Luk 23
23
Ma ya Zozii Pilatɩ ‑deliin fa
(Mat 27.2,11-14; Mak 15.1-5; Zan 18.28,33-38)
1Na, maa 'fɩan ya nebhlo 'kʋbholu 'nyɩ ma ya Zozii Pilatɩ ‑deliin fa. 2Ma yɔɔ wɔlɩ 'kʋgɩlɩɛ bhɔ 'nyɩ ma claa lebhe: «‑A ya nclɔɔ ‑naa ‑ala 'bhlɩnyaa 'wlunyumoda 'lɩ: Ɔ claa maa le ma 'la ‑plʋa nyɩbhɛlʋ Sezalɩ 'la ‑lapooa 'nyɩ ɔ la 'lɛ ɔcɩ Laagɔ 'la ‑Sasanyɔa* ɩya nyɩbhɛlʋ.»
3Na, Pilatɩ ya Zozii neencla lebhe: «‑Mɔ ‑glɩ 'lɛ Zifʋnyaa* 'la nyɩbhɛlʋa bha?» Ɔ yɔɔ neenŋonu lebhe: «Sɛɛ ‑n 'bhli 'lɛ 'kʋ.» 4Pilatɩ ya ‑teyiyinyaa tocɩa ɩya ‑alawleea 'cla lebhe: «'N 'lɩlɩ 'ta nclɔɔ ‑naa, wɔlɩa ‑ɩ ‑cɩ kɔɔ 'lɛ gʋa na, nɩkplaan.» 5‑Ma ma 'kpafɩalɩa wɔlɩa 'kʋ, ma claa lebhe: «Ɔla cacawɔlɩa cla 'bhlɩnyaa le ma ‑bhokʋ ɩya ma mʋnʋ goonvlakpoa gbatlɩ. Ɔ ya Galileebhlɩa 'kʋ bhɔlʋ, ɔ ya 'lɛ Zudeebhlɩa ‑tɛtɛa 'kʋ 'plɩlɩ ‑aan 'nyɩ ɔ ya 'lɛ ‑wɔlʋ ŋeni.»
6Daa Pilatɩ 'nu 'lɛ wɔlɩ ‑naa na, ɔ ya neencla ɩ ‑ka ‑kʋ le nclɔɔ ‑naa ‑glɩa Galileenyɔ na. 7'Nyɩ, daa ɔ cibhlili 'lɛ le 'bhlɩa Ewlɔdʋ ‑kwle 'lɛ na, ɛmɛ 'kʋ Zozii 'wlʋlʋa 'lɛ na, ɔ yɔɔ 'mɔɔ fa, sa 'dɛ 'la clɩɩa nɩkplaan, Ewlɔdʋ ‑ma ‑kʋmʋa Zolizalɛmʋ dua nɩkplaan na.
Zozii ‑kʋnɩ Ewlɔdʋ ‑deliin
8Daa Ewlɔdʋ 'lɩ 'lɛ Zozii na, pɔlɛ 'kʋ yɔɔ ‑gbɔɔn mɛma, sa daa tootoa ɔ 'matɩa le ɔ 'kaa 'mɔɔ 'ciinlɩ ɩmɩa ɔ 'nunua 'mɔɔ 'lɛ ‑budu 'kʋ na, 'la gbʋ. ‑Awlɛ ɔ gugua le ɔ cɩa Zozii 'ciinzizielɩlobholi bhlo nʋda 'lɩ. 9Na, ɔ ya Zozii wɔɔbhutukpa neencla, ‑ma 'ɔ 'tɔɔ nesalɩ ‑ylɛylɛ. 10‑Teyiyinyaa tocɩa ɩya ‑jlɩmaazienyaa* ‑kʋa 'dɛ, ma zala 'ci, 'nyɩ ma gɩa 'mɔɔ wɔlɩ 'kʋ. 11Ewlɔdʋ ɩya ɔla ‑bɛnyaa yɔɔ ‑zoogbɩ cɩ nʋ 'nyɩ ma yɔɔ nyanɩ. Ewlɔdʋ yɔɔ lokwi 'nanɛ nɩkplaan ‑pla 'nyɩ ɔ yɔɔ Pilatɩ 'ciincala. 12'Dɛ 'la clɩɩa bhlogbɩɩ 'kʋ, Ewlɔdʋ ɩya Pilatɩ ya 'nagwɩɛ li, maa ‑ɔ 'tawaa 'lɛ ‑walɩ na.
