Be Kalata ko Jeremii 1
1
Ɛnɛ kasi zu-‘nɛ́ nɛ o geesɔ̧
1Nɛ́ wen ɗaŋmɔ n’ɛnɛ dee sitɛ Sɔ̧ a Nabukɔdɔnɔsɔr, wannu ko be Babilɔŋ tɛ kai nɛ ɛ́nɛ́ nɛ bara-biro si Babilɔŋ. 2K’ɛnɛ hɔ Babilɔŋ‘i kaɗi, ɛ́nɛ́ tɛ ya hi̧i̧ zɛ dɔ́k, pɛ gɔn mbɛt: ɛ́nɛ́ tɛ ko nɛ o bezaŋ ɗoŋ ŋmaa ɗoŋ ŋmaa war mɔɔrɔ-ɗoŋ-yiitoo; ɓɛɛ nɛ ɗoŋ, mi tɛ fo'nɛ́ gbonɛ ɗɔɔ ga̧a̧mɔ. 3Sɛn Babilɔŋ‘i, ɛ́nɛ́ tɛ zɔk o geesɔ̧ nɛ‘i duia nɛ bu-mbɔi in lɔr, kóó nɛ‘i sɛka nɛ te, nɛ o bii kai nɛ zukuɓaa, ɓɛɛ nɛ pi̧ nɛ kií tɛ o bii nɛ iŋ kpasa Sɔ̧ na. 4Hegɔ, ɛnɛ kási zu-‘nɛ́, wen k’ɛ́nɛ́ tɛ̀ɛ́ kifi hɔ ŋmaa in o gɔni-duk.
5Ŋgimbi n’ɛnɛ tɛ zɔk o bii fara gbɛ́ɛ́ zugur nù nɛ ti in nɛ ɗoŋ o geesɔ̧ nɔ‘i, gasi nɛ wa, k’ɛ́nɛ́ dé kií na! Ɓɛɛ ɛnɛ tɔ̧ kɔ see'nɛ́‘e: “Gasa Wan, nɛ́ Ɛ́nɛ́ kpɔk a'i tɛ gasi ɓɛɛ!” 6Wen betom kɔ‘m a̧-a̧ in ‘nɛ́ɛ́; nɛ́ á̧‘a̧ tɛ zɔk mɔ zu ‘nɛ́.
Ká o geesɔ̧ ɔr'nɛ́ na!
7Wen, nɛ́ ŋma widuimɔ a bɛŋa leɓe o geesɔ̧ nɔ‘i; nɛ mbetɛ, wi kpa̧i̧a nɛ́ lɔr in bu-mbɔi sɔ̧ tɛ wa, ɓɛɛ wa nɛ́ o gee mɔɔ-ɔr-mɔ, nɛ nyɛm mɛ tɔ̧ wen na. 8Wa ba lɔr, ɓɛɛ wa kara gu zu o geesɔ̧ kɔ-wa, hee mɔ nɛ‘i ɗafi nɛ tɛ ŋma bokobem nɛ kɔ̧ɔ̧ mɛ de zɔŋa ga. 9Ŋma ŋgimbi mbɛt, o wiɗafisɔ̧ zu̧ nɛ́ lɔr in bu-mbɔi tɛ o geesɔ̧ kɔ-wa nɔ‘i wen o haazi kɔ‘i, 10kóó wen ha̧ha̧ o ko-de-mɔ nɛ mbɔɗɔnu nɛ ya kɔ tua ko o sɔ̧ kɔ-wa nɔ‘i. Wa pi̧ nɛ laa tɛ o geesɔ̧, nɛ‘i dee nɛ bu-mbɔi, lɔr in te'i, hee mɛ nɛ o bii ga; 11mɔ kpɔk, mɔ nɔ‘i dor wa tɛ gbɛɛ dua, kóó tɛ ɓukaa na. 12Kà‘i pi̧ so o tóka gbɛ̧ zɔ̧-laa tɛ wa kaɗi, ɓɛɛ wi tura fuunu kɔ tua'i nɛ mboɗa saŋayi-wa'i yinɛ. 13Ŋma geesɔ̧ kasi nɛ dɔ́rá-wan, hee ŋma wi-duk-zu zikanu ga; zu-a'i, a̧ nyɛm gee nyɛmaa mɛ gbɛ wi nɛ de ɗaŋmɔ in a̧ na; 14a̧ kasi nɛ gbapaa kóó kpi̧i̧ nɛ wii-er; zu-a'i, a̧ nyɛm mɛ dor biro, kóó mɛ de ŋmaa in o wizu̧zu̧ na. Tɛ mɔ nɔ‘i, wi iŋa nɛ dea'e wa bó nɛ́ o sɔ̧ na: k’ɛ́nɛ́ de kií wa