1 WANNU 21
21
Fɔ-nyak-dɔ̧ɔ̧ ko Nabot
1Mɔ nɛ̀ yaka ɗoŋ o mɔɔ nɔ‘i nɛ́ mɔ'ɔ. Nabot be Yizreɛl a̧a̧ so nɛ̀ fɔ-nyak-dɔ̧ɔ̧ kɔ‘i; fɔ‘i duka so ká̧ tua-wan ko Akab wannu Samarii. 2Akab tɔ̧ɔ̧ ha̧ Nabot: «Mɛ̀ é fɔ-nyak-dɔ̧ɔ̧ kɔ-mɛ ha̧‘m de nɛ̀ fɔ wa̧a̧-kpoo, wen a̧ duk mgbák ká̧ tua kɔ‘m, ɓɛɛ mi tɛ ha̧ ŋma mbe de fɔ-nyak-dɔ̧ɔ̧ ha̧ mɛ oi-aa, kóó kà mɛ nɛ́ kɔ̧a̧, mi ha̧a̧ nɛ́ sede oi-aa ha̧ mɛ mbɛt.»
3Nabot tɔ̧ɔ̧ ha̧ Akab: «Mi kànà nin GASA WAN, kà‘m nɛ́ ha̧a̧ mɔɔ-oi o dáà kɔ‘m h’ɛ́nɛ́, ɓɛɛ mɔ‘i tɛ duk nɛ́ gasa ɗaŋmɔ wen am nyɛmna.»
4Akab sii ɗoŋ nɛ̀ ga̧a̧-tɛ in tu̧u̧-see wen wen nɛ̀ Nabot be Yizreɛl kifa ha̧ a̧‘e, wi beka ha̧ mɔɔ-oi o dáà kɔ‘i ha̧ a̧ na wó‘i. A̧ ɔɔ nù gɔn gado kɔ̧-a̧ zik tɛ si zaŋ ŋgeŋ, ɓɛɛ bɛ̧ nyɔŋa mɔ. 5Kóò kɔ̧-a̧ Jezabɛl tɛ̀ɛ̀ kpa a̧, ɓɛɛ tɔ̧ ha̧ a̧: «Wen ge mɛ duk bɔɔ nɛ̀ ɗaŋsee, ɓɛɛ mɛ kɔ̧ nyɔŋa mɔ na ge?»
6A̧ kifa nú ha̧ a̧: «Mɛ̀ nɛ́ wen n'am aka Nabot be Yizreɛl ndé, a̧ a̧ ɗɔ́r fɔ-nyak-dɔ̧ɔ̧ kɔ̧-a̧ ha̧‘m, ɓɛɛ kà a̧ nɛ́ kɔ̧ɔ̧ sede na, ɛɛ kpaia nɛ̀ fɔ-nyak-dɔ̧ɔ̧ kɔ‘m, ɓɛɛ a̧ kifi nú ha̧‘m ndé, wi beka ha̧ fɔ-nyak-dɔ̧ɔ̧ kɔ‘i ha̧‘m na.»
7Jezabɛl kóò ko wannu kifa nú ha̧ a̧: «Mɔɔ bó nɛ́ mɛ́ a̧ ɔ wan zu Israɛl na nde? Mɛ̀ kúr, mɛ̀ nyɔ́ŋ mɔ, ká mɛ́ kpa ɗaŋsee géè na! Nɛ́ mi a̧ tɛ ha̧ fɔ-nyak-dɔ̧ɔ̧ ko Nabot be Yizreɛl ha̧ mɛ.»
8Jezabɛl yɔra o kalata nɛ̀ nin Akab e tumbal kɔ̧-a̧ sɛnɛ, ɓɛɛ tom ha̧ o kuti-wi in o dita-bíí nɛ̀ ɔ kpɔk saaye in Nabot. 9Gba̧a̧ wen kalata'i nɛ́ mɔ'ɔ: «Ɛ̀nɛ̀ hé mbea wen zima-yì, ɓɛɛ ɛ̀nɛ̀ é ha̧ Nabot mɛ duk ti ha̧ o bíí nɛ tɛ mɔi̧. 10Ɛ̀nɛ̀ dé ha̧ o ŋma wi-de-gba̧a̧-mɔ-na yiitoo mɛ ya nù sɛn ti a̧, ɓɛɛ wa a̧ ɓír wen e nú-a tɔ̧ nɛnɛ‘e, a̧ foma Sɔ̧ in wannu; hegɔ, ɛ̀nɛ̀ fó a̧ gbonɛ saaye ɓɛɛ ɛ̀nɛ̀ yó a̧ nɛ̀ ta gbɛ.»
11O bíí saaye Yizreɛl, o kuti-wi in o dita-bíí nɛ̀ ɔ so saaye'i dee mɔ nyɛm nɛ̀ ɗoŋ tɔ̧ɔ̧-wen ko Jezabɛl hee mɔ'ɔ nɛ̀ yɔra zaŋ o kalata nɔ‘i n'aa toma ha̧ wa'i ga. 12Wa hee mbea zima-yì, ɓɛɛ wa e Nabot tɛ kuti fara ti o bíí nɛ̀ mɔi̧a. 13O wi-de-gba̧a̧-mɔ-na nɔ‘i yiitoo'i tɛ̀ɛ̀ ya nù ti a̧. Wa yaa ti dukbíí ɓir nɛ̀ wen e nú Nabot hee mɔ'ɔ ga: «Nabot foma Sɔ̧ in wannu.» Wa mgbɔɔ a̧ gbonɛ si ɗoŋ ye, ɓɛɛ wa yo a̧ nɛ̀ ta gbɛ. 14Wa toma tɔ̧ ha̧ Jezabɛl ndé, wa yoo Nabot nɛ̀ ta gbɛ kaɗi.
