Zud 1
1
‑Ayopalɩɛ
1‑Amʋ Zudu, n ‑glɩ Zozi Klisi 'la lobhoco ɩya Zakɩ bholi. N zie maa -a To Laagɔ la 'lɛ, ɔ ‑wa 'lɛ 'nyɩ ɔ lɩ 'lɛ 'klʋ, Zozi Klisi 'la gbʋ na ‑afluwaa ‑naa. 2'Naa ŋaazɩɩnlɩlɩɛ, pupue ɩya ‑walʋa ŋeni anyɩ 'kʋ ‑bhutukpa.
A zʋlʋ yooyo -wɔlɩ 'la canyaa pɔlɛ 'kʋ
3N 'nagwɩɛcɩnyɩ, daa n wabha 'lɛ lebhe n 'kaa anyɩa zie ɩya n 'ka anyɩ gbʋʋnsalɩɛa -anyɩa 'fɩan ‑a 'wlalɩ 'kʋ na ɩla cɩ 'la wɔlɩa solu na, 'na wɔɔgugwiea yaan 'kʋkpɛ le n zie anyɩ 'saantiin ɩya n 'ka anyɩ 'tɛtɩɩn zʋ le a vʋ pɔɔtɛtɛa ‑ɛ 'nyɩɔ 'lɛ ‑kplɔkplɔnyaa 'kplookʋ na ɛla gbʋ. 4‑Masa, ‑kplakpla nɩkplaan, ncɛlɩ ya anyɩ sidiin ble. Maa ‑ɔla gbaylɩsalɩɛa 'la wɔlɩa ‑zieo 'lɛ tooto na. Maa ‑ɔ 'ta 'lɛ Laagɔ 'la zʋlɩɛ bhlogbɩɩ ‑ka na, ma cala Laagɔ 'la dananɔa 'la wɔlɩa kwla mala ‑badaaglu nʋnʋgbɩa nɩkplaan 'nyɩ ma blɔ ‑ala Canyɔa bhloa ɩya ‑ala ‑Kwlenyɔa ‑ɔ ‑glɩ 'lɛ Zozi Klisi na.
5N ‑wa lebhe n 'ka anyɩ luoli, ka a ‑ka 'mɩɩ tooto ‑ci 'titio na, lebhe daa ‑Kwlenyɔa ‑sa 'lɛ ɔla 'lɔlʋa gbʋʋn Ejibhitibhlɩa 'kʋ na, ɩla leen, ɔ ya maa ‑ɔ pala 'lɛ lebhe ma 'ta ɔla pɔɔtɛtɛ ‑ka na nua. 6'Bhlaandleecɩa* ‑ɔ 'ta 'lɛ ɩmɩa ‑ɩ ‑nyɩɔ 'lɛ maa na wabha 'nyɩ ‑ɔ 'wlʋ 'lɛ mala sakʋdaa na, ɔ gɩɩ maa 'tutua nɩkplaan ‑abhluakɩɩn 'lʋkʋlʋkʋ ɩya 'lʋkʋlʋkʋ 'tɩtɩplaclɩɩ 'kadiea 'la gbʋ. 7‑Ɔ ‑glɩ 'lɛ Sodɔmʋ ɩya Gɔmɔlʋdia, ɩya 'dia ‑ɩ ‑didiui 'lɛ na, ɩla 'kʋ 'la ncɛlɩa ‑ɔ lia 'lɛ ɩmɩ 'bhisa 'kʋ 'la ‑badaaglua, 'nyɩ ‑ɔ 'matɩanɩa 'lɛ le maya ma li ‑ŋodie 'kanɩa ‑gbiti 'kʋwlalɩa na, ma ‑kʋ ‑kosua ‑ʋ ŋomu 'ta 'lɛ 'lʋkʋlʋkʋ ɩya 'lʋkʋlʋkʋ na 'la ‑gbaylɩsalɩɛa ‑zɔn le ɩ 'ka sɛ palalɩlɩɛ 'plɩ. 8Na, 'sɛtɛɛ bhlogbɩɩ ncɛlɩ ‑naa ‑ma, ma ‑ka 'lɛ mala yooyo -wɔlɩa nyɩtɛda ‑kʋ na, ma pla 'lɛ mala 'nyɛkɛa ‑bhʋbhɔlɩ, ma bu 'ta 'lɛ Laagɔ 'la ‑kwleliea, 'nyɩ ma vla 'lɛ ɔla 'bhlaandleecɩa, ɔla 'klʋagbaa ‑yelɩo 'lɛ na. 9'Bhlɩmɔɔn, Mɩsɛlɩ, 'bhlaandleekpasaa, daa ɔ ya gɔzɛ 'tɩtɔa 'lɛ wɔlɩ Moyizi 'la ‑blaanyɛkɛa 'la gbʋ na, ɔ 'ta ɔcɩ 'nyiglili ɩya ɔ 'kɛɛ vla. ‑Ma ɔ ya 'cla lebhe: «'Naa ‑Kwlenyɔ ‑sɔɔ gbaylɩ.» 10‑Ma, ncɛlɩ ‑naa ɩmɩa ma 'ta 'lɛ ‑ci na, ɩmɩ ma vla 'lɛ. 'Nyɩ mla 'bhisa, ɩmɩa ‑ɩ ci 'lɛ maa 'wluun na, ka ‑tɛɛ ɩ gba 'lɛ 'nyɩ ma mlɔ 'lɛ. 11‑Munzue ya maa bho ‑ofi lebhe ma ya Kayɛɛn 'la ‑gugwiea bhli. Dluuplʋdala 'la gbʋ, ma ya mlɔ Balamʋ 'bhisa 'kʋ 'nyɩ ma ya Kolee 'la ‑ncɩkubholɩɛ 'la 'kwɩa 'ku. 12Maa ‑naa, maa ‑ɔ pla 'lɛ ala nyɩa a lili 'lɛ dabhlo na ‑bhʋbhɔlɩ, saa 'titia nyɩ ‑ka 'lɛ sakɔsɔlʋ 'nyɩ ma ma li 'lɛ nyagbu 'nyɩ ɩ 'ta 'lɛ maa ‑zo ‑ka na. Ka mala gbɩa ‑kʋ 'lɛ lebhe 'nyukplia 'nyu 'ta 'lɛ nɩkplaan ‑kʋ 'nyɩ ‑pupolu famʋ 'lɛ na, ma ‑kʋ lebhe sia si 'la tlʋda ‑ka 'lɛ ŋeni 'nyɩ ‑ɩ tlʋ 'ta 'lɛ na, sa ɩ ya 'ku 'nyɩ ɩ ya ‑gluu 'wlʋ. 13Ma dlolu mala ‑zonʋnʋgbɩa daa ‑tɛtɛa le saa gegbagbɩ 'kɔsɔ 'lɛ ɩla fliiflia 'nyigbo 'kʋ sa na. Ma ‑kʋ le ‑zɔlʋa ‑ʋ bibili 'lɛ 'tutukpoonkpiea nɩkplaan 'kʋ 'lʋkʋlʋkʋ ɩya 'lʋkʋlʋkʋ na.
14Maa ‑naa ‑sakasaka 'la wɔlɩa Enɔkʋ ‑ɔ ‑glɩ 'lɛ ‑ngbɔɔsɔ nclɔɔa ‑ɔ gɩɩ 'lɛ Adaan 'kʋ na nyɩtɛa 'lɛ Laagɔ ne 'kʋ lebhe: 'Lɩka ‑Kwlenyɔa ‑ya ɔla ‑kplɔkplɔ tavʋnyaa ci 'yɛpɩ, 15le ɔ 'ka ‑laagɔzɔnbhuoa 'tɩtɩpla. Ɩya ɔ 'ka maa ‑tɛtɛa ‑ɔla 'nyi 'ta 'lɛ laagɔ yi na, mala nʋnʋgbanyinyia ‑tɛtɛa ɩya vlalɩɛ ‑tɛtɛa ma vlɔ 'lɛ na, ɩla gbaylɩa ‑sa. 16Ma ‑tɛɛ ‑kʋ 'lɛ 'dɛ. Ma ‑glɩ ncɛlɩa dɔgbɛ ‑yelio 'lɛ, ‑ɔ gba 'lɛ wɔlɩ clɩɩa 'fɩan 'nyɩ ‑ɔ gɩlɩ 'lɛ mala wɔɔgugwiea na. Wɔɔbhu ‑tɛɛ 'wlʋlʋ 'lɛ maa neen 'nyɩ saa nvʋsʋɛa ma cɩ 'ka 'lɛ nclɔɔ nɩkplaan 'lɩlɩ na ‑kʋ 'lɛ na, sɛɛ ma buo 'lɛ.
