O WI-GƆN-KITA 21
21
O okoo wen zuduk ko Bɛnjamin
1O be Israɛl kànà so mɔ sɛn Mispa'e, ŋma bíí kpɔk mgbara wi o be Israɛl beka ha̧ boko-bem kɔ‘i nɛ kóò ha̧ ŋma bezaŋ Bɛnjamin na. 2Dukbíí Israɛl tɛɛ pii Bɛtɛl, ɓɛɛ wa ya nù mɔ ga̧ ti GASA WAN. Wa aia nú ɓɛɛ wa hi̧i̧ kɔ̧a̧ nɛ dɔka-a. 3Wa tɔ̧a̧: «GASA WAN Sɔ̧ ko Israɛl, wen ge ŋma duk be Israɛl kpɔk bo ɓɔ na ge?»
4Nɛ mɔ sa̧a̧ kaɗi, o be Israɛl kura mɛ tutuyɛ sut, ɓɛɛ ɗoŋ nɛ wa mboo fara-ɗafi-sɔ̧ hi̧i̧, wa dɔɔ kpoo-sɔ̧, ɓɛɛ wa ɗafi sɔ̧-gaŋmɔ. 5O be Israɛl aka mɔ: «Mgbara o dɔka duk be Israɛl, ŋma duk nɛ nɛ́ so tɛ mɔi̧a-a ti GASA WAN na nɛ o?» Ŋma kanamɔ duka so'e, wi tɛ gbɛ wi nɛ beka daŋ nɛ si ti GASA WAN sɛn Mispa na. 6O be Israɛl zɔka o nya kɔ-wa bezaŋ Bɛnjamin nɛ ko, ɓɛɛ wa tɔ̧: «Ŋma zuduk k’ɛɛ yuu mgbara yɛ sɔsɔɔ. 7Nɛ́ ge ɛ̀ɛ̀ tɛ de ha̧ nɛ kóò ha̧ o wan nɛ ɓɔna n’ɛɛ baa ha̧ so nú nɛ nin GASA WAN'e, ɛɛ beka ha̧ so o boko-bem k’ɛɛ nɛ kóò ha̧ wa na’ɛ ge?»
8Wa aka mɔ: «Ŋma bíí mgbara o zuduk be Israɛl a̧a̧ sɛnɛ nɛ daŋ so pii ti GASA WAN sɛn Mispa na nde?» Wa zɔka'e ŋma bíí tɛ so nɛ Yabɛs nu Galad tɛ mɔi̧a-a na. 9O be Israɛl tɔra so ŋmaa, ɓɛɛ wa kpa so ŋma bíí Yabɛs sɛn nú Galad kpɔk mgbara wa na. 10Nɛ mɔ'ɔ nɛ o be Israɛl toma o ŋga wi-biro lɛŋ booro-ɓu-zua-yiitoo, ɓɛɛ ha̧ nú ha̧ wa: «Ɛ̀nɛ̀ nɛ́ɛ̀ gbɛ́ o bíí Yabɛs nu Galad, gu nɛ okoo, in o obem mbɛt nɛ gba-paa. 11Mɔ n’ɛnɛ tɛ de nɛ mɔ'ɔ: ɛ̀nɛ̀ gbɛ́ o wiwii lɛŋ, in o okoo lɛŋ nɛ iŋa tɛ in wiwii kaɗi, ɓɛɛ o wan nɛ tɛ iŋ tɛ na, k’ɛ́nɛ́ fo wa na.» Mɔ nɛ wa nɛɛ de nɛ mɔ‘i. 12Wa nɛɛ kpa o be-zɔŋa nɛ tɛ iŋ tɛ in wiwii na sɛn nu Galad sɛn Yabɛs gɔmŋmaa-naar, ɓɛɛ wa kai wa si kɔ̧ gbagari Silo nɛ duk nú Kanaŋ.
13O be Israɛl pi̧i̧ tom ha̧ o bezaŋ Bɛnjamin nɛ ya sɛn ká̧ ta ko Rimɔŋ, wen ha̧ ga̧a̧mɔ mɛ duk mgbara wa. 14O bezaŋ Bɛnjamin pia ɗoŋ tɛ ŋgimbi'i, ɓɛɛ wa ha̧ o boko-bem nú Yabɛs nú Galad nɛ wa kaia so ha̧ o bezaŋ Bɛnjamin, ɓɛɛ o okoo nɔ‘i dam wa na.
