Zak 5
5
Nyɩbhɛlɩnyɩ ‑munzue ya anyɩ bho
1Na, anyɩ nyɩbhɛlɩa, a ‑gaa nɩkplaan ɩya a 'tu, 'kwlɩbhɩɛa ‑ɛ ‑bɛɛ 'lɛ anyɩ na, ɛla gbʋ! 2Ala 'bhɛlɩa ɩ zɛɛ, 'nyɩ ŋlɔ li 'lɛ ala lokua. 3Ala ‑asɩkɛa ɩya ala 'dalaa pla gʋgwlɩzalɩ. Ɩla gʋgwlɩzalɩa cɩ ka 'lɛ ‑danʋfʋɛliliea ‑ɩ ‑cɩ ka 'lɛ anyɩ gbatlɩmʋnʋ na 'plɩ, ɩya ɩ 'ka ala 'nyɛkɛa ‑sie, ‑kosu 'bhisa. ‑Ofi lebhe a ya 'bhɛlɩ 'wluwlalɩ, bhɩalɩclɩɩa 'la gbʋ. 4A kope ka, a ya ncɛlɩa ‑ɔ nʋ 'lɛ ala 'kwlɩa nɩkplaan lobholi na, mala dluuplʋdala 'kʋkʋlʋ. 'Dala ‑naa ‑gaa nɩkplaan, 'nyɩ lobholinʋnyaa 'la 'nʋgbʋkasɛa ya 'tɛtɩa 'fɩan 'la ‑Kwlenyɔa 'nyukwliin bhlili. 5‑Dʋdʋa 'kʋ, a ‑kʋa 'nanɩ, 'bhɛlɩ sidiin. A lia 'nanɩ, daa ncaabhutukpa kua 'lɛ na. 6A ya 'kʋnylugolunyɔ 'tɩtɩ ‑pla, 'nyɩ a yɔɔ 'bhla. Ɔya anyɩsɔ 'ta 'tɩtɔ.
‑Kwlenyɔa cɩ 'ka ci
7Bholiecɩnyɩ, a kla pɔlɛ ‑aan, ɩya ‑Kwlenyɔa 'la ciclɩɩa 'ka ŋeni. A 'pa 'kɔgolonyɔ pɔlɛ. Ka ɔ kla 'lɛ pɔlɛ, 'nyɩ ɔ ‑bɛ 'lɛ lebhe 'nyugozo ɩya gude 'ka bhla 'fɩɔn ɩya lɩɩa ɔ golo 'lɛ ‑dʋdʋa nɩkplaan na, 'ka 'ca ‑bhutukpa tlʋ, 'fɩɔn ɩya ɩla 'dɩdaa 'ka ŋeni. 8Na, anyɩ ‑masɛɛ, a kla pɔlɛ, a zʋ 'tɛtɩ, sa ‑Kwlenyɔa 'la ciclɩɩa ya cɩmɛ na.
9Bholiecɩnyɩ, a 'la gbagbalɩa wɔlɩ cɩ, ɩya Laagɔ 'la ka anyɩ 'tɩtɩpla. A kopeka, 'tɩtɩplanyɔa ‑kʋ gbinea ne 'kʋ. 10Bholiecɩnyɩ, ‑ɔ ‑glɩ 'lɛ 'kwlɩbhɩɛ ɩya pɔɔklalɩɛ 'la cɩa wɔlɩa na, a dɩbalɩ Laagɔnekʋnyɩtɛnyaa* ‑ɔ nyɩtɛlɩa 'lɛ ‑Kwlenyɔ 'la 'ŋlɩa nɩkplaan na. 11A kopeka, ‑a cla lebhe ma ‑kʋ 'nanɩ, maa ‑ɔ kla 'lɛ pɔlɛ na. A ya nclɔɔa ma laa 'lɛ Zɔbʋ na, ɔla pɔɔklalɩɛa 'la wɔlɩa 'nu, 'nyɩ a ‑ci ɩmɩa ‑Kwlenyɔa nʋ 'lɛ 'nyɩ ɔ 'nyɩɔ 'lɛ bhɩalɩdaa na. ‑Masa ‑Kwlenyɔa ‑yelio ŋaazɩɩnlɩlɩɛ ɩya dananɔ na.