Wɔlɩ pɔlɛcɩfalɩlɩɛ
17‑Ma anyɩ, n 'nagwɩɛcɩnyɩ, a luoli wɔlɩa ‑ala ‑Kwlenyɔ Zozi Klisi 'la lobhulobhunyaa* pʋ 'lɛ 'kʋklʋʋn 'nyɩ ma solu 'lɛ anyɩ na. 18Ma yaa anyɩa 'cla lebhe: «Leenbhɩalɩclɩɩa nɩkplaan, ncaanyanɩnya cɩ 'ka ‑zɔnwlʋ, ma cɩ 'ka mala wɔɔgugwienyinyea gɩlɩ.» 19Maa ‑tɛɛ ‑kʋ 'lɛ 'dɛ! Maa ‑ɔ lamʋ 'lɛ nɩkplaandolɩɛa, ncaawɔɔgugwie ma ‑ka 'lɛ, ‑ma ma 'ta Laagɔ 'la Wugoa ‑ka. 20‑Ma anyɩ, n ‑nagwɩɛcɩnyɩ, a 'slalɩ acɩ ala ‑kplɔkplɔ pɔɔtɛtɛa 'kʋ ɩya a bhibhieli ‑Kplɔkplɔ ‑Wugoa* nɩkplaan. 21A kʋ Laagɔ 'la ‑walʋa nɩkplaan ɩya a ‑bɛlɩ jabhʋa ‑ʋ 'kʋ 'lɛ 'lʋkʋlʋkʋ ɩya 'lʋkʋlʋkʋ na, ‑ala ‑Kwlenyɔ Zozi Klisi 'la ŋaazɩɩnlɩlɩɛa nɩkplaan. 22Maa pɔlɛ 'ta 'lɛ 'cɩɩ ‑kʋ na, a 'lɩ maa ŋaazɩɩn. 23A ‑sa maa gbʋʋn mala ‑kosu neensalɩɛ nɩkplaan. ‑Ma ‑ɔ ‑glɩ 'lɛ ‑da -naanʋaa na, a 'lɩ maa ŋaazɩɩn, ‑ma a kalɩ ŋanɔpɔlɛ, a 'gulu maa ɩya a tlʋbhalɩ mala lokua mala 'nyɛkɛa ya 'lɛ ‑bhʋbhɔlɩ ‑pla na cɩ da.
'Klʋagba ŋeni Laagɔ
24Ɔmɔa ‑ɔ ‑cɩ ka 'lɛ anyɩ 'klʋlɩ ɩya a 'la ka bhli ɩya a 'la ka pʋɛ cɩ kalɩ, daa a cɩ 'ka 'lɛ ɔla 'klʋagbaa ‑deliin 'nylugo pɔlɛkʋmɛnɔ nɩkplaan na, 25ɔmɔ Laagɔ bhlo, ‑ɔ 'plɩlɩ 'lɛ ‑ala ‑Kwlenyɔ Zozi Klisi 'kʋ 'nyɩ ɔ ‑sa 'lɛ ‑anyɩ gbʋʋn na, 'naa 'klʋagba, 'ghlilo, 'tɛtɩ ɩya ‑kwleliea ‑ɩ ‑kʋ 'lɛ bhɔdaa tooto, ‑pɔtɔnʋ ɩya 'lʋkʋlʋkʋ na, 'plɩ ɔla da. Ɩ kʋ sɛɛ.
Currently Selected:
Zud 1: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.