JOB 42
42
War yiitoo kifa-nú ko Job ha̧ Sɔ̧
1Job kifa nú ha̧ GASA WAN, ɓɛɛ tɔ̧:
2Mi iŋa'e ɛnɛ nyɛma mɛ de mɔ lɛŋ;
ŋma mɔ nɛ̀ ŋgaia gan'nɛ bo na.
3Ɛnɛ‘e mi ɗaŋ nɛ wen k’ɛ́nɛ́,
tɔ̧ nɛ wen tɛ mɔ n'am iŋ na.
Ii, mi tɔ̧ɔ̧ wen zu ɗukamɔ nɛ gana'm,
n'am iŋ mgbara-a na nɛ mbetɛ.#Job 38.2
4Ɛnɛ‘e, à̧‘m zíí wen kɔ‘i, à̧‘m é ha'i tɔ̧ wen;
wi tɛ ak am, ɓɛɛ mi kifa nú ha'i wo.#Job 38.3
5Kɔ‘m, mi zia so nɛ nyɛrɛ k’ɛ́nɛ́ nɛ wa tɔ̧ɔ̧ so ha̧‘m nɛti,
ɓɛɛ kinii, mi zɔka nɛ yí‘m.
6Ziimɔ baa'm, hegɔ mɔ n'am tɔ̧ɔ̧ so nɛti, mi kaɗa;
mi kiŋgila tɛ‘m tɛ bùk in fuunu.
GASA WAN HA̧A̧ MƆ HA̧ JOB WOYO
7Ɗoŋ nɛ GASA WAN tɔ̧ɔ̧ wen'i ha̧ Job kaɗi, a̧ tɔ̧ɔ̧ ha̧ Elifaz be Teman: «See-am nyim nyim in mɛɛ ka ba nɛ o sɛm kɔ-mɛ yiitoo, wen ɛ́nɛ́ tɔ̧ wen tɛ‘m nɛ de-a hee Job wi-de-tom kɔ‘m ga na. 8Ɛ̀nɛ̀ káí wiwii ndai mɔɔrɔ-ɗoŋ-yiitoo in vala sami mɔɔrɔ-ɗoŋ-yiitoo mbɛt, ɓɛɛ ɛ̀nɛ̀ nɛ́ɛ̀ kpá wi-de-tom kɔ‘m Job. Ɛ̀nɛ̀ dɔ́ wa nɛ̀ kpoo-sɔ̧ wen zu'nɛ́, ɓɛɛ tɛ kpɔk kale ŋgimbi'i, wi-de-tom kɔ‘m Job a̧ ai nú ha̧‘m wen zu'nɛ́ mbɛt. Mɛ̀ nɛ́ wen zu a̧ a̧‘m beka de ha̧ ziimɔ mɛ ba'nɛ́ na, wen ɛ́nɛ́ tɔ̧ de wen zu'm hee mɔ'ɔ nɛ wi-de-tom kɔ‘m Job tɔ̧ɔ̧ nɛnɛ ga na.»
9Ɓɛɛ Elifaz be Teman in Bildad be Sua ka ba nɛ Sɔfar be Naama nɛ́ɛ̀ de mɔ nɛ GASA WAN ha̧a̧ so nú ha̧ wa mɛ de, ɓɛɛ GASA WAN yeŋ zer tɛ wora Sɔ̧ ko Job.
10Ŋgimbi nɛ Job biti wora Sɔ̧ wen o sɛm kɔ‘i, GASA WAN dee ha̧ a̧ mɛ kpa o mɔ kɔ̧-a̧ siɗoŋ woyo war yiitoo.#Job 1.1-3 11O boko nya-a̧ in o nya-a̧ gú nɛ̀ o sɛm kɔ̧-a̧ só nɛti tɛɛ lɛŋ mɛ zɔk a̧, ɓɛɛ wa nyɔŋ mɔ in a̧ sɛn kɔ̧ tua kɔ̧-a̧. Wa aia nú, ɓɛɛ wa ga̧ see-aa tɛ ŋgamɔ nɛ̀ GASA WAN pi̧i̧ zu a̧, ɓɛɛ wa lɛŋ ha̧ kɔya-sede kpɔk kpɔk#42.11 gɛnɛ be-sami só nɛ́ kɔya-sede kpɔk. ha̧ a̧ in wele nɛ‘i dee nɛ lɔr mbɛt.
12GASA WAN toka de yoŋgo zu sɔŋkur ŋgimbi ko Job gan wan mɛ ti. Job kpaa sami booro-ɓu-zua-naar, ŋgeloba booro-mɔɔrɔ-ɗoŋ-kpɔk, ndai-de-tom booro-yiitoo in nana tuifuu booro. 13A̧ koo be wiwii mɔɔrɔ-ɗoŋ-yiitoo in be okoo taar. 14A̧ aa nin o be okoo nɔ‘i hee mɔ'ɔ ga: kuti-a nɛ Jɛmina,#42.14a Jɛmina: nɛ́ wen nɛ̀ tɔ̧́: gbaku̧i. yiitoo-aa nɛ Kɛtsia,#42.14b Kɛtsia: nɛ́ nin ŋma te nɛ‘i pi̧ tɛ́ nyɔŋmɔ: mɛ̀ nɛ́ cannelle. taar-a nɛ Kɛrɛn-Hapuk.#42.14c Kɛrɛn-Hapuk: nɛ́ wen nɛ̀ tɔ̧́: finaari. 15Zu nù lɛŋ wi beka nyɛm so mɛ kpa o ŋma okoo nɛ yora zɔŋa gan o boko bem ko Job na. Dáà kɔ-wa ha̧a̧ mɔɔ-oi ha̧ wa hee ko o bu̧i nya-wa ga mbɛt.
16Ɗoŋ mɔ‘i, Job duka siti tɛ pɛ gɔmŋmaa-nɛ-ɓu-naar, ɓɛɛ a̧ zɔk o bezaŋ-aa ɗoŋ ŋmaa naar. 17A̧ duka zu nù ɗoŋ-aa nyɛi̧; a̧ sɔka so nyɛmna ɓɛɛ a̧ fe.
Currently Selected:
JOB 42: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.