Bɛl 1
1
Daniɛl in o wiɗafi geesɔ̧ Bɛl
1Ŋgimbi nɛ wannu Astyaj fea, Syrus be-Pɛrsɛ baa wan oi aa.
2Daniɛl duka so nɛ gasa sɛm ko wannu, nɛ tu̧ so tɛ-a gan o dɔkaa lɛŋ.
3O be Babilɔŋ a̧-a̧ so nɛ ŋma geesɔ̧ nɛ wa sa'e Bɛl,
ɓɛɛ wese lɛŋ wa ɗaŋ so hee daro fuu mɔɔrɔ-ɗoŋ-kpɔk ga, o sami ɓu-na̧-a̧r,
in dɔ̧ɔ̧ hee litrɛ gɔmŋmaa yiitoo nɛ ɓu-mɔɔrɔ ga, ɗafi nɛ a̧.
4Wannu duka so mɛ zɔn geesɔ̧‘i, wese lɛŋ a̧ nɛ gas'a̧.
Daniɛl bó gasi so nɛ Sɔ̧ kɔ‘i. Wannu aka a̧: “Mɛ gasi Bɛl na wen ge?”
5A̧ kifa: “Wen n'am gasi kɔ‘m o geesɔ̧ nɛ bii dee nɛ er na, kana nɛ́ Sɔ̧
nɛ duk kpasá, nɛ dee yiwese in nù, ɓɛɛ nɛ ɔ wan zu mɔ lɛŋ nɛ duk
kpasá ɓɛɛ.”
6Wannu aka a̧ woyo: “Tɛ taamɔ kɔ-mɛ, Bɛl bó nɛ́ Sɔ̧ nɛ duk kpasá na nde?
Mɛ zɔk kɔ-mɛ o zɔm mɔ n'aa nyɔŋ in n'aa nɔ wese lɛŋ‘i na nde?”
7Daniɛl mama, ɓɛɛ tɔ̧ ha̧ a̧: “Wannu, k’ɛ́nɛ́ ɔr tɛ-‘nɛ́ na!
wen, kɔ̧-zaŋ geesɔ̧‘i nɛ́ geé mbɔɗa-gíì, ɓɛɛ nɛ zan nɛ́ geé ndɛrɛ.
A̧̧ tɛ nyɔŋ ŋma mɔ kóó nɔa mɔ ŋma wese na.”
8See-wannu ɗaŋa kus. Nɛ́ mɔ n'aa saa o wiɗafisɔ̧ kɔ̧-a̧, ɓɛɛ a̧ tɔ̧ ha̧ wa:
“K’ɛ̀nɛ̀ sa nin o wi nɛ nyɔŋ o mɔɔ-dafi-sɔ̧ nɔ'ɔ ha̧‘m na, ɛnɛ tɛ fe lɛŋ.
9“Ɓɛɛ, k’ɛnɛ usi nɛ sa̧-a̧‘e nɛ́ Bɛl a nyɔŋ wa wo, ɓɛɛ nɛ́ Daniɛl a tɛ fe,
wen n'aa da̧-a̧ Bɛl” Daniɛl kifa ha̧ wannu: “Mɔ a de, hee mɔ'ɔ n’ɛnɛ tɔ̧a̧ ga”
O wiɗafi-Bɛl yaa so nɛ ɓu-mɔɔrɔ-ɗoŋ-yiitoo, wi tɔr o okóò in o obem na.
10Wannu nɛa in Daniɛl sɛn kɔ̧ tua ko Bɛl.
11O wiɗafi-Bɛl tɔ̧a̧: “Nya̧-a̧, ɛ́ɛ́ tɛ gbo k’ɛ́ɛ́ kinii. Ɓɛɛ, k’ɛ́nɛ́, wannu,
ɛnɛ kai o nyɔŋmɔ in o dɔ̧ɔ̧ nɛ‘i gia kaɗi a ti Bɛl, ɓɛɛ ɛnɛ kpe nu tua,
ɛnɛ mán e tumbal k’ɛ́nɛ́ sɛnɛ.
12“Sa̧a̧mɔ, mɛ tutuyɛ, k’ɛnɛ nɛ tɛa kpa'e Bɛl nyɔŋ o mɔ nɔ‘i lɛŋ na,
ɓɛɛ ɛnɛ gbɛɛ yɛ; kà nɛ́ bòò hegɔ na, ɓɛɛ nɛ́ Daniɛl a tɛ fe feaa,
wen n'aa ɓira wen e nú-yɛ.”
