Efes-sâ 3
3
Sun nda Alona mi hat mi Paul yam andjaf suma dingîd’a
1Kayam ndata, an Paul ma dangei ma yam Jesus Christ yam agi andjaf suma dingîna, an nga ni tchen Alona kagiya. 2Gagazi, agi humugi ala yam sumad’a Alona mi han sun nda led’a kagiya. 3Alona mi tagan á wäd’u zla d’a muduri mamba. Ni kayam ndata ba, an b’irigi ki wan nde na. 4Kur ndumba agi mba wagi wäd’u manda yam zla d’a mudurid’a hi Jesus Christ-sa. 5Kur atchogoi d’a kala, Alona mi simat nga zla d’a muduri ndata woi mi suma d’i, wani ki tchetchemba, yam ad’enga hi Muzuk mamid’a, mi ndat ad’ut tei mi mam suma a sunuzi suma mi tinizi irazi vazina ki mam suma djok vuna mi. 6Wana ni zla d’a muduri ndata: Yam Zla d’a Djivid’a andjaf suma dingâ a zlap tu ki Juif-fâ, a te djona ki sum mama tu, a mbut hliu ma tuna kayam vun ma hle ma Alona hlum yam Jesus Christ-sâ mi.
7An mbut ma a sunuma á tchi wal Zla d’a Djivid’a yam sumad’a hAlonid’a. Kur djivi mamba mi han ad’eng mamba á le sunda. 8An ni ma kid’aka aduk suma hAlonina pet, wani Alona mi han ad’enga á tchi wal Zla d’a Djivid’a mandjaf suma dingâ yam ahle suma ndjondjoîna hi Christ suma bei dabid’a ba na, 9á tak zla d’a mudurid’a Alo ma lahlena petna mi ngeyet kurum avok deid’a woi mi suma pet, 10wani ki tchetchemba, yam Toka, suma te yamba ki suma ad’eng suma sä akulona a we ne d’a tetenga hAlonid’a. 11Alona mi le hina kayam nga hur mam ma avok deina mi ndak memet yam Saleina Jesus Christ. 12Yam he gagazi meid’a, ei zlabei tu ki Christ. Kayam ndata, ei fei lovota á kalei avok Alona bei mandarâ ba. 13Ni kayam ndata ba, an nga ni tchenegiya, ar tagi tchuk lus yam ndak man nda an nga ni fat kagid’a tala ni subur magid’a d’a d’i.
Od’a hi Christ-sa
14Ni kayam ndata ba, an tchuk guguvan kä avok Abui 15ma tin simina mandjaf ma lara ge pet ma sä kur akulod’a ki ma yam andagad’a mi na. 16An nga ni tchen Alo ma subur mamba kal teglesâ, kayam mi hagi ad’enga kurugi kad’enga hi Muzuk mamid’a. 17Ar Christ mi kak kurugi yam he gagazi magid’a. Ar sideyegi mi sir kä, ad’ugi ti pe kä kur od’a 18zlapa ki suma hAlonina pet, kayam agi fagi ad’enga á we o d’a ngola hi Christ-sa ki bubu mata ki fiyak mata ki fiyak mat ta akulod’a ki zul mat ta kä yiyika. 19Hina wani, agi mba fagi ad’enga á we ki od’a hi Christ sa sana mi ndak á wat ad’ut pepet tuo d’a, kayam agi wagi oî d’a memeta hAlonid’a.
20Ni mam ma nga kad’enga á lahlena pet suma kal suma ei nga tcheneizina d’oze suma ei nga djib’erei kazina, yam ad’eng mam mba nga d’i le sunda kurid’a. 21Kayam ndata, ei suburi Alona kur Toka yam Jesus Christ kur atchogoi d’a lara ge peta gak didin. Amin!
Currently Selected:
Efes-sâ 3: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.