1 KALATA NYƐRƐ 28
28
Usamɔ ko David wen Tua ko Sɔ̧
1David mɔi̧a o gasawi Israɛl lɛŋ pii Jerusalɛm, o gasawi zu o zuduk bíí, o gasawi zu dùk o wi-biro ko wannu, o gasawi zu o wi-biro booro in gɔmŋmaa, o wi-duk-zu o mbɔi in o mɔ-dai ko wannu in ko o bem kɔ̧-a̧ ká bá nɛ̀ o wi-de-tom kɔ̧ tua-wan, o ŋga wi-biro in o kpasa-bíí lɛŋ.
2Wannu David kura ŋgɔn, ɓɛɛ tɔ̧ ha̧ wa: «O nya'm in dukbíí kɔ‘m, ɛ̀nɛ̀ zìì. Mi taa so mɔ mɛ mbo Tua wen ee Kuɓa nɔɔ-tɔk ko GASA WAN nɛ̀ duk nɛ́ mɔɔ-e-ɗɔɔ naŋ ko Sɔ̧ k’ɛɛ sɛnɛ, ɓɛɛ mi ɗafi mɔ wen mboa-a;#2 Sam 7.1-16; 1 Kal Ny 17.1-14 3nɛ́ mɔ'ɔ nɛ̀ Sɔ̧ tɔ̧ɔ̧ ha̧‘m: ‹Mɛ beka mbo Tua wen nin-am na, wen mɛ́ nɛ́ wi-de-biro in mɛ gbaia tɔk-tɛ bíí a nù mbɛt.› 4GASA WAN Sɔ̧ ko Israɛl hoka'm mgbara o bíí nutua kɔ‘m ha̧‘m mɛ ɔ wan zu o be Israɛl kpoo nɛ kpoo; a̧ hoka Juda nɛ̀ wi-usi-war, ɓɛɛ a̧ hoka nutua ko dáà kɔ‘m, tɛ zuduk ko Juda; mgbara o bem ko dáà kɔ‘m, a̧ hoka nɛ‘m mɛ ɔ wan zu Israɛl lɛŋ. 5Mgbara o bem kɔ‘m lɛŋ nɛ̀ Sɔ̧ ha̧a̧ ha̧‘m, a̧ hoka nɛ́ Salomɔŋ mɛ duk zu damti ko GASA WAN zu Israɛl.
6«Ɓɛɛ a̧ tɔ̧ ha̧‘m'e: ‹Mɛ̀ nɛ́ bem kɔ-mɛ Salomɔŋ a̧ tɛ mbo Tua kɔ‘m in bee-gara-a, wen mi hoka a̧ nɛ̀ bem kɔ‘m, ɓɛɛ war kɔ̧-a̧, mi tɛ duk nɛ dáà kɔ̧-a̧. 7Mi ɗafa yuwar mɔɔ-wan kɔ̧-a̧ nɛ̀ tɛ duk ɓɔnsɛnɛ, kà a̧ nɛ́ yora nɛ̀ ŋgaya-a tɛ kasa o geŋa in o heembea kɔ‘i de nɛ̀ tom-aa.›
8«Ɓɛɛ kinii, sɛn yí o be Israɛl lɛŋ, sɛn yí giiwi ko GASA WAN Sɔ̧ k’ɛɛ, ɛ̀nɛ̀ kásí o geŋa ko GASA WAN Sɔ̧ k’ɛ́nɛ́ lɛŋ, h’ɛ́nɛ́ mɛ ba fara tɛ de nù'ɛ, in h’ɛ́nɛ́ mɛ e nù'ɛ ha̧ o bem k’ɛ́nɛ́ mɛ ɗoŋ nɛ̀ mɔɔ-oi ɓɔnsɛnɛ.
9«Ɓɛɛ kɔ-mɛ, bem kɔ‘m Salomɔŋ, mɛ̀ íŋ Sɔ̧ ko dáà kɔ-mɛ, mɛ̀ dé tom ha̧ a̧ nɛ̀ see kpɔk nɛ̀ fee-see, wen GASA WAN we nɛ́ see-wi ɓɛɛ a̧ kɛ̧ɛ̧ mgbara taamɔ ko bíí lɛŋ mbɛt. Kà mɛ kii a̧, a̧ tɛ e ha̧ mɛ mɛ kpa a̧, ɓɛɛ kà mɛ e a̧ duk, a̧ tɛ pi̧ mɛ nù kpoo nɛ kpoo. 10Mɛ̀ zɔ̀k, kinii, GASA WAN hoka mɛ wen ha̧ mɛ mɛ mbo Tua nɛ̀ duk nɛ́ sa̧a̧-fara kɔ̧-a̧; mɛ̀ nɔ́ ŋgiɗi, mɛ̀ dé tom.»
