Esdras 1
1
JUIF SUMA KUR MAGOMBINA A HULONG AVO KI ZOROBABEL
(1—6)
Sirus mi he vuna ala a hulong min gong nga kud’orid’a akulo
1Kur biza d’a avok ka Sirus amul ma Perse-na nga mi tamulid’a, Ma didina mi nga hurum á ndak vun zla d’a mi dat avun mam ma djok vuna Jeremi-d’a. Mi mal djib’era hi Sirus amul ma Perse-nid’a woyo. Sirus mi tchi wala ki vunamu, mi b’ir mbaktumba mi suma kur leu mambina pet ala:
2Wana ni zla d’a an Sirus amul ma Perse-na ni data: Ma didina Alo ma akulona mi han leu d’a yam andagad’id’a pet, mi han vuna á minim gong nga kud’ora avo Jerusalem mba Juda-d’a mi.
3Ni nge adigagi ba, ni sa mama ge? Ar Alo mama mi kak ki sed’emu, mi i Jerusalem mba Juda-d’a, mi min gong nga kud’ora mi Ma didina Alona hi Israel ma nga avo Jerusalem-ma. 4Yima lara ma Israel suma a arâ a nga kaka kuana, ar suma kak kur yi mámina a ndjunuzi ki bege d’a hapa, lora, d’uwarâ ki he d’a hawa d’a kur min mazid’id’a á min gong nga kud’ora hAlo ma nga avo Jerusalem-ma.
5Ata yi máma suma nglo suma avok ades andjafâ hi Juda-nina ki suma avok ades andjafâ hi Benjamin-nina ki suma hi Levi-nina pet suma Alona mi malazi djib’er mazid’a woina, a tchol a i á min gong nga kud’ora hi Ma didin ma nga avo Jerusalem-ma. 6Ndrozi sumazina a ndjunuzi kahle suma sunda, lora kahlena teteng, d’uwarâ kahle suma guzuzi ngolina bei ndum he d’a hawa d’a kur min mazid’id’a ba mi.
7Amulâ Sirus tamba, mi hulong ahle suma kur gong nga kud’ora hi Ma didinid’a suma Nebukanezar mi yozï adjeu avo Jerusalem mi tchuguzi kur gong nga kud’ora halo mamid’ina. 8Amulâ Sirus mi he vuna mi Mitredat ma ngom ahlena ala mi buzuguzi woi mi ndumuzi woi ir Sesebasar ma ngolâ hi suma Juda-na. 9Ablawazi ba wana: Hal ma lora 30, hal ma kawei ma hapma 1000, mbigeud’a 29, 10kop ma lora 30, kop ma lum kandjaf kawei ma hapma ma dingîna 410 kandjaf ahle suma dingâ kua 1000 mi. 11Ahle suma a lazi ki lora ki kawei ma hapmina, azi pet ni 5400. Sesebasar mi tcholï ki sed’ezi Babilon zlapa ki suma Nebukanezar mi yozi mi izi sä Babilon-na, mi hulongôzï Jerusalem.
Currently Selected:
Esdras 1: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.