2 KALATA NYƐRƐ 6
6
Tɔ̧ɔ̧-wen ko Salomɔŋ ha̧ dukbíí
(Zɔk 1 Wan 8.12-21)
1Salomɔŋ tɔ̧a̧:
«GASA WAN tɔ̧ɔ̧ so'e wi kɔ̧ɔ̧ mɛ duk zaŋ tum!
2Mɛ̀ nɛ́ wen zu'nɛ́ a̧‘m dee nɛ̀ gba de Tua’ɛ
h’ɛ́nɛ́ mɛ duk sɛnɛ ɓɔnsɛnɛ.»
3Wannu zika tɛ, ɓɛɛ tok de yoŋgo zu o be Israɛl lɛŋ nɛ̀ mɔi̧a. O be Israɛl lɛŋ nɛ̀ mɔi̧a'i yor so nɛ̀ ŋgɔn. 4A̧ tɔ̧a̧: «Zɔnamɔ a̧ dúk nɛ́ ko GASA WAN Sɔ̧ ko Israɛl nɛ̀ tɔ̧ɔ̧ wen nɛ̀ nú ha̧ dáà kɔ‘m David, ɓɛɛ de mɔ n'aa tɔ̧a̧ lɛŋ nɛ̀ er-a.#2 Sam 7.1-13; 1 Kal Ny 17.1-12 5Wen n'aa tɔ̧ɔ̧ so'i nɛ́ mɔ'ɔ: ‹Ku̧u̧naŋ-a nɛ̀ wese n'am gboo nɛ̀ dukbíí kɔ‘m nɛ̀ nú Egiptɛ, mi hok ŋma ye kóó kpɔk mgbara zuduk be Israɛl ha̧‘m mɛ mbo Tua nɛ̀ nin-am tɛ duk sɛnɛ na, kóó ŋma bíí ha̧ mɛ duk zu Israɛl dukbíí kɔ‘m na mbɛt. 6Mi hoka nɛ́ Jerusalɛm ha̧ nin-am mɛ duk sɛnɛ, in David mɛ ɔ wan zu Israɛl dukbíí kɔ‘m.› »
7Salomɔŋ tɔ̧ɔ̧ woyo: «Dáà kɔ‘m David taa so mɔ mɛ de Tua wen nin GASA WAN Sɔ̧ ko Israɛl. 8Ɓɛɛ GASA WAN tɔ̧ ha̧ dáà kɔ‘m David'e: ‹Taamɔ kɔ-mɛ mɛ de Tua wen nin-am'i ɔ dee. 9Mɔ kpɔk, bo nɛ mɛ a̧ tɛ de Tua'i ha̧‘m na, mɛ̀ nɛ́ bem kɔ-mɛ nɛ̀ mɛ koa a̧ tɛ de dea-a.›
10«Wen nɛ̀ GASA WAN tɔ̧ɔ̧ so'i hɔɔ gba̧a̧. Mi ɔɔ wan oi dáà kɔ‘m David, ɓɛɛ nɛ́ mɔ'ɔ n'am duka zu damti Israɛl hee mɔ'ɔ nɛ̀ GASA WAN baa tɔ̧ so ga; mi dee Tua’ɛ wen nin GASA WAN Sɔ̧ ko Israɛl, 11ɓɛɛ mi ba kuɓa fara nɛ̀ nɔɔ-tɔk nɛ̀ GASA WAN nɔɔ so in o be Israɛl duk sɛnɛ‘i e kɔ̧ a̧.»