Zozii ‑kʋ ‑awlɛ Pɩlatɩ ‑deliin
(Mat 27.11-26; Mak 15.1-15; Zan 18.39—19.16)
13Na, Pilatɩ ya ‑teyiyinyaa tocɩa, 'bhlɩtocɩa ɩya 'bhlɩnyaa la 14'nyɩ ɔ ya maa 'cla lebhe: «A yaan 'cla le nclɔɔ ‑naa ‑la le ɔ nyumo 'bhlɩnya 'wlu. ‑Ma ‑amʋa ‑ɔ clɔɔ 'lɛ neen anyɩ 'ci 'kʋ na, n 'ta nclɔɔ ‑naa nɩkplaan, wɔlɩa a gɩɔ 'lɛ 'kʋ na, ‑ylɛylɛ 'lɩlɩ, ‑ɩ ‑cɩ kɔɔ 'lɛ gʋa na. 15Ewlɔdʋ ‑ma 'sɛɛ bhlogbɩɩ, sa ɔ yɔɔ ‑anyɩ 'ciincala na. 'Lɩka, ɔla nʋnʋgbɩa nɩkplaan, wɔlɩa ‑ɩya 'kwɩ ‑fata 'lɛ na, ‑ylɛylɛ 'tɛɛ ‑kʋ. 16Na, n cɩ 'ka gba ma 'kɔɔ 'bɩsa ɩya n kɔɔ 'cintalɩ.»
[ 17]#23.17 ‑Godogodofluwia ‑anɩ ya wɔɔke ‑naa Zieziewɔlɩa nɩkplaan ‑pla: «Geyliinwlʋfɛtlɩa ‑ka ‑azla ŋeni na, ‑ɩ ‑fata lebhe Pilatɩ 'talɩa ‑palʋʋnpapanyɔ bhlo 'cin ɩya ɔ 'nyɩa maa.» 18Na, ncɛlɩa 'fɩan ya nebhlogbɩɩ nɩkplaan ‑gaalɩ 'nyɩ ma ya 'cla lebhe: «'Bhlɔɔ ɩya ‑n 'talɩ Balabasɩ 'cin ‑n 'nyɩ ‑anyɩ.»
19Balabasɩ ‑naa ka ma 'pa 'mɔɔ 'lɛ ‑palʋʋn, sa ma yaa macɩ 'kubho 'dua nɩkplaan ma ya 'goonvlakpo gbatlɩ mʋnʋ 'nyɩ ma ya nclɔɔ 'bhla. 20Pilatɩ ya ‑awlɛ maa solu le ɔ ‑wa le ɔ 'ka Zozii 'cintalɩ. 21‑Ma maa, ma ‑gaa nɩkplaan 'nyɩ ma claa lebhe: «Bhoo, bhoo dabhlalɩsu 'ciin.» 22‑Mɔtada, ɔ ya ‑awlɛ maa 'cla lebhe: «Wɔɔnyinyi saa 'titi nclɔɔ ‑naa yaa 'lɛ nʋ bha? N 'tɔɔ wɔlɩ ‑ylɛylɛ nɩkplaan 'lɩlɩ, ‑ɩya 'kwɩ ‑fata 'lɛ na. Na, ka n cɩ 'ka 'lɛ gba ma 'kɔɔ 'bɩsa ɩya n 'kɔɔ 'cintali.» 23‑Ma maa 'ka ma 'kpafɩalɩa 'lɛ wɔlɩa 'kʋ, ma ‑gaa 'lɛ nɩkplaan, 'nyɩ ma 'clalɩa 'lɛ le ɔ bhoo dabhlalɩsu 'ciin 'nyɩ mala 'kasɛa ‑ziloanɩa 'lɛ 'kʋ. 24Na, Pilatɩ ya 'cla le ɔ cɩ 'ka ɩmɩa ma 'clalɩ 'lɛ na nʋ. 25Ɔ ya ɔmɔa ma 'pa 'lɛ ‑palʋʋn, 'goonvlakpoa 'la gbatlɩmʋnʋlɩɛ ɩya ‑ncabhlalɩɛ 'la gbʋ, 'nyɩ ma 'clalɩɛa 'lɛ na, 'cintalɩ. ‑Ma ‑ɔ ‑glɩ 'lɛ Zozii na, ɔ ya ne te le ma nʋɔ mala saa ma ‑wa 'lɛ na.
