Filip-ma 2
2
Lulumad’a ki ngola hi Christ-sa
1He gagazi magi d’a yam Christ-sa mbud’ugi ad’enga zu? O mamba b’lengêgi hurugi zu? Agi nga lagi darigïd’a ki Muzu’â hAlonina zu? Agi nga wagi hohou tagi ki hat hurâ mi zu? 2Le ni na ni, agi kagagi ki djib’er ra tud’a ki o d’a tud’a ki vun ma tuna mi. Hina wani, tan mba d’i lan djivi d’a ngola kagiya. 3Ar agi lagi va ki tuguyod’a d’oze ki subur ta d’a hawa yaka d’i. Wani agi gagi yagi kä avok tagiya, ar nge nge pî adigagi mi we ndrama ala mi kalamu. 4Ar nge nge pî adigagi mi hal va yam mam tamba go d’i, wani mi hal yam suma dingâ mi. 5Ar agi kagagi ki djib’era hi Jesus Christ-sa kurugiya:
6Mam ma dedege d’igi Alona na na,
wani mi gol tam mba dedege d’igi Alona na d’a,
ni vama ved’a ndinding ngi.
7Wani mi fok tam mba subura woyo,
mi hle tad’a hi magomid’a,
mi mbut tam dedege d’igi suma na.
8Mi hle tam d’igi sana na,
ata min mamba mi ge yam kä kukud’uk gak matna,
mat ma ata agu ma b’alina.
9Kayam ndata, Alona mi hlum sä akulo ata yima kal teglesâ,
mi tinim simi ma kal yam simina petna.
10Yam simina hi Jesus-na,
guguf ma lara ge pet ma hi suma sä akulona
ki ma hi suma kä yam andagad’ina
ki ma hi suma kä ad’u andagad’ina,
mi grif kä avoromu,
11ar suma pet a dala: Jesus Christ ni Salad’a mi,
yam subura hAbum Alonid’a.
Agi wilegi d’igi b’od’a na kur duniyad’a
12Kayam ndata, buniyôn suma od’a, d’igi agi nga humun teteu na, nga ni iran hol li, wani ki tchetchemba an nga adigagi d’uo pî, ar agi lagi sunda yam sut magid’a ki mandarâ ki zlaka mi. 13Kayam Alona ni Ma nga mi le sunda kurugi á hagi ad’enga á le min mamba, á ndak vun nga hur mama mi na.
14Ar agi lagi ahlena pet bei gureîd’a, bei tuguyod’a mi, 15kayam agi kagagi suma yed’etna bei zlad’a kagi ba Alona grom suma bei ndjendjed’a aduk suma tcho suma gun suma kur atchogoi d’a wandina. Ar agi kagagi adigazi d’igi b’od’a na kur duniyad’a 16á tagazi zla d’a arid’a woi abua. Le agi nga lagi hina ni, an mba ni subur tan kagi kur bur ma mbad’a hi Christ-sâ, tala ring mana ki sun man nda kaud’a a ba atan nduo d’a.
17Wani le a ngad’an yam sunda hi he gagazi magid’a d’igi vama ngat buzuna na pî, an nga ki furîd’a, an mba ni le furîd’a zlapa ki sed’egi mi. 18Hina wani, agi mba lagi furîd’a, agi mba lagi furîd’a zlapa ki sed’en mi.
Timote azi ki Epafrodit
19Yam zlad’a hi Salad’a Jesus-d’a, an tin hurun ala an sunugi sä Timote ka tchetchem, kayam mi b’lengên hurun yam zla magid’a. 20Kayam an nga ki sama ding ma mi djib’er kagi d’igi an na yam zla magid’ina nga d’i. 21Kayam suma hiuna a nga djib’erî yam ahle mazina, wani nga ni yam ahlena hi Jesus Christ-sâ d’i. 22Wani agi wagi Timote ni sama d’engzengâ. Mi ndjunun kur sunda hi Zla d’a Djivid’id’a d’igi gorâ nga mi le kabum na. 23An tin hurun ala fata a kan wa sariya manda ni, an mba ni sunugizi sä. 24Wani an tin hurun yam Salad’a ala an tan mba ni iza hatagi tua.
25An djib’er ala djivid’a an sunugi sä wiyena Epafrodit ndran ma sun ma dur ayîna hi Christ-sâ, ni ma agi sunumï kahlena abom á ndjunun kur kid’ak mandina. 26Kayam tam nga d’i lum zlezleû á wagi pet. Wani mi nga mi hat hurum ngola, kayam agi humugi ala tugud’eid’a lumu. 27Gagazi, tugud’eid’a lumu, mi ar go á matna. Wani Alona mi wum hohowomu, nga ni mam hol li, wani mi wan hohowon mi, kayam an yor tan yor ra ding ngi. 28Kayam ndata, an nga ni sunugizi sä atogo zak. Fata agi wumba, agi mba lagi furîd’a, an mba yor tan ngol luo mi. 29Kayam ndata, agi vum atagi ki furîd’a yam Salad’a. Andjaf suma hina na, agi hazi ngola, 30kayam mam ar go á matna yam sunda hi Christ-sa. Mi gol tamî va d’i á mban ahle suma ndjun suma agi tagid’a ndak á mbandji d’uo na.
Currently Selected:
Filip-ma 2: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.