Kɔfa-sɔ̧ ko Salomɔŋ
(Zɔk 1 Wan 8.22-53)
12Salomɔŋ yora ti fara-ɗafi-sɔ̧ ko GASA WAN ti o be Israɛl nɛ̀ mɔi̧a, ɓɛɛ nyɛi̧ er si ŋgɔn. 13A̧ mboo so ŋma mɔ nɛ̀ ndɛrɛ bee-gara'i, zi̧a̧-a̧ in pɛsa-a nɛ́ mɛtrɛ yiitoo nɛ reeta hee ŋmaa ga, ɓɛɛ kusa-a nɛ́ mɛtrɛ kpɔk nɛ reeta. A̧ daŋa yor sɛnɛ, ɓɛɛ a̧ gbɛ zugur-aa nù ti o be Israɛl lɛŋ nɛ̀ mɔi̧a. A̧ nyɛi̧a er-a si yiwese, 14ɓɛɛ a̧ tɔ̧: «GASA WAN Sɔ̧ ko Israɛl! Ŋma Sɔ̧ hee ɛ́nɛ́ ga bo yiwese kóó zu nù'ɛ na. Ɛ́nɛ́ kasi nɛ́ nɔɔ-tɔk k’ɛ́nɛ́ in o bíí k’ɛ́nɛ́, ɓɛɛ ɛ́nɛ́ usi nɛ́ kɔ̧ɔ̧mɔ k’ɛ́nɛ́ ha̧ wa mbɛt ŋgimbi nɛ̀ wa mbo zu h’ɛ́nɛ́ nɛ̀ see-wa lɛŋ. 15Ɛ́nɛ́ kasa o ha̧a̧nú k’ɛ́nɛ́ ha̧ dáà kɔ‘m David wi-de-tom k’ɛ́nɛ́. Ɛ́nɛ́ dee mɔ n’ɛnɛ tɔ̧ɔ̧ so nɛ̀ nú‘nɛ́, nɛ̀ er'nɛ́, hee mɔ'ɔ nɛ̀‘i zɔk sɔsɔɔ ga. 16Kinii, GASA WAN Sɔ̧ ko Israɛl, ɛ̀nɛ̀ kásí wen n’ɛnɛ tɔ̧ɔ̧ so zu dáà kɔ‘m David wi-de-tom k’ɛ́nɛ́; wen ɛnɛ tɔ̧ɔ̧ so'e: ‹Kà o bem kɔ-mɛ mbo zu, kà wa nɛ́ nɔ̀ hee mɔ'ɔ nɛ̀ mɛ nɛ̀ɛ́ so nɛ̀ nɔ̀ ti'm nyɛm nɛ̀ ɗoŋ Heembea kɔ‘m ga, bem kɔ-mɛ beka nyaŋ zu damti Israɛl ti'm na ɓɔnsɛnɛ.›#1 Wan 2.4 17Kinii, GASA WAN Sɔ̧ ko Israɛl, wen n’ɛnɛ baa tɔ̧ so ha̧ wi-de-tom k’ɛ́nɛ́ David a̧ hɔ́ gba̧a̧.
18«Nɛ mbetɛ Sɔ̧ nyɛma mɛ de ye in o bíí zu nù'ɛ nde? Yiwese’ɛ in o wan mɛ ɗoŋ-aa nɛ̀ nyɛm'nɛ́ na’ɛ, sɛ́kà bó nɛ̀ Tua’ɛ n'am mboa’ɛ nde?#2 Kal Ny 2.7 19Ɛ̀nɛ̀ yéŋ zer'nɛ́ tɛ gɔma-er in aia-nú ko wi-de-tom k’ɛ́nɛ́, GASA WAN Sɔ̧ kɔ‘m! Ɛ̀nɛ̀ zíí sara in mɔ nɛ̀ wi-de-tom k’ɛ́nɛ́ ak er'nɛ́ sɔsɔɔ‘i. 20Ɛ̀nɛ̀ zɔ́k Tua’ɛ zɛ nɛ̀ wese; ɛ̀nɛ̀ zɔ́k mɔ sitɛ fara n’ɛnɛ baa tɔ̧ so'e, nin-wi tɛ duk sɛnɛ wó‘i! Ɛ̀nɛ̀ zíí mɔ nɛ̀ wi-de-tom k’ɛ́nɛ́ tɛ ak in'nɛ̀ɛ́ sɛn hɛ̧ɛ̧!#Wee-ɗoŋ-he 12.11 21Kà wi-de-tom k’ɛ́nɛ́ in dukbíí k’ɛ́nɛ́ Israɛl ak mɔ in'nɛ̀ɛ́ fara’ɛ, ɓɛɛ n’ɛ̀nɛ̀ zíí aia-nú kɔ-wa. Ɛ̀nɛ̀ zíí tɛ fara n’ɛnɛ duk sɛnɛ yiwese mɛ, ɓɛɛ ɛ̀nɛ̀ é ɗaŋmɔ kɔ-wa ha̧ wa.
22«Kà ŋma bíí de ɗaŋmɔ in ŋma-a, kà‘i de ha̧ a̧ mɛ kan mɔ nɛ̀ fom, ɓɛɛ kà a̧ tɛ́ɛ̀ kán mɔ‘i ti fara-ɗafi-sɔ̧ k’ɛ́nɛ́ kɔ̧ Tua’ɛ, 23ɓɛɛ n’ɛ̀nɛ̀ zíí sɛn yiwese mɛ, ɛ̀nɛ̀ gɔ́n kita zu o wi-de-tom k’ɛ́nɛ́, ɛ̀nɛ̀ úsí wi-de-ɗaŋmɔ, pi̧ nɛ̀ ɗaŋmɔ kɔ̧-a̧ zu a̧, ɓɛɛ ɛ́nɛ́ usa wi-de-mɔ nɛ̀ yuwar-a de nɛ̀ mɔ in a̧ nyɛm nɛ̀ ɗoŋ deemɔ kɔ̧-a̧ nɛ̀ yuwar-a mbɛt.
