Wlɔ 15
15
‑A nʋ Klisi 'bhisa
1‑Anyɩa ‑ɔla pɔɔtɛtɛa 'tɛ 'lɛ nɩkplaan na, ɩ ‑fata lebhe ‑a ‑sie maa mala pɔɔtɛtɛa 'taan 'lɛ 'tɛ na 'la wlɛɛ. ‑Ma, ‑a 'la 'matɩa lebhe ‑a ka ɩmɩa ‑ɩ ‑ka 'lɛ ‑anyɩ 'tʋ na nʋ. 2‑Ma, 'naa nclɔɔ nclɔɔ 'matɩ lebhe ɔ 'ka ɔ 'yʋ 'tʋpla, ɔla 'nanɩnʋlɩɛ nɩkplaan, ɩya ɩ 'ka ɔ 'yʋ 'la pɔɔtɛtɛa nɩkplaan 'tɛbhalɩ. 3‑Masa, Klisi 'taa 'matɩ lebhe ɔ 'kaa ɔmɔ 'titi ɔla pɔɔsa nʋ. Saa ɩ ‑zieo 'lɛ Zieziewɔlɩa* nɩkplaan lebhe: Vlalɩɛa ma vlaa 'mɔɔ 'lɛ na, ɩ yanɩ 'na vlalɩɛ 'plɩ. 4‑Masa, ɩmɩa ‑tɛtɛa ‑ɩ ‑zieoa 'lɛ ‑godogodoa na, ka ɩ ‑zieo 'lɛ lebhe ɩ 'ka ‑anyɩ dɩgalɩ ca ɩya pɔɔklalɩɛ ɩya 'tɛtɩɩnzʋlɩɛa, ‑a 'lɩlɩɩ 'lɛ nɩkplaan na, ɩ 'ka ‑ala pɔlɛkʋtɛlɔ 'plɩ. 5'Naa Laagɔ, ‑ɔ nyɩ pɔɔklalɩɛ 'nyɩ ‑ɔ zʋ 'lɛ 'tɛtɩɩn na, gba ɩya a 'plɩ bhlo saa Zozi Klisi ‑wa 'lɛ na, 6ɩya pɔlɛ bhlo ɩya ‑blɩɩzɔɔn bhlo nɩkplaan, a 'ka Laagɔ, ‑ala ‑Kwlenyɔ Zozi Klisi To 'klʋgba.
A klaklalɩ
7A klaklalɩ 'nanɩ, saa Klisi kla 'lɛ anyɩ, le ɩ 'ka Laagɔ 'la 'klʋagba 'plɩ na. 8Ka n cla 'lɛ anyɩ lebhe Klisi 'ka 'lɛ pala lebhe Laagɔ glalɩ ɔla niwɔlɩ 'kʋ na, dɛ ɔ 'plɩ 'lɛ maa ‑ɔ ‑dɩɔ 'lɛ 'kʋ na, mala lobhoco ɩya ɔ 'ka ‑ndanyɩa Laagɔ taa 'lɛ ma tokadɔcɩa na 'kʋglalɩ.
9‑Ma, ‑ɔ ‑glɩ 'lɛ maa ‑ɔ 'ta 'lɛ Zifʋnya* ‑glɩ na, Laagɔ 'la ŋaazɩɩnlɩlɩɛa 'la gbʋ ma gbɔɔ 'lɛ 'klʋ, saa ɩ ‑zieo 'lɛ lebhe:
Ɩla gbʋ, dɛ n cɩ 'kɔɔ 'lɛ maa ‑ɔ 'tɔɔ 'lɛ ‑ci na sidiin ‑evliwolʋ
ɩya n 'ka bhlɩ ɩya n 'ka ‑naa 'ŋlɩa jaka.
10Ɩ ‑zieo ‑awlɛ lebhe:
'Bhlɩ 'bhlɩ 'kʋ 'la ncɛlɩnyɩ,
aya ɔla 'lɔlʋa nʋ ‑pɔpʋɛ.
11'Nyɩ ɩ ‑zieo ‑awlɛ lebhe:
A wo ‑Kwlenyɔ ‑evli,
Anyɩ, 'bhlɩ 'bhlɩ 'kʋ 'la ncɛlɩa ‑tɛtɛa.
'Naa 'lɔlɩa ‑tɛtɛa kaanvʋɔ.
12Izayii ‑ma ya 'cla lebhe:
'Kɔlaa Zesee 'pa 'lɛ na ya ‑zɔnwlʋ!
Ama ‑ɔ cɩ 'ka 'lɛ 'kʋbho,
ɩya a 'ka 'lɔlɩa ‑tɛtɛa ‑kwle.
