Wlɔ 16
16
‑Ayopalɩɛ
1‑A mɛnɔa ma la 'lɛ Febee, 'nyɩ ‑ɔ lobho 'lɛ Sankleedua 'kʋ 'la ‑laagɔnɩkplaa na, n lobhuo anyɩ 'bhlɩ. 2Na, n 'clalɩ anyɩ le a klɔɔ 'nanɩ ‑Kwlenyɔ 'la 'ŋlɩa nɩkplaan, saa ɩ ‑fata 'lɛ lebhe Laagɔ 'la ncɛlɩ nʋ na ɩya wɔlɩa ‑tɛtɛa nɩkplaan ɔ cɩ 'ka 'lɛ ala klalɩlɩɛ 'matɩ na, 'naa a klalɩɔ. ‑Masa, ɔ yaa ‑ncabhutukpa klalɩ 'nyɩ ‑amʋ 'titi ‑masɛɛ, ɔ yaan klalɩ na.
3A 'pa Plisii ɩya Akilasɩ ‑ayo. Ma ‑glɩ 'na 'namʋnya Zozi Klisi 'la lobholia nɩkplaan. 4Ma ya macɩ 'kwɩ neen fa, 'na jabhʋ 'la gbʋ. 'Nyɩ, ‑n 'ta ‑amʋ bhlo ‑tɛɛ 'ta 'lɛ mala bhɔlʋlɩɛ ‑ka, ‑ma ‑laagɔnɩkplaa ‑tɛtɛa, ‑n 'ta Zifʋnya* ‑tɛɛ. 5‑Laagɔnɩkplaa 'la ncɛlɩa ‑tɛtɛa ‑ma 'wlalɩ 'lɛ ma 'bhisleen 'wlu na, maa ‑ma, ma pa maa ‑ayo. A 'pamʋ 'na ‑wawanyɔ Epanɛtɩ ‑ayo. Ɔmɔa ‑ɔ ‑glɩ 'lɛ Aziibhlɩa 'kʋ 'la ‑bɛka nclɔɔa ‑ɔ zʋ 'lɛ ɔla pɔɔtɛtɛa Klisi pɔlɛ 'kʋ na. 6A 'pa Malii ‑ayo, ‑ma ɔ ya ‑ala gbʋ ‑gbɔɔn sɛ. 7A 'pa Andlonikusu ɩya Zuniasɩ ‑ayo. Ma ‑glɩ 'na 'slinya 'nyɩ n ‑ya maasɔɔ ‑kʋa 'lɛ nebhlo ‑palʋʋnpapalʋ ‑zɔn. Ma ‑glɩ 'ŋlɩkalɩlobhulobhunya* 'nyɩ ma ‑glɩa Klisi 'nʋa 'fɩɔn 'nyɩ n yɔɔ 'lɛ cibhlili. 8A 'pa Anpliatusu ‑ayo. -Ɔ ‑glɩ 'lɛ gbakabhanyɔ ‑Kwlenyɔ nɩkplaan. 9A 'pa Ylubɛɛn ‑ayo. Ɔ ‑glɩ 'na 'kʋgbɛnyɔ Klisi 'la lobholia nɩkplaan, ɩya a 'pamʋ 'naa gbakabhanyɔ Sɩtakisi ‑ayo. 10A 'pa Apelɛsɩ ‑ayo, ‑ma ɔ ya pala lebhe ɔ ‑glɩ ‑nʋawlɛɛsa Klisi 'la ‑plɔnyɔ. A 'pa Asitobulu 'la 'slea ‑ayo. 11A 'pa 'na slinyɔ Ewlodɩɔɔn ‑ayo. Ncɛlɩa ‑ɔ ‑kʋ 'lɛ Nasisi 'la 'slea nɩkplaan 'nyɩ ‑ɔ ‑ka 'lɛ ‑Kwlenyɔa pɔɔtɛtɛ na, a 'pa maa ‑ayo. 12A 'pa Tlifɛnɩ ɩya Tlifozʋ ‑ayo, sa ma ya lobholi 'nʋ ‑gbɔɔn ‑Kwlenyɔa 'la gbʋ. A 'pa 'na gbakabhamɛnɔ Pɛsidɩ ‑ayo, sa ɔmɔ ‑ma, ɔ ya ‑Kwlenyɔa lobho ‑gbɔɔn na. 13A 'pa Ghlufusʋ, ‑Kwlenyɔa 'la deslaslanyɔa ɩya ɔ 'nɔ, ‑ɔ ‑glɩ 'lɛ ‑amʋ ‑ma n 'nɔ na ‑ayo. 14A 'pa Asɛnkliti, Flegɔɔn, Ɛlɩmɛsɩ, Patlobasɩ, Elɩmasɩ ɩya bholiecɩa ‑ɔ ‑kʋ 'lɛ maa cɩ na ‑ayo. 15A 'pa Filolɔgɩ ɩya Zulii, Nelee ɩya ɔ mɛnɔ, Olɛnpasɩ ɩya Laagɔ 'la ncɛlɩa 'fɩan ‑ɔ ‑kʋ 'lɛ maa cɩ na, a 'pa maa ‑ayo.
16A ŋʋŋɔnʋŋʋŋɔnʋnʋ ‑kpacɩ cɩ bholiecɩ 'bhisa ɩya a 'papalɩ ‑ayo. Ncɛlɩa 'fɩan ‑ɔ ‑zʋɔ 'lɛ mala pɔɔtɛtɛa Klisi 'kʋ na, ma pa anyɩ ‑ayo.