24«Ŋgimbi nɛ̀ wisɛn tɛ gan Israɛl dukbíí k’ɛ́nɛ́ tɛ biro wen nɛ̀ wa dee ɗaŋmɔ ti'nɛ́, kà wa pii ɗoŋ tɛ‘nɛ́, kà wa gasi nin'nɛ́, kà wa kɔfi'nɛ́ ai nɛ̀ nú h’ɛ́nɛ́ n’ɛ̀nɛ̀ duk kɔ̧ Tua’ɛ, 25ɓɛɛ n’ɛ̀nɛ̀ zíí wen'i sɛn yiwese mɛ, ɛ̀nɛ̀ é ɗaŋmɔ ko o be Israɛl dukbíí k’ɛ́nɛ́ ha̧ wa, ɓɛɛ ɛ̀nɛ̀ mgbɔ́ wa pii tɛ nù n’ɛnɛ baa ha̧ so ha̧ wa in o dáà kɔ-wa.
26«Ŋgimbi nɛ̀ yiwese tɛ kpe, nɛ̀ kórò beka bo na, wen nɛ̀ dukbíí dee ɗaŋmɔ ti'nɛ́, kà wa kɔfi mɔ pii hɛ̧ɛ̧, gasi nɛ̀ nin'nɛ́, kà wa e ɗaŋmɔ duk wen n’ɛnɛ pi̧i̧ bɔnɛ zu wa, 27ɓɛɛ n’ɛ̀nɛ̀ zíí aia-nú kɔ-wa sɛn yiwese mɛ, ɛ̀nɛ̀ é ɗaŋmɔ ko o wi-de-tom k’ɛ́nɛ́ in dukbíí k’ɛ́nɛ́ Israɛl ha̧ wa. Ɛ̀nɛ̀ úsí de yuwar nɛ̀ wa tɛ ba ha̧ wa; ɛ̀nɛ̀ dé ha̧ kórò mɛ hɔ a zu nù k’ɛ́nɛ́ n’ɛnɛ baa hà̧ so há̧ dukbíí k’ɛ́nɛ́ nɛ̀ mɔɔ-oi.
28«Kóó nɛ́ kaɓa a̧ tika nù, kóó nɛ́ ŋga-zɛɛ-geŋa, kóó nɛ́ mɔ a̧ gbɛɛ dua, kóó nɛ́ laambam, kóó nɛ́ kooŋa̧i̧ in gba-dɔya a̧ tika nù, kóó nɛ́ wisɛn a̧ kɛra ye e nù, kóó nɛ́ ge ŋgamɔ ge, kóó nɛ́ ge zɛɛ ge, 29kóó nɛ́ ge kɔfa-sɔ̧ ge in aia-nú ko ŋma bíí, kóó nɛ́ ko ŋma be Israɛl, ŋgimbi nɛ̀ wi’ɛi tɛ ta mɔ zu ŋgamɔ in bɔnɛ nɛ̀ a̧a̧ zu a̧, kà a̧ nyɛi̧ er-a sitɛ Tua’ɛ, 30ɓɛɛ ɛ̀nɛ̀ zíí sɛn yiwese, fara n’ɛ̀nɛ̀ duk sɛnɛ‘i, ɛ̀nɛ̀ é ɗaŋmɔ kɔ̧-a̧ ha̧ a̧, ɓɛɛ ɛ̀nɛ̀ dé mɔ in a̧ nyɛm nɛ̀ ɗoŋ naŋanɔ kɔ̧-a̧, wen n’ɛnɛ iŋa kɔ̧ see-aa; mɛ̀ nɛ́ ɛ́nɛ́ kpɔk a̧ iŋa kɔ̧ see bíí ɓɛɛ. 31Hegɔ‘i, wa tɛ yu'nɛ́, ɓɛɛ wa baa yuwar k’ɛ́nɛ́ wese lɛŋ tɛ duka-a zu nù n’ɛnɛ ha̧a̧ ha̧ o dáà k’ɛɛ.
32«Kóó nɛ́ gɛnɛ nɛ̀ bó nɛ́ be Israɛl dukbíí k’ɛ́nɛ́ na, kà a̧ tɛ nɛ̀ nyɛi̧a fara wen zu nin'nɛ́ nɛ̀ ɔ gasa, wen zu ŋgai mɛ er'nɛ́ in ɓaa'nɛ́ n’ɛnɛ nyai̧a, kà a̧ kɔfi mɔ pii tɛ Tua’ɛ, 33ɛ̀nɛ̀ zíí sɛn yiwese fara n’ɛ̀nɛ̀ duk sɛnɛ‘i; ɛ̀nɛ̀ dé mɔ nyɛm nɛ̀ ɗoŋ mɔ lɛŋ nɛ̀ gɛnɛ aka er'nɛ‘i, wen ha̧ o dukbíí zu nù lɛŋ mɛ iŋ nin'nɛ́, ha̧ wa mɛ yu'nɛ́ hee Israɛl dukbíí k’ɛ́nɛ́ ga, in ha̧ wa mɛ iŋ ndé, wi sa nɛ́ nin'nɛ́ tɛ Tua’ɛ n'am mboa’ɛ.