Ma mʋnɩ Zozii 'bhlakan
(Mat 27.31-44; Mak 15.20-32; Zan 19.17-24)
26Daa 'sojaa ‑kʋa 'lɛ Zozii famʋda na, ma ‑ya Silɛnɩdua 'kʋ 'la nclɔɔ bhlo, ‑ɔ 'wlʋa 'lɛ 'kwlaan na, 'kʋbhli, ma laa 'mɔɔ Simɔɔn. Ma yɔɔ dabhlalɩsua 'nyɩ le ɔ bhɩʋ ɩya ɔ gɩlɩ Zozii. 27'Bhlɩa 'kʋ 'la ncaabhutukpa gɩlɩa Zozii, 'ŋwlɛ ‑kʋmʋa maa nɩkplaan, ma tua 'nyɩ ma bhʋtʋa 'mɔɔ. 28Zozii ya maa 'klʋtla 'nyɩ ɔ ya maa 'cla lebhe: «Zolizalɛmʋŋwlɛnyɩ, a ‑la 'tuan, ‑ma a 'tu acɩ ɩya ala 'cuoa. 29Sa 'lɩka clɩɩ bhlo ci 'yɛpɩ ‑ɩ ya ma 'ka 'cla lebhe: Ma ‑kʋ 'nanɩ, 'ŋwlɛa ‑ɔ ‑fio 'lɛ, nɩkplɩa ‑ɩ 'ta 'ka ‑azla 'lɛ 'cilee bhɛ ɩya nyitia ‑ɩ 'ta ka ‑azla 'lɛ 'cilee nyɩa na. 30Na, ncɛlɩ cɩ 'ka 'kiki 'cla lebhe: A bhlili ‑anyɩ 'kʋ ɩya ma 'ka ‑kpʋkpʋɩ 'cla lebhe: A zizie ‑anyɩ 31Sa, ma nʋ 'lɛ ‑sa su ‑calʋa na, 'nsasa susʋsʋa 'nɩa cɩ kɩnɩ 'lɛ kʋkʋlʋ bha?»