15Ŋgimbi nɛ Jezabɛl zia'e ndé, wa yoo Nabot nɛ̀ ta gbɛ kaɗi, a̧ tɔ̧ɔ̧ ha̧ Akab: «Mɛ̀ kúr, mɛ̀ bá fɔ-nyak-dɔ̧ɔ̧ nɛ̀ Nabot be Yizreɛl bɛ̧ɛ̧ so ɗɔra-a ha̧ mɛ'ɛ, wen a̧ bo ɓɔna, a̧ fee kaɗi.» 16Ŋgimbi nɛ Akab zia'e Nabot fea kaɗi, a̧ kura mɛ nɛ si kpɛɛfɔ-nyak-dɔ̧ɔ̧ ko Nabot be Yizreɛl so'i wen baa a̧ nɛ̀ kɔ̧-a̧.
GASA WAN tɔ̧ɔ̧ wen zu Akab in Jezabɛl
17GASA WAN tɔ̧ɔ̧ ha̧ Elii be Tisbe hee mɔ'ɔ ga: 18«Mɛ̀ kúr, mɛ̀ wé ti Akab wannu Israɛl sɛn Samarii; a̧ zira si kpɛɛfɔ-nyak-dɔ̧ɔ̧ ko Nabot ha̧ a̧ mɛ ba. 19Mɛ̀ tɔ̧́ ha̧ a̧ hee mɔ'ɔ ga: ‹Wen nɛ̀ GASA WAN tɔ̧ nɛ́ mɔ'ɔ: Ɗoŋ nɛ̀ mɛ gbɛɛ zu kaɗi, mɛ kɔ̧ɔ̧ mɛ ba mɔɔ-oi-aa nɛ̀ kɔ-mɛ nde? Mɛ̀ tɔ̧́ ha̧ Akab'e, wen nɛ̀ GASA WAN tɔ̧ nɛ mɔ'ɔ: O toyo tɛ ndal tɔk tɛ-a kpɔk fara nɛ̀ o toyo ndala tɔk tɛ Nabot sɛnɛ‘i.› »#1 Wan 22.38
20Akab tɔ̧ɔ̧ ha̧ Elii: «Ho! Wisɛn kɔ‘m, mɛ kpaa'm woyo na nde!»
Elii kifa nú: «Mi kpaa mɛ woyo wen nɛ̀ mɛ dee gasa ɗaŋmɔ yí GASA WAN. 21A̧ tɔ̧a: ‹Mi tɛ fo ɗaŋmɔ pi̧ zu mɛ, mi tɛ ɗaŋ mɛ yinɛ, mi tɛ fo o wiwii yinɛ tɛ kɔ-mɛ, kóó nɛ́ bara, kóó nɛ́ o bíí nɛ̀ bo nɛ́ bara na sɛn Israɛl. 22Mi tɛ de mɔ in o bíí nutua kɔ-mɛ hee mɔ'ɔ n'am dee so nɛnɛ in o bíí nutua ko Jeroboam, bem ko Nɛbat ká bá nɛ̀ o bíí nutua ko Baesa bem ko Ahiya ga, wen zu ɗaŋmɔ nɛ mɛ dea, in wan nɛ mɛ dee ha̧ o be Israɛl mɛ de mbɛt.› 23GASA WAN tɔ̧ɔ̧ wen zu Jezabɛl mbɛt ndé, o toyo tɛ nyɔŋ Jezabɛl tɛ nú Yizreɛl.#2 Wan 9.36 24Bíí nutua ko Akab nɛ tɛ fe saaye, o toyo tɛ nyɔŋ wa, ɓɛɛ wan mɛ zaŋbɛɛ, o nɔ̧́í̧ tɛ nyɔŋ wa.»
25Ŋma bíí nɛ pi̧i̧ tɛ, tɛ dee ɗaŋmɔ yi Sɔ̧ hee Akab ga wen nɛ̀ kóò kɔ̧-a̧ Jezabɛl ɔra a̧ bo na. 26A̧ dee o ɗaŋmɔ nɛ̀ dɔka-a nɛ́ nɛ̀ ɗoŋ o géé-sɔ̧, nyɛm ŋmaa in o be Amɔr nɛ̀ GASA WAN ndaka so yinɛ tɛ nù kɔ-wa ti o be Israɛl.
27Akab a̧ka̧ laa sɛn tɛ tɛ́ ŋgimbi n'aa zia wen'i, ɓɛɛ pi̧ nɛ́ laa-bufu; a̧ zima yì, a̧ ɔ so nɛ̀ oi bufu'i, yar nɛnɛ nɛ̀ ga̧a̧-tɛ.
28Ɓɛɛ GASA WAN tɔ̧ ha̧ Elii, be Tisbe hee mɔ'ɔ ga: 29«Mɛ zɔka hee mɔ'ɔ nɛ̀ Akab duka si ɗɔɔ sɛn ti'm ga nde? Hee mɔ'ɔ n'aa yuu am ga, mi beka e ha̧ ŋma bɔnɛ mɛ hɔ tɛ ŋgimbi kɔ̧-a̧ na; mɛ̀ nɛ́ tɛ ŋgimbi ko o bem kɔ̧-a̧ a̧‘m tɛ fo nɛ̀ bɔnɛ‘i pi̧ zu o bíí nutua kɔ̧-a̧.»
Currently Selected:
1 WANNU 21: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.