KOLOSIƐN 4
4
1O dáa-bara, ɛ̀nɛ̀ dé mɔ nɛ̀ de-a, nɛ̀ yuwar-a in o bara k’ɛ́nɛ́, ɓɛɛ ɛ̀nɛ̀ íŋ ndé, ɛ́nɛ́ a̧a̧ nɛ̀ Wan nɛ̀ duk zu'nɛ́ yiwese mɛ mbɛt.#Ef 6.9
Tɔ̧ɔ̧-mbɔrɔ
2Ɛ̀nɛ̀ é see'nɛ́ tɛ kɔfa-sɔ̧. Ɛ̀nɛ̀ dúk tɛ pɛma mɔ nyɛm nɛ̀ ɗoŋ kɔfa-sɔ̧ n’ɛnɛ kɔfi dé nɛ osoko'i. 3Ɛ̀nɛ̀ kɔ́fí Sɔ̧ wen ɛ́ɛ́ mbɛt wen ha̧ Sɔ̧ mɛ́ hú̧í̧ war h’ɛ́ɛ́ wen ha̧‘m mɛ́ tɔ̧ wen ɗukamɔ ko Krist n'am yee zɔɓɔ wen-aa’ɛ. 4Ɛ̀nɛ̀ kɔ́fí Sɔ̧ wen am ha̧‘m mɛ́ tɔ̧ mɔ‘i nɛ̀ sa̧a̧-a̧, hee mɔ'ɔ n'am tɛ̀ɛ́ tɔ̧ so ga.
5Ɛ̀nɛ̀ dúk nɛ̀ de taamɔ sitɛ ŋmaa in o bíí nɛ̀ bó nɛ́ bíí ko Krist na, ɓɛɛ ɛ̀nɛ̀ dé mɔ tɛ ŋgimbi-a.#Ef 5.16 6Wen k’ɛ́nɛ́ a̧ dé tɛ bíí hee tɔŋ ga, ɓɛɛ ɛ̀nɛ̀ kíí mɛ́ kifi nú ha̧ o ndé nɛ̀ de-a.
Sɔŋkur fanamɔ
7Tikik nɛ́ nya'm n'am kɔ̧ɔ̧ nyɛmna. A̧ nɛ́ mgbák gbama wi-de-tom in am tɛ tom ko Gasa Wan, ɓɛɛ nɛ́ a̧ a̧ tɛ́ tɔ̧ nyɛrɛ kɔ‘m lɛŋ h’ɛ́nɛ́.#Tom 20.4; 2 Tim 4.12#Ef 6.21-22 8Gba̧a̧-mɔ n'am tom a̧ nɛnɛ wen-aa nɛ́ wen tɔ̧ɔ̧ nyɛrɛ duka-a k’ɛ́ɛ́ h’ɛ́nɛ́ wen h’ɛ́nɛ́ mɛ́ kpa nɔɔ-ŋgiɗi. 9Onesim, kpasa de nya yɛ n’ɛ́ɛ́ kɔ̧ɔ̧ nyɛmna, tɛ́ nɛ̀ in a̧ mbɛt; a̧ nɛ́ bíí k’ɛ́nɛ́ mbɛt. Wa tɛ́ we ɗoŋ mɔ lɛŋ nɛ̀ yak hɛ̧ɛ̧ h’ɛ́nɛ́.#Film 10-12
10Aristark nɛ̀ duk kɔ̧ zɔɓɔ in am fana'nɛ́, in Mark be-nɔkɔ ko Barnabas mbɛt. Bó nɛ́ ɛ́nɛ́ baa zii mɔ n’ɛnɛ tɛ́ de ha̧ Mark kaɗi na nde? Kà a̧ nɛ́ hɔɔ tɛ‘nɛ́, ɓɛɛ ɛ̀nɛ̀ kpɛ́k a̧ nɛ̀ de-a.#Tom 12.12,25; 13.13; 15.37-39; 19.29; 27.2; Film 24 11Jesu nɛ̀ wa sa'e Justus fana'nɛ́ mbɛt. O wi nɔ‘i taar'i, ɓaa o Juif nɛ̀ duk nɛ́ o gbama wi-de-tom wen Wan ko Sɔ̧ in am nɛ́ wa ɓɛɛ; mɛ̀ nɛ́ wa a̧ ha̧ ga̧a̧-see ha̧‘m.
12Epafras bíí tɛ̀ k’ɛ́nɛ́, wi-de-tom ko Jesu Krist, fana'nɛ́ mbɛt. A̧ kaɗi kɔfa Sɔ̧, bi nɛ̀ biro wen zu'nɛ́ na, wen h’ɛ́nɛ́ mɛ́ duk nɛ̀ nɔɔ-ŋgiɗi, nɛ̀ ŋma wen bo zu'nɛ́ na, in h’ɛ́nɛ́ mɛ́ kpɛk mɔ lɛŋ nɛ̀ Sɔ̧ kɔ̧ɔ̧ h’ɛ́nɛ́ mɛ́ de. 13Mi de nɛ́ sedaako wen-aa'e, a̧ zɔk nɛ́ bɔnɛ nyɛmna wen'nɛ́, in wen o wi Laodisee ká bá nɛ̀ o wi Hierapolis mbɛt. 14Sɛm k’ɛ́ɛ́ Luk, nɛ̀ duk nɛ́ dɔkta, in Demas fana ɛ́nɛ́ mbɛt.
15Ɛ̀nɛ̀ fán o nya yɛ nɛ̀ a̧a̧ sɛn Laodisee; ɛ̀nɛ̀ fán Nimfa in zuduk bíí ko Krist nɛ̀ mɔi̧ sɛn kɔ̧ tua kɔ̧-a̧. 16K’ɛ̀nɛ̀ nɛ́ tɔra kalata’ɛ kaɗi, ɓɛɛ ɛ́nɛ́ toma ha̧ zuduk bíí ko Krist sɛn Laodisee wen ha̧ wa mɛ tɔr mbɛt. Ɛ́nɛ́ mbɛt, ɛ̀nɛ̀ tɔ́r kalata nɛ̀ o bíí Laodisee tɛ́ tom h’ɛ́nɛ́. 17Ɛ̀nɛ̀ tɔ̧́ ha̧ Arkip mɛ́ zɔk tom ko Gasa Wan nɛ̀ a̧a̧ er-a'i nɛ̀ de-a. Ɓɛɛ a̧ a̧ dé nɛ̀ yuwar-a mbɛt.
18Mɛ̀ nɛ́ mi Paul a̧ yɔr kalata’ɛ nɛ̀ er-am fan nɛ̀ ɛ́nɛ́. Tɛ‘nɛ́'ɛ mbáŋ ɗoŋ-aa ndé, nyak-zɔɓɔ a̧a̧ tɛ‘m.
Deemɔ nɛ̀ ta-tɛ ko Sɔ̧ a̧ dúk in'nɛ̀ɛ́.
Currently Selected:
KOLOSIƐN 4: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.