ƐSDRAS 10
10
Ndaka o ko-gɔni-duk
1Ɛsdras ɔɔ nù hí̧í̧ nɛ̀ kɔ̧a̧ nú Tua ko Sɔ̧, kɔfi nɛ̀ Sɔ̧, gbar nɛ̀ ɗaŋmɔ kɔ‘i. Nɛ mɔ'ɔ nɛ gíí be Israɛl, o wiwii, o okoo, ká bá nɛ̀ o obem mɔi̧a katɛ a̧ hí̧í̧ nɛ̀ kɔ̧a̧ nyɛmna. 2Sɛkania bem ko Yehiɛl, ŋma bezaŋ Elam tɔ̧ɔ̧ ha̧ Ɛsdras: «Báá ko-gɔni-duk n’ɛɛ baa tɛ o bíí nù hɛ̧ɛ̧, nɛ́ ŋgazu ɛɛ dee ti Sɔ̧ k’ɛɛ, ɓɛɛ zu mɔ‘i, ŋma be mɔ ha̧ o be Israɛl mɛ e nɛ̀ ta a̧a̧ kànà sɛnɛ. 3Ɛ̀ɛ̀ nɔ́ tɔk há̧ nɛ̀ nú ti Sɔ̧ ndé, ɛɛ tɛ ndak o ko-gɔni-duk n’ɛɛ baa in o bem n’ɛɛ kòó in wa, nyɛm nɛ ɗoŋ mbɔrɔ k’ɛ́nɛ́ in o wi nɛ mbo zu tɛ o geŋa ko Sɔ̧ k’ɛɛ. A'i dé mɔ nyɛm nɛ ɗoŋ Heembea. 4Ɛ̀nɛ̀ kúr wen wen’ɛ zɔk nɛ́ ɛ́nɛ́! Ɛɛ a̧a̧ ɗoŋ‘nɛ́! Ɛ̀nɛ̀ nɔ́ ŋgiɗi wen dee tom!»
5Nɛ mɔ'ɔ nɛ Ɛsdras kura, ɓɛɛ tɔ̧ ha̧ o gasawi ko o wi-ɗafi-sɔ̧ in o be Levii gú nɛ̀ o bíí Israɛl lɛŋ‘e, wa a̧ kán mɔ ndé, wa tɛ de mɔ nɛ wi’ɛi tɔ̧a̧‘i. Ɓɛɛ wa kan mɔ. 6Ɛsdras kura nú Tua ko Sɔ̧, ɓɛɛ yak si tɛ ko Yohanaŋ bem ko Eliasib. N'aa hɔɔ hi̧i̧, a̧ nyɔŋ mɔ na, a̧ nɔ yì na mbɛt, wen a̧ zim nɛ mɔ wen zu ŋgazu ko o wi nɛ pia nɛ tɛ bara.
7Wa hee mbea sɛn Juda in sɛn Jerusalɛm ha̧ o bíí nɛ pia nɛ tɛ bara mɛ mɔi̧ ŋmaa si Jerusalɛm. 8O gasawi in o kuti-wi tɔ̧ɔ̧ ndè, wi nɛ beka mɔi̧ zaŋ zɛ nɔ'ɔ taar’ɛ na, wi tɛ kai mɔ kɔ̧-a̧ lɛŋ, ɓɛɛ wi ndaka a̧ yinɛ mgbara o bíí nɛ pia nɛ tɛ bara. 9Hegɔ, wiwii nù Juda in Bɛnjamin mɔi̧a ŋmaa lɛŋ sɛn Jerusalɛm zaŋ zɛ nɔ‘i taar'i. Duka nɛ́ ɓu-yiitoo ɔɔ-zɛ tɛ mɔɔrɔ-ɗoŋ-naar fio-zɛ. O bíí lɛŋ yaa bee-gara nú Tua ko Sɔ̧; tɛ-wa nak nak tɛ wen'i nɛ kpaa wa'i in wen kórò nɛ̀ ŋma wa'i mbɛt.
10Ɛsdras wi-ɗafi-sɔ̧ kura ɓɛɛ tɔ̧ ha̧ wa: «Ɛ́nɛ́ dee ŋgazu ɓɛɛ báá o ko-gɔni-duk n’ɛnɛ baa dee ha̧ ɗaŋmɔ ko o be Israɛl mɛ gasi. 11Kinii, ɛ̀nɛ̀ gbár ɗaŋmɔ k’ɛ́nɛ́ ha̧ GASA WAN Sɔ̧ ko o dáà k’ɛ́nɛ́, ɓɛɛ ɛ̀nɛ̀ dé nɛ mɔ nɛ see-aa kɔ̧a̧. Ɛ̀nɛ̀ kɛ̧́ tɛ‘nɛ́ nɛ o bíí nù'ɛ, ɓɛɛ ɛ̀nɛ̀ kɛ̧́ tɛ‘nɛ́ nɛ o ko-gɔni-duk nɔ‘i mbɛt.»