Flɩɩnzʋlɩɛ ɩya bhɩalɩayopalɩɛ
17N Bholiecɩnyɩ, n 'clalɩ anyɩ le a zʋlʋ maa -ɔ 'plɩlɩ 'ta 'lɛ wɔlɩa ma ca 'lɛ anyɩ 'nyɩ ‑ɔ lamʋ 'lɛ anyɩ sidiin nɩkplaandolɩɛ ɩya wɔɔnyinyi na, pɔlɛ 'kʋ. A tlʋbhalɩ maa cɩ da. 18‑Masa, ‑sa 'la ncaalɔkpa ‑naa, ‑n 'ta klisi, ‑ala ‑Kwlenyɔa maa lobho 'ta 'lɛ, ‑ma maa 'titi mala nyalinɩkplɩa. 'Nyɩ ma 'plɩlɩ 'lɛ mala ‑kplakpla wɔɔnyɩtʋa 'kʋ 'nyɩ ma 'nyiglili ncɛlɩa ‑ɔ 'ta 'lɛ mala 'wlu 'la wɔlɩ ‑ka na. 19‑Masa, ala 'ŋlɩ ya daa ‑tɛtɛa dlolu, zʋlɩɛa a ‑ka 'lɛ Laagɔ 'la gbazɔ na 'la gbʋ. Na, anyɩ 'wluku, n ‑kʋ pɔlɛkʋmɛnɔɔn. ‑Ma, n ‑wa lebhe a 'plɩ dɩgalɩnya ɩya a 'ka 'nanɩ nʋ ɩya a flobhalɩ, a 'la ka sɛ nyinyi nʋ. 20Sa, Laagɔa ‑ɔ nyɩ 'lɛ pupue na, ɔ cɩ 'ka clɩɩ ‑klipɛ nɩkplaan Sataan* ala kplia ‑zɔn sulu. Na, 'naa ‑ala ‑Kwlenyɔ Zozi Klisi 'la ‑walʋa kʋ anyɩ cɩ!
21Timoti, nclɔɔa ‑ɔ klalɩɩn 'lɛ Laagɔ 'la lobholia nɩkplaan na, pa anyɩ ‑ayo. 'Na 'slinyaa ‑ɔ ‑glɩ 'lɛ Lisiyusu, Zasɔɔn ɩya Sosipatɛlɩ na, maa ‑ma, ma pa anyɩ ‑ayo.
22Na, ‑amʋ Tɛtɩyusu, ‑ɔ zie 'lɛ ‑afluwaa ‑naa#16.22 Ka Pɔlʋ nyɩ ‑azla 'lɛ ɔla ‑afluwia ncɛlɩ zieda. na, n pa anyɩ ‑ayo ‑Kwlenyɔa nɩkplaan.
23Nclɔɔa ma la 'lɛ Gayiusu, nclɔɔ ‑naa n ‑pla 'lɛ 'kʋ 'nyɩ ‑laagɔnɩkplaa ‑tɛtɛa 'wlalɩ 'lɛ ɔ 'bhisleen 'wlu na, pa anyɩ ‑ayo. Nclɔɔa ma la 'lɛ Elasɩ, 'nyɩ ‑ɔ ‑glɩ 'lɛ 'dua 'la 'bhaklɔa 'la 'klʋlɩnyɔ na, ɔ pa anyɩ ‑ayo, ‑a bholi Kalɩtusu ‑masɛ. [24]#16.24 ‑Godogodofluwia ‑anɩ ya wɔɔkle ‑naa Zieziewɔlɩa nɩkplaan ‑pla: «'Naa ‑ala ‑Kwlenyɔ Zozi Klisi 'la 'nyupalɩɛa ‑kʋ anyɩa 'fɩan 'kʋ. Ɩ kʋ sɛɛ!»
'Klʋagba ŋeni Laagɔ bhlo
25‑A ‑gba Laagɔ 'klʋ, sa Dɩnanɩa* n ‑sa 'lɛ Zozi Klisi 'la pliciliea nɩkplaan ɩya wɔlɩa ‑ɩ ‑zizieoa 'lɛ ncɛlɩ 'ciin 'lʋkʋlʋkʋ ɩya 'lʋkʋlʋkʋ na ɩla gbʋ, ɔ cɩ gba 'nyɩ a cɩ kpaan 'nylugo. 26‑Ma, ‑pɔtɔnʋ, ‑ɩ yanɩ ‑zɔnwlʋ 'nyɩ ncɛlɩa 'fɩan ɔ 'taa 'lɛ Laagɔ ‑ci na, ma cɩnɩ Laagɔnekʋnyɩtɛnyaa* 'la Zieziewɔlɩa* 'kʋplɩlɩ, 'nyɩ 'lʋkʋlʋkʋ 'la Laagɔa 'la ‑jiolia 'la 'sasʋʋn, ma cɩɔ mala pɔɔtɛtɛa 'kʋ zʋ 'nyɩ mala 'nyi cɩɔ yi.
27Na, Laagɔ, ɔmɔ bhlo ‑glɩ 'lɛ dɩgalɩ na, Zozi Klisi 'la 'kʋplɩlɩlɩɛa nɩkplaan, 'naa 'klʋagba ŋenio 'lʋkʋlʋkʋ ɩya 'lʋkʋlʋkʋ. Ɩ kʋ sɛɛ!
Currently Selected:
Wlɔ 16: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.