Jobo 2
2
Satani u sa lika Jobo hape
1Lizazi le liñwi hape mangeloi a t'o iponahaza lwa bubeli fapil'a Muñ'a Bupilo, mi Satani ni yena n'a li mwahal'a bona. 2Muñ'a Bupilo a mu buza, a li, “N'o li kai?”
Satani a alaba, a li, “Ne ni nze ni ngunda-ngunda kafa ni kafa, ni potoloha lifasi.”
3Muñ'a Bupilo a buza, a li, “U boni mutang'a ka Jobo, naa? Ha ku na mutu mwa lifasi ya sepahala ni ku luka sina yena. Wa ni lapela, mi u tokomezi ku sa eza sifi ni sifi se si maswe. Wena u ni susuelize kuli ni ku lumelele ku y'o mu lwanisa ku si na libaka ni hanyinyani, kono nihakulicwalo Jobo u sa sepahala sina pili.”
4Satani a alaba, a li, “Mutu u kona ku fanisa z'a na ni zona kamukana kuli yena a pile. 5Kono cwale ha ne lu ka li a utwiswe butuku mwa mubili, u ta ku shwaula u nz'o mu talimezi.”
6Cwale Muñ'a Bupilo a li ku Satani, “Ku lukile. U mwa maata a hao, kono u si ke wa mu bulaya.”
7Cwale Satani a zwa fapil'a Muñ'a Bupilo, mi a y'o melisa litombo fa mubili wa Jobo kaufela. 8Jobo a y'o ina mwa katambi, mo ku sululelwa mulola, mi a nga liñetana la ku ñwaisa litombo za hae ka lona. 9Musal'a hae a li ku yena, “Ni nako ye u sa sepahala sina pili, nji ha ku cwalo? Kiñihe, ha u sa kuti Mulimu, mi u shwe?”
10Jobo a alaba, a li, “Wena wa yambutuka! Mulimu h'a lu fa sika se sinde lwa si amuhela. Cwale lu ta bilaezwa kiñi h'a lu fa manyando?” Mane ni mwa manyando ao kaufela Jobo h'a si ka bulela se si maswe ka libizo la Mulimu.
Ku taha balikani ba Jobo
11Balikani ba Jobo ba balalu n'e li bo Elifazi ya n'a zwa mwa munzi wa Temani, Bilidadi wa mwa Shuha, ni Zofari wa mwa naha ya Naama. Ha ba y'o utwa mw'a n'a nyandela Jobo, ba lela ku y'o mu lekula ni ku mu wisa pilu. 12Ha ne ba sa li kwahulenyana, ba bona Jobo, kono ha ba si ka mu ziba. Ha ba se ba mu zibile, ba kala ku lila ni ku bokolola, ba pazaula liapalo za bona ka maswabi, mi ba hasakela mubu mwahalimu ni kwa litoho za bona. 13Cwale ba ina hona fafasi foo ni yena mazazi a supile ni masihu a teñi ba sa buleli se siñwi, kakuli ne ba bona mw'a n'a nyandela.
Currently Selected:
Jobo 2: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.