na! 15-16O geesɔ̧ kɔ-wa, nɛ wa a kɔ o tua'i, nyɛma ŋmaa in ŋma gbaa nyɛk, nɛ de tom ɓɔna’ɛ. Fuunu-naŋ o wi nɛ tɛ-mɛ zɔk wa kpee saŋayi-wa ŋmak ŋmak. 17Hee mɔ'ɔ nɛ‘i gɔm nɛ o nutua e zu wi nɛ da̧ wannu, wen mɛ mgbɔ a nɛnɛ mɛ gbɛ a̧'ɛ ga, nɛ́ hegɔ mbɛt a o wan-ɗafi-sɔ̧ nɔ‘i ŋgasi nɛ o nutua ko o sɔ̧ kɔ-wa, saŋ nɛnɛ, gɔm nɛnɛ, dor nɛ o wizu̧zu̧ tɛ ɓɔŋa o sɔ̧ nɔ‘i: 18Wa a wee tɛ o lamba mgbaŋalaa zu o geesɔ̧ nɔ‘i gan zu kɔ-wa; zu-a'i, o sɔ̧ nɔ‘i nyɛm mɛ zɔk geé zɔka ŋma kpɔk na.
19O geesɔ̧ nɔ‘i hɔɔ ŋmaa in kpaakpee tua kɔ-wa: zɔli-see-a ɓuka ɓuk lɛŋ; o zɛmɛ, nɛ gbo nɛ ɗɔɔ nù, nyɔŋa wa, kpɔk in o laa kɔ-wa, ɓɛɛ wa iŋ gee iŋaa na. 20Saŋayí-wa tu̧u̧ mbilo-mbilo nɛ ziwee nɛ tur nɛ kɔ̧ tua kɔ-wa. 21O besa̧i̧, o gbiiwara in o nɔi̧ nɛtɛ nɛtɛ bu̧ bu̧ nɛ tɛ-wa in zu-wa; o paturu a̧-a̧ sɛnɛ mbɛt. 22Tɛ mɔ‘i, ɛnɛ tɛ iŋ nde wa bó nɛ o kpasa sɔ̧ na. K’ɛ́nɛ́ de kií wa na. 23Kà ŋma bii bɛŋ lɔr nɛ‘i kpa̧i̧a̧ ɗafi nɛ tɛ-wa'i na, wa nɛ tɛ-wa nyɛm mɛ de ha̧ a̧ mɛ tɔk na, wen wa iŋ gee iŋa ŋgimbi nɛ‘i kpa̧i̧a̧ nɛnɛ na. 24O geesɔ̧ nɔ‘i nɛ ŋma gee ɔmi bó tɛ wa na, wa hi̧fi̧ nɛ gba zɔm sede. 25Hee mɔ'ɔ nɛ wa bo nɛ naŋ-wa mɛ nɛ nɔ na ga, wi tui nɛ wa e zukúɓaa-wi: wa usi nɛnɛ ha̧ o bii'e ŋma gba̧a̧mɔ kɔ-wa bó na; foe ba nɛ o widetom kɔ-wa mbɛt 26wen kà ŋma kpɔk mgbara o geesɔ̧ kɔ-wa'i hɔfi̧ tik nù, nɛ́ wa'a tɛ ba a̧ e ŋgɔn kà‘i ba a e ŋgɔn kaɗi, a̧ nyɛm mɛ nɛ nɔ nɛ tatɛ-a na; kà a nɛ ɔɔ nù, a̧ nyɛm mɛ kur nɛ tɛ-a na mbɛt. Wi nɛ ɗafi o geesɔ̧ nɔ‘i duk hee a̧ ɗafi nɛ fio ga. 27O wiɗafisɔ̧ kai kɔ‘i nɛ o saɗi nɛ‘i ɗafi nɛ o geesɔ̧ nɔ‘i ɗór nɛnɛ, nyɔŋ nɛ mbɔi-aa o koo kɔ-wa aa ŋma yi-gui mbɛt, ɓɛɛ wa kɛ̧ ŋma ha̧ o wisan in o wikúm na, kóó tikiɗi. 28O ko-zɔk-zɛ in o nana-oi-kɔra fo nɛ tɛ o saɗi-ɗafisɔ̧ nɔ‘i mbɛt. O mɔ nɔ‘i lɛŋ usi h’ɛ́nɛ́‘e wa bó nɛ o kpasa sɔ̧ na: k’ɛ́nɛ́ de kií wa na!
