Sunda hi suma a sunuzinid’a 2
2
WAL LA TCHI D’A AVO JERUSALEM-MBA
(2.1—8.3)
Mbad’a hi Muzuk ma bei tchod’ina
1Kid’a bur ma Pantekot-na ndaka, azi pet a nga toka ata yima tuna. 2Ata yi máma na wat, siwel la dinga tcholï akulo d’igi babar ma ngol ma mi le bibi’â na, ti oî gong nga azi nga kuad’a. 3A we vana d’igi sin akud’a na mba kaziya, mi b’rau kak yam nge nge pî adigaziya. 4Azi pet a oî ki Muzuk ma bei tchod’a ba na, a nde de zlad’a ki vuna hi sumina teteng d’igi Muzu’â mi hazizi á ded’a na.
5Kur bur máma Juif suma ding suma a nga ring mandar Alonina a nga kaka Jerusalem. Ni suma tcholï ad’u andjafâ teteng pet kur duniyad’ina. 6Ata yima azi hum siwel ndatina, ablau suma a togïya. Zlad’a vid’izi silil, kayam sama lara pî nga mi hum suma a he gagazid’ina a nga de zlad’a ki vun mama. 7Vunadigazi d’i pat fek, a le atchap, a dala: Gologiya! Suma pet suma a nga de zlad’a wana ni suma Galile-na d’uo zu? 8Ni nana ba, sama lara pî adigei nga mi humuzi a de zlad’a ki vun ma a vud’i ki na na ge? 9Ei ni suma Parte-na, suma Mede-na, suma Elam-ma, suma a nga kaka kur Mesopotami-na, suma Jude-na, suma Kapados-sâ, suma Pongâ, suma yam ambas sa Asi-d’ina, 10suma Frizi-na, suma Pamfili-na, suma Ezipte-na, suma yam andaga d’a Libi-d’ina, suma go ki Siren-na ki suma tcholï Rom-ma mi, 11nala, Juif-fâ ki suma mbut Juif-fîna mi. Suma hiuna ni suma Kret-na ki suma Arap-ma. Ni nana ba, ei nga hum sum ndazina a nga de zlad’a ki vun meina teteng yam sun nda ngol la Alona mi lata na ge?
12Azi pet a le atchap, zlad’a vid’izi silil, a nga de tazi ala: Zla ndata ni nana na ge?
13Wani suma dingâ a nga las suma a he gagazid’ina, a dala: A gurut ni ki süma!
Pierre mi tchi wala
14Wani Pierre mi tchol akulo zlapa ki suma ding suma a sunuzi suma dogo yam tuna, mi er ad’um akulo, mi dala: Agi Juif-fâ, agi pet suma nga kaka kur Jerusalem-ma, ar agi wagi djiviya, agi tinigi humagi á hum zla manda. 15Sum ndazina a gurut nga ni ki süma d’igi agi djib’eregi kazi na d’i, kayam afata ni mid’eina tua. 16Wana ni vama ma djok vun Alona Joel mi dum mbei ala:
17Alona mi dala: Kur bur ma danana,
an mba ni vo Muzuk mana yam suma pet.
Grogi suma andjofâ ki suma aropma a mba djok vun Alona,
azungeî magina ahlena a mba nde woi iraziya,
momorogei magina adïd’a mba d’i dazi mi na.
18Gagazi, kur bur máma
an mba ni vo Muzuk mana yam azungeî mana,
yam yugunei mana mi,
azi mba djogon vunanu.
19An mba lahle suma atchapma kur akulod’a,
an mba lahle suma ndandalâ kä yam andagad’a.
Suma a mba we buzuna kakud’a,
andosâ mba mi tin d’ugula mi.
20Afata mba d’i mbut nduvunda,
tilâ mba mi mbut hleud’a d’igi buzuna na
avok mbad’a hi burâ hi Ma didinina,
ni bur ma ngol ma subura.
21Wani sama lara pî ma mba mi yi Ma didina á ndjunuma,
mba mi fe suta.
22Agi Israel-lâ, agi humugi zla d’a an nga ni dagizid’a. Jesus ma Nazarat-na ni sama Alona tagagizi woi avorogi ki sun nda atchap pa ndandala kahle suma simata suma Alona mi lazi ki sed’em adigagi d’igi agi tagi wagi na na. 23Mam mi sama agi hum mbei abo suma tchona. A tchum ata agu ma b’ala d’igi Alo ma wahlena petna mi nga hurum kam avok dei na. 24Wani Alona mi tcholom akulo, mi pad’am mbei kur ndaka hi matnid’a, kayam matna nga kad’enga á vum kä d’i. 25Kayam David mi dum zlam mbei ala:
An we Ma didina mi nga avoron teteu,
mi nga ata bigan nda ndjufa, kayam an giget ti.
