2 KALATA NYƐRƐ 26
26
Ozias wannu Juda
(Zɔk 2 Wan 14.21-22; 15.1-3)
1O dukbíí Juda baa Ozias nɛ̀ a̧a̧ nɛ̀ pɛ ɓu-zua-mɔɔrɔ-ɗoŋ-kpɔk pi̧ tɛ wan oi dáà kɔ̧-a̧ Amasia. 2Nɛ́ a̧ á̧ bìì ye Elat ɓɛɛ ba piiɗoŋ ha̧ Juda ɗoŋ nɛ̀ wa guna nɛ̀ wannu si ɗoŋ o dáà kɔ‘i kaɗi.
3Ozias a̧a̧ so nɛ̀ pɛ ɓu-zua-mɔɔrɔ-ɗoŋ-kpɔk ŋgimbi n'aa ɔɔ nɛ̀ wan, ɓɛɛ a̧ ɔ wan pɛ ɓu-mɔɔrɔ-zua-yiitoo sɛn Jerusalɛm. Nin nàà kɔ̧-a̧ duka so nɛ́ Yɛkɔlia zɔŋa Jerusalɛm. 4Ozias dee mɔ nɛ̀ yuwar-a ti GASA WAN, kànà hee mɔ'ɔ nɛ̀ Amasia dáà kɔ̧-a̧ dee so ga. 5A̧ kia Sɔ̧ ŋgimbi nɛ̀ Zakarii wi nɛ̀ usa yuwar yuu Sɔ̧ ha̧ a̧ ɓɔna nɛ̀ yí in ŋgimbi n'aa ɓɔna so nɛnɛ tɛ mboozu ha̧ GASA WAN mbɛt. Tɛ ŋgimbi'i, Sɔ̧ dee ha̧ mɔ kɔ̧-a̧ mɛ gasi gasi siti.
6A̧ baa biro dúk nɛ̀ o be Filistii ɓɛɛ a̧ gbin garo Gat, in wan mɛ Yabne bá nɛ̀ wan mɛ Asdod mbɛt. A̧ ɗafa ɗoŋ o ye tɛ zika nú Asdod in sɛn nú Filistii mbɛt. 7Sɔ̧ gbaka a̧ tɛ bíí o be Filistii, in o be Arab nɛ̀ ɔ sɛn Gur-Bal gú nɛ̀ o be Mɛɔnii mbɛt. 8Hegɔ o be Mɛɔnii gboo garama ha̧ Ozias, ɓɛɛ nin-a hur hɔ si nú Egiptɛ mɛ, wen a̧ kpaa so ŋgai nɛ̀ dɔka-a nyɛmna.
9Ozias mboo kusa ŋgárá-pɛm-mɔ sɛn Jerusalɛm sɛn zu nutua mɛ Mgbii-aa in wan mɛ si kɔ̧ Gboŋgo in see zu fara nɛ̀ garo suia si zan#26.9 fara nɛ̀ garo suia si zan: wa sa nin fara'i nɛ̀ nú hébreu nɛ́ Rɛdaŋ. sɛnɛ mbɛt, ɓɛɛ a̧ mbo garo zik nɛ̀ wa. 10A̧ mboo ŋma ŋgárá-pɛm-mɔ sɛn ŋga-gbárà, ɓɛɛ a̧ za̧ o kɔ̧-yì nɛ̀ dɔka-a mbɛt, wen a̧ a̧a̧ so nɛ̀ o gíí mɔ-dai nyɛmna. A̧ a̧a̧ so nɛ̀ o wi-wa-fɔ mbɛt sɛn ká̧ nù mɛ ɗɔɔ in sɛn tɔyɛɛ gɔn-see-nù, bá nɛ̀ o wi-de-tom-dɔ̧ɔ̧ sɛn zu kaya in sɛn Karmɛl, wen a̧ kɔ̧ɔ̧ so tom-fɔ nyɛmna.
11Ozias a̧a̧ so nɛ̀ gíí wi-biro nɛ̀ iŋa dee biro in wen nɛ́ɛ́ biro mbɛt, tɛ dùk-aa nɛtɛ nɛtɛ nyɛm nɛ̀ ɗoŋ o tom nɛ̀ wi-yɔr-mɔ Yeiɛl in ŋma wi-gɔn-kita Masɛya yɔra so. Nɛ́ Hanania, ŋma gasawi ko wannu a̧ duka so zu o wi-biro nɔ‘i. 12Dɔka o gasawi nú-gara lɛŋ nɛ̀ yaa so zu o ŋga wi-biro nɔ‘i nɛ́ booro-yiitoo-nɛ-gɔmŋmaa-mɔɔrɔ-ɗoŋ-kpɔk. 13O ŋga wi-biro nɛ́ booro-gɔmŋmaa-taar-zua-mɔɔrɔ-ɗoŋ-yiitoo-nɛ-gɔmŋmaa-mɔɔrɔ nɛ̀ nyɛma so mɛ bi biro nɛ̀ ŋgai in nɛ̀ nɔɔ-ŋgiɗi wen pɛma wannu wen o wisɛn kɔ̧-a̧. 14Ŋgimbi nɛ́ɛ́ biro, Ozias ha̧ so nɛ́ o ŋgee, o sɛ́ɛ̀, o laasɔ̧i̧-boi, o laa-boi, o kusaa in o ta-birndiŋ ha̧ wa. 15Sɛn Jerusalɛm, a̧ dee o ŋma boi-biro nɛ̀ ya kɔ‘i sɛn zu garo zu tua-pɛm-mɔ in nɛ̀ war mgbii-aa wen pi̧i̧ góò in o gasa ta. Nin-a hura dam fara lɛŋ, wen Sɔ̧ gbaka so a̧ nɛ̀ dɔka-a; hegɔ a̧ kpaa ŋgai nɛ̀ de-a.
