2 KALATA NYƐRƐ 10
10
NYƐRƐ MƆ KO O WANNU JUDA
Dee ŋgazu ko giiwi mɛ ká̧-zan-mɛ́-ŋgɔn
(Zɔk 1 Wan 12.1-20)
1Roboam nɛɛ si Sikɛm, wen mɛ̀ nɛ́ hi̧i̧ a̧ o be Israɛl lɛŋ gara pii sɛnɛ mɛ de wan ha̧ a̧. 2Ɓɛɛ ŋgimbi nɛ̀ Jeroboam bem ko Nɛbat zia nɛ̀ nyɛrɛ mɔ‘i, a̧ a̧a̧ so kɔ̧-a̧ Egiptɛ, wen a̧ yuu so mɔ nyɛi̧ nɛ̀ wannu Salomɔŋ duk nɛnɛ hi̧i̧. 3Wa pi̧i̧ tom sa a̧, ɓɛɛ a̧ tɛ in o be Israɛl lɛŋ; wa tɔ̧ɔ̧ ha̧ Roboam hee mɔ'ɔ ga: 4«Dáà k’ɛ́nɛ́ ee so gasa bɔnɛ zu yɛ. K’ɛɛ kinii, ɛ̀nɛ̀ fó ŋma nú ŋga tom-bara ko dáà k’ɛ́nɛ́ in dita kpáŋá n'aa pi̧i̧ ger yɛ yinɛ, ɓɛɛ ɛɛ tɛ de tom h’ɛ́nɛ́.»
5A̧ tɔ̧ɔ̧ ha̧ wa: «Ɛ̀nɛ̀ yák, ɓɛɛ ɛ̀nɛ̀ píí ɗoŋ tɛ‘m ɗoŋ zɛ taar.» Hegɔ wa yaka.
6Wannu Roboam aka mbɔrɔ er o gasawi nɛ̀ dee so tom ha̧ dáà kɔ̧-a̧ Salomɔŋ ŋgimbi n'aa ɓɔna so nɛnɛ kpasa hee mɔ'ɔ ga: «K’ɛ́nɛ́, ɛ́nɛ́ kɔ̧ɔ̧ a̧‘m kifi nú ha̧ dukbíí'ɛ hee ge?»
7Wa tɔ̧ɔ̧ ha̧ a̧: «K’ɛ̀nɛ̀ e tɛ‘nɛ́ hee wi-de-tom ga ha̧ dukbíí'ɛ sɔsɔɔ, k’ɛ̀nɛ̀ de tom ha̧ wa, ɓɛɛ k’ɛ̀nɛ̀ kifi nú ha̧ wa nɛ̀ de-a, wa tɛ ya nɛ́ o wi-de-tom k’ɛ́nɛ́ ɓɔnsɛnɛ!»
8Roboam ee mbɔrɔ nɛ̀ o gasawi tɔ̧ɔ̧ ha̧ a̧‘i tɛ geemɔ, ɓɛɛ a̧ ak mbɔrɔ ko o gbama-ŋgai kɔ̧-a̧ nɛ̀ de tom ha̧ a̧; 9a̧ aka wa: «Ɓɛɛ nɛ̀ war k’ɛ́nɛ́, ɛnɛ tɔ̧ k’ɛ́nɛ́ hee ge? Kifa-nú n’ɛɛ tɛ ha̧ ha̧ o wi nɔ'ɔ nɛ̀ tɔ̧ɔ̧ ha̧‘m, a̧‘m bá ŋma nú ŋga tom nɛ dáà kɔ‘m aa wi sɛnɛ yinɛ wó'ɛ hee ge?»