26Ni kayam ndata ba, an nga ki hur ma hapma,
tan nga d’i lan djivid’a,
tan mba d’i tuk halas
kayam an ni tin hurun ni kangû,
27kayam ang mba aran kä ata yima azuleina d’i,
ang mba aran ma ang tinin iran vana kä
kur zula á tchimba d’i.
28Ang tagan lovot ta i kur arid’id’a.
Ang mba oyôn ki furîd’a avorong mi.
29B’oziyona, aran an dagi zlad’a yam abui ngolo David woi mbak. Mi mid’a, a tozomu, asuwam nga adigei gak ini. 30Kayam mam mi ma djok vun Alona, mi wala Alona mi hlum vuna ki gun tad’a ala mba mi pat sana tu ad’u ndjavam kuruma á kak yam zlam mam mba amula. 31Kayam mi we zla ndata avogo, mi de zla d’a yam tchola hi Mesi-d’a akulo aduk suma matnid’a ala:
A aram nga kä ata yima azuleina d’i,
hliwim tchim nga d’uo mi.
32Ni Jesus máma ba, Alona mi tcholom akulo; ami pet ni suma glangâsâ yam zla ndata mi. 33Alona mi hlum sä akulo, mi tinim ata bigam mba ndjufa. Mi ve Muzuk ma bei tchod’a ba ma Abum mi hlum vunam kama, mi vomizï kami d’igi agi wagizi agi humugizi na mi. 34Kayam David mi djak nga akulo d’i, wani mam ki yam mi dala:
Ma didina mi de mi Salana ala:
Ang kak ata bigan nda ndjufa
35gak an mba ni mbut
mang suma djangûna vama tin asengâ.
36Kayam ndata, ar agi Israel-lâ pet agi wagi woi tetet ala ni Jesus ma agi b’alam akulo ata agunina ba, Alona mi mbud’um Salad’a ki Mesi mi.
37Kid’a azi hum zla ndatid’a, zlad’a vaziya, a de mi Pierre azi ki suma hiu suma a sunuzina ala: B’oziyomina, ami lami ni nana ge?
38Pierre mi dazi ala: Agi mbud’ugi hurugi yam tcho magid’a, nge nge pî adigagi mi le batemba ki simiyê Jesus Christ, kayam Alona mi vat hurum mbei yam tcho magid’a. Hina wani, Alona mba mi hagi Muzuk ma bei tchod’a ba na hawa. 39Kayam vun ma hle mama ni kagi ki grogina ki suma sä deina pet ki suma Salad’a Alo meina mba mi yazina pet mi.
40Ata yi máma, Pierre mi dazi zlad’a teteng ngola, mi lazi glangâsâ, nga mi gigid’ezi ala: Sud’ugi tagi woi aduk suma tcho suma kur atchogoi d’a wandina. 41Suma a ve zla mambina, a lazi batemba. Kur bur máma a fe suma kazi kua d’igi dudubud’a hindi na. 42A ve tazi ad’enga kur hat ta suma a sunuzina a had’azizid’a, a nga le darigïd’a aduk taziya, a nga mbruk avungôna, a nga tchen Alona mi.
Kaka hi suma a he gagazid’ina
43Suma pet a le mandarâ, kayam suma a sunuzina a lahle suma atchapma ngola kahle suma simata mi. 44Suma he gagazid’ina pet a nga toka darigïd’a, a nga b’rau ahle suma azi nga ki sed’ezina pet aduk taziya. 45Azi gus ahle suma avo hatazina woi beged’a, a b’rawat aduk tazi pet. Nge nge pî mi fe ndak yam min mamba. 46Burâ ki burâ a nga toka kur gong nga kud’ora hAlonid’a, azi nga mbruk avungôna avo hataziya, a nga te te mazina ki furîd’a ki hur ma tuna, 47a nga gile Alona mi. Suma pet a nga yoroziya. Burâ ki burâ Salad’a nga mi sut suma dingâ kazi kua kazi kua kur Toka.
Currently Selected:
Sunda hi suma a sunuzinid’a 2: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.