GASA WAN usa bɔnɛ ha̧ Ozias wen gasa-zu kɔ̧-a̧
16Ozias kpaa ŋgai, ɓɛɛ ku̧ naŋ gasa zu. A̧ dee ŋgazu in GASA WAN Sɔ̧ kɔ̧-a̧, ɓɛɛ a̧ yɔ kɔya-tɛ-a. Ŋma wese, a̧ yee kɔ̧ Tua ko GASA WAN mɛ dɔ fuu-nyama sɛn zu fara-ɗafi-sɔ̧. 17Nɛ́ mɔ'ɔ nɛ̀ gasa wan-ɗafi-sɔ̧ Azaria yee Tua ɗoŋ-aa in o ŋma dɔka wi-ɗafi-sɔ̧ ko GASA WAN ɓu-mɔɔrɔ-ɗoŋ-taar nɛ̀ a̧a̧ nɛ̀ nɔɔ-ŋgiɗi. 18Wa nɛka ti wannu Ozias, ɓɛɛ wa tɔ̧ ha̧ a̧: «Wannu, ɛnɛ bo nɛ̀ yuwar mɛ dɔ fuu-nyama ha̧ GASA WAN nɛ̀ tɛ‘nɛ́ na; mɔ‘i nɛ́ tom ko o bezaŋ Arɔŋ wi-ɗafi-sɔ̧ nɛ̀‘i hoka wa wen-aa. Ɛ̀nɛ̀ gbó kɔ̧ sa̧a̧-fara’ɛ, wen ɛ́nɛ́ de nɛ ndiŋ a sɛnɛ! Mɔ‘i beka duk nɛ́ zɔnamɔ wen'nɛ́ sɛn ti GASA WAN Sɔ̧ na.»#Gboa-a 30.7-8; Tɔra-bíí 3.10
19See Ozias nyima, ɓɛɛ ká mɔɔ-dɔ-fuu-nyama ɓɔna so kɔ̧ er-a. Ɓɛɛ sɛn tɛ ŋgimbi nyimsea kɔ̧-a̧ zu o wi-ɗafi-sɔ̧, zɛɛ doko ku̧u̧naŋ gboa-a sɛn sɔnti-a nɛ̀ yí-wa sɛn kɔ̧ Tua ko GASA WAN, ká̧ fara-dɔ-fuu-nyama. 20Gasa wan-ɗafi-sɔ̧ Azaria in o dɔka wi-ɗafi-sɔ̧ zɔka mɔ sitɛ-a, ɓɛɛ zɛɛ doko kpee sɔnti-a lɛŋ. Wa ira a̧ gbonɛ, ɓɛɛ a̧ gbo nɛ̀ haya-a wen a̧ iŋa'e GASA WAN pi̧i̧ zɛɛ doko tɛ-wi.
Kaɗa wan ko Ozias
(Zɔk 2 Wan 15.5-7)
21Zɛɛ doko ɓɔna tɛ wannu Ozias hɔ wese fio kɔ̧-a̧. Hegɔ wen zu zɛɛ‘i, a̧ ɔ so kɔ̧ ŋma tua ɛ̀nɛ́-a, wen wa foo a̧ nyɛi̧ nɛ̀ Tua ko GASA WAN. Bem kɔ̧-a̧ Yotam nɛ̀ duk nɛ́ gasawi zu o bíí nutua ko wannu ɔɔ wan zu nù.
22 Wi-tɔ̧-wen oi nú Sɔ̧ Esaii bem ko Amɔs yɔra oi o tom ko Ozias tɛ ku̧u̧naŋ-a hɔ sɔŋkur-aa. 23Wa guna Ozias in o dáà kɔ̧-a̧ ɓɛɛ bó nɛ́ sɛn fara gun o wannu na, wen wa tɔ̧ɔ̧ so'e ndé, a̧ nɛ́ wi-doko; ɓɛɛ bem kɔ̧-a̧ Yotam ɔ wan oi-aa.#Es 6.1
Currently Selected:
2 KALATA NYƐRƐ 26: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.