2 KALATA NYƐRƐ 9
9
Wannu-okoo Saba
(Zɔk 1 Wan 10.1-13)
1Wannu-okoo Saba zia nyɛrɛ hura-nin Salomɔŋ, ɓɛɛ kur tɛ sɛn Jerusalɛm mɛ we a̧ nɛ̀ o sumgba. A̧ kura tɛ nɛ̀ zɔm mbɔi nyɛmna: o ŋgeloba nɛ̀ tui nɛ́ o nɔ̧́-nyama, lɔr in o de ta nɛ̀ gɛnɛ-a ɔ ŋgaya ɔ dɔka nyɛmna. A̧ tɛɛ in o bíí nɛ̀ dɔka-a wen ee a̧. Ŋgimbi n'aa hɔɔ nɛnɛ tɛ ko Salomɔŋ kaɗi, a̧ tɔ̧ɔ̧ o mɔ n'aa ta kɔ̧ see-aa lɛŋ ha̧ a̧.#Mt 12.42; Lk 11.31 2Salomɔŋ kifa nú tɛ akamɔ nɔ‘i lɛŋ. Ŋma ɗuka akamɔ nɛ̀ wannu kifi nú sɛnɛ na, bo na. 3Wannu-okoo Saba zɔka iŋa-mgbara-mɔ ko Salomɔŋ, tua n'aa mboo so, 4o nyɔŋmɔ sɛn zu fara-nyɔŋ-mɔ kɔ̧-a̧, fara-ɔɔ ko o wi-de-tom kɔ̧-a̧, yuwar duka-a ko o wi-de-tom kɔ̧-a̧ in laa kɔ-wa, o kpoo-sɔ̧ n'aa ha̧ so nɛ̀ ha̧a̧mɔ kɔ̧ Tua ko GASA WAN; a̧ zɔka mɔɔ nɔ‘i lɛŋ, ɓɛɛ hiɗ‘a gɔn.
5A̧ tɔ̧ɔ̧ ha̧ wannu: «Nyɛrɛ mɔ zu tɔ̧ɔ̧-wen k’ɛ́nɛ́ in iŋa-mgbara-mɔ k’ɛ́nɛ́ n'am zia tɛ nù kɔ‘m mɛ‘i nɛ́ kpasawen nɛ̀ mbetɛ! 6Mi kɔ̧ɔ̧ so ha̧‘m mɛ zɔk nɛ̀ gbaayí‘m, ɓɛɛ sɛka'm kpɛka. Wa tɔ̧ so géé be reeta iŋamɔ k’ɛ́nɛ́ ha̧‘m na! Duka-a k’ɛ́nɛ́ gana hura nin'nɛ́ n'am zia so nyɛrɛ-a. 7Sɔnti o bíí in o wi-de-tom k’ɛ́nɛ́ nɛ̀ ya katɛ‘nɛ́ ɓɔnsɛnɛ zii nɛ̀ iŋa-mgbara-mɔ k’ɛ́nɛ́ ɔ dee. 8Zɔnamɔ a̧ dúk nɛ́ ko GASA WAN Sɔ̧ k’ɛ́nɛ́ nɛ̀ ee'nɛ́ zu damti hee wannu ga, h’ɛ́nɛ́ mɛ de tom ha̧ a̧. Mɛ̀ nɛ́ wen nɛ̀ Sɔ̧ k’ɛ́nɛ́ kɔ̧ɔ̧ ha̧ Israɛl mɛ duk kpoo nɛ kpoo a̧ a̧ ee nɛ̀ ɛnɛ nɛ̀ wan, h’ɛ́nɛ́ mɛ kɛ̧ mgbara mɔ nɛ̀ de-a in nɛ̀ yuwar-a ha̧ wa.»
9A̧ ha̧a̧ kilo lɔr booro-taar nɛ reeta, o dak nɔ̧́-nyama nɛ̀ dɔka-a in o de toka-ta nɛ̀ gɛnɛ-a ɔ ŋgaya ha̧ wannu. Wi tɛ zɔk so pɛrti dɔka nɔ̧́-nyama hegɔ nɛti na.
10O wi-de-tom ko Hiram in ko wannu Salomɔŋ nɛ̀ nɛ̀ɛ̀ so Ofir kaia lɔr, o te-nyama in o ta nɛ̀ gɛnɛ-a ɔ ŋgaya piinɛ mbɛt. 11Wannu kaia o ŋga te nɔ‘i de nɛ̀ gaŋgala Tua ko GASA WAN in ko wannu; a̧ dee nɛ̀ o koloŋ in o kunde ha̧ o wi-mbɛr-mɔ mbɛt. Wi tɛ zɔk so pɛrti mɔ hegɔ sɛn nú Juda hɔ̧ɔ̧ na.
12Wannu Salomɔŋ ha̧a̧ mɔ lɛŋ nɛ̀ dee tɛ wannu-okoo Saba gan mɔ n'aa kaia tɛnɛ ha̧ wannu Salomɔŋ. Wannu-okoo Saba sii ɗoŋ in o bíí kɔ‘i si nù kɔ‘i.
