FILEMƆŊ 1
1
Fanamɔ
1Nɛ́ mi Paul nɛ̀ yee zɔɓɔ wen zu Jesu Krist, in nya-wi Timotee, a̧ tom kalata’ɛ ha̧ Filemɔŋ, gbama wi-de-tom k’ɛ́ɛ́, n’ɛ̀ɛ̀ kɔ̧ɔ̧ nyɛmna, 2in ha̧ boko-nya yɛ Apia, ha̧ gbama-wi-biro in yɛɛ, Arkip, in ha̧ zuduk bíí ko Krist nɛ̀ mɔi̧ kɔ̧ tua kɔ-mɛ.#Kol 4.17 3Deemɔ nɛ̀ ta-tɛ in ga̧a̧mɔ ko Dáà k’ɛ́ɛ́ Sɔ̧ in ko Gasa Wan Jesu Krist a̧ dúk in'nɛ̀ɛ́.
Kɔ̧ɔ̧mɔ in kɔ̧ɔ̧ɗɔɔwen ko Filemɔŋ
4Mi sa nin mɛ́ tɛ̀ kɔfa-sɔ̧ kɔ‘m de nɛ̀ osoko ɓɔnsɛnɛ, 5wen mi zia nyɛrɛ kɔ̧ɔ̧ɗɔɔwen kɔ-mɛ wen Gasa Wan Jesu, in kɔ̧ɔ̧mɔ nɛ̀ mɛ usi ha̧ o sa̧a̧-bíí lɛŋ. 6Kɔfa-sɔ̧ kɔ‘m mɛ̀ nɛ́ wen ha̧ duka-a kɔ-mɛ kpɔk in yɛɛ sɛn tɛ kɔ̧ɔ̧ɗɔɔwen mɛ́ duk nɛ́ kpasamɔ, wen há̧ o bíí lɛŋ mɛ́ zɔk o demɔ lɛŋ n’ɛ̀ɛ̀ kpa zaŋ duka-a k’ɛ́ɛ́ ín Krist.#1.6b wen há̧ o bíí lɛ́ŋ mɛ́ zɔ̀k ó démɔ̀ lɛ́ŋ n’ɛ̀ɛ̀ kpá zaŋ dúká-a k’ɛ́ɛ́ ín Krist: ó ŋma wí-kpai-kalata tɔ̧a: mɛ̀ dè há̧ ó bíí lɛ́ŋ mɛ́ ìŋ démɔ̀ lɛ́ŋ n’ɛ̀ɛ̀ nyɛ̀má mɛ́ dè há̧ Krist. 7Nya'm, mi kpaa desee nyɛmna, see-am ga̧a̧ mbɛt tɛ̀ zia nyɛrɛ kɔ̧ɔ̧mɔ kɔ-mɛ; o sa̧a̧-bíí ko Sɔ̧ lɛŋ kpaa nɔɔ-ŋgiɗi wen zu mɔ nɛ̀ mɛ́ dee in wa.
Aka ŋma mɔ wen zu Onesim
8Mi a̧a̧ nɛ̀ ŋgai nɛ̀ ɗoŋ Krist mɛ́ yɔr mɔ nɛ̀ mɛ tɛ de, 9ɓɛɛ nɛ́ kɔ̧ɔ̧mɔ a̧‘m kɔ̧ɔ̧ mɛ́ tɔ̧ nɛ̀ wen'i ha̧ mɛ́. Nɛ́ mi Paul, gbɛrɛ nɛ̀ duk kɔ̧ zɔɓɔ kinii wen zu Jesu Krist, a̧ tom kalata’ɛ. 10Mi ai nú ha̧ mɛ́ wen zu Onesim, bem kɔ‘m n'am koo so tɛ Krist kɔ̧ zɔɓɔ.#Kol 4.9 11Nɛti ŋma mɔ n'aa dee ha̧ mɛ, bo na; ɓɛɛ kinii, a̧ tɛ́ gbak mɛ́ in am mbɛt.
