Wlɔ 1
1
‑Ayopalɩɛ
1‑Amʋ Pɔlʋ, n ‑glɩ Zozi Klisi 'la lobhocoa ɔ la 'lɛ le -ɔ ka ɔla lobhulobhunyɔ* 'plɩ, 'nyɩ ɔ gbɛga 'lɛ le ɔ 'ka Laagɔ 'la Dɩnanɩa* ‑sa na. 2Dɩnanɩ ‑naa, Laagɔ yaa tooto ɔla nekʋnyɩtɛnyaa 'kʋ 'plɩlɩ 'nyɩ ɔ yɩɩ 'lɛ ‑ndanyɩ 'kʋ talɩ, ‑Kplɔkplɔzieziewɔlɩa* nɩkplaan. 3Ɩ nyɩtɛ ɔla 'Cʋa 'la wɔlɩ. 'Nyɛkɛa nɩkplaan, ‑ɔ 'wlʋlʋ Daviti 'la 'lɔlʋa nɩkplaan. 4'Nyɩ ‑Kplɔkplɔ ‑Wugoa* nɩkplaan, ɔ ‑glɩ 'lɛ Laagɔ 'la 'Cʋ, 'tɛtɩa nɩkplaan ɔ ‑bholu 'lɛ 'kwɩɩn 'kʋ na, ɩla 'sasʋʋn. Ɔmɔ ‑ɔ ‑glɩ 'lɛ Zozi Klisi, ‑ala ‑Kwlenyɔa. 5Ɔmɔ ‑ɔ nʋʋn 'lɛ 'nanɩa ‑ɩ pleen 'lɛ ɔla lobhulobhunyɔ na, le n 'ka 'lɔlɩa ‑tɛtɛa pɔɔtɛtɛ 'la ‑gugwiea 'kʋ zʋ, ɔla 'ŋlɩa 'la gbʋ. 6'Nyɩ ɩla nɩkplaan 'la ncɛlɩ anyɩ ‑ma a ‑glɩmʋ 'lɛ, anyɩa Zozi Klisi la 'lɛ. 7Anyɩ, Laagɔ 'la ‑wawanyaa ‑tɛtɛa ‑ɔ ‑kʋ 'lɛ Wlɔmʋdua nɩkplaan na, anyɩa ‑ɔ 'plɩ 'lɛ ‑klpɔkplɔnya Laagɔ 'la lalɩɛa nɩkplaan na, 'naa 'nyupalɩɛ ɩya pupuea ‑ɩ 'wlʋlʋ 'lɛ ‑a To Laagɔ ɩya ‑Kwlenyɔ Zozi Klisi wlɩɩn na, kʋ anyɩ 'kʋ.
Pɔlʋ ‑wa le ɔ 'ka Wlɔmʋnyaa 'ciinlɩ
8‑Bɛɛ, n 'plɩlɩ Zozi Klisi 'kʋ 'nyɩ n bhɔlʋ 'na Laagɔ anyɩa 'fɩan 'la gbʋ, ‑ofi lebhe ‑laagɔzɔn bhuoa nyɩtɛ ala pɔɔtɛtɛa 'la wɔlɩa. 9Laagɔa 'na ‑lɩɩbhuoa lobho 'lɛ, ɔla 'Cʋa 'la Dɩnanɩa* 'la ‑salɩɛa nɩkplaan na, ‑lio 'na ‑danʋfʋɛ lebhe n sla anyɩ 'ŋlɩ clɩɩa 'fɩan, 10'nyɩ n 'clalɩ 'lʋkʋlʋkʋ 'na bhibhiea nɩkplaan, le ɔ wabha ɩya n 'lɩ ‑jioli ɩya n 'ka anyɩ 'bhlɩ ci. 11‑Masa, n ‑wa ‑gbɔɔn le n 'ka anyɩ 'ciinlɩ, ɩya a 'ka 'Wugoa 'la 'nanɩa 'lɩ, ɩya ɩ 'ka anyɩ 'tɛtɩɩn zʋ. 12Ka n nabhe n 'ka 'lɛ 'cla lebhe pɔɔtɛtɛa ‑a 'wlalɩ 'lɛ 'kʋ na, 'ka n ‑ya anyɩ nebhlo pɔlɛɛn zʋzʋlʋ 'yɛpɩ a 'bhlɩ.