Ma ya Zozii dabhlalɩsua 'ciin bho
32Ma famʋmʋa ncɛlɩ ‑mɔsɔ, ‑ɔ ‑glɩa 'lɛ ‑ncablanya na le ma 'kaa maya Zozii nebhlo 'bhlalɩ. 33Daa ma ŋeni 'lɛ daa ma 'la 'lɛ «'Wlukoklooa» na, ma ya Zozii ɔya ncaabhlanyaa ‑mɔsɔ nebhlo bholu, bhlo ɔla 'lipasɔa 'kʋ ɩya bhlo ɔla 'dabaa 'kʋ. 34‑Ma Zozii claa lebhe: «To, va maa, ‑ma ma 'ta ɩmɩa ma nʋ 'lɛ na ‑ci.» Na, 'sojaa ya ‑gɔjɩma ghla 'nyɩ ma ya ɔla lokua poli. 35'Bhlɩnyaa ‑kʋa 'dɛ ma 'lɩmʋa. 'Bhlɩtocɩa nyanɩa 'mɔɔ 'nyɩ ma claa lebhe: «Ɔ ya ncɛlɩ ‑anʋa gbʋʋnsa. 'Naa ɔ ‑sanɩ ɔmɔ 'titi ɔcɩ gbʋʋn, ɩ ‑ka ‑kʋ le ɔmɔ ‑glɩ 'lɛ Laagɔ 'la ‑Sasanyɔa* ɔ sla 'lɛ de na!» 36'Sojaa ‑ma nyanɩa 'mɔɔ: Ma yɔɔ cɩ mɛ le ma 'kɔɔ ‑diinvɛɛn ‑nyinye 'nyɩ, 'nyɩ ma 'claa 'mɔɔ lebhe: 37«Ɩ ‑ka ‑kʋ le ‑mɔ ‑glɩ 'lɛ Zifʋnyaa* 'la nyɩbhɛlʋa na, 'maa ‑sa ‑mɔ 'titi ‑ncɩ gbʋʋn.» 38Ma ‑ziea ɔla 'wlua 'kʋ, kpluukpaakpʋ 'kʋ lebhe: «Ɔmɔ ‑ɔ ‑glɩ 'lɛ Zifʋnyaa 'la nyɩbhɛlʋa.»
39Ncaabhlanyaa, ma bhoa 'lɛ na, bhlo vlaa Zozii 'nyɩ ɔ claa lebhe: «‑N 'ta ‑mɔ ‑ɔ 'ta 'lɛ Laagɔ 'la ‑Sasanyɔa ‑glɩ bha? ‑Sa ‑mɔɔ 'titi ‑ncɩ gbʋʋn ɩya ‑anyɩ ‑ma sɛɛ!» 40‑Ma ‑danaanɔa yɔɔ 'bɩsa 'nyɩ ɔ yɔɔ 'cla lebhe: ‑N 'gulu 'ta Laagɔ ‑ylɛylɛ, ‑mɔa ‑n ‑ya nclɔɔ ‑naa lɩ 'lɛ gbaylɩsalɩɛa bhlogbɩɩ na bha! 41‑Anyɩ ‑anɩa, ɩ gɩlɩɔ 'ciin. Ɩmɩa ‑a nʋ 'lɛ na, ɩla dluuplʋlɩɛ ‑a 'lɩ 'lɛ. ‑Ma ɔmɔ, ɔ 'ta ka wɔɔnyinyi ‑ylɛylɛ nʋ. 42'Nyɩ ɔ ya 'cla lebhe: «Zozii, daa ‑n ‑cɩ ka 'lɛ ‑kwlekan ci na, ‑naa boluun 'kʋ.» 43Na, Zozii yɔɔ 'cla lebhe: «N soluo 'mɩ, ɩ ‑glɩ ‑nʋawlɛ, ‑yaka, n ‑yɔɔsɔ ‑cɩ 'ka ‑laagɔɔn, 'kʋnylugolunyaa 'la sakʋdaa ble.»
Zozii ya 'ku
(Mat 27.45-56; Mak 15.33-41; Zan 19.28-30)
44Na, daa 'ylʋ mʋanɩa 'lɛ dɩdɩ slokan na, 'ylʋbhuoa ya pla. Daa ‑tɛtɛa ya 'tutu pla ‑aan 'plɩplɩylʋʋn 'la 'ŋwacɩ ‑mɔta. 45Laagɔpaakadiea* 'la ‑kplɔkplɔdaa 'la lokwia ya sidiin, 'pɛlɩ ‑mɔsɔɔn 'ŋatɔ. 46Zozii ya nɩkplaan ‑gaa 'nyɩ ɔ ya 'cla lebhe: «To, n zʋɔ 'na 'wugoa wlɩɩn.» Daa ɔ nyɩtɛa 'lɛ ‑sa na, ɔ ya nyɔmʋ 'plɩ. 47'Soja ‑gwlɩɩ ‑ngbi toa 'lɩ 'lɛ ɩmɩa ‑ɩ 'plɩ 'lɛ na, ɔ ya Laagɔ 'klʋgba 'nyɩ, 'nyɩ ɔ ya 'cla lebhe: «‑Zaagbʋsa, nclɔɔ ‑naa ‑glɩa 'kʋnylugolunyɔ.»
