2 Kolt 2
2
1‑Amʋ, n ya ncɩ 'cla lebhe: N cɩ 'ta anyɩ 'bhlɩ cɔlɔ 'cɩɩnkalɔ nɩkplaan. 2Sa, n ‑ka anyɩ cɩɩnkalɔ nɩkplaan zʋ na, ncaasaa ‑ɔ ‑cɩ kanɩɩn 'lɛ pɔlɛkʋmɛnɔɔn zʋ bha? Ɩ ‑ka ‑kʋ le ‑n 'ta ɔmɔa n cɩ 'kaa 'lɛ cɩɩnkalɔa nɩkplaan zʋ na. 3Na, wɔlɩa 'la gbʋa n zie 'lɛ anyɩ na, ɩmɩ ‑ɩ ‑glɩ 'lɛ lebhe n 'ta ‑wa lebhe n ‑kaa anyɩ 'bhlɩ ŋeni na, maa ‑anʋa ‑ɔ -cɩ ka ‑amʋa 'lɛ pɔlɛkʋmɛnɔɔn zʋ na, ma zʋʋn cɩɩnkalɔɔn. 'Nyɩ, ‑ɔ ‑glɩ 'lɛ anyɩ na, n ‑ka pɔɔtɛtɛ lebhe 'na pɔlɛkʋmɛnɔ ‑glɩmʋ anyɩ 'fɩan 'la pɔlɛkʋmɛnɔ. 4‑Awlɛ 'kwlɩbhɩɛ, cɩɩnkalɔ ɩya 'mɩɔ ‑bhutukpa nɩkplaan, n zieli 'lɛ anyɩ, ‑n 'ta le n 'ka anyɩ 'cɩɩnkalɔ nɩkplaan zʋ, ‑ma a 'ka cibhlili lebhe ala ‑walʋa ‑ʋ ‑kʋʋn 'lɛ nɩkplaan na, ʋ 'ta ‑tɩpa.
Pɔlʋ va ɔmɔa ‑ɔ tʋ 'lɛ ɔla ‑ngasɩ na
5Nclɔɔ ‑ka nclɔɔ cɩɩnkalɔɔn zʋ na, n 'ta ‑amʋ bhlo ɔ 'ta 'lɛ 'cɩɩnkalɔa nɩkplaan zʋ, ‑ma anyɩa 'fɩan. ‑Ma, ‑a 'la zubholia wɔlɩ. 6'Sɛ 'la nclɔɔa, ncaabhutukpa ‑kɔɔ 'bɩ sa na ɩ nanɩ. 7Dɛ, ɩ nanɩ 'lɛ le a vɔɔ ɩya a zʋɔ pɔlɛɛn, ɔ 'la ka sɛ cɩɩnkalɔ 'kadie 'lɩ. 8'Sɛ 'la gbʋ na, n 'clalɩ anyɩ le a palɔɔ le a ‑wɔɔ. 9'Lɩka wɔlɩa 'la gbʋa n zie 'lɛ anyɩ na. Ka n ‑wa 'lɛ le n 'ka 'lɩ ɩ ‑ka ‑kʋ le a ‑ka ka 'na zʋlɩɛ ‑tɛtɛa 'fɩan nɩkplaan na. 10Na, ɩmɩa a ya 'lɛ nclɔɔ va na, ‑amʋ ‑ma n yɔɔ mɩ va! 'Nyɩ, ɩmɩa n ya 'lɛ nclɔɔ va na, ɩ ‑ka ‑kʋ le n ya nclɔɔ wɔlɩ va na, ala gbʋ n nʋ 'lɛ sɛɛ, Klisi 'la 'klʋʋn, 11ɩya Sataan* 'la ka sɛ ‑anyɩ daan 'lɩ. Sa, -a ‑ci ɔla wɔɔgugwie na.
Pɔlʋ ple pɔlɛ
12Na, n ya Tloasɩdua 'kʋ ŋeni le n ka Klisi 'la Dɩnanɩa* plici. 'Nyɩ, ‑Kwlenyɔ yaan 'yɛpɩ gbine kalɩ vuun. 13'Bhlɩmɔɔn, 'na 'wugoa 'taa 'cɩɩ ‑kʋ, sa n 'ta 'yɛpɩ n bholi Titi ŋeni na. Ɩla gbʋ na, n ya maa 'kaze 'pa 'nyɩ n ya 'lɛ 'plɩ n ya 'lɛ Masedʋanɩbhlɩa 'kʋ mʋ.
14‑Ma 'naa bhɔlʋɛ ŋeni Laagɔ, ‑ɔ 'plɩlɩ 'lɛ Klisi 'kʋ, 'nyɩ ɔ zʋmʋ 'lɛ ‑anyɩ clɩɩa 'fɩan ɔla ‑sɩalɩɛa nɩkplaan, 'nyɩ ɔ 'plɩlɩ 'lɛ ‑anyɩ 'kʋ, 'nyɩ ɔ dlolu 'lɛ ɔla cibhlililiea 'la 'ŋɔnɔa daa ‑tɛtɛa na. 15‑Masa, Laagɔ 'la da, ‑anyɩ ‑glɩ 'lɛ Klisi 'la 'ŋɔnɔ 'nanʋa, maa ‑ɔ 'lɩ 'lɛ gbʋʋnsalɩɛ ɩya maa ‑ɔ ‑mlɔɔ 'lɛ na 'la gbʋ. 16‑Anʋa 'la da, ʋ ‑glɩ 'kwɩ 'la ŋlɛa ‑ɛ fa 'lɛ 'kwɩɩn na, ‑ma ‑anʋa bhlo 'la da, ʋ ‑glɩ jabhʋ 'la 'ŋɔnɔa ‑ʋ lamʋ 'lɛ jabhʋa na. 'Nyɩ ncaasaa, ‑ɔ ‑cɩ 'kaa 'lɛ ‑sa 'la lobholi ‑naa nʋlɩɛ mino bha? 17Na, ‑anyɩ ‑a 'ta ‑kʋ le ncɛlɩa ‑anʋa ‑ɔ ylalɩ 'lɛ Laagɔ 'la wɔɔnyɩtʋa 'kɔsɛ cɩ na 'bhisa. ‑Ma, ‑nʋawlɛ nɩkplaan, ‑a nyɩtɛlɩ 'lɛ Laagɔ ne 'kʋ, Laagɔ 'ci 'kʋ, ɩya Klisi nɩkplaan.
Currently Selected:
2 Kolt 2: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.