Lobh 2
2
‑Kplɔkplɔ ‑Wugoa ya kwli
1Pantekɔtʋfɛtlɩa yaa ŋeni, 'nyɩ Zozii 'la gɩlɩnyaa* 'fɩan 'wlalɩa dabhlogbɩɩ 'wlu. 2'Kplookʋ, ‑laagɔa nɩkplaan ya neen gba le saa ‑pupolu 'kadie 'plɩ 'lɛ na, 'nyɩ ɩ ya ‑palʋa ma ‑kʋa 'lɛ ‑zɔn na, ʋla ‑lɩɩbhuoa nɩkplaan 'kɔsɔ. 3'Nyɩ ma ya ‑kosuvlevle 'lɩ, ʋ ya cɩsasalɩ 'nyɩ ʋ ya nclɔɔ nclɔɔ 'kʋ ‑gbɛ. 4Na, ‑Kplɔkplɔ ‑Wugoa* ya ma 'fɩan yeli 'nyɩ ma ya 'bhlɩ 'bhlɩ 'kʋ 'la wɔlɩ nyɩtɛlɩɛ bhɔ, saa 'Wugoa claa 'lɛ maa lebhe ma nyɩtɛ na.
5'Dɛ 'la clɩɩa nɩkplaan, Zifʋnyaa* ‑ɔ gʋgwla 'lɛ Laagɔ na, ya 'bhlɩa ‑tɛtɛa ‑ɩ ‑kʋ 'lɛ ‑laagɔzɔan na 'kʋ 'wlʋlʋ, 'nyɩ ma ‑kʋa Zolizalɛmʋdua nɩkplaan. 6Na, daa ma 'nu 'lɛ daa 'la neengbalɩɛa na, ‑alawlee ya 'wluwlalɩ 'nyɩ neen ya ncɛlɩa yɛ, sa nclɔɔ nclɔɔ 'nunua maa ɔ 'bhlɩwɔlɩa neen na. 7Nikpoo ya maa sla, ɩ ya maa ne kla, 'nyɩ ma cla lebhe: «Ncɛlɩ ‑naa 'fɩan ‑ɔ nyɩtɛ 'lɛ na, Galileenya ma 'ta 'lɛ ‑glɩ bha? 8Na, 'nsasa 'nyɩ ‑anyɩa ‑ɔ ‑kʋ 'lɛ ‑da na, nclɔɔ nclɔɔ 'nunua 'lɛ maa ɔ 'bhlɩwɔlɩa neen bha?
9Patɩnya, Mediinya ɩya Elamʋnya, Mezopotamii, Zudee, Kapadɔsʋ, Pɔɔn, Azii, 10Flizii, Panfilii, Ejibhiti ɩya Libiibhlɩa ‑ɩ mɛa 'lɛ Silɛnɩbhlɩa cɩ na, ɩla 'kʋ 'la ncɛlɩ, ɩya Wlɔmʋnyaa ‑ɔ ‑kʋ 'lɛ ‑wɔlʋ na, 11ncɛlɩ ‑naa ‑tɛtɛa, Zifʋnya, ɩya maa ‑ɔ 'ta 'lɛ Zifʋnya ‑glɩ 'nyɩ ‑ɔ gʋgwla 'lɛ Laagɔ na, Klɛtɩnya ɩya Aghlabʋnya, ‑anyɩa 'fɩan, nclɔɔ nclɔɔ 'nunu maa ɔ 'bhlɩwɔlɩa nɩkplaan Laagɔ 'la ‑jakajakagbɩa neen.» 12Nikpoo ‑slaa maa 'fɩan, 'nyɩ maa cibhlili 'taa 'lɛ saa ma 'kanɩa 'lɛ nʋnʋnʋ na, ma 'claclalɩa neen lebhe: «'Nsasa ɩmɩ ‑naa sasalɩa 'lɛ ‑zɔn bha?» 13‑Ma ‑anʋa nyaa 'nyɩ ma claa lebhe: «‑Diinvɛɛn ‑calɛ ‑ɛ ‑yelio 'lɛ maa.»