12Onesim nɛ́ mgbák wi nɛ̀ duk yí see-am, ɓɛɛ mi tom nɛ́ a̧ si ɗoŋ ha̧ mɛ. 13Mi kɔ̧ɔ̧ so mɛ́ dor a̧, ha̧ a̧ mɛ́ gbak am oi nú mɛ́ zaŋ zɔɓɔ De Mbe Wen n'am duk sɛnɛ'ɛ; 14mi kɔ̧ mɛ́ yak zu mɛ́ de nɛ̀ ŋma demɔ na, wen ká deemɔ‘i tɛɛ duk zu mɛ́ hee ŋma mɔɔ-ŋgai ga; ɓɛɛ nɛ́ mɔ nɛ̀ mɛ́ tɛ́ kɔ̧ ɛ̧.
15Ŋmafara nɛ́ be ŋgimbi tikiɗi a̧ Onesim yuu nɛnɛ katɛ mɛ, ha̧ mɛ mɛ kpa a̧ woyo kpoo nɛ kpoo. 16Bó nɛ́ duka-a hee bara ga ɓɔna, ɓɛɛ nɛ́ duka-a nɛ̀ tɛ́ de gan ko bara: a̧ nɛ́ nya yɛ n’ɛ̀ɛ̀ kɔ̧ɔ̧ nyɛmna. War kɔ‘m mi kɔ̧ɔ̧ a̧ nyɛmna, ɓɛɛ war kɔ-mɛ tɛ́ gan kɔ‘m, tɛ̀ zɔka a̧ hee bara ga, in hee nya-wi nɛ̀ ɗoŋ Krist ga.
17Kà mɛ̀ nɛ́ kpɛka'm hee nya-mɛ ga nɛ̀ ɗoŋ kɔ̧ɔ̧ɗɔɔwen, ɓɛɛ mɛ̀ kpɛ́k a̧ hee mi ga. 18Ɓɛɛ kà a̧ nɛ́ dee ŋma ɗaŋmɔ in mɛ̀ɛ́ nɛti, kóó ŋma nyamandoi kɔ-mɛ nɛ́ ɓɔna zu a̧, nɛ̀ mɛ̀ é zu'm. 19Nɛ́ mi Paul a̧ yɔr wen’ɛ nɛ̀ er-am ha̧ mɛ́‘e ndé, mi tɛ gbo nyamandoi'i, ɓɛɛ mi beka tɔ̧ war kɔ‘m nɛ̀ duk zu mɛ‘i na: nyamandoi'i nɛ́ kiitɛ-mɛ nɛ̀ zu-mɛ. 20Nya'm, mɛ̀ dé mɔ n'am aka'i ha̧‘m nɛ̀ ɗoŋ Gasa Wan; mɛ̀ há̧ nɔɔ-ŋgiɗi ha̧ see-am tɛ Krist.
21Mi yɔr kalata’ɛ ha̧ mɛ́ wen mi iŋa mboozu kɔ-mɛ, ɓɛɛ mi iŋa'e mɛ́ tɛ́ de mɔ gan zu mɔ n'am aka'i. 22Mɛ̀ ɗáfí ŋma tua-ɔɔ ha̧‘m mbɛt, wen mi taa, wa tɛ́ gbo'm ha̧‘m mɛ́ si ɗoŋ tɛ‘nɛ́, wen zu kɔfa-sɔ̧ k’ɛ́nɛ́.
Sɔŋkur fanamɔ
23Epafras, sɛm kɔ‘m n’ɛ̀ɛ̀ de zɔɓɔ in ŋmaa wen zu Jesu Krist, fana mɛ́;#Kol 1.7; 4.12 24o gbama wi-de-tom kɔ‘m Mark, Aristark, Demas, in Luk fana mɛ́ mbɛt.#Tom 12.12,25; 13.13; 15.37-39; 19.29; 27.2; Kol 4.10,14; 2 Tim 4.10,11
25Deemɔ nɛ̀ ta-tɛ ko Gasa Wan Jesu Krist a̧ dúk in'nɛ̀ɛ́.
Currently Selected:
FILEMƆŊ 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.