Wi yɔ nɛ kaya sa nɛ wa'e Sɔ̧
29O sɔ̧-sɛka-te, o sɔ̧-lɔr in o sɔ̧-bu-mbɔi nɔ‘i, nɛ́ o okóò a ɗafi wa; ɓɛɛ nɛ́ hee ge a'i tɛ sa nɛ wa'e o sɔ̧ ge? 30Sɛn kɔ̧ tua ko o geesɔ̧ nɔ‘i, o wiɗafi-wa ya nɛ nù, nɛ a̧ka laa, mui̧zu-wa in zera kpuia lɛŋ, wa gu mɔ zu-wa na mbɛt. 31Wa bembi bembi, hiɗi nɛ mɔ ti o geesɔ̧ kɔ-wa nɔ‘i, hee mɔ nɛ o ŋma bii de nɛnɛ tɛ nyɔŋmɔ fio’ɛ ga. 32O wan-ɗafi-sɔ̧ kpɔ̧i̧ nɛ o laa tɛ o sɔ̧ kɔ-wa nɔ‘i a nɛnɛ tɛ o koo in o bem kɔ‘i.
33Kóó wi de nɛ ɗaŋmɔ kóó demɔ sitɛ o sɔ̧ nɔ‘i, wa nyɛm mɛ kifi er na; wa nyɛm mɛ ba ŋma bii e zu wan kà bó nɛ gboa a̧ yinɛ na. 34Wa nyɛm mɛ ha̧ mbɔi ha̧ bíí, kà bó nɛ sede na. Kà ŋma bii ha̧ nú mɛ ha̧ ŋma mɔ ha̧ wa ɓɛɛ n'aa ha̧ na, wa nyɛm mɛ ak na. 35Wa nyɛm mɛ kpasi bii yi fio kà bó nɛ ɓárá wiɓɔsa er wan-ŋgai na. 36Wa beka hu̧i̧ yi wan-boma-yí na, wa nyɛm mɛ gbak bii yi bɔnɛ na mbɛt. 37Wa beka de ko ha̧ ko-oi na, wa beka gbak o be-oi na mbɛt. 38O sɛka-te nɔ‘i, nɛ‘i sɔ̧ɔ̧ lɔr in bu-mbɔi tɛ wa'i, hɔ̧ɔ̧ ŋmaa in o ta nɛ‘i za̧-a̧ zaŋ kaya: foe tɛ ba o wi nɛ de tom ha̧ wa. 39Ɓɛɛ hee ge a'i tɛ ta nɛnɛ, kóó tɔ̧ɔ̧ nɛnɛ‘e wa nɛ o sɔ̧ wo ge? 40Ŋma mɔ woyo nɛ mɔ'ɔ, wen o be-Kaldee nɛ zu mbɛt pi nɛ foe tɛ wa: Kà wa kpa ŋma mukɛ̧ nɛ tɔ̧ wen na, ɓɛɛ wa mgbɔɔ nɛnɛ tɛ sɔ̧ kɔ-wa Bɛl, kɔfi nɛ a̧ ha̧ mukɛ̧‘i mɛ tɔ̧ wen, hee Bɛl'i zií so mɔ ziì ga. 41O wi nɔ‘i nyɛm gee nyɛmaa mɛ ta mɔ mɛ bɛ̧ o geesɔ̧ nɔ‘i nɛ bo nɛ iŋa-mgbara-mɔ na'i na. 42O okóò hɛr nɛ guntir nɛ gba̧a̧-pɛr, ɓɛɛ wa yaa ka̧ yuwar dɔ nɛ púmyúlú-mɔ. 43Kà ŋma wi-ɓir-war sa ŋma mgbara wa, ɔ in a̧ nɛ dala nde, kóó‘i ye nɛ tɛ pi̧i̧ foe tɛ ŋma'a? I̧ nɛ kpa de sɔnti