Hagai 1
1
Batu ba susuezwa ku yaha Tempele sinca
1 #
Ezra 4.24—5.2; 6.14 Ka silimo sa bubeli Dariusi ha n'a li mulena yo muhulu wa Peresia, ka lizazi la pili la kweli ya busilela, Muñ'a Bupilo a bulela ka mupolofita Hagai, ku zibisa mubusisi wa naha ya Juda Zerubabele mwan'a Shealitiele, ni muprisita yo muhulu Joshua mwan'a Jozadaki.
2Muñ'a Bupilo ya Maata Kaufela a li ku Hagai, “Batu ba, ba li, ‘Ye ha si yona nako ya ku yaha Tempele sinca.’ ”
3Cwale Muñ'a Bupilo a bulelela batu litaba ze ka mupolofita Hagai, a li, 4“Batu ba ka, mu pilelañi mwa mandu a yahilwe hande, kono Tempele ya ka, yona, ki matota? 5Kana ha mu boni se si ezahala ku mina? 6Mu cezi lipeu ze ñata, kono kutulo i bile ye nyinyani. Mu na ni lico, kono ha li mi kulisi. Mu na ni waine ya ku nwa, kono ha i mi koli. Mu na ni liapalo kono ha mu futumalelwi. Ni mubeleki h'a koni ku fumana se si likana ku mu pilisa. 7Kana mwa ziba se si tahisize cwalo? 8Cwale mu ye mwa lilundu, mu y'o nga misumo ni mabala, mi mu yahe Tempele sinca. Fohe ni ka taba, mi ni ka lapelelwa mo ku ni swanela.
9“Ne mu sepile ku ba ni kutulo ye tuna, kono i fetuhile ye nyinyani. Mi ha mu tisize kutulo ye kwa hae, ni i fefuzi. Kikabakalañi ha ni ezize cwalo? Kakuli Tempele ya ka ki matota, kono yo muñwi ni yo muñwi wa mina u patehile ni ndu ya hae. 10Kikabakaleo lihalimu ha li si ka nelisa pula, ni lifasi ha li si ka melisa lipeu. 11Ni tisize linanga mwa naha, fa malundu, masimu a lico, a waine ni a likota za olive, fa simela sifi ni sifi se si mela mwa mubu, kwa batu ni lifolofolo, fa sika sifi ni sifi se mu ka lika ku cala.”
Batu ba mamela taelo ya Muñ'a Bupilo
12Cwale Zerubabele ni Joshua ni batu kaufela, ba ba ne ba kutile ku zwa kwa butanga mwa Babilona, ba eza s'a n'a ba bulelezi Muñ'a Bupilo ya Maata Kaufela, Mulimu wa bona. Ba kuteka Muñ'a Bupilo, mi ba utwa s'a n'a ba bulelezi mupolofita Hagai, yena mulumiwa wa Muñ'a Bupilo. 13Cwale Hagai, mulumiwa wa Muñ'a Bupilo, a bulelela batu manzwi a Muñ'a Bupilo, a li, “Sepiso ya ka kikuli ni ta ba ni mina.” 14Muñ'a Bupilo a susueza mañi ni mañi ku y'o yaha Tempele, ili Zerubabele mubusisi wa naha ya Juda, muprisita yo muhulu Joshua, ni batu kaufela ba ba ne ba kutile ku zwa kwa butanga. Ba kala ku yaha Tempele ya Muñ'a Bupilo ya Maata Kaufela, Mulimu wa bona. 15Ba kala ka lizazi la bumashumi a mabeli ka a mane la kweli ya busilela, mwa silimo sa bubeli sa puso ya Dariusi.
Currently Selected:
Hagai 1: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.