2 Kolt 1
1
‑Ayopalɩɛ
1‑Amʋ Pɔlʋ, n -glɩ Zozi Klisi 'la lobhulobhunyɔ* Laagɔ 'la pɔɔsanʋlɩɛa nɩkplaan. N ‑ya ‑a bholi Timoti, ‑anyɩ ‑ɔ zie 'lɛ anyɩ Kolɛntɩdua 'kʋ 'la ‑laagɔnɩkplaa ɩya ‑kplɔkplɔnyaa 'fɩan ‑ɔ ‑kʋ 'lɛ Akayiibhlɩa ‑tɛtɛa 'kʋ na. 2'Naa 'nyupalɩɛ ɩya pupuea ‑ɩ 'wlʋlʋ 'lɛ ‑a To Laagɔ ɩya ‑Kwlenyɔ Zozi Klisi cɩ na kʋ anyɩ 'kʋ.
Pɔlʋ bhɔlʋ Laagɔ
3'Klʋagba ŋeni Laagɔ, ala ‑Kwlenyɔ Zozi Klisi To, ŋaazɩɩnlɩlɩɛ To ɩya pɔlɛɛnzʋlɩɛa ‑tɛtɛa 'la Laagɔ. 4Ɔ zʋ ‑anyɩ pɔlɛɛn ‑ala 'kwlɩbhɩɛa ‑tɛtɛa nɩkplaan le ‑a ka mino ɩya anyɩ ‑ma, ‑a ka maa ‑tɛtɛa 'kwlɩ bhɩa 'lɛ pɔlɛɛnzʋmʋ, pɔlɛɛnzʋlɩɛa ‑a 'lɩlɩɔ wlɩɩn na 'la gbʋ. 5‑Masa, saa 'kwlɩa ‑ɩ bhɩa 'lɛ Klisi, ɩ bhɩamʋ 'lɛ ‑anyɩ na, 'sɛtɛɛ bhlogbɩɩ pɔlɛɛnzʋlɩɛa ‑a 'lɩlɩ 'lɛ Klisi nɩkplaan na, ɩ zʋlʋ 'lɛ 'kʋ. 6'Kwlɩ bhɩa ‑anyɩ bha? Ala pɔlɛɛnzʋlɩɛ ɩya ala gbʋʋnsalɩɛ 'la gbʋ, ɩ bhɩa 'lɛ ‑anyɩ. ‑A lɩ pɔlɛɛnzʋlɩɛ bha? Ala pɔlɛɛnzʋlɩɛa ‑ɩ ‑cɩ ka 'lɛ gba ɩya 'kwlɩa ‑ɩ bhɩa 'lɛ ‑anyɩ, ɩ ‑ka anyɩ bhɩada 'kʋ na, anyɩ ‑ma, a 'ka 'lɛ pɔɔklalɩɛ mino. 7'Nyɩ ‑a 'tɛlɩ anyɩ pɔlɛ ‑gbɔɔn. Sa, a ya 'lɛ ŋonu le aya ‑anyɩsɔ cɩ ‑ala 'kwlɩbhɩɛa 'kʋ 'wlalɩ na, ‑a ‑ci lebhe aya ‑anyɩsɔ cɩ ‑ala pɔlɛɛnzʋlɩɛa 'kʋwlalɩ.
8Bholiecɩnyɩ, ‑a 'ta ‑wa lebhe ‑a ka anyɩ wɔlɩ ‑naa 'la 'nyukwlibhuun te: 'Kwlɩa ‑ɩ bhɩalɩ 'lɛ ‑anyɩ Aziibhlɩa 'kʋ na, ɩ ya ‑anyɩ 'kʋkpafɩalɩ ‑gbɔɔn. Ɩ ‑ziloa ‑ala 'tɛtɩa 'kʋ 'nyɩ ‑a 'taanɩa pɔɔtɛtɛ ‑ylɛylɛ ‑ka le ‑a cɩa kʋ. 9‑Ghɛɛ, ‑anyɩ 'titi, a ya 'lɩ lebhe ‑ala 'kwɩa 'la da yaa 'lɛ ŋeni. Ka ɩ 'plɩ 'lɛ sɛɛ le ‑a 'la kaanɩa acɩ ‑delikʋtɛbhalɩ, ‑ma ‑a kanɩ Laagɔ bhlo, ‑ɔ bho 'lɛ 'ku 'kwɩɩn 'kʋ na, ‑ala ‑delikʋtɛlɔa 'kʋ zʋ. 10Ɔmɔ ‑ɔ ‑sa 'lɛ ‑anyɩ 'kwɩɩ ‑naa neen 'nyɩ ɔ cɩ 'ka ‑awlɛɛ anyɩ neensa. Ɔmɔ nɩkplaan ‑a ‑zʋɔ 'lɛ ‑ala pɔlɛkʋtɛlɔa. Ɔ cɩ 'ka ‑awlɛɛ ‑anyɩ neensa. 11A ‑ka ‑ala da bhibhieda ‑kʋ na, lobholi ‑naa anyɩ ‑ma a nʋ 'lɛ. ‑Sa, ŋaazɩɩnlɩlɩɛa ‑naa, ‑a 'lɩlɩ 'lɛ bhibhielia ncaabhutukpa nʋ 'lɛ ‑ala da nɩkplaan na, ɩ cɩ 'ka gba ɩya ncaabhutukpa 'ka ‑ala gbʋ Laagɔ bhɔlʋ.