Pɩɛlɩ solu ‑alawleea
14Na, Pɩɛlɩ ya 'kʋbho, ɔya ‑daa lobhulobhunyaa* 'kʋgba bhloa, ɔ ya nɩkplaan ‑gaa 'nyɩ ɔ ya 'cla lebhe: «Zudeenyanyɩ ɩya anyɩa 'fɩan ‑ɔ ‑kʋ 'lɛ Zolizalɛmʋdua nɩkplaan na, a po wɔlɩa n cɩ 'ka 'lɛ anyɩ solu na 'nyukwliin ɩya a 'nu ɩmɩa ‑ɩ plɩ 'lɛ na. 15Ncɛlɩ ‑naa 'ta ka nʋ 'mla, saa a gugu 'lɛ na, ‑masa ‑zʋkpa 'la 'ŋwacɩ ‑nvɔɔna ‑tɛɛ ‑a ‑kʋ ka 'lɛ na. 16‑Ma ɩmɩa Laagɔnekʋnyɩtɛnyɔ* Zowɛlɩ nyɩtɛa 'lɛ na, ɩmɩ ‑ɩ glalɩ 'lɛ 'kʋ. 17Ɔ ya 'cla lebhe Laagɔ nabhe:
Leenbhɩalɩclɩɩa nɩkplaan,
n cɩ 'ka ncɛlɩa 'fɩan nɩkplaan 'na 'Wugoa zʋ.
Ala 'ciŋlʋcʋkwlɩa ɩya ala 'ciŋodicuoa
cɩ 'ka 'na nekʋnyɩtɛnya 'plɩ.
Wɔlɩ cɩ 'ka ala ncaanyɩgbɩaa 'ciinfutolu
ɩya ala ‑glɛɛglɛnyaa 'ka wɔlɩ 'claan 'lɩ.
18 ‑Ghɛɛ, 'dɛ 'la clɩɩ nɩkplaan,
n cɩ 'ka 'na lobhocuoa
ɩya 'na lobhoŋwlɛa nɩkplaan 'na 'Wugoa zʋ,
ɩya ma 'ka 'na nekʋnyɩtɛnya 'plɩ.
19 N cɩ 'ka nikpooslaslawɔlɩ nʋ, 'yɛpɩ ‑laagɔɔn,
ɩya ciinzizielɩlobholi, ‑wɔlʋ ‑dʋdʋa 'kʋ.
Ma cɩ 'ka ‑dolu, ‑kosu ɩya gbacʋ 'lɩ.
20 'Ylʋbhuoa cɩ 'ka 'tutu pla
ɩya cabhuoa 'ka ‑dolu kaci,
'fɩɔn ɩya ‑Kwlenyɔa 'la cɩclɩɩa, ɔla ‑clɩɩkadɩea
ɩya 'klʋagbaclɩɩa 'ka ŋeni.
21 Na, ncaatʋtʋʋntʋa ‑ɔ ‑cɩ ka 'lɛ
‑Kwlenyɔa 'la 'ŋlɩa la na,
ɔ cɩ gbʋʋnsalɩɛ 'lɩ.
22Izlayɛlɩnyanyɩ*, a po 'na niwɔlɩa 'nyukwliin. Anyɩ 'titi a -ci sɛɛ lebhe Nazalɛtɩnyɔ Zozii ‑glɩ 'lɛ nclɔɔa Laagɔ pala 'lɛ anyɩ na. Ɔmɔ ɔ 'plɩlɩ 'lɛ 'kʋ 'nyɩ ɔ ya 'lɛ anyɩ sidiin 'ciinzizielɩlobholi ɩya nikpooslaslawɔlɩ nʋnʋ 'nyɩ ɔ ya 'lɛ anyɩ ghledɩ pala. 23Nclɔɔ ‑naa, a yɔɔ ‑sa 'nyɩ a yɔɔ maa ‑ɔla 'nyi yi 'ta 'lɛ Laagɔ na wlɩɩn 'bhlalɩ, dabhlalɩsua 'ciin, saa Laagɔ, ‑ɔ ‑ci 'lɛ ‑tɛtɛa 'fɩan tooto na, zʋa 'mɩɩ 'lɛ kpo 'kʋ na. 24‑Ma, Laagɔ yɔɔ 'kwɩɩnkʋbho. Ɔ yɔɔ 'kwɩ 'la 'kwlɩbhɩɛa nɩkplaan ‑sa, sa ɔ cɩ 'taa 'kwɩ 'la ‑kwleliea ‑zɔn ‑to na. 25Ɔla wɔlɩ Daviti nyɩtɛa 'lɛ lebhe:
N ‑jlɛa clɩɩa 'fɩan, ‑Kwlenyɔ ncɩ 'kʋklʋʋn,
ɔ ‑kʋʋn 'lipasɔ 'kʋ ɩya n 'la ka sɛ bhli.