13Bholiecɩnyɩ, n ‑wa lebhe a cibhlili lebhe n ya ‑azla bhɔsʋa le n 'ka anyɩ 'bhlɩ ci, ɩya n 'ka 'yɛpɩ lobholia ‑ɩ ‑cɩ ka 'lɛ 'ca tlʋ na nʋnʋ, saa ɩ 'plɩ 'lɛ ‑daa 'lɔlɩa sidiin na, ‑ma ka n 'ta 'lɛ mino ‑aan ‑yaka. 14Ɩ ‑fata lebhe n mʋnʋ Glɛkɩnyaa ɩya 'lukulukunyaa, ncɛlɩa ‑ɔ ‑ci 'lɛ wɔlɩ ɩya maa ‑ɔ 'ta 'lɛ wɔlɩ ‑ylɛylɛ ‑ci na. 15Ɩla gbʋ, dɛ n ‑wa 'lɛ lebhe n 'ka anyɩ Dɩnanɩa* ‑sa, anyɩa ‑ɔ ‑kʋ 'lɛ Wlɔmʋdua nɩkplaan na.
Dɩnanɩa ‑glɩ Laagɔ 'la 'tɛtɩ
16Sa, Dɩnanɩa* 'la ‑salɩɛa 'taan ‑zo ‑ka, ‑ofi lebhe ɩ glɩ Laagɔ 'la 'tɛtɩ le ncaatʋtʋʋntʋa ‑ɔ ‑ka 'lɛ pɔɔtɛtɛ na 'ka gbʋʋnsalɩɛ 'lɩ, Zifʋnyaa* ‑bɛɛ, ɩya mala leen, maa ‑ɔ 'ta 'lɛ Zifʋnya ‑glɩ na. 17‑Masa, Dɩnanɩa nɩkplaan Laagɔ palalɩ 'lɛ ɔla 'kʋnylugolulɩɛa, pɔɔtɛtɛ 'la 'kʋplɩlɩɛ nɩkplaan ɩya pɔɔtɛtɛ 'la gbʋ, saa ɩ ‑zieo 'lɛ lebhe: Ɔmɔa ‑ɔ ‑glɩ 'lɛ 'kʋnylugolunyɔ pɔɔtɛtɛ nɩkplaan na, ɔ cɩ 'ka kʋ#1.17 Ncɛlɩ ‑anʋa gugu lebhe ka wɔɔnyɩtʋ ‑naa cla 'lɛ lebhe: «Ɔmɔa ‑ɔ ‑glɩ 'lɛ 'kʋnylugolunyɔ na, pɔɔtɛtɛ nɩkplaan ɔ cɩ 'ka 'lɛ jabhʋa 'lɩlɩ.»
Ncɛlɩ 'la nyinyia
18Laagɔ 'la dɔgbɛa 'yɛpɩ ‑laagɔɔn ɛ 'wlʋlʋ 'lɛ ‑zɔn, 'nyɩ ɛ cili 'lɛ ncɛlɩa mala nʋnʋgbɩa ‑gba 'ta 'lɛ Laagɔ 'klʋ 'nyɩ ɩ 'ta 'lɛ 'kʋnylugolu na gbatlɩ. Ma zʋ ‑nʋawlɛ 'kpomuun, mala nʋnʋgbɩa ‑ɩ 'ta 'lɛ 'kʋnylugolu na nɩkplaan. 19‑Masa, ɩmɩa ma cɩ 'lɛ Laagɔ 'la gbazɔ cibhlili na, ma ‑jlɩɩ wɩaan, sa Laagɔ ya maa mɩ pala 'kpataa na. 20Daa ‑laagɔzɔan ‑kaa 'lɛ ‑nʋnʋɔ na, Laagɔ 'la kʋkʋkʋlɩɛa nclɔɔ 'ta 'lɛ ‑jlɛ, ɔla 'tɛtɩa ‑ɩ 'ta 'lɛ bhɩada ‑ka, ɩya saa ɔ ‑glɩglɩlɩ 'lɛ Laagɔ na, ɔla nʋnʋlobholia nɩkplaan ma 'lɩlɩɩ 'lɛ, dɩgalɩɩn nɩkplaan. Na, maa cɩ 'ta 'cla lebhe ma 'ta ‑ci, 21sa ma ‑ci Laagɔ, ‑ma ma 'tɔɔ 'klʋgba naa ma 'tɔɔ bhɔlʋɛa ‑ɩ ‑glɩ 'lɛ ɔla daa na 'nyɩ. ‑Ma ma ya mala 'kpɔkpɔ -wɔɔgugwiea nɩkplaan mlɔnʋ 'nyɩ mala 'tututupɔlɛa ya 'lɛ 'tutu pla. 22Maa ‑ɔ -nabhe ‑ɔ la 'lɛ macɩ wɔɔcibhlilinya na, ‑ma ya pɔɔbhlanya 'plɩ. 23Ma 'la 'ka 'lɛ Laagɔ, ‑ɔ 'plɩ 'ta 'lɛ na, 'klʋgba na, ma ya ‑buunlɩɩ, ‑ɩ palalɩ 'lɛ nclɔɔ, ‑ɔ plɩ 'lɛ na, libhli, mlaa ‑ɩ ‑ka 'lɛ 'blɩ ‑mɔnaa, ɩya ‑blɛblɛmlaa gʋgwla.
