1 Kolt 2
2
Pɔlʋ plici Laagɔ 'la ‑Sasanyɔa
1Bholiecɩnyɩ, daa n ci 'lɛ anyɩ 'bhlɩ na, ‑n 'ta neenmɛnɔ ‑aana dɩgalɩ 'kadɩ n 'ta 'lɛ 'ma ɩya n 'ka 'lɛ anyɩ Laagɔ 'la wɔlɩa ‑ɩ ‑zizieoa 'lɛ na solu. 2Sa, daa n ‑kʋa 'lɛ anyɩ sidiin na, n ya ncɩ 'cla lebhe n 'ta ‑buun wɔlɩ ‑ylɛylɛ ‑ci, ‑n 'ta le Zozi Klisi, Zozi Klisia ma bho 'lɛ dabhlalɩsua 'ciin na, ɔla wɔlɩa ‑tɛɛ na. 3‑Awlɛ, n ya ncɩ ‑dʋdʋ 'kʋ ‑la, pɔɔvʋ bhlaa ‑amʋa 'nyɩ n tɩtɛlɩa. 4'Na wɔɔnyɩtʋa ɩya 'na pliciea ‑ya dɩgalɩwɔlɩa ‑ɩ kaci 'lɛ ncɛlɩ 'la wɔɔgugwie na, 'taa wɔlɩ -ylɛylɛ ‑kalɩ, ‑ma ɩ ‑glɩa 'Wugoa 'la 'tɛtɩa 'la ghleda, 5ɩya ala pɔɔtɛtɛa 'la ka ncɛlɩ 'la dɩgalɩa 'kʋ 'slalɩɔ, ‑ma ɛ 'ka Laagɔ 'la 'tɛtɩa 'kʋ 'slalɩɔ.
Laagɔ 'la dɩgalɩa
6'Bhlɩmɔɔn, dɩgalɩ 'la wɔlɩ ‑a solu 'lɛ maa ‑ɔ ya 'lɛ mala pɔɔtɛtɛa nɩkplaan ‑glɛɛlɩ na. 'Nyɩ dɩgalɩ ‑naa, ɩ 'ta ‑laagɔzɔn ‑naa 'la dɩgalɩ ‑glɩ, 'nyɩ ɩ 'ta ‑awlɛ bhlɛsʋʋn ‑naa 'la ‑kwletocɩa ‑ɔ ‑cɩ ka 'lɛ mlɔ na 'la dɩgalɩ ‑glɩ. 7‑Ma, Laagɔ 'la dɩgalɩa ‑ɩ ‑zizieo 'lɛ na, ɩla wɔlɩ a nyɩtɛ 'lɛ, ɩmɩa ‑laagɔzɔan 'la bhɔdaa tooto, Laagɔ bhɔsʋa 'lɛ ‑ala 'klʋagbaa 'la gbʋ na. 8Dɩgalɩ ‑naa, ‑laagɔzɔn ‑naa 'la ‑kwletocɩa, bhlogbɩɩ 'tɩɩ cibhlili, sa ɩ ‑kaa ‑kʋ le ma yaa 'mɩɩ cibhlili na, maa cɩ 'taa ‑Kwlenyɔa 'klʋagba ‑yelio 'lɛ na dabhlalɩsu 'ciin bho. 9‑Masa, ɩ ‑zieo lebhe:
Ɩmɩa 'ci 'ta 'ka ‑azla 'lɛ 'lɩ,
'nyukwli 'ta 'ka ‑azla 'lɛ 'nu,
'nyɩ nclɔɔ 'la pɔlɛ 'ta ‑ka ‑azla 'lɛ gugu na,
ɩmɩ ‑naa ‑tɛtɛa Laagɔ bhɔsʋa 'lɛ,
maa ‑ɔ ‑wɔɔ 'lɛ na 'la gbʋ.
10Na, ‑anyɩ Laagɔ 'plɩlɩ 'lɛ 'Wugoa 'kʋ 'nyɩ ɔ ya 'lɛ dɩgalɩ ‑naa pala. Sa 'Wugoa ‑jlɛ ‑tɛtɛa 'fɩan, Laagɔ 'la wɔlɩa ‑ɩ -zizieo 'lɛ 'titio, ʋ ‑jlɩɩ. 11'Nyɩ ncɛlɩ sidiin, ɩ ‑ka ‑kʋ le ‑n 'ta nclɔɔ 'la 'wugoa ‑ʋ ‑kʋɔ 'lɛ nɩkplaan na bhlogbɩɩ ‑tɛɛ na, ncaasaa 'titi ‑ɔ ‑cia 'lɛ nclɔɔ 'la nɩkplaan 'la wɔlɩ bha? 'Sɛtɛɛ bhlogbɩɩ, ɩmɩa ‑ɩ ‑kʋ 'lɛ Laagɔ nɩkplaan na, nclɔɔ ‑ylɛylɛ 'tɩɩ ‑ci, n 'ta le Laagɔ 'la 'Wugoa bhlogbɩɩ ‑tɛɛ na. 12‑Anyɩ, ‑n 'ta ‑laagɔzɔan 'la 'wugoa ‑a 'ta 'lɛ 'lɩ, ‑ma 'Wugoa ‑ʋ 'wlʋlʋ 'lɛ Laagɔ wlɩɩn na, ʋmʋ ‑a 'lɩ 'lɛ le ‑a ka lɩɩa Laagɔ va 'lɛ ‑anyɩ na cibhlili. 13'Nyɩ ‑n 'ta ncaadɩgalɩ 'la cacawɔlɩ nɩkplaan ‑a nyɩtɛlɩ 'tɩɩ 'lɛ, ‑ma ɩmɩa 'Wugoa ca 'lɛ nɩkplaan. Na, ɩmɩa ‑ɩ ‑glɩ 'lɛ 'Wugoa 'la wɔlɩ na, 'Wugoa 'la niwɔlɩ nɩkplaan ‑a nyɩtɛlɩɩ 'lɛ.
14Nclɔɔa ‑ɔ ‑kʋlʋ 'lɛ ɔla wɔɔgugwiea bhlobhlo na, 'ɔ 'ma 'ta Laagɔ 'la 'Wugoa 'la wɔlɩ. Ɩ ‑glɩ ɔla da pɔɔbhlagbɩ 'nyɩ 'ɔ cɩ 'tɩɩ 'nulɩɛ mino, sa 'Wugoa nɩkplaan ma 'nunu 'lɛ ɩla ‑zɔn na. 15‑Ma nclɔɔa ‑ɔ ‑ka 'lɛ 'Wugoa na, ɔ nu ‑tɛtɛa 'fɩan 'la ‑zɔn, ‑ma ɔmɔ, nclɔɔ ‑ylɛylɛ mino 'ta ɔla wɔlɩ 'la ‑zɔn 'nulɩɛ.
16Na, ncaasaa 'titi ‑ɔ ‑cia 'lɛ ‑Kwlenyɔa 'la wɔɔgugwie
ɩya ɔ 'kɔɔ 'lɛ dɩgalɩ ca bha? 'Bhlɩmɔɔn, ‑anyɩ,
Klisi 'la wɔɔgugwiea ‑a ‑ka 'lɛ.
Currently Selected:
1 Kolt 2: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.