12Bholiecɩnyɩ, saa 'fɩan ɩ cɩ 'ka 'lɛ kʋkʋlʋ na, a 'la zligoa. A 'la slaa ‑laagɔɔn, ‑dʋdʋ, ‑aana, ‑buun lʋʋ bhlogbɩɩ 'ŋlɩ, ɩya a 'la zligoa. ‑Ma 'naa ala ‑ghɛɛ 'plɩ ‑ghɛɛ, ɩya ala ‑wɔɔ 'plɩ ‑wɔɔ, ɩya Laagɔ 'la ka anyɩ 'tɩtɩpla.
A bhibhie
13Na, anyɩ sidiin, 'kwlɩ ‑ka nclɔɔ bhɩa na, 'naa ɔ bhibhie. Pɔlɛ 'kʋ ‑ka nclɔɔ mɛnɩ na, 'naa ɔ bhlɩ ɩya ɔ wo ‑Kwlenyɔ ‑evli. 14Anyɩ sidiin, gu ‑ka nclɔɔ 'bhla na, 'naa ɔ gba ɩya ma la ‑laagɔnɩkplaa 'la ncaakpasɩa, ɩya ma tɔlʋɔ 'kpʋ 'wlu ‑Kwlenyɔ 'la 'ŋlɩa nɩkplaan, ɩya ma bhibhie ɩya ma 'nyɩɔ. 15Ma ‑ka pɔɔtɛtɛ nɩkplaan bhibhieli na, bhibhie ‑naa cɩ 'ka gba ɩya guzenyɔa 'ka jabha. ‑Kwlenyɔa cɩ 'kɔɔ 'kʋbho, 'nyɩ ka ɔ ‑kaa nyinyi nʋ na, ɔ cɩ 'kɔɔ mɩ va. 16Na, a wlaa ala nyinyia ‑zɔn ɩya nclɔɔ nclɔɔ solu ɔ 'yʋ, ɩya a bhibhie ɩya a 'nyɩnyɩnɩ, ɩya a 'ka jabha. ‑Masa 'kʋnylugolunyɔ 'la bhibhie ‑ka 'tɛtɩ na. 17Elii ‑glɩa nclɔɔ, ‑anyɩ 'bhisa. ‑Ma ɔ ya ‑gbɔɔn bhibhie le 'nyu 'la bhlaa, 'nyɩ 'nyu 'taa ‑dʋdʋa 'kʋ tɔlʋa ‑aan, 'nyɩ ɩ yaa liowli ‑mɔta ɩya 'kle nʋ. 18'Nyɩ ɩla leen, ɔ ya ‑awlɛ bhibhie, 'nyɩ ‑laagɔɔn ya 'nyu 'cintalɩ, 'nyɩ ‑dʋdʋa 'kʋ 'la gologololɩɩa ya tlʋ.
A gba ɩya maa ‑ɔ mlɔ 'lɛ na 'ka kwlacala
19Bholiecɩnyɩ, gbazɩ anyɩ sidiin, bhlo ‑ka ‑nʋawlɛa cɩ da tlʋbhalɩ 'nyɩ ɔ ‑ka mlɔ, 'nyɩ ma ka gba 'nyɩ ɔ ‑ka kwlacala na, 20a cibhlili lebhe ɔmɔa ‑ɔ gba 'lɛ 'nyɩ nyinyinʋnyɔ 'wlʋ 'lɛ ‑gugwiea 'kʋa ɔ mlɔlʋa 'lɛ na 'kʋ, 'nyɩ ɔ cala 'lɛ kwla na, ɔ yɔɔ 'kwɩ neen ‑sa. Na ɩ cɩ 'ka gba ɩya nyinyi ‑bhutukpa 'ka valɩɛ 'lɩ.
Currently Selected:
Zak 5: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.