Vama ndum mbeina Wana ni modo zla d’a kuruta
Wana ni modo zla d’a kuruta
Kur mbaktum ndata, Jean mi ta’î ahle suma Jesus Christ mi ndazi woina (1.1). Mi de woi yam ahle suma mi wazi ata yima Muzu’â hAlonina mi vuma (1.10). Ata yima mi b’iritna mi ni ma dangeina kur til la Patmos sa aduk alum ma ngol ma Mediterane-nid’a, abo ma fladegena hi Asi-na d’ar, kayam mi tchi wal Zla d’a Djivid’a ata yima amul ma ngol ma Rom-ma nga mi djop vun kretiyênina (1.9). Mi b’irit mi Tok ka kid’iziya d’a kur ambas sa Asi-d’a, go ki yima djin batod’a kä ma a yum ala Ismirin-na.
A djop vun kretiyêna kayam azi nga ge yazi kä ad’u Salazi ma tuna, nala, Jesus Christ. Ata yi máma, Jean mi b’irizi mbaktumba á ndjunuzi á ve tazi kur he gagazi mazid’a ki tin hur mazina. Mi b’ir kur mbaktum mamba ala ahlena teteng a nde tazi woi iramu. Mi vazi ad’ud’a yam lovot ta suma bei wAlona ndak á wat ad’ut tuo d’a. Wani, kayam kretiyêna a we Vun ma Djin ma Adjeuna, azi ndak á wad’ud’a. Ahle suma a nde tazi woi irama a ni teteng, wani ad’uzi ni tu, nala, suma tchona a djib’er ala azi mba kuza pî, Alona mba mi kus yam ad’enga hi Ma tchonid’a gagazi yam ad’enga hi Salei ma tuna Jesus Christ-sa.
Ad’u tinda hi mbaktum ndatid’a, Jean mi tak tam mbei d’igi ma sunda hi Christ ma tchol akulo aduk suma matnina na (1.1-8). Mi nga mi vad’ud’a yam kak mamba ata yima vana nde tam mbei iram avok ata yima Christ mi hum vuna á b’ir zla d’a mam sunut mi Tok ka kid’iziya d’a kur ambas sa Asi-d’id’a (1.9–3.22).
Bugola, mi wala Alona mi hlum sä akulo, mi tagam ahle suma a nde tazi woi iram tetengâ mi. Jean mi kal kur azina hAlona ma akulona, mi we suma kurâ a nga kud’or Alona ki Jesus Christ (sapitre d’a 4-5). Bugola, mi we mbaktum mba nga b’ala ki dubangâ kid’iziyad’a (6.1–8.1). Bugola, mi we adifa kid’iziya abo malaikana kid’iziya mi (8.2–11.19), mi we dragon ma hleu ma nga ki yamba kid’iziyana kambureina mbà mi (12.1–13.18). Bugola, mi we Gor timina ki suma a wurak kazi suma 144.000 na, mi we sariya d’a malaikana a tchi wala kata mi (14.1-20). Bugola, mi we malaikana kid’iziya a vo ayîna hAlona ma nga kur angal la kid’iziyad’ina woi yam andagad’a (15.1–16.21). Bugola, mi we b’laka hi Babilon-nda, mi we kus sa Christ mba mi kus yam amburei suma mbà ndazina, yam ma djok vun ma ka zlad’a, yam Diable tamba mi d’a (17.1–20.10). Bugola, mi we akulo d’a awilid’a kandaga d’a awilid’a ki Jerusalem mba awilid’a mi (21.1–22.5). Bugola, mi dap mbaktum mamba ki zla d’a yam hulonga hi Christ-sa dapa. Mi tak vun ma hled’a hi ma tchol akulo aduk suma matnina woi ala: Â, an nga ni mba ka tchetchem (22.6-21).
Jean mi b’ir mbaktum ndata kayam kretiyêna a ring mandar ri, wani a ve tazi ad’enga ata yima ndaka. Ahle suma a nde tazi woi ir Jean-na ndak á ndjuni á wei ahle suma a mba le ata atchogoi d’a danandina, kayam Christ mi le sun mamba, mi mid’a, wani mi tchol akulo aduk suma matna mi. Ar ei tid’i ad’um gak didin. t Wana ni wal mata
Zla d’a avoka 1.1-8
Vama nde tam mbei ir Jean ma avok ki mbaktum mba kid’iziya d’a mi sunut mi Tok ka kid’iziyad’ina 1.9–3.22
Mbaktum mba nga b’ala ki dubangâ kid’iziyad’a 4.1–8.1
Adif fa kid’iziyad’a 8.2–11.19
Dragon kamburei suma mbàna 12.1–13.18
Ahle suma a nde tazi ir Jean tetengâ 14.1–15.8
Angal la kid’iziyad’a hayîna hAlonid’a 16.1-21
B’laka hi Babilon-nda ki kus sa Christ mba mi kus yam azurei suma mbàna, yam ma djok vun ma ka zlad’a, yam Diable tamba mi d’a 17.1–20.10
Sariya d’a ka d’a dananda 20.11-15
Akulo d’a awilid’a kandaga d’a awilid’a ki Jerusalem mba awilid’a 21.1–22.5
Zla d’a dabid’a 22.6-21
Currently Selected:
Vama ndum mbeina Wana ni modo zla d’a kuruta: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.