Ziz 1
1
Zozi Klisi ya zizieziziewɔlɩa Zaan pala
1'Lɩka wɔlɩa Zozi Klisi wlaa 'lɛ ‑zɔn na: Laagɔ -ɔ zʋɔ 'lɛ mɩ wlɩɩn le ɔ 'ka ɔla lobhocuoa ɩmɩa ‑ɩ ‑cɩ ka 'lɛ clɩɩ ‑klipɛ nɩkplaan ŋeni na, pala. Ɔ ya ɔla 'bhlaandleea* ɔla lobhoco Zaan 'bhlɩ lobhu 'nyɩ ɔ ya gba ɔ yɩɩ cibhlili. 2Ɔmɔ ‑naa li ‑danʋfʋɛ lebhe ɩmɩa ‑tɛtɛa ɔ 'lɩ 'lɛ na, ɩ ‑glɩ Laagɔ 'la wɔɔnyɩtʋ ɩya Zozi Klisi 'la ‑danʋfʋɛlilie. 3Ɔ ‑kʋ 'nanɩ, ɔmɔa ‑ɔ zɛlɩ 'lɛ ɩya maa ‑ɔ po 'lɛ wɔɔnyɩtʋa ‑ʋ 'wlʋlʋ 'lɛ Laagɔ neen na 'nyukwliin 'nyɩ ‑ɔ 'plɩlɩ 'lɛ ʋla nɩkplaan 'la wɔlɩa ‑ɩ ‑zie 'lɛ na 'kʋ na. Sa ɩla 'kʋglalɩdaa ya cɩ mɛ na.
Zaan ya Aziibhlɩa 'kʋ 'la ‑lagɔnɩkplaa 'la ‑kandia ‑ngbɔɔsɔa zie
4‑Amʋ Zaan, n zie ‑laagɔnɩkplaa 'la ‑kandia ‑ngbɔɔsɔa ‑ɩ ‑kʋ 'lɛ Aziibhlɩa 'kʋ na.
'Naa 'nyupalɩɛ ɩya pupuea ‑ɩ 'wlʋlʋ 'lɛ ɔmɔa ‑ɔ ‑kʋ 'lɛ, ɔ ‑kʋa 'lɛ 'nyɩ ‑ɔ -cɩ ka 'lɛ ci na wlɩɩn,
ɩya 'wugwia ‑ngbɔɔsɔa ‑ɩ ‑kʋ 'lɛ ɔla ‑kwlekpoa ‑deliin na wlɩɩn,
5ɩya Zozi Klisi, ‑danʋfʋɛa 'titi,
‑bɛka nclɔɔa ‑ɔ ‑bho 'lɛ 'kwɩɩn 'kʋ,
'nyɩ ‑ɔ ‑glɩ 'lɛ ‑dʋdʋa 'kʋ 'la ‑kwletocɩa 'fɩan 'la ‑kwleto na wlɩɩn na, ŋeni anyɩ 'kʋ.
Ɔmɔa ‑ɔ ‑wabha 'lɛ ‑anyɩ,
'nyɩ ɔla ‑dolua 'kɔsɔ 'lɛ sa,
'nyɩ ‑ɔ ‑sa 'lɛ ‑anyɩ ‑ala nyinyia 'la geylia nɩkplaan,
6‑ɔ blee 'lɛ ‑anyɩ Laagɔ 'la Nyɩbhɛlɩdua* nɩkplaan,
le ‑a ka ɔ To Laagɔ 'la ‑teyiyinya 'plɩ na,
'naa 'klʋagba ɩya 'tɛtɩ 'plɩ ɔla da 'lʋkʋlʋkʋ ɩya 'lʋkʋlʋkʋ.
Ɩ kʋ sɛɛ!
7'Lɩka, ɔ cili 'yɛpɩ 'nyukpli sidiin!
Ncɛlɩa 'fɩan 'la 'ci cɩ 'kɔɔ 'lɩ,
Maa 'titia ‑ɔ 'fitio 'lɛ na ‑masɛɛ.
‑Dʋdʋa 'kʋ 'la ncɛlɩa ‑tɛtɛa cɩ 'ka 'kuzluun kʋ ɔla gbʋ.
‑Ghɛɛ, sɛɛ ɩ cɩ 'ka 'lɛ 'plɩ! Ɩ kʋ sɛɛ!
8Laagɔ, ‑Kwlenyɔa nabhe:
«N ‑glɩ bhɔda ɩya 'wlukoda,
ɔmɔa ‑ɔ ‑kʋ 'lɛ, ‑ɔ ‑kʋa 'lɛ 'nyɩ ‑ɔ ‑cɩ ka 'lɛ ci na,
'tɛtɩa 'fɩan ɩ To.»