Pɔlʋ ya ɔla lowluunmʋlɩɛa ‑daa 'kʋ ‑sa
12Ɩmɩa nɩkplaan ‑a kpolili 'lɛ na, ɩmɩ ‑ɩ ‑glɩ 'lɛ ‑danʋfʋɛ ‑naa ‑ala wɔɔgugwiea li 'lɛ na. ‑A ya ‑laagɔzɔan ɩya anyɩ 'tasɩɩ sidiin Laagɔ 'la ‑ncɩdʋdʋkʋlalɩɛa ɩya ‑kplɔlɩɛa nɩkplaan namʋnʋ, ‑n 'ta le ncaadɩgalɩ 'la cibhliliea nɩkplaan, ‑ma Laagɔ 'la klalɩlɩɛa nɩkplaan. 13Na, ‑a zie 'ta anyɩ ‑buun -wɔlɩ, ‑ma ɩmɩa ‑tɛɛa, a ‑ka 'lɛ zɛlɩ 'nyɩ a cɩ 'ka 'lɛ 'nu na. 'Nyɩ n ‑ka pɔɔtɛtɛ lebhe a cɩ 'ka ‑anyɩ 'nanɩ neen 'nu, 14‑masa 'kle 'kʋ a 'nunua 'lɛ ‑anyɩ neen na. ‑A kpolili anyɩ 'kʋ le saa ‑anyɩ ‑ma a cɩ 'ka 'lɛ anyɩ nɩkplaan kpolili ‑Kwlɛnyɔ Zozii 'la ciclɩɩa 'kʋ na. 15Ɩmɩ ‑naa 'la ‑delikʋtɛlɔa nɩkplaan, n yaa wabhaa le n 'kaa anyɩ 'bhlɩ 'plɩlɩ ‑bɛɛ ɩya ɩ 'ka gba a 'kaa ‑mɔsɔda Laagɔ 'la 'nyupalɩɛa 'lɩ. 16Ɩla leen, n 'kanɩa anyɩ 'bhlɩ 'wlʋlʋ, n 'ka Masedʋanɩbhlɩa 'kʋ mʋ ɩya n ‑kaa 'yɛpɩ 'wlʋ na, n 'kaa a 'bhlɩ cɔlɔ ɩya a 'kaa ‑tɛtɛa 'fɩan ‑ɩ ‑fata 'lɛ le a nʋ ɩya n 'ka Zudeebhlɩa 'kʋ mʋ na, nʋ. 17Na, ka n 'ta 'lɛ ɩmɩ ‑naa 'nanɩ bhɔsʋa 'nyɩ n yɩɩ 'lɛ kpo 'kʋ zʋ bha? ‑Aana 'na wɔlɩa n zʋ 'lɛ kpo 'kʋ na, ncaawɔɔgugwiea bhlobhlo ɩ ‑glɩ 'lɛ ɩya ‑ghɛɛ ‑ya ‑wɔɔ 'kaan 'lɛ nɩkplaan 'cakalɩ bha? 18‑A cɩ Laagɔ ‑delikʋtɛbhalɩ. ‑Ala wɔlɩa, ‑a solu 'lɛ anyɩ na, ‑ghɛɛ ɩya ‑wɔɔ 'ta 'cakalɩɔ. 19Sa Laagɔ 'la 'Cʋa ‑ɔ ‑glɩ 'lɛ Zozi Klisi 'nyɩ Silivɛɛn, Timoti ɩya ‑amʋ 'titi plici 'lɛ anyɩ 'bhlɩ na, ɔ 'ta ‑ghɛɛ ɩya ‑wɔɔ ‑glɩ, ‑ma ‑ghɛɛ bhlobhlo ‑tɛɛ ɔ ‑glɩ 'lɛ 'lʋkʋlʋkʋ. 20‑Masa, ‑ndanyɩa ‑tɛtɛa Laagɔ ta 'lɛ na, ɔmɔ nɩkplaan ɩ ‑glɩlɩ 'lɛ ‑ghɛɛ. 'Nyɩ, ɔmɔ 'kʋ ‑a 'plɩlɩ 'lɛ 'nyɩ ‑a cla 'lɛ Laagɔ le «ɩ kʋ sɛɛ,» ɔla 'klʋagba 'la gbʋ. 21Ɔmɔa ‑ɔ zʋ 'lɛ ‑aya ‑anyɩ 'tɛtɩɩn Klisi nɩkplaan 'nyɩ ‑ɔ ‑sa 'lɛ ‑anyɩ na, ɔmɔ ‑ɔ ‑glɩ 'lɛ Laagɔ, 22ɔmɔ ‑ɔ zʋ 'lɛ ‑anyɩ ɔla cibhlidaa cɩ 'nyɩ ɔ ya 'lɛ ‑Kplɔkplɔ ‑Wugoa* -ala pɔlɩa nɩkplaan ‑awobha zʋ. 23Na, n ma Laagɔ ‑danʋfʋɛ 'kʋ 'nyɩ n zʋ 'na jabhʋa ‑awobha. N 'la ka 'lɛ anyɩ 'kwlɩbhɩɛ 'nyɩ na, dɛ n 'ta 'lɛ Kolɛntɩdua 'kʋ cɔlɔ. 24‑N 'ta le ‑a ka anyɩ ɩmɩa 'la pɔɔtɛtɛa a cɩ 'ka 'lɛ kalɩ na neengʋalɩ, ala pɔɔtɛtɛa 'ghli, ‑ma ‑aya anyɩsɔ 'ka ala pɔlɛkʋmɛnɔa 'la lobholia nebhlo nʋnʋ, sa pɔɔtɛtɛa 'la gbazɔ, a 'nylugoluka kpaan.
Currently Selected:
2 Kolt 1: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.