10O gbama-ŋgai kɔ̧-a̧ kifa nú ha̧ a̧ hee mɔ'ɔ ga: «Ɛ̀nɛ̀ nɛ́, ɛ̀nɛ̀ tɔ̧́ ha̧ o wi nɔ‘i nɛ̀ tɔ̧ɔ̧ h’ɛ́nɛ́‘e dáà k’ɛ́nɛ́ ee so ŋga tom zu wi, ɛ̀nɛ̀ fó ŋma nú-a yinɛ wó‘i ndé, bekete er'nɛ́ gana guntir dáà k’ɛ́nɛ́; 11ku̧u̧naŋ-a kinii, hee mɔ'ɔ nɛ̀ dáà kɔ‘i pi̧i̧ dita kpáŋá ger-wa ga, kɔ‘i, wi tɛ de ha̧ mɛ diti diti siti; hee mɔ'ɔ nɛ̀ dáà kɔ‘i usa so mɔ ha̧ wa nɛ̀ géé nyasi ga, kɔ‘i, wi tɛ gusi wa nɛ̀ o ndoi nɛ̀ boi a̧a̧ nú-a.»
12Ɗoŋ zɛ taar, Jeroboam in dukbíí lɛŋ mɔi̧a kpa ŋmaa ti Roboam nyɛm nɛ̀ ɗoŋ wen n'aa ba tɔ̧ so ha̧ wa'e, wa a̧ píí ɗoŋ tɛ-wi ɗoŋ zɛ taar wó‘i. 13Wannu Roboam kifa ɗaŋ nú ha̧ wa, e mbɔrɔ ko o gasawi duk. 14A̧ kifa nú ha̧ wa nyɛm nɛ̀ ɗoŋ mbɔrɔ ko o gbama-ŋgai kɔ̧-a̧ hegɔ: «Dáà kɔ‘m ee so ŋga tom zu'nɛ́; kɔ‘m, mi tɛ e mbe-a zu-a; dáà kɔ‘m usa so mɔ h’ɛ́nɛ́ nɛ̀ o géé nyasi, kɔ‘m, mi tɛ usi mɔ h’ɛ́nɛ́ nɛ̀ o ndoi nɛ̀ boi a̧a̧ nú-a.» 15Wannu kɔ̧ so mɛ zii wen ko dukbíí na, wen nɛ́ GASA WAN a̧ dee hegɔ, ha̧ wen n'aa tɔ̧ɔ̧ so ha̧ Jeroboam nɛ̀ nú Ahiya be Silo mɛ hɔ gba̧a̧.
Nù kɛ̧ɛ̧ yiitoo, ɓɛɛ Roboam ɔ wan zu Juda
(Zɔk 1 Wan 12.16-25)
16Hee mɔ'ɔ nɛ̀ wannu kɔ̧ so mɛ zii wen nú dukbíí na ga, o be Israɛl lɛŋ tɔ̧ɔ̧ ha̧ a̧: «K’ɛ́ɛ́ tɛ mɔ ko David hèè ge? Ɛ́ɛ́ bó nɛ̀ ŋma mɔɔ-oi in bem ko Jɛse na! O be Israɛl, o ndé a̧ sí ɗoŋ tɛ kɔ‘i. Kinii, David, mɛ̀ dáí o bíí nutua kɔ-mɛ!»
Ɓɛɛ o be Israɛl lɛŋ si ɗoŋ tɛ kɔ‘i.#2 Sam 20.1 17Mɔ kpɔk, Roboam ɔɔ kànà wan zu o be Israɛl nɛ̀ ya tɛ o ye nù Juda.
18Wannu Roboam toma Adoram wi-duk-zu tom-bara si sɛn zu o be Israɛl, ɓɛɛ o be Israɛl yo a̧ nɛ̀ ta gbɛ. Wannu Roboam yɔsɔra daŋ keekee-nyaŋa kɔ‘i, ɓɛɛ yu mɔ yak si Jerusalɛm. 19Tugun dee ŋgazu ko o be Israɛl nɛ̀ dee in o bíí nutua ko David hɔ sɔsɔɔ nɛ́ mɔ‘i.
Currently Selected:
2 KALATA NYƐRƐ 10: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.