15Ko dee o be Israɛl ha̧ o bezaŋ Bɛnjamin wen GASA WAN ɗaŋa ŋma zuduk yinɛ mgbara wa. 16O gasawi Israɛl tɔ̧a̧: «Ɛ́ɛ́ tɛ de hee ge kpa nɛ o kóò ha̧ o bezaŋ Bɛnjamin nɛ kpa kɔ‘i kóò na’ɛ ge? Ɛ́ɛ́ baa kum so o okoo er wa yinɛ kaɗi.» 17O gasawi Israɛl tɔ̧ɔ̧ woyo: «Ɛ́ɛ́ tɛ de hee ge, wen ká kpar bezaŋ Bɛnjamin tɛɛ kaɗi mgbara zuduk ko o be Israɛl ge? 18Ɛɛ nyɛm mɛ ha̧ o boko-bem k’ɛɛ ha̧ wa nɛ kóò na, wen o be Israɛl kana so mɔ‘e: ‹Fom a̧ bá wi nɛ tɛ ha̧ kóò ha̧ bezaŋ Bɛnjamin!› »
19Wa tɔ̧a̧ woyo: «Gbaŋa ko GASA WAN a̧a̧ sɛnɛ sɛn Silo tɛ pɛ lɛŋ.» Silo duk nɛ̀ war ká̧-zan-mɛ́-ŋgɔn ha̧ Bɛtɛl ká̧ yuwar nɛ daŋ nɛ Bɛtɛl nɛ war daŋa-wese sɛn Sikɛm, ká̧ Lebona nɛ war ká̧-zan-mɛ́-ɗɔɔ. 20O gasawi nɔ‘i ha̧a̧ nú ha̧ o be ŋgai Bɛnjamin hee mɔ'ɔ ga: «Ɛ̀nɛ̀ hú̧sí sɛn kpɛɛfɔ-nyak-dɔ̧ɔ̧. 21K’ɛ̀nɛ̀ nɛ́ zɔka o be-zɔŋa Silo fara daŋa-a mɛ yɔ yɔyɛ in o ŋmaa, ɛ̀nɛ̀ gbó nɛ kpɛɛfɔ-nyak-dɔ̧ɔ̧ tik zu wa, o ndé kpɔk kpɔk, ɓɛɛ ɛnɛ sii nù ko Bɛnjamin. 22Kà o dáà kɔ-wa, kóò o bu̧i̧-nya-wa nɛ tɛɛ mɛ kii nú‘nɛ́, ɛɛ tɛ kifi nú ha̧ wa, ɓɛɛ ɛɛ tɔ̧a̧: ‹Ɛ̀nɛ̀ dé demɔ in wa, wen wa kpa kóò tɛ ŋgimbi biro’ɛ na. Ɛ́nɛ́ mbɛt bó nɛ́ ɛ́nɛ́ tɛ̀ɛ́ ha̧ so kóò ha̧ wa na; k’ɛ̀nɛ̀ ha̧ so koo ha̧ wa, wen-aa tɛ tik nɛ zu'nɛ́.› »
23O bezaŋ Bɛnjamin dee hee mɔ'ɔ nɛ wa tɔ̧ɔ̧ ha̧ wa ga, ɓɛɛ wa kai zɔŋa nɛ gboo mɛ yɔ yɔyɛ nɛ ŋgai, nyɛm nɛ wa; ɓɛɛ wa si ɗoŋ si tɛ nù kɔ-wa; wa ɗafa o ye kɔ-wa woyo, ɓɛɛ wa ɔ sɛnɛ. 24Ŋgimbi'i, o be Israɛl kɛ̧ɛ̧ tɛ nɛ ŋmaa, kóó o nde sitɛ zuduk kɔ‘i in tɛ nú-gara kɔ‘i, ɓɛɛ wa si tɛ nù kɔ-wa.
25Ŋgimbi'i mbɛt, ŋma wannu bo so sɛn Israɛl na, ɓɛɛ o ndé de so nɛ mɔ nɛ see kɔ̧a̧.#Wi-gɔn-ki 17.6
Currently Selected:
O WI-GƆN-KITA 21: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.