Ama 'kʋ ‑laagɔzɔan 'la ncɛlɩa ‑tɛtɛa
cɩ 'ka 'lɛ mala pɔlɛkʋtɛlɔa zʋ.
13'Naa Laagɔ, ‑ɔ nyɩ 'lɛ pɔlɛkʋtɛlɔ na, ɔ yeli anyɩ pɔlɛkʋmɛnɔ ɩya pupue, ala pɔɔtɛtɛa 'la 'sasʋʋn, ɩya pɔlɛkʋtɛlɔ 'ka anyɩ yeli, ‑Kplɔkplɔ ‑Wugoa* 'la 'tɛtɩa nɩkplaan.
Pɔlʋ nyɩtɛ ɔla lobholɩa 'la wɔlɩ
14N Bholiecɩnyɩ, ‑ɔ ‑glɩ 'lɛ anyɩ na, n ‑ka pɔɔtɛtɛ lebhe wɔɔgugwie 'nanɛ ‑yelio anyɩ, a ‑cinɩ wɔlɩ ‑gbɔɔn 'nyɩ anyɩ bhlobhlo, a cɩnɩ dɩgalɩ cacalɩ. 15'Bhlɩmɔɔn, n 'ka 'lɛ anyɩ luoli na, dɛ n zie 'lɛ anyɩ, 'nyɩ n ‑ci lebhe n ya anyɩ ‑daanda wɔɔtɛtɩ solu, 'nanɩa Laagɔ nʋʋn 'lɛ 16le n 'plɩ Zozi Klisi 'la lobhoco maa ‑ɔ 'ta 'lɛ Zifʋnya* ‑glɩ na sidiin na, ɩla 'sasʋʋn. Ɔ yaan Laagɔ 'la Dɩnanɩa* 'la ‑salobholia wlɩɩn zʋ le maa ɔ 'ta 'lɛ Zifʋnya ‑glɩ na, 'ka vavalʋʋa ‑Kplɔkplɔ ‑Wugoa* ya 'lɛ ‑kplɔ 'nyɩ ‑ʋ ‑ka 'lɛ Laagɔ 'tʋ na 'plɩ. 17Na, ‑ɩ ‑glɩ 'lɛ Laagɔ 'la lobholia 'la gbazɔ na, n cɩ mino, n cɩ Zozi Klisi nɩkplaan kpolili. 18Sa, n 'matɩ 'ta lebhe n 'ka ‑buun -wɔlɩ bhlogbɩɩ nyɩtɛ, ‑n 'ta le ɩmɩa ‑tɛɛa Klisi 'plɩlɩɩn 'lɛ 'kʋ 'nyɩ ɔ nʋ 'lɛ le maa -ɔ 'ta 'lɛ Zifʋnya ‑glɩ na 'la 'nyi 'ka Laagɔ yi na. Ɔ yɩɩ wɔɔnyɩtʋ, nʋnʋgbɩ, 19ghledɩ, 'ciinzizielɩlobholi ɩya ‑Kplɔkplɔ ‑Wugoa 'la 'tɛtɩa nɩkplaan nʋnʋ. ‑Sa, n bhɔlʋ 'lɛ Zolizalɛmʋ 'nyɩ n -kʋ 'lɛ -Klisi 'la Dɩnanɩa pɔlɛ bhloon ‑sada ‑aan, 'nyɩ n ya 'lɛ Ililiibhlɩa 'kʋ ŋeni. 20‑Ma, 'bhlɩmɔɔn, daa ma 'ta ka ‑azla 'lɛ Klisi 'ŋlɩ sla na, 'yɛpɩ n mʋ 'lɛ Dɩnanɩa ‑sakan, le n 'la ka sɛ n 'yʋ 'la ‑gluuzʋzʋgbidi 'kʋ 'slalɩ. 21'Lɩka ‑sa n 'plɩlɩ 'lɛ ɩmɩa ɩ ‑zieo 'lɛ na 'kʋ. Ɩmɩ ‑ɩ ‑glɩ 'lɛ lebhe:
Maa ma 'ta ka ‑azla 'lɛ ɔla 'dɩa ‑sa na,
ma cɩ 'kɔɔ 'lɩ,
ɩya maa ‑ɔ 'ta kaa ‑azla 'lɛ ɔla wɔlɩ 'nu na, ma 'ka 'nu.
