HEBREU 1
1
Sɔ̧ tɔ̧ɔ̧ wen h’ɛ́ɛ́ nɛ̀ tɛ̀ Bem kɔ‘i
1Sɔ̧ tɔ̧ɔ̧ so wen ha̧ o zɔmdáa k’ɛ́ɛ́ ɓeemɛ war ɔ dɔka in tɛ̀ yuwar-a nɛtɛ nɛtɛ mbɛt nɛ̀ nú o wi-tɔ̧-wen oi nú-a. 2Ɓɛɛ tɛ́ sɔŋkur ŋgimbi n’ɛ̀ɛ̀ ya sɛnɛ'ɛ, a̧ tɔ̧ɔ̧ wen h’ɛ́ɛ́ nɛ̀ ɗoŋ Bem kɔ̧-a̧. Nɛ̀ ɗoŋ à̧ á̧ Sɔ̧ dee nɛ̀ mɔ lɛŋ, ɓɛɛ nɛ́ à̧ á̧ Sɔ̧ ea wen ha̧ mɔ lɛŋ mɛ́ duk nɛ́ kɔ̧-a̧. 3Bem’ɛi nɛ́ sa̧a̧mɔ nɛ̀ usi nɛ́ gasamɔ ko Sɔ̧, mɔ nɛ̀ a̧a̧ tɛ́ a̧ a̧a̧ tɛ́ Sɔ̧, ɓɛɛ nɛ́ a̧ a̧ kasi mɔ lɛŋ tɛ ŋgayamɔ ko wen kɔ̧-a̧. Ɗoŋ n'aa tɛ̀ɛ́ ɗafi war-tɛ o bíí wen ɗaŋmɔ kɔ-wa kaɗi, a̧ nɛ̀ɛ́ dúk nù nɛ̀ war wii-er Sɔ̧ Wan nɛ̀ ɔ gasa ŋgɔn mɛ.
Bem ko Sɔ̧ gana o betom mɛ yiwese
4Nin nɛ̀ Bem’ɛi kpaa gana ko o betom mɛ yiwese mɛ̀; nɛ́ hegɔ mbɛt á̧ à̧ gana nɛ̀ wa lɛŋ. 5Mgbara o betom lɛŋ Sɔ̧ tɛ tɔ̧ ha̧ ŋma'e:
«Mɛ́ nɛ́ Bem kɔ‘m,
mi koo mɛ́ sɔsɔɔ,»
kóó‘e:
«Mi tɛ́ duk nɛ́ Dáà kɔ̧-a̧
ɓɛɛ a̧ duka nɛ́ Bem kɔ‘m», hɔ̧ɔ̧ na.#Gima 2.7; 2 Sam 7.14; 1 Kal Ny 17.13
6Ɓɛɛ ŋgimbi n'aa ee nɛ̀ kaya-bem kɔ̧-a̧ sɛn zaŋnu, a̧ tɔ̧ɔ̧‘e:
«O betom ko Sɔ̧ lɛŋ a̧ gú nù ti a̧.»#Wee-ɗoŋ-he 32.43
7Nɛ̀ war ko o betom mɛ yiwese, a̧ tɔ̧a̧:
«Nɛ́ a̧ a̧ dé ha̧ o betom kɔ̧-a̧ mɛ́ ya hee búk ga,
in ha̧ o wi-de-tom kɔ̧-a̧ mɛ́ ya hee leɓe-wee ga.»#Gima 104.4
8Ɓɛɛ a̧ tɔ̧ɔ̧ ha̧ Bem kɔ̧-a̧ hee mɔ'ɔ ga:
«Sɔ̧, damti kɔ-mɛ tɛ́ duk ɓɔnsɛnɛ.
Dɔra-wan kɔ-mɛ tɛ́ duk nɛ́ dɔra deemɔ nɛ̀ yuwar-a.#Gima 45.7-8
9Mɛ́ kɔ̧ɔ̧ so nɛ́ deemɔ nɛ̀ yuwar-a, ɓɛɛ mɛ́ sɛn ɗaŋmɔ;
mɛ̀ nɛ́ hegɔ, sa Sɔ̧, Sɔ̧ kɔ-mɛ, tɛn nɔ̧́-tortɛ a zu mɛ́,
ba nɛ̀ mɛ́ e ŋgɔn mgbara o ŋmà-mɛ lɛŋ.»
10A̧ tɔ̧ɔ̧ woyo mbɛt'e:
«Gasa Wan, nɛ́ ɛ́nɛ́'ɛ dee nù nɛ̀ ku̧u̧naŋ-a mɛ,
ɓɛɛ yiwese nɛ́ tom nɛ̀ er'nɛ́ dea.#Gima 102.26-28
11O mɔɔ nɔ‘i lɛŋ tɛ́ ɗaŋ,
ɓɛɛ kànà nɛ́ ɛ́nɛ́'ɛ tɛ́ duk ɓɔnsɛnɛ.
Duka-a ko o mɔɔ nɔ‘i hɔɔ ŋmaa in laa nɛ̀ sɔk,
ɓɛɛ a̧ka̧ a nù'ɛ ga.
12Ɛ́nɛ́ tɛ́ gbin wa a zu ŋmaa hee mɔ'ɔ nɛ̀‘i
gbin nɛ̀ gba-laa’ɛ ga.
Ɛ́nɛ́ tɛ́ kpai wa hee mɔ'ɔ nɛ‘i kpai nɛ̀ laa’ɛ ga.
Ɓɛɛ k’ɛ́nɛ́, ɛ́nɛ́ kpai na,
nduti pɛ duka-a k’ɛ́nɛ́ bó na hegɔɔ kpoo nɛ kpoo.»
13Sɔ̧ tɔ̧ɔ̧ ha̧ ŋma betom'e:
«Mɛ̀ dúk nù nɛ̀ war wii-er-am
hɔ ŋgimbi n'am tɛ́ de ha̧ mɛ́ mɛ́ kpa ŋgai
zu o wi-sɛn-mɛ», kaɗi nde?#Gima 110.1
14Bó nɛ́ o betom mɛ yiwese lɛŋ nɛ́ o ɔmi nɛ̀ ya wen dee tom, nɛ̀ Sɔ̧ tom wa mɛ́ gbak o bíí nɛ̀ tɛ́ kpa yuwar-duka-kpasa nɛ̀ mɔɔ-oi na nde?
Currently Selected:
HEBREU 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.