hee a̧ ga, ha̧ ŋma bii mɛ bur gba̧a̧-pɛr kɔ̧-a̧ na'i. 44Mɔ nɛ‘i de sitɛ o geesɔ̧ nɔ‘i lɛŋ nɛ o mɔ-ndela; ɓɛɛ nɛ́ hee ge a'i tɛ ta nɛnɛ tɔ̧ nɛnɛ‘e wa nɛ́ o sɔ̧ wo ge? 45Nɛ́ o wi-sɛk-te in o widuimɔ a dee wa: wa kpai yak zu mɔ nɛ o wi nɛ dee wa kɔ̧oa̧ ha̧ wa mɛ duk na. 46O wi nɛ dee wa'i nɛ zu mbɛt beka ya zaŋnu ɗoŋ-aa nyɛi̧ na. 47Ɓɛɛ nɛ́ hee ge a o mɔ nɛ wa dee nɛ er-wa tɛ ya nɛ́ o sɔ̧ ge? Nɛ́ o mɔ'ɔ-ndela in o mɔ'ɔ-foe a o wi nɔ‘i e ha̧ o bezaŋ-wa. 48Kà biro kóó ŋma ŋgaŋamɔ tik zu o geesɔ̧ nɔ‘i, ɓɛɛ wiɗafi-wa mɔi̧a̧ ba keta mɛ zɔk fara nɛ wa tɛ hu̧si sɛnɛ in o geesɔ̧ nɔ‘i.
49O geesɔ̧ nɔ‘i nyɛm mɛ kpasi tɛ-wa nɛ tɛ-wa, tɛ ŋgimbi biro kóó ŋgimbi ŋgaŋamɔ na, ɓɛɛ heé ge a'i beka nyɛm mɛ zɔk'e wa bo nɛ o sɔ̧ wo na ge? 50Mɛ nɛ o gee sɛkate nɛ‘i sɔ̧ɔ̧ lɔr in bu-mbɔi sɛnɛ; wi tɛ iŋ nɛ ɗoŋ nde wa nɛ o geé mɔɔ-ɔr-wi. O dukbii in o wannu lɛŋ tɛ zɔk nɛ sa̧-a̧‘e wa bo nɛ o sɔ̧ na, ɓɛɛ mɛ nɛ o mɔ nɛ bii dea nɛ er, ŋma mɔɔ tɛ sɔ̧ bó tɛ wa na. 51Bíí nɛ zɔk nɛ sa̧-a̧‘e wa bó nɛ o sɔ̧ na na, nɛ́ o? 52Wa nyɛm mɛ hok wan e zu ŋma nù, kà bó nɛ dea ha̧ koro mɛ hɔ a zu bii na. 53Wa nyɛm mɛ gɔn kita kɔ-wa nɛ zu-wa, kà bó nɛ gboo bii nɛ zɔk bɔnɛ zu mɔ n'aa de na yinɛ na: ŋma gba̧a̧mɔ kɔ-wa bo na. 54Wa ya hee o gba-kɔra nɛ bu̧i̧ yambali nɛ mgbara yizan’ɛ ga. Ɓɛɛ kà wee tik zu tua ko o geesɔ̧-sɛkatɛ nɛ wa kpa̧i̧a lɔr in bu-mbɔi sɔ̧ sɛnɛ‘i, o wiɗafi-wa tɛ gɔm kɔ‘i yak nɛ̀ɛ́ hu̧si, ŋma mɔ ndɔ wa na; ɓɛɛ wa tɛ bii kɔ-wa wee lɛŋ gbuɗuk hee ŋma kpaakpee-tua a wee baa ga. 55Wa nyɛm mɛ yor ti ŋma wannu kóó ti ŋma wisɛn na. 56Ɓɛɛ hee ge a'i tɛ ta, kóó tɔ̧ nɛnɛ‘e wa nɛ́ o sɔ̧ wo ge?