Zaan ya Klisi 'wugoon 'lɩlɩ
9‑Amʋ, a bholi Zaan, n ‑ya anyɩsɔ 'wlalɩ 'kwlɩbhɩɛa, Laagɔ 'la Nyɩbhɛlɩdua* ɩya pɔɔklalɩɛa ‑a 'lɩlɩ 'lɛ Zozii nɩkplaan na, 'kʋ. N ‑kʋa Patʋmɔsʋ 'la 'lɛkpoa 'kʋ, Laagɔ 'la wɔɔnyɩtʋa n plicia 'lɛ ɩya Zozii 'la ‑danʋfʋɛa n lia 'lɛ na, 'la gbʋ. 10Clɩɩ bhlo, ‑Kwlenyɔ 'la clɩɩa 'kʋ, Laagɔ 'la 'Wugoa* ya gba 'nyɩ n ya ‑blɩɩzɔn 'kadie bhlo ncɩ leen 'nunu, ʋ kʋa le saa lɛglɛ gba 'lɛ na, 11'nyɩ ʋ claa lebhe: «Ɩmɩa ‑n ‑jlɛ 'lɛ na, zii ‑afluwa nɩkplaan ɩya ‑n tlɛlɩa -laagɔnɩkplaa -la -kandia ‑ngbɔɔsɔa ‑ɩ ‑kʋ 'lɛ 'dia ‑ɩ ‑glɩ 'lɛ Efɛzɩ, Simini, Pɛlɩgamʋ, Tiatili, Salɩdɩ, Filadɛlɩfii ɩya Laodisee na 'kʋ na.» 12N ya kwlacala le n 'ka nclɔɔa ‑ɔ solua ‑amʋa 'lɛ na 'lɩ. Na, daa n cala 'lɛ kwla na, n ya ‑asɩkɛ ‑buziigɩlɩɩ ‑ngbɔɔsɔ 'lɩ. 13'Nyɩ ‑buziigɩlɩɩa, nclɔɔ bhlo, ‑ɔ ‑kʋa 'lɛ le nclɔɔ 'la 'cʋ na, 'nylugoa 'mɩɩ 'lɛ sidiin. Ɔ ‑plaa 'janpa ‑bluu nɩkplaan, 'nyɩ ‑asɩkɛ 'bɛtʋ ‑gʋalɩa 'mɔɔ 'lɛ dineen. 14Ɔla 'wlua 'la 'nyɩa ‑pulua le ‑ngese 'pɔpʋɛ ɩya 'cɔcɔlɛ 'bhisa, 'nyɩ ɔla 'cia ‑zaa 'lɛ le ‑kosugbagbalu 'bhisa. 15Ɔla kplia lea le ‑jawiea ma ya 'lɛ wɔlʋ na 'nyɩ ɔla ‑blɩɩzɔnwɔlɩa ‑kʋa 'lɛ le saa ge gbɛtɛ 'lɛ na. 16Ɔ ‑kaa ‑zɔlʋ ‑ngbɔɔsɔ ɔla 'lipasɔsɔa nɩkplaan 'nyɩ ‑baandua ‑ʋla nia ‑mɔsɔa nɛ na, 'wlʋlʋa 'mɔɔ 'lɛ neen. Ɔla 'klʋa lea le dɩdɩylʋbhuo.
17Daa n 'lɩɔ 'lɛ na, n yɔɔ ‑deliin bhlili le saa n ‑kuoa 'lɛ na. ‑Ma, ɔ yaan ɔla 'lipasɔsɔa 'kʋ ‑gbɛ 'nyɩ ɔ yaan 'cla lebhe: «Ŋanɔ 'la 'bhlɔɔ. ‑Amʋ ‑ɔ ‑glɩ 'lɛ ‑bɛka -naanɔa ɩya bhɩalɩ naanɔa, 18ɩya ɔmɔa ‑ɔ ‑kʋ 'lɛ na. N yaa 'ku, ‑ma 'lɩka, n ‑kʋnɩ 'lʋkʋlʋkʋ ɩya 'lʋkʋlʋkʋ 'nyɩ n ‑ka 'lɛ 'kwɩ ɩya 'kuduku 'la 'safʋa wlɩɩn.
19Na, 'maa zie ɩmɩa ‑n 'lɩ 'lɛ, ɩmɩa ‑ɩ ‑jlɛ 'lɛ ɩya ɩmɩa ‑ɩ ‑cɩ 'kɩɩ 'lɛ leen ci na. 20‑Ɔ ‑glɩ 'lɛ ‑zɔlʋa ‑ngbɔɔsɔa ‑n 'lɩ 'lɛ 'na 'lipasɔsɔa nɩkplaan ɩya ‑asɩkɛ ‑buziigɩlɩɩa 'la wɔlɩa ‑ɩ ‑zizio 'lɛ na, 'lɩka ɩla ‑zɔnsalɩɛa: ‑Zɔlʋa ‑ngbɔɔsɔa ‑glɩ -laagɔnɩkplaa -la -kandia ‑ngbɔɔsɔa 'la 'bhlaandleecɩ* 'nyɩ ‑buziigɩlɩɩa ‑glɩ 'lɛ -laagɔnɩkplaa -la -kandia ‑ngbɔɔsɔa.
Currently Selected:
Ziz 1: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.