12Bíí lɛŋ kɔ̧ɔ̧ ɗɔaa nɛ hee ger: «Nɛ mbetɛ! Ɛɛ tɛ de mɔ nyɛm nɛ̀ ɗoŋ wen k’ɛ́nɛ́. 13Ɓɛɛ hee mɔ'ɔ nɛ bíí ɔ dɔka in nɛ́ ŋgimbi-ɓar ga, ɛɛ beka ya wan zan na, ɓɛɛ tom'i bó nɛ́ tom-dee zɛ kpɔk, kóó zɛ yiitoo na, wen o wi-de-ɗaŋmɔ tɛ mɔ‘i ɔ dɔka. 14O gasawi k’ɛɛ a̧ yá hɛ̧ɛ̧ oi nú dukbíí lɛŋ, ɓɛɛ o bíí tɛ̀ ye k’ɛɛ lɛŋ nɛ kaia o ko-gɔni-duk a̧ tɛ́ tɛ́ ŋgimbi nɛ‘i gɔna in o gasawi tɛ o ye kpɔk kpɔk ká bá nɛ̀ o wi-gɔn-kita, hɔ ŋgimbi nɛ nyimsea ko Sɔ̧ k’ɛɛ tɛ yu zu yɛ wen zu wen’ɛ.» 15Ɓɛɛ Yɔnataŋ bem ko Asahɛl in Yazɛya bem ko Tikwa kpɛk mɔ‘i na, ɓɛɛ Mɛsulam in Sabtai ŋma be Levii, yor ɗoŋ wa.
16O wi nɛ pia so nɛ tɛ bara dee mɔ hee mɔ'ɔ nɛ‘i tɔ̧ɔ̧ ga. Ɛsdras hoka o gasawi nɛ nin dám nutua kpɔk kpɔk; wa mɔi̧a tɛ kuti ɔɔ-zɛ tɛ ɓu fio-zɛ wen kia mgbara mɔ‘i. 17Ɓɛɛ tɛ kuti ɔɔ-zɛ tɛ kuti fio-zɛ, wen ko o wi nɛ kaia so o ko-gɔni-duk kaɗa.
Nin o wi nɛ kaia o ko-gɔni-duk
18Mgbara o wi-ɗafi-sɔ̧, o wi nɛ kaia o ko-gɔni-duk nɛ́ mɔɔ nɔ'ɔ:
Masɛya, Eliɛzɛr, Yarib ká bá nɛ̀ Gɛdalia; wa nɛ́ o bezaŋ Josue bem ko Yosadak in o nya-wi. 19Wa ha̧a̧ nú mɛ ndak o kóò kɔ-wa, ɓɛɛ wa ha̧ vala sami ɗafi nɛ sɔ̧ oi ɗaŋmɔ kɔ-wa.
20Mgbara o bezaŋ Imɛr, nɛ́ Hanani in Zɛbadia.
21Mgbara o bezaŋ Harim, nɛ́ Masɛya, Elia, Sɛmaya, Yehiɛl in Uzia.
22Mgbara o bezaŋ Pasɛhur, nɛ́ Ɛlyɔnai, Masɛya, Yismaɛl, Nɛtanɛl in Yozabad ká bá nɛ̀ Elɛasa.
23Mgbara o be Levii, nɛ́ Yozabad in Simɛi in Kelaya nɛ‘i sa'e Kelita mbɛt, in Pɛtaya in Yehuda in Eliɛzɛr.
24Mgbara o wi-bii-gima, nɛ́ Eliasib.
Mgbara o wi-pɛm-nú Tua ko Sɔ̧ nɛ́ Salum, Tɛlɛm in Uri. 25War ko o dɔka o be Israɛl, mgbara o bezaŋ Parɔs, nɛ́ Ramia, Izia, Malkia, Miyamin, Eleazar, Malkia in Bɛnaya.
26Mgbara o bezaŋ Elam, nɛ́ Matania, Zakarii, Yehiɛl, Abdi, Yɛrɛmɔt ká bá nɛ̀ Elia.
27Mgbara o bezaŋ Zatu, nɛ́ Ɛlyɔnai, Eliasib, Matania, Yɛrɛmɔt, Zabad ká bá nɛ̀ Aziza.
28Mgbara o bezaŋ Bebai, nɛ́ Yohanaŋ, Hanania, Zabai ká bá nɛ̀ Atlai.
29Mgbara o bezaŋ Bani, nɛ́ Mɛsulam, Maluk, Adaya, Yasub, Yisal, Yɛrɛmɔt.
30Mgbara o bezaŋ Pahat-Mɔab, nɛ́ Adna, Kɛlal, Bɛnaya, Masɛya, Matania, Besalɛl, Binui ká bá nɛ̀ Manase.
31Mgbara o bezaŋ Harim, nɛ́ Eliɛzɛr, Isia, Malkia, Sɛmaya, Simɛɔŋ, 32Bɛnjamin, Maluk ká bá nɛ̀ Sɛmaria.
33Mgbara o bezaŋ Hasum, nɛ́ Matɛnai, Matata, Zabad, Ɛlifɛlɛt, Yeremai in Manase ká bá nɛ̀ Simɛi.
34Mgbara o bezaŋ Bani, nɛ́ Madai, Amram, Uɛl, 35Bɛnaya, Badia, Kɛluli, 36Vania, Mɛrɛmɔt, Eliasib, 37Matania, Matɛnai, Yasai, 38Bani, Binui, Simɛi, 39Sɛlɛmia, Nataŋ, Adaya, 40Maknadebai, Sasai, Sarai, 41Azarɛl, Sɛlɛmia, Sɛmaria, 42Salum, Amaria in Josɛf.
43Mgbara o bezaŋ Nɛbo, nɛ́ Yeiɛl, Matitia, Zabad, Zɛbina, Yadai, Jɔɛl ká bá nɛ̀ Bɛnaya.
44O wi nɔ‘i lɛŋ kaia so nɛ́ o ko-gɔni-duk, ɓɛɛ wa ndak wa in o bem kɔ-wa lɛŋ.
Currently Selected:
ƐSDRAS 10: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.