11David tɔ̧ɔ̧ yuwar deemɔ nɛ̀ bem kɔ̧-a̧ Salomɔŋ tɛ de lɛŋ: nú-zala, o tua nɛtɛ nɛtɛ, o fara-a-mɔ, o bɛr-tua mɛ ŋgɔn, o gɔna-bɛr-aa mɛ see-a in bɛr-tua e kuɓa mbɛt. 12A̧ usa yuwar deemɔ lɛŋ n'aa taa so mɛ de tɛ bee-gara Tua ko GASA WAN, in o gɔna-bɛr-tua mɛ ká̧ a̧, fara-a-mbɔi ko Tua ko GASA WAN, in o fara-a-mɔ nɛ‘i ha̧ ha̧ Sɔ̧ mbɛt. 13A̧ usa yuwar tom ko o wi-ɗafi-sɔ̧ in o be Levii, yuwar zɔka nyɛk in yuwar tom lɛŋ sɛn kɔ̧ Tua ko GASA WAN. 14O nyɛk nɛ̀‘i tɛ de nɛ̀ lɔr in bu-mbɔi, a̧ usa kilo-a nyɛm nɛ̀ ɗoŋ tom-aa; 15o dek-e-wee in o lamba-a nɛ‘i tɛ de nɛ̀ lɔr in bu-mbɔi, a̧ usa kilo-a nyɛm nɛ̀ ɗoŋ tom-aa. 16O fara-e-brɛt ha̧ Sɔ̧ nɛ‘i tɛ de nɛ̀ lɔr in bu-mbɔi, a̧ usa kilo-a; yuwar dee fara-dɔ-fuu-nyama nɛ̀ sa̧a̧ lɔr in kilo-a, 17o mɔɔ-tok-kpoo, o be yèé-misi̧-yí gaŋmɔ in o ɓii nɛ‘i tɛ de nɛ̀ sa̧a̧ lɔr, sɛka o mɔɔ-nɔ-mɔ nɛ̀‘i tɛ de nɛ̀ lɔr in bu-mbɔi, a̧ usa kilo-a. 18A̧ usa kilo fara-dɔ-fuu nyama, yuwar dee keekee, in o keribim nɛ̀ nyɛi̧ ɓaa kpe nɛ̀ zu Kuɓa nɔɔ-tɔk ko GASA WAN mbɛt. 19David tɔ̧a̧: «Mɔɔ nɔ‘i a̧a̧ zaŋ kalata nɛ̀ GASA WAN ha̧a̧ ha̧‘m. Kalata'i usi nɛ́ ɗoŋ yuwar-tom nɔ‘i.»
20Ɓɛɛ David tɔ̧ ha̧ bem kɔ‘i Salomɔŋ: «Mɛ̀ ŋgáí gba̧a̧ tɛ-mɛ. Mɛ̀ nɔ́ ŋgiɗi mbɛt! Ká mɛ de kíì na. Ká tɛ-mɛ nak na mbɛt, wen GASA WAN Sɔ̧ kɔ‘m a̧a̧ in mɛɛ. A̧ beka e mɛ duk na, in tɛ-a beka bi ɗoŋ mɛ na hɔ ŋgimbi nɛ̀ tom Tua ko GASA WAN lɛŋ tɛ kaɗi. 21O wi-ɗafi-sɔ̧ in o be Levii nɛ̀ ya wen ɗafa sɔ̧ kɔ̧ Tua ko Sɔ̧ a̧a̧ in mɛɛ, ɓɛɛ o wi nɛ̀ a̧a̧ nɛ̀ de taamɔ nɛ̀ iŋa mgbara mɔ tɛ tom lɛŋ tɛ gbak mɛ mbɛt. O gasawi in dukbíí lɛŋ tɛ mbo zu ha̧ mɛ.»
Currently Selected:
1 KALATA NYƐRƐ 28: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.