2 Tes 1
1
‑Ayopalɩɛ
1Silivɛɛn, Timoti ɩya ‑amʋ Pɔlʋ, ‑anyɩ ‑ɔ zie 'lɛ anyɩ Tesalonikidua 'kʋ 'la ‑laagɔnɩkplaa -a ‑kʋ 'lɛ ‑a To Laagɔ ɩya ‑Kwlenyɔ Zozi Klisi nɩkplaan na. 2'Naa To Laagɔ ɩya ‑Kwlenyɔ Zozi Klisi palɩ anyɩ 'nyu ɩya ma 'nyɩ anyɩ pupue.
‑Kwlenyɔ cɩ 'ka ‑laagɔzɔan 'tɩtɩpla
3Bholiecɩnyɩ, ɩ ‑fata lebhe ‑a bhɔlʋ Laagɔ clɩɩa 'fɩan ‑tɛtɛa ala gbʋ. Sɛɛ ɩ ‑fata 'lɛ lebhe ‑a nʋ, ‑ofi lebhe ala pɔɔtɛtɛa zʋlʋzʋlʋlʋ 'kʋ 'nyɩ ‑walʋa anyɩa 'fɩan ‑wawalɩ 'lɛ na, ʋmʋ ‑ma, ʋ zʋlʋzʋlʋlʋ 'kʋ clɩɩa 'fɩan ‑tɛtɛa. 4Ɩla gbʋ 'kʋ, dɛ Laagɔ 'la gʋgwlakandia sidiin, ‑a 'palɩ 'lɛ anyɩ -bliin, ‑ofi lebhe a 'nylugo kpaan gbaylɩsalɩɛa sidiin 'nyɩ 'kwlɩbhɩɛa 'fɩan a lɩ 'lɛ na, ala pɔɔtɛtɛa ‑kʋ ka ‑azla ɛla daa.
5Ɩ ‑glɩ Laagɔ 'la 'tɩtɩplalɩɛ ‑ɩ 'nylugolu 'lɛ 'kʋ na 'la cibhlilida, sa 'kwlɩa ‑ɩ bhɩa 'lɛ anyɩ na, ɩla 'wlukodaa ‑glɩ 'lɛ lebhe Laagɔ cɩ 'ka 'lɩ lebhe aya ɔla Nyɩbhɛlʋdua* 'la gbʋa 'kwlɩa bhɩa 'lɛ anyɩ na, ‑fata. 6Laagɔ 'nylugolu 'kʋ: Ɔ cɩ 'ka maa ‑ɔ bhɩa 'lɛ anyɩ 'kwlɩ na, gbaylɩa ma sa 'lɛ anyɩ na, ɩ 'mʋsʋʋn 'la gbaylɩ ‑samʋ, 7ɩya ɔ 'ka anyɩa 'kwlɩ bhɩa 'lɛ na a ‑ma pɔlɛɛnbhlilie 'nyɩ. Ɩmɩ ‑naa, daa ‑Kwlenyɔ Zozi ɔya ɔla 'tɛtɩkalɩ 'bhlaandleecɩa* cɩ 'ka 'lɛ ‑laagɔa nɩkplaan futolu na, dɛ ɩ cɩ 'ka 'lɛ ŋeni. 8Ɔ cɩ 'ka vʋtavʋtakosu sidiin cili ɩya ɔ 'ka maa ‑ɔ 'ta 'lɛ Laagɔ ‑ci 'nyɩ ‑ɔ 'plɩlɩ 'ta 'lɛ ‑ala ‑Kwlenyɔ Zozi 'la Dɩnanɩa* 'kʋ na, gbaylɩsa. 9Ma cɩ 'ka maa ‑Kwlenyɔa ɩya ɔla 'klʋagbaa 'la 'tɛtɩa cɩ da tlʋbhalɩ ɩya ma 'ka gbaylɩsalɩɛa ‑ɩ 'ta 'lɛ 'wluzɔnbhɩalɩda ‑ka na 'lɩ. 10Daa ɔ cɩ 'ka 'lɛ 'dɛ la clɩɩa 'kʋ ci ɩya maa 'fɩan -ɔ ‑glɩ 'lɛ ɔ 'nʋa na 'kɔɔ 'lɛ 'klʋgba ɩya nikpoo 'ka 'lɛ maa sla na, ma cɩ 'ka anyɩ ‑ma, maa sidiin zɛlɩmʋ, sa a ya wɔlɩa ‑a solu 'lɛ anyɩ na, ‑nʋawlɛ la na.
11Ɩla gbʋ, dɛ ‑a bhibhie 'lɛ clɩɩa 'fɩan ala da, le ‑ala Laagɔ gba ɩya a nʋ ɩmɩa 'kʋa ɔ la 'lɛ anyɩ na. ‑A 'clalɩ lebhe ɔla 'tɛtɩa nɩkplaan ɔ klalɩ anyɩ ɩya a nʋ 'nanɩa a 'matɩ 'lɛ lebhe a 'ka nʋ na ɩya ɔ gba ala pɔɔtɛtɛa nʋ ɛla lobholia. 12‑Sa, a cɩ 'ka 'lɛ ala ‑Kwlenyɔ Zozii 'la 'ŋlɩa 'klʋgba ɩya ɔmɔ ‑ma ɔ 'ka anyɩ 'klʋgba. Ɩmɩ ‑naa ‑glɩ ‑ala Laagɔ ɩya ‑Kwlenyɔ Zozi Klisi 'la ‑walʋa 'la nʋnʋgbɩ.
Currently Selected:
2 Tes 1: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.