26 Dɛ 'na pɔlɛa nʋ 'lɛ ‑pɔpʋɛ,
'nyɩ 'na nea bhlɩ 'lɛ pɔlɛkʋmɛnɔmɛnɔlʋ.
'Nyɩ 'na 'nyɛkɛa 'titio,
pɔlɛkʋtɛlɔ nɩkplaan ɛ cɩ 'ka 'lɛ nyɔkwɛlɩ.
27 ‑Kwlenyɔ, ‑n cɩ 'ta 'na 'wugoa 'kuduku te,
‑n cɩ 'ta ‑naa ‑kplɔkplɔnyɔa 'cintalɩ
ɩya ɔ 'ka ‑gluu zɛlɩ.
28 ‑N yaan jabhʋa 'la ‑gugoa pala,
‑n -cɩ kaan pɔlɛkʋmɛnɔ yeli, ‑naa ‑deliin.
29Bholiecɩnyɩ, ɩ ‑fata lebhe n solui anyɩ 'kpataa. ‑A tokadɔ Daviti ya 'ku, ma yɔɔ ‑gluu zʋ 'nyɩ ‑yaka, ɔla lesua ‑kʋ ka ‑azla ‑anyɩ sidiin. 30‑Ma, ɔ ‑glɩa Laagɔnekʋnyɩtɛnyɔ*, 'nyɩ ɔ ‑cia lebhe Laagɔ ya ta lebhe ɔ cɩ 'kaa gba ɩya ɔla valɩnɩkplaa nɩkplaan 'la nclɔɔ 'ka ɔla ‑kwlekpoa 'kʋ sakʋ. 31Na, Klisi 'la 'kwɩɩnkʋbhuea ɔ 'lɩlɩ 'lɛ 'koonko 'nyɩ ɔla wɔlɩ ɔ nyɩtɛ 'lɛ lebhe Laagɔ 'tɔɔ 'kuduku te ɩya ɔla 'nyɛkɛa 'ka ‑gluu zɛlɩ. 32Zozii ‑naa, Laagɔ yɔɔ 'kwɩɩnkʋbho 'nyɩ ‑anyɩa 'fɩan ‑lio ɩla ‑danʋfʋɛ. 33Laagɔ yɔɔ 'kʋto, ɔla 'lɩpasɔa 'kʋ. Toa yɔɔ ‑Kplɔkplɔ ‑Wugoa* ɔ talɩa 'lɛ ‑ndanyɩ 'kʋ na 'nyɩ, 'nyɩ ɔ yʋʋ 'lɛ ‑anyɩ nikadieen 'nyɩ, ʋla nʋnʋgbɩa a ‑jlɛ 'lɛ 'nyɩ a 'nu 'lɛ. 34Daviti 'ta ‑laagɔɔn ‑gblaa, 'bhlɩmɔɔn, ɔ ya 'cla lebhe:
‑Kwlenyɔ ya 'na ‑Kwlenyɔa 'cla lebhe:
Kʋʋn 'lipasɔ 'kʋ sa,
35 ɩya n 'ka ‑naa ‑zɔbhɛlɩgbanyaa ‑naa kplikʋgbɛlʋʋ ple.
36Izlayɛlɩnyanyɩ, 'naa a cibhlili sɛɛ lebhe Zozii ‑naa anyɩ a bho 'lɛ dabhlalɩsua 'ciin na, ɔmɔ Laagɔ ple 'lɛ ‑Kwlenyɔ ɩya ɔla ‑Sasanyɔa.»
