Jobo 1
1
Satani u lika Jobo
1Ne ku na ni munna ya n'a bizwa Jobo, ya n'a yahile mwa naha ya Uzi. N'a lapela Mulimu, mi n'a sepahala ku yena. N'a li mutu yo munde, ya n'a tokomela ku sa eza sifi ni sifi se si maswe. 2N'a na ni bana ba bashimani ba supile ni ba basizana ba balalu. 3N'a luile lingu ze likiti ze supile, likamele ze likiti ze talu, likomu ze sikiti ni limbongolo za litole ze mianda i ketalizoho. Hape n'a na ni babeleki ba bañata, mi n'e li yena mufumi yo mutuna ya n'a fita ba bañwi kamukana kwa Upa.
4Bana ba hae ne ba yapananga kwa ku eza mukiti, ko ne ba tahanga ba bañwi kaufela, mi kamita ne ba memanga likaizeli za bona ba balalu ku t'o kopana ni bona. 5Mukiti o muñwi ni o muñwi ha u s'o felile, habusa Jobo n'a pakelanga ku y'o eza litabelo, ili ku kenisa bana ba hae. N'a ezanga cwalo kamita kakuli n'a hupula kuli mwendi yo muñwi wa bona u ezize sibi ka ku shwaula Mulimu a si ka lela ku eza cwalo.
6 #
Sim 6.2
Cwale lizazi la mangeloi h'a li fita, la ku iponahaza fapil'a Muñ'a Bupilo, Satani, ni yena n'a li mwahal'a bona. 7Muñ'a Bupilo a buza muliki yo, a li, “N'o ezañi?”
Satani a alaba, a li, “Ne ni nze ni ngunda kafa ni kafa, ni potoloha lifasi.”
8Muñ'a Bupilo a li, “Kana u boni mutang'a ka Jobo, nji? Ha ku na ya swana ni yena mwa lifasi kaufela kwa ku sepahala ni ku luka. Wa ni lapela, mi u tokomezi ku sa eza sifi ni sifi se si maswe.”
9 #
Sin 12.10
Satani a alaba, a li, “Kana Jobo n'a ka ku sebelezanga feela a sa fumani se siñwi, nji? 10U mu silelelize yena ni lubasi lwa hae ni z'a na ni zona kamukana. U fuyaula z'a eza kaufela, mi u mu file likomu ze ñata ze tala naha kamukana. 11Kono cwale lu hupule kuli n'o ka mu amuha lika kaufela z'a na ni zona, fohe n'o ka bona ha n'a ka ku shwaula u nz'o mu talimezi.”
12Muñ'a Bupilo cwale a li ku Satani, “Ku lukile. Z'a na ni zona kaufela li mwa maata a hao, kono yena u si ke wa mu holofaza.” Cwale Satani a funduka.
Jobo u sinyehelwa ki liluwo ni bana ba hae
13Zazi le liñwi bana ba Jobo ne ba li mwa mukiti mwa ndu ya muhulwan'a bona. 14Kiha numwana a taha a matela ku Jobo, a li, “Ne lu lima mwa masimu ka lipulu, mi limbongolo ne li fulela fakaufi. 15Honafo Masabea ba fita, ba lu lwanisa, mi ba li uzwa kaufel'a zona. Ba bulaile batanga ba hao kaufela haisi na ni nosi. Ki na ya bandukile, kiha ni til'o ku bulelela.”
16A si ka feza kale ku bulela, mutanga yo muñwi a kena, mi a t'o li, “Pula i lengile lingu ni balisana, mi ba shwile kamukana. Ku bandukile na feela ku t'o ku bulelela.”
17Ni yena yo a si ka feza kale ku bulela, yo muñwi hape mutanga a taha, mi a li, “Litopa ze talu za Makalade li lu lwanisize, mi ba ngile likamele za hao kaufela ni ku bulaya babeleki ba hao. Ku siyezi feela na. Ki na ya bandukile, mi ni til'o ku bulelela.”
18A si ka feza kale ku bulela, yo muñwi mubeleki a kena, mi a li, “Bana ba hao ne ba na ni mukiti mwa ndu ya mweli wa hao. 19Kwa taha liñungwa le li zwa mwa lihalaupa. La t'o wisa ndu, mi ba shwa kaufel'a bona. Ku bandukile na feela ni nosi ku t'o ku zwisa mitolo.”
20Cwale ka maswabi Jobo a yema, a pazula liapalo za hae. A beula toho ya hae, mi a ikwiseza fafasi ka pata. 21#Litu 40.1; 11.14 A li, “Ne ni pepilwe ni si na ni se sikana, mi ni ta shwa ni si na sika. Muñ'a Bupilo n'a ni file, mi hape u ni amuhile. Ku lumbekwe libizo la hae!”
22Zeo kaufela niha ne li ezahalile, Jobo h'a si ka eza sibi ka ku nyaza Mulimu.
Currently Selected:
Jobo 1: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.