13Ɗɛɗɛ o wiɗafi-Bɛl gɔn na, wen wa za̧-a̧ so ŋma be tóró nɛ gbo
ɗɔɔ taŋe-ɗafisɔ̧ nɛ hu̧sa̧a̧: wa gbo so nɛ hi̧i̧ nyɔŋ nɛ mɔɔdafisɔ̧ ŋgimbi lɛŋ.
14Dika gboaa kɔ-wa hega, wannu kaia nyɔŋmɔ a ti Bɛl.
Daniɛl ha̧nú ha̧ o widetom kɔ̧-a̧ mɛ pɛ bùk tɛnɛ:
wa sɛɛ dam ka̧ fara-dafi-Bɛl lɛŋ, nɛ yí wannu ɛnɛ. Wa gboo kpe nútua,
e tumbal ko wannu sɛnɛ, ɓɛɛ wa yak.
15Mɛ zaŋ zɛ, o wiɗafi-Bɛl in o koo, gu nɛ o bem kɔ‘i, tɛa, hee mɔ nɛ wa de
ɓɔnsɛnɛ ga. Wa nyɔŋa mɔ ɓɛɛ wa nɔ mɔ lɛŋ.
16Wannu kura mɛ tutuyɛ sút, ɓɛɛ yak in Daniɛl.
17A̧ aka mɔ: “Daniɛl, tumbal ɓɔna nɛ oi aa nde?”
Daniɛl kifa nú: “Ii, nya̧-a̧, wa ɓɔna nɛ oi aa.”
18Ɓɛɛ tɛ hu̧i̧a̧ nútua hega, wannu kɛ̧i̧a mɔ si zu taŋe, ɓɛɛ ŋma nú tɛ hiɗi mɔ:
“Ɛnɛ ɔ gasa wa, Bɛl! Ŋma mɔɔ-ndela bó tɛ‘nɛ́ na mbɛt!”
19Daniɛl tika mami. A̧ dora wannu tɛ yea mɔ, ɓɛɛ a̧ tɔ̧:
“Nyaa, ɛnɛ zɔ́k mɔ si mboɗɔnu! Ɛ̧ɛ̧ nɛ́ oi naŋ o?”
20Wannu kifa: “Mi zɔk nɛ́ oi naŋ o wiwii, o okóò in o obem!”
21Nɛ mɔ nɛ see-wannu ɗaŋa kús, ɓɛɛ a̧ tɔ̧ wa'a kai o wiɗafi-Bɛl, o koo
kɔ-wa in o bem kɔ-wa: wa usa hu̧sa̧ tóró nɛ wa ye nɛnɛ mɛ nyɔŋ nɛ mɔ
zu taŋe'i ha̧ a̧.
22Wannu gbɛɛ wa, ɓɛɛ e ɓoo geesɔ̧ɔ̧ Bɛl er Daniɛl, ɓɛɛ Daniɛl gbin a̧
in tua-ɗafi-a̧ mbɛt.
Daniɛl in ndiɓa
23Ŋma gasa ndiɓa, nɛ o be Babilɔŋ gasi, a̧-a̧ so sɛnɛ mbɛt.
24Wannu tɔ̧̧ ha̧ Daniɛl: “Mɛ nyɛm wan mɛ tɔ̧‘e ɛ̧ɛ̧ bó nɛ̀ sɔ̧ nɛ duk kpasa’ɛ na
Mɛ gasi a̧ gɔ!”
25Daniɛl tɔ̧a̧: “Nɛ́ Gasa Wan Sɔ̧ kɔ‘m a'm tɛ gasi ɓɛɛ, wen nɛ́ A̧ kpɔk ɓɛɛ
a duk kpasá.”
26“Nya̧-a̧, ɛnɛ e war ha̧‘m, ɓɛɛ mi tɛ gbɛ ndiɓa'i nɛ geé er-am,
gbapaa koo dɔra beka ndɔ a̧ na.” Wannu kifa: “Mi e war ha̧ mɛ́!”
27Daniɛl kaia o sɔ̧ɔ̧-te in o nɔ̧-saɗi in o buma, ɓɛɛ a̧ mɔi̧ wa lɛŋ e tɛ wee;
a̧ mboɗa wa nɛ gba-ki-aa, ɓɛɛ a̧ kai a kɔ̧ nú ndiɓa'i. Ndiɓa gura ɓɛɛ fe.
Ɓɛa Daniɛl tɔ̧: “Ɛnɛ zɔ́k mɔ n’ɛnɛ gasi.”
28Ŋgimbi nɛ o be Babilɔŋ zia nɛ nyɛrɛmɔ‘i, see-wa ɗaŋa nɛ ŋgaiaa.