24Ɩmɩ ‑naa 'la gbʋ, dɛ Laagɔ ‑sa 'lɛ maa sɔ 'kʋ, le ma 'ka lɩɩa ɩla 'tʋa ‑kʋ 'lɛ mala pɔlɩa 'ciin na gɩlɩ, ɩya ma 'ka ‑badaaglua nɩkplaan ma plalɩ 'lɛ maa 'titi mala 'nyɛkɛa ‑bhʋbhɔlɩ na li. 25Ma ya Laagɔ 'la ‑nʋawlɛa yodi nɩkplaan kacili. Ma ya nʋnʋlʋʋa gʋgwla 'nyɩ ma yʋʋ lobho, Nʋnyɔa 'la 'jeen, ɔmɔa ‑ɔ ‑palɩɔ 'lɛ 'nyu 'lʋkʋlʋkʋ ɩya 'lʋkʋlʋkʋ na! Ɩ kʋ sɛɛ!
26Ɩmɩ ‑naa 'la gbʋ, dɛ Laagɔ ‑sa 'lɛ maa sɔ 'kʋ le ma gɩlɩ wɔɔgugwiea ‑ɛ pla 'lɛ maa ‑bhʋbhɔlɩ na. Mala 'ŋwlɛa ya maya ŋodie 'la ‑gbitikʋmʋlɩɛa te 'nyɩ maya ma liŋwlɛ mʋnɩ 'lɛ ‑gbiti 'kʋ. 27Ŋodiea ‑ma sɛɛ bhlogbɩɩ, ma ya maya 'ŋwlɛ 'la ‑gbitikʋmʋlɩɛa te, 'nyɩ ncaaŋodico ɔ liŋodico 'la 'tʋ ‑yelinɩɔ 'lɛ 'nyɩ ŋodi ‑ya ɔ liŋodi nʋ 'lɛ ‑zoogbɩ, 'nyɩ ma 'lɩlɩ 'lɛ mala 'nyɛkɛa nɩkplaan dluuplʋlɩɛa ‑ɩya mala mlɔlɩɛa ‑fata 'lɛ na. 28'Nyɩ sa ma 'ta 'lɛ wabha le ma 'kaa Laagɔ 'la cibhlililiea nɩkplaan kʋ na, ɔ ya maa sɔ 'kʋ ‑sa, 'nyɩ ɔ ya 'lɛ maa mala dɩgalɩa ‑ɩ 'ta 'lɛ wɔlɩ ‑ci na nɩkplaan te, 'nyɩ ma nʋnɩ 'lɛ ɩmɩa ‑ɩ 'ta 'lɛ nʋnʋsa ‑kʋ na.
29Nʋnʋgbɩ ‑mizi -mizia ‑ɩ 'ta 'lɛ 'kʋnylugolu na, ‑badaaglu, 'dala 'la ‑walʋ, ‑abhɔlɛ, woze, ncaabhlalɩɛ, 'slagbʋslalɩɛ, ‑kplakpla, danyuno, 'lɩbhɩlɩbhɩ 30ɩya ncɛlɩcɩnyumolɩɛ ‑yelio maa. Ma ‑glɩ Laagɔ 'la ‑zɔbhɛlɩgbanya, gbɩmatɩnya, ‑tutulelinya, gbɩɩnkpolinya, 'nyɩ ma ‑ka 'lɛ ‑abhɔlɛnʋnɛnɛ. Ma mʋnʋ mala valɩnya gbatlɩ, 31ma 'ta dɩgalɩ ‑ci, maa 'tɛbhalɩ 'ta maa ‑deli 'kʋ, ma 'ta pɔlɛ ‑ka, ma 'ta ncaaŋaazɩ ‑ka. 32Ma ‑ci Laagɔ 'la 'tɩtɩa ‑ɩ cla 'lɛ lebhe maa ‑ɔ nʋ 'lɛ ‑sa 'la nʋnʋgbɩa na, maya 'kwɩ ‑fata na. ‑Sakɛ 'bhlɩmɔɔn, maa 'titi nʋɩ, 'nyɩ ma ‑kʋ ‑awlɛ 'lɛ maa ‑ɔ nʋɩ 'lɛ na leen.
Currently Selected:
Wlɔ 1: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.