Ncɛlɩ ‑tabhli ‑mɔta ya kwlacala
37Ncɛlɩa 'nu 'lɛ wɔlɩ ‑naa na, mala wɔɔgugwiea ya gblogblolu 'nyɩ ma ya Pɩɛlɩ ɩya ‑daa lobhulobhunyaa* neencla lebhe: «Bholiecɩnyɩ, 'lɩsaa ‑a -cɩ kanɩ 'lɛ nʋ bha?» 38Pɩɛlɩ ya maa neenŋonu lebhe: «A cala kwla. 'Naa Zozi Klisi 'la 'ŋlɩa nɩkplaan, nclɔɔ nclɔɔ gba ɩya ma zʋɔ 'nyu 'wlu, ɔla nyinyia 'ka valɩɛ 'lɩ ɩya a 'ka ‑Kplɔkplɔ ‑Wugoa* 'la 'nanɩa 'lɩ. 39Sa, anyɩ ‑ndanyɩa ‑kʋ 'lɛ 'nyɩ ɩ ‑nyɩɔ 'lɛ, aya ala 'cuoa ɩya maa ‑tɛtɛa ‑ɔ ‑kʋ 'lɛ 'koonko na, saa mala zuloa cɩ 'lɛ kʋkʋlʋ 'nyɩ ‑Kwlenyɔa cɩ 'lɛ maa la na.» 40Pɩɛlɩ ya ‑awlɛ maa wɔlɩ ‑gbɔɔn solu. Ɔ zʋa maa flɩɩn ɩya 'tɛtɩɩn 'nyɩ ɔ 'cla lebhe: «Aya ‑zɔkpaa ‑naa ‑a ‑nyumo 'lɛ na ‑sasalɩ cɩ ɩya a ŋonu a 'ma gbʋʋnsalɩɛa 'la Dɩnanɩa*.» 41Maa ‑ɔ ŋonu 'lɛ 'nyɩ ‑ɔ 'ma 'lɛ ɔla niwɔlɩa na, ya 'nyuwluzʋlɩɛ 'lɩ 'nyɩ 'dɛ 'la clɩɩa 'kʋ, ncɛlɩa ‑ɔ bhlili 'lɛ maa nɩkplaan na, cɩa ‑sa ncaatabhli ‑mɔta 'wlʋ.
Klisi 'la ‑bɛkagɩlɩnyaa ‑glɩa bhlo
42Ma via ‑nwɔ 'nyɩ ma poa lobhulobhunyaa 'la cacawɔlɩa 'nyukwliin. Ma ‑kʋa nebhlo bholiecɩ 'bhisa, ma lilia nebhlo#2.42 Ma ‑ka lilɩɛ bhɩalɩ na, ma li ‑kplɔkplɔnyɩa ‑masɛɛ. 'nyɩ ma bhibhielia 'lɛ nebhlo. 43Nikpooslaslawɔlɩa ɩya 'ciinzizielɩlobholi ‑bhutukpaa Laagɔ 'plɩlɩ lobhulobhunyaa* 'kʋ 'nyɩ ɔ 'nʋ 'lɛ na, gbaa na ɔla zʋlɩɛ ‑yelioa ncɛlɩa 'fɩan. 44Maa 'fɩan ‑ɔ zʋa 'lɛ mala pɔɔtɛtɛa Zozii 'kʋ na ‑glɩa bhlo, 'nyɩ ma zʋa mala lɩɩa ‑tɛtɛa nebhlo. 45Ma zʋa mala 'nanɩa ɩya mala kalɩkalɩlɩɩa 'pɛlʋ 'nyɩ ma polia 'lɛ ɩla 'dalaa, lʋʋa nclɔɔ nclɔɔ ‑miea 'lɛ na 'la 'sasʋʋn. 46Ma 'wlalɩa pɔlɛ 'kʋ, 'nyɩ clɩɩa 'fɩan, ma via 'lɛ ‑nwɔ 'nyɩ ma mʋa 'lɛ Laagɔpaakadiea* ‑zɔn. Ma lalalɩa 'slia nɩkplaan nyɩ 'kʋ, 'nyɩ ma lilia 'lɛ nebhlo, pɔlɛkʋmɛnɔɔn ɩya pɔlɛ bhloon. 47Ma woa Laagɔ ‑evli 'nyɩ ncɛlɩa 'fɩan ‑waa 'lɛ mala wɔlɩ. 'Nyɩ clɩɩ 'fɩan ‑Kwlenyɔa palɩa 'lɛ maa ‑ɔ lɩa 'lɛ gbʋʋnsalɩɛ na, ‑kandea nɩkplaan.
Currently Selected:
Lobh 2: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.