Dɔka kpaamɔ ko Salomɔŋ
(Zɔk 1 Wan 10.14-25)
13Tɛ pɛ kpɔk kpɔk, lɔr nɛ̀ wannu Salomɔŋ kpa nɛ́ kilo booro-ɓu-yiitoo. 14Wi tɔr o lɔr in bu-mbɔi nɛ̀ o wi-nɛ-gɛnɛ, o wi-ɗɔr-mɔ, o wannu Arabii in o wannu zu zika-nù kai tɛnɛ ha̧ wannu Salomɔŋ na. 15Wannu Salomɔŋ nɔi̧a lɔr de nɛ̀ o gasa ŋgee-biro tɛ gɔmŋmaa-yiitoo; kpɔk ŋgee ba nɛ́ kilo lɔr mɔɔrɔ-ɗoŋ-yiitoo. 16A̧ duia o geɗek ŋgee-biro tɛ gɔmŋmaa-taar nɛ̀ lɔr lɛŋ; kpɔk ŋgee kpɔk ba nɛ́ kilo lɔr taar. Wannu kaia a kɔ̧ gɔna bɛr-tua nɛ‘i sa'e Kombo-Libaŋ.
17A̧ dee ŋma gasa damti gba̧a̧-nin fɔrɔ, ɓɛɛ wa nɔ̧́í̧ lɔr a ɗoŋ-aa. 18Fara-daŋ-nɛnɛ sitɛ damti'i a̧a̧ ɗoŋ ŋmaa mɔɔrɔ-ɗoŋ-kpɔk nɛ̀ wa dee nɛ̀ lɔr. Wa dee fara-a-er in fara-a-tui-er nɛ̀ ká̧ damti'i, ɓɛɛ wa mbo o dila yiitoo nɛ̀ lɔr e ká̧ fara-a-tui-er nɔ‘i. 19O dila ɓu-zua-yiitoo nɛk nɛ̀ war wiiko in nɛ̀ war gale ká̧ damti. Pɛrti mɔ hegɔ tɛ de tɛ ŋma mɔɔ-wan hɔ̧ɔ̧ na.
20Wa dee mɔɔ-nɔ-mɔ ko wannu Salomɔŋ lɛŋ nɛ̀ lɔr; o nyɛk kɔ̧ gɔna-bɛr-tua Kombo-Libaŋ, wa duia so lɛŋ nɛ̀ sa̧a̧ lɔr, ŋma bíí nɛ̀ pi̧ so kɔ‘i nú ɗoŋ bu-mbɔi tɛ ŋgimbi ko wannu Salomɔŋ bo so kɔ‘i na. 21Wannu Salomɔŋ a̧a̧ so nɛ̀ o kombon nɛ̀ duka kai mɔ si Tarsis, ɓɛɛ nɛ ó wi-de-tom ko Hiram a ba baa wa. Ɗoŋ pɛ taar lɛŋ, o kombon nɔ‘i kai nɛ́ o mɔ nɛ̀ Tarsis mɛ piinɛ: nɛ́ tui lɔr, bu-mbɔi, nin-fɔrɔ in o dawa bá nɛ̀ o nɔ̧́í̧-gɔ-tɛ.
22Wannu Salomɔŋ gana so dɔka wannu zaŋnu lɛŋ nɛ̀ kpaamɔ in iŋa-mgbara-mɔ. 23O dɔka wannu kia so mɛ tɛ̀ɛ́ zɔk Salomɔŋ wen zia iŋa-mgbara-mɔ nɛ̀ Sɔ̧ ha̧a̧ so ha̧ a̧. 24Kóó o ndé ba nɛ war ha̧a̧mɔ kɔ‘i nɛ̀ ta-tɛ tɛnɛ ha̧ a̧: o mɔ nɛ̀‘i dee nɛ̀ bu-mbɔi, in lɔr, o laa, o boi-biro, o nɔ̧́-nyama, o nyaŋa in o sunda ti pɛ nɛ̀ yak lɛŋ.
25Salomɔŋ a̧a̧ so nɛ̀ fara wen aa o nyaŋa tɛ booro-naar, o keekee in o wi-daŋ-nyaŋa booro-ɓu-zua-yiitoo n'aa kaia a sɛn tɛ ye-a-boi-biro, ɓɛɛ a̧ e oi-aa katɛ a̧ sɛn Jerusalɛm.#1 Wan 5.6 26A̧ gana so dɔka wannu lɛŋ ku̧u̧naŋ nɛ̀ Efrat mɛ si hɔ nù ko o be Filistii hɔ gbìsí-nù ko o be Egiptɛ.#Ku̧u̧ 15.18; 1 Wan 5.1 27Ŋgimbi wan ko Salomɔŋ, bu-mbɔi yaa Jerusalɛm hee géé ta ga, gbatui in o te-nyama yaa so hee wa̧a̧ zɔ̧ ga mbɛt. 28Kpar nyaŋa ko Salomɔŋ tɛ so nɛ̀ Egiptɛ in nɛ̀ o ŋma nù nɛtɛ nɛtɛ.#Wee-ɗoŋ-he 17.16
O mɔ nɛ̀ Salomɔŋ dee tɛ wan kɔ‘i
(Zɔk 1 Wan 11.41-43)
29Oi nyɛrɛ ko Salomɔŋ tɛ ku̧u̧naŋ-a hɔ sɔŋkur-aa yɔra zaŋ Kalata ko Nataŋ wi-tɔ̧-wen oi nu Sɔ̧, zaŋ tɔ̧ɔ̧-wen oi nú Sɔ̧ ko Ahiya be Silo in tɛ Hɔɔ-zu ko Yedo, ŋgimbi zɔka mɔ wen zu Jeroboam bem ko Nɛbat. 30Salomɔŋ ɔɔ wan pɛ ɓu-naar sɛn Jerusalɛm zu o be Israɛl lɛŋ. 31Salomɔŋ fea siɗoŋ o dáà kɔ‘i, ɓɛɛ wa gun a̧ sɛn ye ko Dáà kɔ̧-a̧ David, ɓɛɛ bem kɔ̧-a̧ Roboam ɔ wan oi-aa.
Currently Selected:
2 KALATA NYƐRƐ 9: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.