1 JEAN 2
2
Wi-am-mɔ zu yɛ
1O bem kɔ‘m, mi yɔr mɔ'ɔ h’ɛ́nɛ́ wen k’ɛ́nɛ́ tɛ́ɛ̀ de ɗaŋmɔ. Ɓɛɛ kà ŋma bíí nɛ́ dee ɗaŋmɔ, Wi-am-mɔ zu yɛ a̧a̧ sɛnɛ katɛ Dáà; wi’ɛi nɛ́ Jesu Krist, wi-de-mɔ nɛ yuwar-a; 2wen a̧ nɛ́ wi nɛ̀ ha̧a̧ tɛ-a nɛ̀ mɔɔ-ɗafi-sɔ̧ gɔn nɛ̀ zu ɗaŋmɔ k’ɛ́ɛ́, bó nɛ́ ɗaŋmɔ k’ɛ́ɛ́ ɛ̀nɛ̀ yɛ ɓɛɛ na, ɓɛɛ nɛ́ ɗaŋmɔ ko o bíí zaŋnu lɛŋ.
3Mɔ nɛ̀ tɛ́ usi'e ɛ́ɛ́ iŋa Sɔ̧ nɛ́ mɔ'ɔ: nɛ́ kasa o heembea kɔ̧-a̧. 4Wi nɛ̀ tɔ̧‘e wi iŋa Sɔ̧ ɓɛɛ nɛ̀ kasi o heembea kɔ̧-a̧ na, wi’ɛi nɛ́ wi-ndela, kpasawen bó tɛ-a na. 5Ɓɛɛ wi nɛ̀ kasi wen ko Sɔ̧, kɔ̧ɔ̧mɔ ko Sɔ̧ hɔɔ gba̧a̧ tɛ̀ wi’ɛi nɛ̀ mbetɛ. Nɛ́ tɛ́ mɔ‘i ɛ̀ɛ̀ tɛ́ iŋ‘e ɛ́ɛ́ dúk tɛ́ Sɔ̧. 6Wi nɛ̀ tɔ̧‘e wi dúk tɛ́ Sɔ̧, wi’ɛi a̧ zɔ́k ɗoŋ nɛɛ nɔ̀ ko Jesu, nɛ́ nɛ̀ kɔ‘i.
Mbe heembea
7O wi n'am kɔ̧ɔ̧ nyɛmna, bó nɛ́ mbe heembea a̧‘m yɔr h’ɛ́nɛ́ na, ɓɛɛ mɛ̀ nɛ́ gba̧‘a̧ heembea n’ɛ̀nɛ̀ kpaa só nɛ̀ ku̧u̧naŋ-a mɛ̀ tɛnɛ. Gba̧‘a̧ heembea'i nɛ́ wen n’ɛ̀nɛ̀ zia kaɗi'i.#Jn 13.34 8Ɓɛɛ kóó hegɔ, nɛ́ mbe heembea a̧‘m yɔr h’ɛ́nɛ́, wen heembea'i dúk kpasa tɛ̀ Jesu in tɛ‘nɛ́ mbɛt; tum yaka ɓɛɛ kpasa sa̧a̧mɔ nyɛk.
9Wi nɛ̀ tɔ̧‘e wi dúk tɛ̀ sa̧a̧mɔ, ɓɛɛ nɛ̀ sɛn nya kɔ‘i, wi’ɛi ɓɔna ti tum. 10Wi nɛ̀ kɔ̧ nya kɔ‘i, duk tɛ̀ sa̧a̧mɔ, ɓɛɛ ŋma mɔ nɛ̀ a̧a̧ tɛ́ a̧ nɛ tɛ de há̧ a̧ mɛ́ kɔ̧̀ náŋ-a bó na.#2.10 wen há̧ a̧ mɛ́ kɔ̧̀ náŋ-a: ó ŋma wí-kpai-kalata tɔ̧a̧: nɛ̀ tɛ́ dè há̧ ŋma bíí mɛ́ kɔ̧́ naŋ, bó ná. 11Ɓɛɛ wi nɛ̀ sɛn nya kɔ‘i dúk ti tum; a̧ nɛ́ nɔ̀ ti tum, a̧ iŋ fara n'aa nɛ́ si sɛnɛ na, wen tum kpee yí-a.