Pɔlʋ nyɩtɛ ɔla lowluunmʋlɩɛ 'la wɔlɩ
22Na, 'lɩka ɩmɩ ‑naa, ɩmɩ ‑ɩ gba 'lɛ clɩɩa 'fɩan 'nyɩ 'n 'lɩ 'ta 'lɛ ‑jioli ɩya n 'ka anyɩ 'bhlɩ ci. 23‑Ma, ‑pɔtɔnʋ, n 'tanɩ 'lɛ lobholi ‑ka ɩya n 'ka bhlɩ ‑naa 'kʋ nʋnʋ na. N yaa wabha ‑gbɔɔn lebhe n 'kaa anyɩa kopekan ci, ɩ nʋnɩ ɩla liowli ‑bhutukpa. 24Na, n ‑ka Ɛsɩpanyɩbhlɩa 'kʋ mʋda ‑kʋ na, n gugu lebhe n cɩ 'ka anyɩ ciinlɩ. 'Nyɩ n 'tɛlɩ pɔlɛ 'kʋ lebhe a cɩ 'kaan klalɩ ɩya n 'ka 'yɛpɩ mʋ. ‑Sakɛ 'bhlɩmɔɔn, n cɩ 'ka anyɩ clɩɩ ‑zlʋsaasa cɩ kʋ 'fɩɔn. 25‑Ma, ‑pɔtɔnʋ, ka n mʋ 'lɛ Zolizalɛmʋ ɩya n 'ka Laagɔ 'la ncɛlɩa ‑ɔ ‑kʋ 'lɛ 'yɛpɩ na klalɩ. 26‑Masa, Klisi 'la plɔnyaa ‑ɔ ‑kʋ 'lɛ Masedʋanɩ ɩya Akayiibhlɩa 'kʋ na ya wɔlɩ kpo 'kʋ zʋ le ma 'ka 'dala ‑bʋʋ ɩya ma 'ka Laagɔ 'la ncɛlɩa, maa ‑ɔ ‑glɩ 'lɛ ŋaazɩnya 'nyɩ ‑ɔ ‑kʋ 'lɛ Zolizalɛmʋ na, ma 'ka maa klalɩ. 27‑Ghɛɛ, ncɛlɩ ‑naa ya wɔlɩ ‑naa kpo 'kʋ zʋ 'nyɩ ɩ ‑fataa sɛɛ. ‑Masa, maa ɔ 'taa 'lɛ Laagɔ ‑ci, saa ma ya 'lɛ maa klalɩ 'nyɩ ma ya 'lɛ ‑laagɔɔn 'la 'bhɛlɩa 'lɩ na, ɩ ‑fata lebhe maa ‑masɛɛ ma 'ma ‑dʋdʋ 'kʋ 'la 'bhɛlɩa ɩya ma klalɩ maa. 28Na, daa n cɩ 'ka 'lɛ wɔlɩ ‑naa bhɩalɩ na ɩya n 'ka 'lɛ maa ‑bʋʋbʋ ‑dala ‑naa ncɛlɩa 'fɩan 'ci 'kʋ 'nyɩnɩ na, dɛ n cɩ 'kanɩ 'lɛ anyɩ 'bhlɩ 'plɩlɩ ɩya n 'ka Ɛsɩpanyɩbhlɩa 'kʋ mʋ. 29'Nyɩ n ‑ci sɛɛ lebhe n ‑ka anyɩ 'bhlɩ ci na, ɩ cɩ 'ka gba ɩya Klisi 'la 'nyupalɩɛa ‑tɛtɛa 'ka anyɩ 'kʋ ŋeni.
30Na, n bholiecɩnyɩ, ‑ala ‑Kwlenyɔ Zozi Klisi 'la 'ŋlɩa nɩkplaan ɩya ‑walʋa Laagɔ 'la 'Wugoa 'nyɩ 'lɛ anyɩ na 'la 'sasʋʋn, n zʋ 'lɛ anyɩ 'tɛtɩɩn le a bhibhie 'na da ɩya a klalɩɩn tʋa bhibhie nɩkplaan. 31Ɩya n 'la ka ncɛlɩa ‑anʋa ‑ɔ 'ta 'lɛ Laagɔ 'la pɔɔtɛtɛ ‑ka 'nyɩ ‑ɔ ‑kʋ 'lɛ Zudeebhlɩa 'kʋ na wlɩɩn bhlili. Ɩya 'dalaa n famʋ 'lɛ Zolizalɛmʋ na, Laagɔ 'la ncɛlɩa 'ka sɔ fa ɩya ma 'kaa 'ma pɔɔwɔtɛ nɩkplaan. 32'Lɩka ‑sa, n cɩ 'ka 'lɛ mino ɩya n 'ka anyɩ 'bhlɩ ci pɔlɛkʋmɛnɔ nɩkplaan. Ɩya gbazɩ Laagɔ ‑ka ŋonu na, n 'ka anyɩ cɩ 'pɛpɛ nyɔkwɛ. 33Na, 'naa Laagɔ, ‑ɔ 'nyɩ 'lɛ pupue na kʋ anyɩa 'fɩan cɩ. Ɩ kʋ sɛɛ!
Currently Selected:
Wlɔ 15: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.