1 JEAN 1
1
Wen-duka-kpasa
1Mɔ n’ɛ̀ɛ̀ yɔr mɔ h’ɛ́nɛ́ wen-aa’ɛ nɛ́ mɔ nɛ̀ duka so nɛ̀ ku̧u̧naŋ-a mɛ̀ tɛnɛ, nɛ́ mɔ n’ɛ̀ɛ́ zia, n’ɛ̀ɛ́ zɔka nɛ̀ yí-ɛ́ɛ́, n’ɛ̀ɛ́ mbaɗa, ɓɛɛ ɛɛ tam nɛ̀ er yɛ́ mbɛt; wen'i nɛ́ Wen-duka-kpasa.#Jn 1.1 2Duka-kpasa usa tɛ̀, ɛ́ɛ́ zɔka a̧, ɓɛɛ ɛ́ɛ́ dé sedaako, tɔ̧́ nɛ̀ wen-aa h’ɛ́nɛ́. Duka-kpasa'i nɛ́ wan nɛ̀ dúk ɓɔnsɛnɛ, nɛ̀ duka so katɛ Dáà, ɓɛɛ usi tɛ̀ h’ɛ́ɛ́.#Jn 1.14 3Mɔ n’ɛ̀ɛ́ zɔka in n’ɛ̀ɛ́ zia, nɛ́ mɔ‘i ɛ̀ɛ̀ tɔ̧́ wen-aa h’ɛ́nɛ́ wen h’ɛ́nɛ́ mɛ́ duk kpɔk in yɛɛ mbɛt; ɓɛɛ duka-a k’ɛ́ɛ́ kpɔk'i, nɛ́ duka-a kpɔk in Dáà in Bem kɔ̧-a̧ Jesu Krist. 4Ɛ́ɛ́ yɔ́r mɔ‘i lɛŋ h’ɛ́nɛ́ wen há̧ desee k’ɛ́ɛ́ mɛ́ dùk nɛ́ kpasa desee.
Nɛɛ nɔ̀ tɛ̀ sa̧a̧mɔ
5Gba̧a̧ wen n’ɛ̀ɛ́ zia nú Bem kɔ̧-a̧ nɛ́ mɔ'ɔ n’ɛ̀ɛ̀ tɔ̧́ h’ɛ́nɛ́'ɛ: Sɔ̧ nɛ́ sa̧a̧mɔ; tum kóó tikiɗi bó tɛ́ a̧ na. 6K’ɛ̀ɛ̀ tɔ̧́‘e ɛ́ɛ́ dúk kpɔk in Sɔ̧ wó, ɓɛɛ k’ɛ̀ɛ̀ nɛ́ nɛ̀ɛ́ nɔ̀ ti tum, ɓɛɛ ɛ́ɛ́ dé nɛ́ ndela, ɛ́ɛ́ dé mɔ tɛ́ kpasawen na#1.6 ɛ́ɛ́ dé mɔ tɛ́ kpàsáwen ná: texte tɔ̧a: ɛ́ɛ́ dé kpàsáwen ná.. 7Ɓɛɛ k’ɛ̀ɛ̀ nɛ́ nɛ̀ɛ́ nɔ̀ tɛ́ sa̧a̧mɔ hee mɔ'ɔ nɛ̀ a̧ nɛ̀ tɛ-a a̧a̧ tɛ̀ sa̧a̧mɔ ga, ɛ́ɛ́ dúk kpɔk in o ŋmaa nɛ̀ mbetɛ, ɓɛɛ tɔk tɛ̀ Bem kɔ̧-a̧ Jesu fɔ́r nɛ́ ɗaŋmɔ lɛŋ yinɛ tɛ-ɛɛ, ha̧ mɛ́ sa̧.
8K’ɛ̀ɛ̀ tɔ̧‘e, ɗaŋmɔ bó tɛ-ɛɛ na, ɛ́ɛ́ ɔr nɛ́ tɛ-ɛɛ, ɓɛɛ kpasawen bó tɛ-ɛɛ na. 9Ɓɛɛ k’ɛ̀ɛ̀ nɛ́ gbara ɗaŋmɔ k’ɛ́ɛ́, Sɔ̧ tɛ́ e h’ɛ́ɛ́, ɓɛɛ a̧ tɛ́ de ha̧ tɛ-ɛɛ mɛ́ sa̧ tɛ̀ ndiŋmɔ lɛŋ, wen a̧ nɛ́ wi-yor-ɗoŋ wen kɔ̧-a̧, in a̧ de mɔ nɛ yuwar-a mbɛt. 10K’ɛ̀ɛ̀ tɔ̧‘e, ɛ́ɛ́ de ɗaŋmɔ na, ɛ́ɛ́ ee Sɔ̧ nɛ̀ wi ndela, ɓɛɛ wen kɔ̧-a̧ bó tɛ-ɛɛ na.
Currently Selected:
1 JEAN 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.