Wa mɔi̧a̧ ŋmaa mɛ ku̧i̧ mɔ zu wannu, wa toa̧-a̧: “Wannu kifa Juif kaɗi:
“a̧ gbina Bɛl a nu, a̧ gbɛ ndiɓa, ɓɛɛ a̧ kum o wiɗafisɔ̧ yinɛ.”
29Nɛ mɔɔ nɛ wa nɛa tɛ wannu, ɓɛɛ wa tɔ̧ ha̧ a̧: “Mɛ e Daniɛl er-yɛ!
Kà bó hegɔ na, ɛ́ɛ́ tɛ gbɛ mɛ́ in o nam kɔ-mɛ lɛŋ.”
30Wannu zɔka'e wa nasi nɛ wi nɛ ŋgai. Ɓɛɛ hee mɔ nɛ ŋma yuwar nɛtɛ
bó na ga, a̧ ee Daniɛl er-wa.
31Wa baa Daniɛl pi̧ kɔ̧ di̧i̧ ko o dila, ɓɛɛ a̧ de zɛ mɔɔrɔ-ɗoŋ-kpɔk sɛn hi̧i̧.
32O dila mɔɔrɔ-ɗoŋ-yiitoo a̧-a̧ so kɔ̧ di̧i̧‘i. Wese lɛŋ, wi ha̧ so
nɛ wɔr bíí yiitoo in sami yiitoo ha̧ wa; ɓɛɛ wese'i wa ha̧ ŋma mɔ
ha̧ wa na, kà de ká wa nyɔna Daniɛl.
33Ŋgimbi'i, Habakuk witɔ̧wen oi nú Sɔ̧ a̧-a̧ so sɛn Judéé. A̧ huna kɔ̧,
ɓir o brɛd sɛ́kɛ́-sɛ́kɛ́ a kɔ̧ nyɛk, ɓɛɛ a̧ kai yaknɛ ha̧ o wimɔi̧nyɔnɔ
sɛn nú-fɔ kɔ̧-a̧.
34Betom ko Gasa Wan tɔ̧̧ ha̧ Habakuk: “Mɛ ba nyɔnmɔ nɛ mɛ tui'i nɛnɛ
si Babilɔŋ ha̧ Daniɛl, sɛn kɔ̧ di̧i̧ ko o dila mɛ.”
35Habakuk kifa nú: “Gasa Wan, mi tɛ hɔ Babilɔŋ nɛti na.
Mi iŋ oi di̧i̧ ko o dila'i na mbɛt.”
36Betom ko Gasa Wan tika tɛ ndoŋ-zu-a, nɔm aa nɛ mui̧zu,
ɓɛɛ ba a̧ bu̧ nɛnɛ hee harabúk ga nɛ̀ɛ̀ e sɛn Babilɔŋ nú di̧i̧‘i.
37Habakuk nɔi̧a sara tɔ̧ nɛnɛ‘e: “Daniɛl, Daniɛl, mɛ zɔ́k nyɔŋmɔ
nɛ Sɔ̧ tom tɛnɛ ha̧ mɛ hɛ̧ɛ̧.”
38Daniɛl tɔ̧̧: “Ho! Sɔ̧! Tɛ-‘Nɛ́ mgbaŋa ɗoŋ am, ɓɛɛ Ɛnɛ siŋ wi nɛ kɔ̧ɔ̧‘Nɛ́
pi̧ nù na.”
39Daniɛl kura ŋgɔn, ɓɛɛ nyɔŋ mɔ. Ɓɛɛ betom ko Gasa Wan ba Habakuk
si ɗɔŋ ɓɛlɛm e fara n'aa kpaa so a̧ sɛnɛ.
40Tɛ mɔɔrɔ-ɗoŋ-yiitoo ɔɔ zɛ, wannu tɛa mɛ hi̧i̧ Daniɛl. A̧ nɛa si nú di̧i̧,
kɛ̧i̧ mɔ, ɓɛɛ a̧ zɔk Daniɛl fara duka nù géɗɛ́k.
41Wannu ŋmaa nú tɛ hiɗi mɔ bél-bél, ɓɛɛ tɔ̧: “Gasa Wan Sɔ̧ ko Daniɛl,
Ɛ́nɛ́ ɔ gasá. Ɓɛɛ ŋma mbe Sɔ̧ yak zu'Nɛ́ bó na.”
42Ɓɛɛ a̧ dak Daniɛl gbonɛ. A̧ kaia o wi nɛ kɔ̧ɔ̧ so fio ko Daniɛl’ɛ a kɔ̧ di̧i̧,
ɓɛɛ o dila gur wa yinɛ ɓɔn yi wannu hi̧i̧.
Currently Selected:
Bɛl 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.