12O bem kɔ‘m, mi yɔr mɔ'ɔ h’ɛ́nɛ́, wen Sɔ̧ ee ɗaŋmɔ k’ɛ́nɛ́ h’ɛ́nɛ́ wen nin Jesu. 13O dáà kɔ‘m, mi yɔr mɔ'ɔ h’ɛ́nɛ́, wen ɛ́nɛ́ iŋa wi nɛ̀ duka so nɛ̀ ku̧u̧naŋ-a mɛ̀ tɛnɛ. O ŋgaiwi, mi yɔr kalata’ɛ h’ɛ́nɛ́, wen ɛ́nɛ́ gana Wan-ɗaŋmɔ kaɗi.
14O bem kɔ‘m, mi yɔra mɔ'ɔ h’ɛ́nɛ́, wen n’ɛ̀nɛ̀ iŋa Dáà. O dáà kɔ‘m, mi yɔra mɔ'ɔ h’ɛ́nɛ́, wen n’ɛ̀nɛ̀ iŋa wi nɛ̀ duka so nɛ̀ ku̧u̧naŋ-a mɛ̀ tɛnɛ. O ŋgaiwi, mi yɔra mɔ'ɔ h’ɛ́nɛ́, wen ɛ́nɛ́ ɔ ŋgaya; wen ko Sɔ̧ dúk tɛ‘nɛ́, ɓɛɛ ɛ́nɛ́ gana Wan-ɗaŋ.
15K’ɛ́nɛ́ kɔ̧ mɔɔ-zaŋnu na, kóó mɔ nɛ̀ a̧a̧ zaŋnu na mbɛt. Kà ŋma bíí nɛ́ kɔ̧ɔ̧ mɔɔ-zaŋnu, ɓɛɛ kɔ̧ɔ̧mɔ kó Dáà bó tɛ̀ wi’ɛi na, 16wen mɔɔ-zaŋnu lɛŋ, wɔ-mɔ wan mɛ́ ko mur-tɛ, wɔ-mɔ nɛ̀ yí-wi zɔk, in duka-tɛ gasi nɛ̀ zu nɛ̀ kpaamɔ, nɛ́ o géé mɔɔ-zaŋnu, nɛ̀ bó nɛ́ tɛ̀ɛ́ nɛ̀ tɛ̀ Dáà na. 17Mɔɔ-zaŋnu in wɔ-a kaɗi kaɗi, ɓɛɛ wi nɛ̀ de mɔ nɛ̀ Sɔ̧ kɔ̧a̧ dúk kɔ‘i ɓɔnsɛnɛ.
Wi-we-zu nɛ̀ Krist
18O bem kɔ‘m, ɛ̀nɛ̀ zɔ́k sɔŋkur ŋgimbi hɔɔ kaɗi. Ɛ́nɛ́ baa zii so'e, wi-we-zu nɛ̀ Krist tɛ́ hɔ, ɓɛɛ kinii o pɛrti wi nɔ‘i hɔɔ dɔk kaɗi; nɛ́ mɔ‘i s’ɛ́ɛ́ iŋ‘e sɔŋkur ŋgimbi hɔɔ kaɗi. 19O wi nɔ‘i gbòó nɛ̀ mgbara yɛ, ɓɛɛ wa bó só nɛ́ o bíí k’ɛ́ɛ́ na. Kà wa bó só nɛ́ o bíí k’ɛ́ɛ́, wa tɛ̀ɛ́ ɓɔn in yɛɛ. Ɓɛɛ mɔ‘i dee hegɔ h’ɛ́ɛ́ mɛ́ iŋ‘e o wi nɔ‘i lɛŋ nɛ̀ yaa so in yɛɛ bó nɛ́ o bíí k’ɛ́ɛ́ na.