34«Ŋgimbi nɛ̀ dukbíí k’ɛ́nɛ́ tɛ ba biro dúk nɛ̀ o wisɛn kɔ-wa sɛn fara n’ɛnɛ tom wa si sɛnɛ‘i, kà wa kɔfi mɔ sitɛ‘nɛ́ zik nɛ̀ tɛ-wa sitɛ ye n’ɛnɛ hoka in sitɛ Tua n'am mboo wen nin'nɛ́‘i, 35ɛ̀nɛ̀ zíí kɔfamɔ in aia-nú kɔ-wa sɛn yiwese mɛ, ɓɛɛ ɛ̀nɛ̀ gbák wa.
36«Ŋgimbi nɛ̀ wa tɛ de ɗaŋmɔ sitɛ‘nɛ́, wen ŋma bíí nɛ̀ de ɗaŋmɔ na, bo na; ŋgimbi nɛ̀ see'nɛ́ tɛ tu̧ zu wa, ŋgimbi n’ɛnɛ tɛ e wa kɔ̧ er o wisɛn kɔ-wa, in ŋgimbi nɛ̀ o wisɛn kɔ-wa tɛ kai wa nɛ̀ bara sitɛ ŋma nù nɛ̀ ɔ nyɛi̧a, kóó nɛ̀ nyɛi̧ na mbɛt, 37kà wa ta mɔ tɛ nù nɛ̀ wa de bara sɛnɛ‘i, kà wa kifi see-wa, ai nɛ̀ nú, tɔ̧ nɛnɛ‘e: ‹Ɛɛ dee ɗaŋmɔ, ɛɛ yɔɔ kaya, ɛɛ iŋa ɗaŋmɔ k’ɛɛ,› 38kà wa pii ɗoŋ pii tɛ‘nɛ́ nɛ̀ see kpɔk in nɛ̀ kiitɛ-wa lɛŋ tɛ nù ko o wisɛn nɛ wa kaia wa si sɛnɛ‘i, ɓɛɛ kà wa kɔfi mɔ sitɛ‘nɛ́, si war nù kɔ-wa, nù n’ɛnɛ ha̧a̧ so ha̧ o dáà kɔ-wa, kà wa zik tɛ-wa sitɛ ye n’ɛnɛ hoka in sitɛ Tua n'am mboo wen nin'nɛ́, 39ɛ̀nɛ̀ zíí sɛn yiwese, fara n’ɛ̀nɛ̀ duk sɛnɛ, ɛ̀nɛ̀ zíí kɔfa-sɔ̧ in aia-nú kɔ-wa, ɛ̀nɛ̀ gbák wa, ɓɛɛ ɛ̀nɛ̀ é ɗaŋmɔ ko dukbíí k’ɛ́nɛ́ nɛ̀ dee ti'nɛ́‘i ha̧ wa.
40«Kinii, Sɔ̧ kɔ‘m, ɛ̀nɛ̀ hú̧í̧ yí‘nɛ́ ɓɛɛ ɛ̀nɛ̀ yéŋ zer'nɛ́ tɛ o kɔfa-sɔ̧ nɛ̀‘i kɔfi fara’ɛ.
41Hegɔ kinii, GASA WAN Sɔ̧,
ɛ̀nɛ̀ kúr, ɛ̀nɛ̀ tɛ́ pii fara-ɔm-tɛ k’ɛ́nɛ́,
ɛ̀nɛ̀ in kuɓa fara nɛ̀ ŋgai k’ɛ́nɛ́ duk sɛnɛ‘i!
GASA WAN Sɔ̧, yuwar-kpasa-a a̧ dúk tɛ o wi-ɗafi-sɔ̧ k’ɛ́nɛ́
hee laa-pi̧-tɛ ga;
o wi-mbo-zu h’ɛ́nɛ́ a̧ dé nyɛŋɛ kpa nɛ̀ desee.#Gima 132.8-10
42GASA WAN Sɔ̧,
k’ɛ́nɛ́ bɛ̧ zɔka sɔnti wi#6.42 sɔnti wi: zɔk wee-ɗoŋ-mɔ tɛ 1 Sam 2.10 n’ɛnɛ tɛna nɔ̧́ a zu a̧ na,
tɛ‘nɛ́ a̧ mbáŋ ɗoŋ demɔ n’ɛnɛ dee in David wi-de-tom k’ɛ́nɛ́.»
Currently Selected:
2 KALATA NYƐRƐ 6: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.