Gba̧a̧mɔ bo tɛ o geesɔ̧ na
O geesɔ̧ nɔ‘i, nɛ‘i dee nɛ sɛkate, ɓɛɛ wi sɔ̧ lɔr in bu-mbɔi sɛnɛ‘i, nyɛm mɛ gɔm yak er o wizu̧zu̧ kóó er o kpɔ̧i̧-gba̧a̧nin na. 57Kóó ŋma wan-ŋgai a tɛ̀ɛ́ gbɛr lɔr in bu-mbɔi tɛ-wa yinɛ, zu̧ nɛ laa, nɛ kpe tɛ-wa yak nɛnɛ, wa nyɛm mɛ de ŋma mɔ na. 58Ɓɛɛ, ŋma wannu nɛ usi ŋgai kɔ‘i fara biro, kóó nyɛk nɛ duk kɔ tua, gbak nɛ wan-aa’ɛ, gana o geesɔ̧ nɔ‘i; kpárnutua nɛ kpe zu mɔ nɛ a̧-a̧ kɔ tua, in mbiŋte nɛ tɔi gɛr-tua ko wannu e ŋgɔn’ɛ gana o geesɔ̧ nɔ‘i mbɛt.
59Wen wese, nyaŋazɛ in o sɔra nɛ tok, gbak nɛ o bii, wa mbo nɛ zu; 60pi̧i̧koro mbɛt, nɛ́ gba de-mɔɔ-zɔk; búk nɛ yu dam fara lɛŋ ɔ dée mbɛt. 61Kà Sɔ̧ ha̧ nú‘e o turazan a yar dam zu nù lɛŋ wo, wa de kana nɛ mɔ n'Aa tɔ̧. 62Wee, nɛ Sɔ̧ tom nɛ ŋgɔn mɛ, dɔ nɛ o kaya in o kombo, de kana nɛ mɔ n'Aa tɔ̧. Kóó nɛ́ dée, kóó nɛ ŋgai, o geesɔ̧ nɔ‘i hɔ gee hɔɔ ŋmaa in o mɔ nɔ‘i n’ɛɛ́ tɔra'i na. 63Ɓɛɛ, tɛ o mɔ nɔ‘i, wi nyɛma mɛ ta in mɛ tɔ̧‘e wa bó nɛ́ o sɔ̧ na, wen nɛ wa nyɛm mɛ gɔn kita in mɛ gbak bii na. 64Ɛnɛ iŋa kaɗi'e wa bó nɛ́ o sɔ̧ na. K’ɛ́nɛ́ de kií wa na. 65Wen, wa nyɛm mɛ tok ɗaŋ yoŋgo, kóó dea, a zu o wannu na. 66Wa nyɛm mɛ de o mɔɔkifi mɛ yizan nɛ yí o dukbii na. Wa nyɛm mɛ tok hee wese ga, ka̧ bó nɛ nyɛkaa hee nyaŋgazɛ ga na. 67O saɗi-zaŋbɛɛ gana o geesɔ̧ nɔ‘i, wen wa nyɛma yuu mɔ husi, kpasi nɛ tɛ-wa. 68Ŋma mɔ nɛ usi'e wa nɛ́ o sɔ̧ wo bó na, kóó tikiɗi: hegɔ, k’ɛ́nɛ́ de kii wa na! 69Naá-nduŋ-tunyuŋ-ndak-nɔi̧ nú fɔ-gala nyɛm mɛ pɛm gala'i na. O geesɔ̧ kɔ-wa, nɛ‘i sɔ̧ɔ̧ lɔr in bu-mbɔi tɛ wa'i, ya hega mbɛt. 70O geesɔ̧-sɛkate kɔ-wa, nɛ‘i sɔ̧ɔ̧ lɔr in bu-mbɔi sɛnɛ‘i, hɔɔ ŋmaa in ŋma tɛn-te nɛ duk kpɛɛfɔ; ɓɛɛ nɛ o nɔi̧ lɛŋ gu sɛnɛ, kóó in ŋma wɔr-bii nɛ‘i ba pi̧ taŋ kɔ̧́ kɔ̧'ɛ. 71Tɛ o de gbɛ́ zɔ̧-laa-godo kɔ-wa nɛ ɓúk, ɛnɛ tɛ iŋ nɛ dea'e wa bó nɛ o sɔ̧ na. Sɔŋkur-aa, nɛ́ dadaka a tɛ dak wa haksak, ɓɛɛ wa pi̧i̧ nɛ bú zu o be nu. 72Ɓɛɛ gana so widemɔ nɛ yuwar-a, nɛ bó kɔ‘i nɛ o geesɔ̧ na’ɛ: foe beka de a̧ na.
Currently Selected:
Be Kalata ko Jeremii 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.