48Na, ncɛlɩa 'fɩan ‑ɔ 'wlalɩa 'lɛ 'wlu nʋnʋgbɩ ‑naa 'la gbʋ na, daa ma 'lɩ 'lɛ ɩmɩa ‑naa, 'nyɩ ma ‑kʋ 'lɛ cɔlɔda na, ma bhutia macɩ dineen, cɩɩnkalɔ 'la gbʋ. 49Ɔla cibhlilinyaa 'fɩan ɩya 'ŋwlɛa ‑ɔ gɩlɩa 'mɔɔ 'lɛ Galileebhlɩa 'kʋ tooto na, ma 'nylugoa 'vʋʋn 'nyɩ ma 'lɩmʋa ɩmɩa ‑tɛtɛa ‑ɩ 'plɩa 'lɛ na.
Ma ya Zozii zizie
(Mat 27.57-61; Mak 15.42-47; Zan 19.38-42)
50Nclɔɔ bhlo ya ci ma lɔɔ Zozɛfʋ, ɔ ‑glɩa tɩtɩplakandikadiea nɩkplaan 'la nclɔɔ. Ɔ ‑glɩa 'nanɩnʋnyɔ ɩya 'kʋnylugolunyɔ. 51‑Ma ɔ 'taa ɩmɩa ‑daa ‑kandinyaa zʋ 'lɛ kpo 'kʋ 'nyɩ ma nʋ 'lɛ na wabha. Ɔ ‑glɩa Zudeebhlɩa 'kʋ 'la 'dua ma la 'lɛ Alimatee 'la nclɔɔ 'nyɩ ɔ ‑bɛa 'lɛ Laagɔ 'la Nyɩbhɛlɩdua* 'la cilɩɛa. 52Nclɔɔ ‑naa ya mʋ, ɔ ya Pilatɩ ŋeni 'nyɩ ɔ yɔɔ Zozii 'la ‑blaanyɛkɛa 'clalɩ. 53Ɔ yɛɛ dabhlalɩsua 'ciin ‑sa, ɔ yɛɛ lokwi cɩ gʋa 'nyɩ ɔ yɛɛ lesua ma kɔtɔlʋ 'lɛ cɔkwieen 'nyɩ ma 'ta ka ‑azla 'lɛ ‑bɛkada nclɔɔ nɩkplaan zizieli na, nɩkplaan zʋ. 54Ɩ ‑glɩanɩa ‑ngbiclɩɩ 'nyɩ Zifʋnyaa* 'la nyɔkwɛclɩɩa* mɛanɩa cɩ.
55'Ŋwlɛa ‑ɔ gɩlɩa 'lɛ Zozii Galileebhlɩa 'kʋ tooto na, ma ya Zozɛfʋ gɩlɩ. Ma ya lesua nɩkplaan kope 'nyɩ ma ya saa Zozɛfʋ zʋzʋlʋa 'lɛ ɔla ‑blaanyɛkɛa na 'lɩ. 56Na, ma ya cɔlɔ 'nyɩ ma ya 'ŋɔnɔpalɩɩ bhɔsʋa le ma 'ka ‑blaanyɛkɛa ‑bʋa. Nyɔkwɛclɩɩa 'kʋ ma ya nyɔkwɛ, saa ‑jlɩmaa bhli 'lɛ 'kʋ na.
Currently Selected:
Luk 23: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.