Israɛl, ka wa ɔ́ nɛnɛ in ‘nɛ́ɛ́ zu kií nɛ de wa;
ɓɛɛ kpasa bokobe-Juda kpɛk ɗaŋ dee-mɔ k’ɛ́nɛ́ na.
58Kinii, mɛ tɔ̧ ha̧‘m zii: “Mɛ kpaa wa fara ɔaa in ŋmaa ɗɔɔ ge te ge?”
A̧ kifa: “Nɛ́ ɗɔɔ dɔ́mɔ́!”.
59Daniɛl tɔ̧ ha̧ a̧: “Nɛ mbetɛ, ndela kɔ-mɛ pia ɗoŋ zu mɛ! Betom ko Sɔ̧ zɛm ne
mɔ nɛ gbapaa er, mɛ ɓir mɛ tán ka̧ see-a, wen kuma ‘nɛ́ yinɛ.”
60O be-Israɛl nɛ mɔi̧a̧ lɛŋ hiɗa mɔ nɛ hee-gɛr, ɓɛɛ wa zɔn Sɔ̧ nɛ kpasi o wi
nɛ e ta nɛ A̧.
61Hegɔ, wa kura zu o kutiwi nɔ‘i yiitoo'i, wen Daniɛl kpaa ndela nú-wa.
Ɓɛɛ nɛ́ kale kpɔk bɔnɛ, nɛ o wi nɔ‘i kɔ̧ɔ̧ so, zaŋ ɗaŋ kɔ-wa, mɛ usi ha̧
ŋma-wa'i, a wa usa ha̧ wa.
62Wa gbɛɛ wa nyɛm nɛ ɗoŋ heembea ko Mɔise: hegɔ, wi nɛ wen bó zu na kpasa wese'i.
63Hɛlkias in kóò gasa Sɔ̧ wen zu bem kɔ-wa Suzan, in wii kɔ̧-a̧
Joakim ká bá nɛ̀ tuá-nam kɔ-wa lɛŋ, wen wi kpa ŋma mɔɔ-foi
tɛ dukaa ko Suzan na.
64Ɓɛɛ, nɛ́ ɗoŋ wese'i a̧ Daniɛl kpaa nɛ̀ gasi yí-bíí lɛŋ yak.
Currently Selected:
Suzan 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.