20Wár k’ɛ́nɛ́, Sa̧a̧ Wi tɛna nɔ̧́ á zù‘nɛ́; ɓɛɛ ɛ́nɛ́ lɛŋ iŋa kpasawen.#2.20 Wár k’ɛ́nɛ́, Sa̧a̧ Wi tɛna nɔ̧́ á zù‘nɛ́; ɓɛ̀ɛ́ ɛ́nɛ́ lɛ́ŋ ìŋà kpàsáwen: ŋma yúwár-kpaia-a mbɛ́t nɛ́: k’ɛ́nɛ́, Krist hà̧á̧ Sa̧a̧ Ɔmi h’ɛ́nɛ́; nɛ́ mɔ‘i á̧ dèé h’ɛ́nɛ́ lɛ́ŋ mɛ́ ìŋ kpàsáwen. 21Bó nɛ́ wen n’ɛ̀nɛ̀ iŋ kpasawen na a̧‘m yɔra nɛ̀ wen’ɛ h’ɛ́nɛ́ na; ɓɛɛ mɛ̀ nɛ́ wen n’ɛ̀nɛ̀ iŋa kpasawen, ɓɛɛ ɛ́nɛ́ iŋa'e ŋma mɔɔ-ndela kóó tikiɗi bó tɛ́ kpasawen na.
22Wi-ndela nɛ́ o? Wi ndela kànà nɛ́ wi nɛ̀ si kafɛ‘e, Jesu bó nɛ́ Krist na. Wi-we-zu nɛ̀ Krist nɛ́ mɔ‘i. Wi’ɛi kafi nɛ́ Dáà in Bem. 23Kóó o ndé nɛ̀ kafi Bem, bó nɛ̀ Dáà tɛ-a na, ɓɛɛ wi nɛ̀ kpɛka Bem, a̧a̧ nɛ̀ Dáà tɛ̀ mbɛt.
24K’ɛ́nɛ́, mɔ n’ɛ̀nɛ̀ zia nɛ̀ ku̧u̧naŋ-a mɛ̀ tɛnɛ a̧ dúk ɓɔn tɛ‘nɛ́. Kà mɔ n’ɛ̀nɛ̀ zia nɛ̀ ku̧u̧naŋ-a mɛ‘i dúk ɓɔn tɛ‘nɛ́, ɓɛɛ ɛ́nɛ́ mbɛt, ɛ́nɛ́ tɛ duk tɛ̀ Bem in tɛ̀ Dáà. 25A̧ nɛ̀ tɛ-a baa ha̧ so nú mɛ́ de h’ɛ́ɛ́ mɛ́ duk kpasa kpoo nɛ kpoo.
26Mɔ n'am kɔ̧ɔ̧ so mɛ́ yɔr h’ɛ́nɛ́ zu o wi nɛ̀ kii war mɛ́ ɔr'nɛ́ nɛ́ mɔ‘i. 27War k’ɛ́nɛ́, nɔ̧́ n'aa tɛna a zu'nɛ́‘i dúk ɓɔn tɛ‘nɛ́, ɓɛɛ ŋma mɔ nɛ̀ bíí tɛ́ usi h’ɛ́nɛ́ woyo bó na. Tɛna nɔ̧́ kɔ̧-a̧‘i nɛ́ kpasawen, ndela bó sɛnɛ na; ɓɛɛ mɔ‘i usi mɔ h’ɛ́nɛ́ zu mɔ lɛŋ. Hee mɔ'ɔ nɛ̀ tɛna-nɔ̧́‘i usa mɔ h’ɛ́nɛ́ ga, ɛ́nɛ́ dúk tɛ́ Krist.
28Hegɔ, o bem kɔ‘m, ɛ̀nɛ̀ dúk tɛ́ a̧, wen kà a̧ be tɛ̀ɛ́ hɔ, ɓɛɛ k’ɛ́ɛ́ èé ta nɛ̀ a̧, bó nɛ́ ha̧ foe mɛ́ de yɛ h’ɛ́ɛ́ mɛ́ ya nɛ̀ ɗoŋ nyɛi̧ nɛ̀ a̧ tɛ hɔa-a kɔ̧-a̧ na. 29Ɛ́nɛ́ iŋa'e a̧ nɛ́ wi-de-mɔ nɛ̀ yuwar-a, ɓɛɛ ɛ̀nɛ̀ íŋ‘e kóó o ndé nɛ̀ de mɔ nɛ̀ yuwar-a mbɛt nɛ́ Sɔ̧ a̧ koo a̧.
Currently Selected:
1 JEAN 2: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.